នៅខណៈនេះ ទិដ្ឋាការសុំស្នាក់នៅរបស់លោក Gotabaya Rajapaksa អតីតប្រធានាធិបតីស្រីលង្កា ដែលរត់ភៀសខ្លួនទៅប្រទេសសិង្ហបុរី នឹងអស់សុពលភាពត្រឹមថ្ងៃទី១១ សីហា តែអតីតមេដឹកនាំស្រីលង្កា ម្នាក់នេះ ត្រូវតែត្រឡប់មកប្រទេសស្រីលង្កា វិញតាមដីកាកោះរបស់តុលាការកំពូលដែលបានបង្គាប់ឱ្យលោក Gotabaya ចូលខ្លួននៅថ្ងៃទី១ សីហា ដើម្បីបំភ្លឺក្នុងសំណុំរឿងដែលបក្សនយោបាយប្រឆាំងបានប្ដឹងបុរសនេះ និងរដ្ឋាភិបាលរបស់លោកពីបទបង្កឱ្យសេដ្ឋកិច្ចស្រីលង្កា ក្រឡាប់ និងករណីការគ្រប់គ្រងបំណុលបរទេស។
សារព័ត៌មាន The Straits Times បានចុះផ្សាយថា ក្រុមមេធាវីរបស់លោក Gotabaya បានបញ្ជូនលិខិតទៅតុលាការដោយស្នើសុំលើកពេលការចូលបំភ្លឺរបស់កូនក្ដី ដោយអះអាងថា កូនក្ដីរបស់ខ្លួននឹងរៀបចំខ្លួនមិនទាន់នោះទេ។
តាមដីការបស់តុលាការ បណ្ដឹងដែលនាំឱ្យមានការចេញដីកាកោះហៅលោក Gotabaya ចូលខ្លួន គឺតាមបណ្ដឹងពីស្ថាប័នតម្លាភាពអន្តរជាតិ ស្រីលង្កា និងក្រុមអ្នកនយោបាយ ៣រូបមកពីបក្សប្រឆាំង ដែលបានប្ដឹងបុរសនេះពីបទខ្វះការទទួលខុសត្រូវចំពោះមុខប្រទេសធ្លាក់ក្នុងវិបត្តិសេដ្ឋកិច្ចដ៏ធ្ងន់ធ្ងរ និងបណ្ដឹងមួយករណីទៀត គឺតម្លាភាពនៃការគ្រប់គ្រងបំណុលបរទេស។
តាមប្រភពព័ត៌មានដដែលនេះ តុលាការកំពូលបានចេញដីកាកាលពីថ្ងៃទី២៧ កក្កដា គឺនៅពេលដែលលោក Gotabaya កំពុងស្ថិតនៅប្រទេសសិង្ហបុរី ជាមួយប្រពន្ធ កូន និងអង្គរក្ស ២នាក់។ ដីកានេះធ្វើឡើងបន្ទាប់ពីមានការចុះផ្សាយថា លោក Gotabaya កំពុងរងការសម្របសម្រួលវិលចូលប្រទេសស្រីលង្កា វិញឆាប់ៗនេះ។
ក្រុមមេធាវីរបស់លោក Gotabaya និយាយថា បើតាមនីតិវិធីច្បាប់ លោក Gotabaya អាចស្នើឱ្យមេធាវីចូលខ្លួនតំណាងចុងចោទតាមការយល់ព្រមពីតុលាការ។ ការពិត លោក Gotabaya ដែលរត់ភៀសខ្លួននេះ គឺដើម្បីស្វែងរកសិទ្ធិជ្រកកោននៅក្រៅប្រទេស។ តែប្រទេសសិង្ហបុរី មិនបានផ្ដល់សិទ្ធិឱ្យអតីតមេដឹកនាំស្រីលង្ការូបនេះទេ។
បើតាមដំណឹង លោក Gotabaya កំពុងស្វែងរកប្រទេសជាច្រើនទៀតនៅមជ្ឈិមបូព៌ា ដើម្បីសុំសិទ្ធិជ្រកកោន តែពុំឃើញប្រទេសណាមួយបើកផ្លូវឱ្យបុរសនេះនៅឡើយនោះទេ។ តែយ៉ាងណា លោករដ្ឋមន្ត្រីក្រសួងព័ត៌មាន Bandula Gunawardana បានឱ្យអ្នកសារព័ត៌មានដឹងថា លោក Gotabaya ចង់វិលចូលប្រទេសវិញ ជាជាងរស់នៅក្រៅប្រទេស។
ប្រទេសស្រីលង្កា ធ្លាក់ក្នុងបំណុលបរទេសគរដូចភ្នំ។ ប្រទេសដែលមានប្រជាជនជិត ២២លាននាក់នេះជាប់បំណុលបរទេសដល់ទៅ ៥១ពាន់លានដុល្លារ ហើយក្នុងនោះជាប់បំណុលប្រទេសចិន ដល់ ៣៥ពាន់លានដុល្លារ។ ម្ចាស់ដែលជំពាក់បំណុលរើខ្លួនពុំរួចនេះ គឺគ្រួសាររបស់ត្រកូល Rajapaksa ព្រោះត្រកូលមួយនេះបានដឹកនាំប្រទេសអាស៊ីខាងត្បូងជិត ២០ឆ្នាំ។ ការដឹកនាំប្រទេស គឺវិលទៅវិលមករវាងបង និងប្អូននៃត្រកូល Rajapaksa។ បងប្រុស Mahinda កាន់អំណាចយ៉ាងណែនក្នុងដៃជាប្រធានាធិបតីបានដប់ឆ្នាំ ហើយលោក Gotabaya បានឡើងកាន់តំណែងរដ្ឋមន្ត្រីក្រសួងការពារជាតិ តាមការចាត់តាំងពីបងប្រុស គឺលោក Mahinda។
