ការចងសម្ពន្ធភាពរបស់គណបក្សក្រៅរដ្ឋាភិបាល កំពុងជួបបញ្ហាចម្រូងចម្រាសដោយសារសកម្មជនរបស់គណបក្សភ្លើងទៀន នៅមិនទាន់ទុកចិត្តគណបក្សផ្សេងៗទៀត បើទោះជាមានការអំពាវនាវឲ្យអ្នកប្រជាធិបតេយ្យចាំបាច់ត្រូវសហការគ្នាដើម្បីឱ្យគណបក្សដែលទទួលបានអាសនៈច្រើន និងអាសនៈតិចក្លាយទៅជាកម្លាំងមួយប្រមូលផ្ដុំគ្នានៅក្នុងរដ្ឋសភាក៏ដោយ។
សកម្មជនសកម្មៗរបស់គណបក្សភ្លើងទៀន បេក្ខជនចៅសង្កាត់អូរចារ អ្នកនាង ស៊ិន ចាន់ពៅរ៉ូហ្ស៊េត បានអះអាងកាលពីថ្ងៃទី២៧ កក្កដា ថា ក្នុងកាលៈទេសៈនេះគ្មានភាពចាំបាច់ណាមួយដែលគណបក្សភ្លើងទៀន ត្រូវទៅរួបរួមជាមួយបក្សផ្សេងឡើយ ព្រោះថាគណបក្សភ្លើងទៀនមិនឆោតល្ងង់ទៅចងសម្ពន្ធភាពជាមួយគណបក្សដែលគ្មានភាពស្មោះត្រង់នោះទេ។
ចំណែកអ្នកស្រាវជ្រាវការអភិវឌ្ឍសង្គម បណ្ឌិត សេង សារី ដែលនៅពេលនេះត្រូវគេដឹងថាជាអ្នកគាំទ្រគណបក្សភ្លើងទៀន បានសរសេរលើគណនីហ្វេសប៊ុករបស់ខ្លួនដោយភ្ជាប់ជាមួយឡូហ្គូគណបក្សមួយចំនួនក្នុងខ្លឹមសារឌឺដងផ្លែផ្កា កាលពីថ្ងៃទី២៧ កក្កដា ថា គណបក្សខ្លះរកផ្លូវមិនទាន់ឃើញ មិនយូរទេពួកគេនឹងហត់ អស់កម្លាំង ច្បាស់ជានឹងចូលមកលេងក្នុងផ្ទះ គឺគណបក្សភ្លើងទៀនជាមិនខាន ប៉ុន្តែម្ចាស់ផ្ទះភ្លើងទៀនធ្វើយ៉ាងណាកុំដេញកូនខ្លួនឯងឱ្យដេកក្រោមផ្ទះ ហើយឱ្យកូនគេដេកលើផ្ទះឱ្យសោះ។
ទាក់ទិននឹងបញ្ហានេះ គណបក្សខ្មែរស្រឡាញ់ជាតិ បានសរសេរលើទំព័រហ្វេសប៊ុករបស់ខ្លួននៅថ្ងៃទី២៨ កក្កដា ដោយស្នើឲ្យបណ្ឌិត សេង សារី លុបរូបឡូហ្គូគណបក្សរបស់ខ្លួនជាបន្ទាន់ ដែលលោកបានបង្ហោះភ្ជាប់ខ្លឹមសារខាងលើនេះ ក្រោមហេតុផលថា គណបក្សខ្មែរស្រឡាញ់ជាតិពុំទាន់បានជជែកក្នុងការរួបរួមជាមួយគណបក្សនយោបាយណាមួយនៅឡើយទេ។
ប្រភពដដែលបញ្ជាក់ថា គណបក្សខ្លួនមានគោលជំហរនយោបាយបង្រួបបង្រួមអ្នកស្នេហាជាតិ អ្នកប្រជាធិបតេយ្យ ដើម្បីផ្លាស់ប្ដូរការដឹកនាំប្រទេសតាមរយៈការបោះឆ្នោតសេរី ត្រឹមត្រូវ យុត្តិធម៌ និងដើម្បីផលប្រយោជន៍ជាតិ មិនមែនរួបរួមឲ្យតែឃើញរូបភាពនយោបាយនោះឡើយ។
កាលពីថ្ងៃទី១១ ខែកក្កដា ឆ្នាំ២០២២ គណបក្សចំនួនបួន រួមមានគណបក្សភ្លើងទៀន គណបក្សឆន្ទៈខ្មែរ គណបក្សកែទម្រង់កម្ពុជា និងគណបក្សប្រជាធិបតេយ្យមូលដ្ឋាន បានធ្វើសន្និសីទសារព័ត៌មានរួមគ្នាក្នុងការស្វែងរកការចងសម្ពន្ធភាពប្រជែងជាមួយគណបក្សកាន់អំណាចក្នុងការបោះឆ្នោតជាតិឆ្នាំ២០២៣ ខាងមុខនេះ។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់ The Cambodia Daily នៅថ្ងៃទី២៨ កក្កដា នេះថា បើគណបក្សក្រៅរដ្ឋាភិបាលមិនសហការគ្នាទេ គណបក្សខ្លះអាចមិនបានអាសនៈ ហើយគណបក្សដែលបានអាសនៈក៏មិនបានច្រើនដែរ ដែលនេះគឺជាគុណវិបត្តិមួយសម្រាប់គណបក្សក្រៅរដ្ឋាភិបាលដែលកំពុងប្រកួតប្រជែងជាមួយបក្សកាន់អំណាច ដើម្បីសិទ្ធិ និងសេរីភាពសម្រាប់ប្រជាពលរដ្ឋខ្មែរសព្វថ្ងៃនេះ។
បណ្ឌិត យ៉ង សាំងកុមារ លើកឡើងថា មានជម្រើសពីរសម្រាប់គណបក្សក្រៅរដ្ឋាភិបាលក្នុងពេលបច្ចុប្បន្ននេះ គឺ៖
- ទី១ ត្រូវសហការគ្នាដើម្បីឱ្យគណបក្សដែលទទួលបានអាសនៈច្រើន និងអាសនៈតិច ក្លាយទៅជាកម្លាំងមួយប្រមូលផ្ដុំគ្នានៅក្នុងរដ្ឋសភា។
- ទី២ គណបក្សទាំងអស់នៅតែបន្តដឹកនាំសកម្មភាពនយោបាយរៀងៗខ្លួនដដែលដោយមិនសហការគ្នានោះទេ ប៉ុន្តែលទ្ធផលគណបក្សក្រៅរដ្ឋាភិបាលទាំងនោះ គឺនៅតែចាញ់គណបក្សកាន់អំណាចដដែល។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់ The Cambodia Daily នៅថ្ងៃទី២៨ កក្កដា នេះដែរថា ការរួបរួមរវាងបក្សនយោបាយក្រៅរដ្ឋាភិបាលទាំងនោះ គឺមិនមានឥទ្ធិពលក្នុងការជួយស្ដារលទ្ធិប្រជាធិបតេយ្យពីការបំផ្លាញដោយគណបក្សកាន់អំណាចនោះឡើយ ព្រោះថាទាំងបក្សកាន់អំណាច និងបក្សក្រៅរដ្ឋាភិបាលទាំងនោះ កំពុងទន្ទេញពាក្យថា កម្ពុជាកំពុងធ្វើដំណើរតាមគន្លងប្រជាធិបតេយ្យដូចៗគ្នា ស្របពេលដែលគេមើលឃើញថា ប្រជាធិបតេយ្យនៅកម្ពុជាកំពុងរងនូវការបំផ្លាញ និងការជាន់ឈ្លីយ៉ាងធ្ងន់ធ្ងរទៅហើយនោះ។
លោក ហ៊ុន កុសល អះអាងថា បក្សភ្លើងទៀនជាគណបក្សនយោបាយមួយដែលកំពុងនាំឆន្ទៈរួបរួមរបស់ប្រជាពលរដ្ឋដើរថយក្រោយយ៉ាងឆ្ងាយពីប្រជាធិបតេយ្យ តាមរយៈនៃបំបែកខ្លួន បំបែកសំឡេងចេញពីស្មារតីរួបរួមរបស់ស្មារតីសង្គ្រោះជាតិ ដែលជាឆន្ទៈពិតរបស់ប្រជាពលរដ្ឋខ្មែរដែលចង់បានការផ្លាស់ប្ដូរពិតប្រាកដនៅកម្ពុជា។
សកម្មជនបក្សប្រឆាំងរូបនេះបញ្ជាក់ថា គណបក្សភ្លើងទៀននៅពេលនេះ កំពុងធ្វើជាវាំងននខ្មៅដ៏ធំមួយ ដើម្បីជួយបិទបាំងទង្វើអាក្រក់របស់បក្សកាន់អំណាចដែលជាដើមហេតុនៃការរំលាយគណបក្សសង្គ្រោះជាតិ និងសម្លាប់ប្រជាធិបតេយ្យនៅកម្ពុជាយ៉ាងធំធេង ជាពិសេសការរំលោភទៅលើកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ ដែលជាកិច្ចព្រមព្រៀងអន្តរជាតិក្នុងការធានានូវលទ្ធិប្រជាធិបតេយ្យនៅកម្ពុជារហូតមក៕