ប្រធានរដ្ឋសភាសហរដ្ឋអាមេរិកដ៏មានឥទ្ធិពល អ្នកស្រី Nancy Pelosi អាចនឹងត្រូវធ្វើដំណើរតាមជើងយន្តហោះរបស់កងទ័ពអាមេរិកទៅកាន់កោះតៃវ៉ាន់។ នេះបើតាមសេចក្ដីរាយការណ៍របស់ទីភ្នាក់ងារសារព័ត៌មាន AP ដែលបានចុះផ្សាយនៅថ្ងៃទី២៧ កក្កដា នេះ។
បើតាមប្រភពព័ត៌មានដដែលនេះ មន្ទីរប៉ុងតាហ្គូនកំពុងតែរៀបចំយន្តហោះចម្បាំងដើម្បីដឹកអ្នកស្រី Pelosi និងគណៈប្រតិភូសមាជិកសភា ប្រសិនបើអ្នកស្រី Pelosi សម្រេចទៅកាន់កោះតៃវ៉ាន់ ទោះបីមានការគំរាមកំហែងយ៉ាងខ្លាំងពីចិន ក៏ដោយនោះ។
មន្ត្រីអាមេរិកនិយាយថា អាមេរិកពុំមានការភ័យច្រើនទេចំពោះការគំរាមកំហែងរបស់ចិន ដែលថានឹងចាត់វិធានការដោយកម្លាំង និងដោយបង្ខំទៅលើយន្តហោះដែលដឹកអ្នកស្រី Pelosi ទៅកោះតៃវ៉ាន់ នៅខែសីហា ខែក្រោយនេះ។
មន្ត្រីអាមេរិកឱ្យដឹងទៀតថា បើអ្នកស្រី Pelosi សម្រេចជ្រើសរើសយកការប្រឈមនឹងការគំរាមកំហែងពីសំណាក់ប្រទេសចិន ដោយសម្រេចទៅកាន់កោះតៃវ៉ាន់មែននោះ គឺកងទ័ពអាមេរិកនឹងធ្វើសកម្មភាពដើម្បីតាមឃ្លាំមើល និងជួយការពារសុវត្ថិភាពយន្តហោះដឹកអ្នកស្រី និងគណៈប្រតិភូរបស់អ្នកស្រី។
សហរដ្ឋអាមេរិកបានដាក់ពង្រាយរួចហើយនូវនាវាផ្ទុកយន្តហោះ USS Ronald Regan ដែលអមដោយនាវាចម្បាំងចំនួន ៦គ្រឿងនៅសមុទ្រចិនខាងត្បូង។ ក្រុមសន្តិសុខអាមេរិកថា អ្នកស្រី Nancy Pelosi គឺជាថ្នាក់ដឹកនាំរបស់សហរដ្ឋអាមេរិកលំដាប់ទី២ ដែលចាំបាច់ត្រូវការសន្តិសុខរឹងមាំក្នុងការជួយការពារសុវត្ថិភាពសម្រាប់អ្នកស្រី។
ការពិត អ្នកស្រី Pelosi ធ្លាប់ទៅទស្សនកិច្ចនៅតៃវ៉ាន់ម្ដងហើយកាលពីឆ្នាំ១៩៩៧។ អ្នកស្រីក៏ធ្លាប់ទៅគោរពវិញ្ញាណក្ខន្ឋផ្ទាល់នៅទីលាន ទៀនអាមីន ក្នុងក្រុងប៉េកាំង ជាទីដែលកងទ័ពបក្សកុម្មុយនីស្តចិន បើករថក្រោះកិន និងបាញ់សម្លាប់បាតុកររាប់ពាន់នាក់នៅឆ្នាំ១៩៨៩។ បាតុករពេលនោះសុទ្ធតែជានិស្សិត។ ពួកគេធ្វើបាតុកម្មដើម្បីឱ្យមានការកែទម្រង់ការដឹកនាំទៅរកប្រព័ន្ធទីផ្សារសេរី តែបក្សកុម្មុយនីស្តចាត់ទុកជាក្រុមបដិវត្តន៍ប្រឆាំងរដ្ឋាភិបាល។
សម្រាប់ Pelosi ទំនងសម្រេចជ្រើសរើសយកការប្រឈមជាមួយនឹងការគំរាមកំហែងរបស់ចិន ជាជាងបោះបង់គម្រោងទស្សនកិច្ចទៅតៃវ៉ាន់។
ផែនការទស្សនកិច្ចរបស់ប្រធានរដ្ឋសភាអាមេរិកទៅតៃវ៉ាន់ បានជំរុញឱ្យមានការបង្កសង្គ្រាមវោហារសាស្ត្រពីប្រទេសចិន។ អ្នកនាំពាក្យក្រសួងការបរទេសចិន បានព្រមានថា រដ្ឋាភិបាលទីក្រុងប៉េកាំង នឹងចាត់វិធានការឆ្លើយតបយ៉ាងម៉ឺងម៉ាត់ ប្រសិនបើអ្នកស្រី Pelosi ធ្វើដំណើរទៅកាន់ដែនកោះមួយនេះ។