នៅឆ្នាំ២០១៩ លោក Gotabaya បានឡើងកាន់តំណែងប្រធានាធិបតីចេញពីការបោះឆ្នោតបាននាំឱ្យបងប្រុស គឺលោក Mahinda ក្លាយជានាយករដ្ឋមន្ត្រី និងប្អូនប្រុសម្នាក់ទៀតកាន់តំណែងរដ្ឋមន្ត្រីហិរញ្ញវត្ថុ។ ក្នុងរជ្ជកាលរបស់ Rajapaksa ជិត ២០ឆ្នាំ គឺប្រទេសចិន បានទម្លាក់ប្រាក់កម្ចីរាប់ពាន់លានដុល្លាររហូតធ្វើឱ្យក្រុមប្រឆាំងបារម្ភអំពីតម្លាភាពនៃការគ្រប់គ្រងប្រាក់បំណុល ព្រោះសំណង់ហេដ្ឋារចនាសម្ព័ន្ធមួយចំនួនត្រូវចិនរឹបអូស ដូចជាកំពង់ផែ Hambantota បានធ្លាក់នៅក្រោមចិនកាន់កាប់ប្រាក់ចំណូលក្នុងកិច្ចសន្យាជួល ៩៩ឆ្នាំ។ សំណង់កំពង់ផែសមុទ្រនេះ លោក Mahinda បានខ្ចីពីចិន នូវសាច់ប្រាក់ ១២០០លានដុល្លារ ដោយរដ្ឋាភិបាលថ្មីនៃប្រធានាធិបតី Maithripala Yapa Sirisena បានរកឃើញបាត់ប្រាក់បំណុលនៃសំណង់កំពង់ផែនេះដល់ទៅ ៣០០លានដុល្លារ។
នេះជាករណីពុករលួយដ៏ធំមួយនៅក្នុងរដ្ឋាភិបាលលោក Mahinda ដែលពេលនោះលោក Gotabaya កាន់តំណែងរដ្ឋមន្ត្រីក្រសួងការពារជាតិ។ ករណីនេះ បាននាំឱ្យបក្សប្រឆាំងសម្រេចប្ដឹងទៅតុលាការកំពូលរបស់ប្រទេសនេះ ដោយស្នើឱ្យពិនិត្យ និងសើរើទ្រព្យសម្បតិ្តរបស់គ្រួសារ Rajapaksa និងក្រុមបក្សពួករបស់លោក Gotabaya ហើយស្នើឱ្យសម្រេចសេចក្ដីនូវការបើកជំនុំជម្រះក្ដីករណីកិបកេងទ្រព្យសម្បតិ្តរបស់ជាតិ។ ទាំងលោក Mahinda និងប្អូនប្រុស គឺលោក Gotabaya សុទ្ធតែត្រូវបានបាតុករដេញទម្លាក់ពីអំណាច។ បាតុករព្រមានឱ្យតុលាការចាប់ខ្លួនបុរសបងប្អូន ២រូបនេះមកជំនុំជម្រះក្ដី។ តែលោក Mahinda ដែលបានលាលែងពីតំណែងកាលពីថ្ងៃទី៩ ឧសភា នៅតែពុំដឹងថាលោក និងគ្រួសាររបស់លោកនៅទីណាពិតប្រាកដនោះទេ ខណៈដំណឹងជាច្រើនថា លោក Mahinda និងគ្រួសារបានរត់ទៅលាក់ខ្លួនក្នុងបន្ទាយកងទ័ព។
គ្រួសារ Rajapaksa ដើមឡើយត្រូវបានប្រជាជនស្រីលង្កា ហៅថាជាវីរជននៃសង្គ្រាម ព្រោះគ្រួសារនេះធ្វើឱ្យសង្គ្រាមស៊ីវិលជិត ៣០ឆ្នាំបានបិទបញ្ចប់នៅឆ្នាំ២០០៩ គឺពេលនោះ លោក Mahinda ជាប្រធានាធិបតី ហើយប្អូនប្រុស គឺលោក Gotabaya ជាមេទ័ពដ៏កំពូលនៃប្រទេសនេះ។ តែសម្រាប់លោក Gotabaya ក៏ប្រឈមមុខនឹងការចោទមួយទៀត គឺករណីឧក្រិដ្ឋកម្មសង្គ្រាមទៅលើជាតិសាសន៍ដើមភាគតិចខ្លាតាមីល កាលពីក្នុងសង្គ្រាមស៊ីវិល។
បច្ចុប្បន្ននេះ ប្រធានាធិបតី គឺ Ranil Wickremesinghe ជាអ្នកដឹកនាំប្រទេសសម្រាប់អន្តរកាល។ លោកជាអ្នកនយោបាយមកពីបក្សប្រឆាំងផងដែរ តែមាននិន្នាការកណ្ដាល គឺមានន័យថាជាអ្នកនយោបាយដើរផ្លូវកណ្ដាល៕