ក្នុងសន្និសីទសារព័ត៌មានកាលពីថ្ងៃចន្ទ ទី២៥ កក្កដា អ្នកនាំពាក្យក្រសួងការបរទេសចិន លោក Zhao Lijian បាននិយាយថា ការព្រមានរបស់ចិន គឺខ្លាំង និងធ្ងន់ធ្ងរ។ លោកបន្តថា ប្រទេសចិនមិនសប្បាយចិត្តនឹងគោលនយោបាយរបស់សហរដ្ឋអាមេរិកចំពោះតៃវ៉ាន់។ លោក Zhao Lijian បាននិយាយថា៖ «ភាគីចិនបានបញ្ជាក់ម្តងហើយម្តងទៀតប្រាប់ទៅភាគីសហរដ្ឋអាមេរិក អំពីការប្រឆាំងរបស់ចិនចំពោះដំណើរទស្សនកិច្ចរបស់ប្រធានរដ្ឋសភា គឺអ្នកស្រី Pelosi ទៅកាន់តៃវ៉ាន់»។
អ្នកនាំពាក្យរូបនេះថា ប្រសិនបើភាគីអាមេរិកនៅតែទទូចធ្វើទស្សនកិច្ចនេះ ភាគីចិននឹងចាត់វិធានការយ៉ាងម៉ឺងម៉ាត់ និងរឹងមាំដើម្បីការពារអធិបតេយ្យភាព និងបូរណភាពទឹកដីរបស់ចិន ហើយសហរដ្ឋអាមេរិកត្រូវតែទទួលខុសត្រូវទាំងស្រុងចំពោះផលវិបាកធ្ងន់ធ្ងរណាមួយដែលកើតឡើង។
តៃវ៉ាន់ជាប្រធានបទនៃភាពតានតឹងក្នុងទំនាក់ទំនងអាមេរិក និងចិនជាយូរមកហើយ។ ចិនចាត់ទុកដែនកោះមួយនេះជាផ្នែកមួយនៃទឹកដីរបស់ចិន។ សម្រាប់សហរដ្ឋអាមេរិក ទោះជាមានគោលនយោបាយចិនតែមួយពិតមែន តែក្រុងវ៉ាស៊ីនតោន នៅតែទទួលស្គាល់តៃវ៉ាន់ជាផ្នែកមួយនៃពិភពលោក និងជារដ្ឋអធិបតេយ្យ និងប្រជាធិបតេយ្យនៅអាស៊ី។
សហរដ្ឋអាមេរិកមានទំនាក់ទំនងការទូតជាផ្លូវការជាមួយក្រុងប៉េកាំង តែសហរដ្ឋអាមេរិកក៏បន្តរក្សាទំនាក់ទំនងជាមួយតៃវ៉ាន់ដែរ តែក្នុងកម្រិតក្រៅផ្លូវការ ដោយការពង្រឹងវិស័យពាណិជ្ជកម្ម ការផ្គត់ផ្គង់ជំនួយយោធា និងសព្វាវុធទៅឱ្យដែនកោះនេះ។
ចំពោះបញ្ហាកោះតៃវ៉ាន់នេះ លោកប្រធានាធិបតី Joe Biden បានលើកឡើងជាច្រើនដងហើយថា អាមេរិកនឹងការពារតៃវ៉ាន់ដោយកម្លាំងយោធា ប្រសិនបើចិន ព្យាយាមដណ្តើមយកកោះនេះដោយប្រើកម្លាំង។
នៅក្នុងអំឡុងប៉ុន្មានឆ្នាំចុងក្រោយនេះ ចិនបានបញ្ចេញយន្តហោះចម្បាំងលុកលុយចូលដែនអាកាស និងនាវាចម្បាំងចូលដែនទឹករបស់តៃវ៉ាន់កាន់តែធ្ងន់ឡើងៗ ដែលជាការបង្កើនការព្រួយបារម្ភថា ចិនអាចនឹងលើកទ័ពវាយកាន់កាប់ដែនកោះមួយក្នុងកាលៈទេសៈណាមួយដែលក្រុងប៉េកាំងអស់ភាពអត់ធ្មត់នឹងការទុកឲ្យតៃវ៉ាន់បន្តមានសេរីភាព ជាមួយនឹងដែនដីនៅក្រៅគោលនយោបាយប្រទេសមួយប្រព័ន្ធពីរ។ តែសម្រាប់តៃវ៉ាន់ ក៏ដឹងថាគ្រប់ទស្សនកិច្ចរបស់ក្រុមមេដឹកនាំប្រទេសគាំទ្រតៃវ៉ាន់ គឺពិតណាស់នឹងរងប្រតិកម្មយ៉ាងខ្លាំងពីចិន។
នៅក្នុងសេចក្តីថ្លែងការណ៍ទៅកាន់សារព័ត៌មាន អ្នកស្រី Joanne Ou អ្នកនាំពាក្យក្រសួងការបរទេសតៃវ៉ាន់ បាននិយាយថា តៃវ៉ាន់តែងតែទទួលស្វាគមន៍ដំណើរទស្សនកិច្ចរបស់សមាជិកសភាអាមេរិក។ តែអ្នកស្រីថា រដ្ឋាភិបាលតៃវ៉ាន់ មិនទាន់ទទួលបានព័ត៌មានច្បាស់ការណ៍ណាមួយអំពីដំណើរទស្សនកិច្ចរបស់អ្នកស្រី Pelosi ថានឹងមកកាន់តៃវ៉ាន់នៅថ្ងៃណាជាក់លាក់ដែរ គឺគ្រាន់តែដឹងថា នៅក្នុងខែសីហា ខែក្រោយនេះ។
តាមការចុះផ្សាយរបស់សារព័ត៌មាន AP អ្នកស្រី Pelosi និងគណៈប្រតិភូនៃសមាជិកសភាអាមេរិក នឹងធ្វើទស្សនកិច្ចនៅប្រទេសចំនួន៥ នៅអាស៊ី គឺប្រទេសជប៉ុន សិង្ហបុរី ម៉ាឡេស៊ី ឥណ្ឌូនេស៊ី និងកោះតៃវ៉ាន់៕