យ៉ាងតិចណាស់មន្ត្រីជាន់ខ្ពស់សហរដ្ឋអាមេរិក ៣រូបដែលមានឥទ្ធិពល បានចែកគ្នាទៅធ្វើទស្សនកិច្ចនៅតំបន់អាស៊ីប៉ាស៊ីហ្វិក សំដៅពង្រឹងអំណាច និងឥទ្ធិពលសហរដ្ឋអាមេរិកនៅក្នុងតំបន់នេះ។
ការមកដល់ប្រទេសមួយនៃអាស៊ីប៉ាស៊ីហ្វិកមុនគេ គឺអ្នកស្រីប្រធានរដ្ឋសភាសហរដ្ឋអាមេរិក ដែលជាអ្នកនយោបាយលំដាប់ទី២ នៃប្រទេសមហាអំណាចមួយនេះ។ តាមដំណឹងពីប្រទេសសិង្ហបុរី ប្រធានរដ្ឋសភា អ្នកស្រី Nancy Pelosi បានទៅដល់ដែនដីនៃអាស៊ីមួយនេះហើយ។ ដំណើរទស្សនកិច្ចរបស់អ្នកស្រី Pelosi ក៏មានសមាជិកសភាជាន់ខ្ពស់ប្រាំមួយរូបមកជាមួយដែរ។
នៅប្រទេសសិង្ហបុរី អ្នកស្រី ប៉េឡូស៊ី បានជួបសន្ទនាភ្លាមជាមួយអ្នកស្រីប្រធានាធិបតី ហាលីម៉ាស់ យ៉ាខូប (Halimah Yacob) និងលោកនាយករដ្ឋមន្ត្រី លី សៀនឡុង នៅថ្ងៃទី១ ខែសីហា នេះ នៅវិមានប្រធានាធិបតី និងទីស្ដីការនាយករដ្ឋមន្ត្រី។
មេដឹកនាំនៃប្រទេសទាំងពីរបានសន្យាបន្តពង្រឹងកិច្ចសហប្រតិបត្តិការគ្រប់ជ្រុងជ្រោយ ដោយសំដៅធ្វើឱ្យរឹងមាំនូវស្ថិរភាព សន្តិភាព និងប្រជាធិបតេយ្យនៅក្នុងតំបន់។ តាមសេចក្ដីថ្លែងការណ៍របស់ក្រសួងការបរទេសសិង្ហបុរី ឲ្យដឹងថា លោក សៀនឡុង បានស្វាគមន៍ និងសាទរក្រុមគណៈប្រតិភូសភាសហរដ្ឋអាមេរិកដឹកនាំដោយអ្នកស្រី ប៉េឡូស៊ី។
លោក លី បានហៅការប្ដេជ្ញាចិត្តរបស់អាមេរិកក្នុងការជួយធ្វើឱ្យមានភាពរឹងមាំនៃកម្លាំងសេដ្ឋកិច្ច និងស្ថិរភាពក្នុងតំបន់ គឺសច្ចភាពមិនអាចខ្វះបានឡើយ។ ក្រៅពីនេះ ភាគីទាំងពីរបានជជែកគ្នាស៊ីជម្រៅអំពីកិច្ចសន្យាទាំងឡាយរបស់ក្រុងវ៉ាស៊ីនតោន ក្នុងក្របខ័ណ្ឌសេដ្ឋកិច្ចឥណ្ឌូ-ប៉ាស៊ីហ្វិក។ ក្រៅពីនេះទៀត ភាគីទាំងពីរបានពិភាក្សាស៊ីជម្រៅអំពីសង្គ្រាមរុស្ស៊ីឈ្លានពានអ៊ុយក្រែន។
ក្រោយពីបិទបញ្ចប់នៃដំណើរទស្សនកិច្ចនៅសិង្ហបុរី អ្នកស្រីប្រធានរដ្ឋសភាអាមេរិកដ៏មានឥទ្ធិពលរូបនេះ នឹងចេញដំណើរទៅប្រទេសម៉ាឡេស៊ី ប្រទេសកូរ៉េខាងត្បូង និងប្រទេសជប៉ុន។ តែសម្រាប់កោះតៃវ៉ាន់ ដែលស្ថិតក្នុងភាពចម្រូងចម្រាសយ៉ាងខ្លាំង គេពុំដឹងថា អ្នកស្រី ប៉េឡូស៊ី នឹងត្រូវទៅធ្វើទស្សនកិច្ច ឬយ៉ាងណានោះទេ ដែលគម្រោងការនេះបានកំពុងធ្វើឱ្យប្រទេសចិន ផ្ទុះប្រតិកម្មខ្លាំងណាស់រហូតគំរាមធ្វើឱ្យគ្រោះថ្នាក់នៃដំណើរទស្សនកិច្ចរបស់អ្នកស្រីទៀតផង ប្រសិនបើអ្នកស្រីសម្រេចមកជាន់កោះតៃវ៉ាន់មែននោះ។
ប្រភពមួយចំនួនឲ្យដឹងថា អ្នកស្រីអាចធ្វើដំណើរទៅកាន់ដែនកោះតៃវ៉ាន់ តែប្រភពខ្លះថា អ្នកស្រីទំនងនឹងមិនទៅកាន់ដែនកោះនេះទេ។
អ្នកសារព័ត៌មាន និងអ្នកសង្កេតការណ៍ រួមទាំងមេដឹកនាំធំៗនៃពិភពលោក កំពុងតាមដានដំណើរទស្សនកិច្ចរបស់អ្នកស្រីយ៉ាងខ្លាំង ថាតើអ្នកស្រីនឹងហ៊ានធ្វើដំណើរទៅកាន់កោះតៃវ៉ាន់ ឬត្រូវបិទបញ្ចប់ត្រឹមទស្សនកិច្ចនៅត្រឹមប្រទេសជប៉ុន។
ប៉ុន្តែនាយករដ្ឋមន្ត្រីកោះតៃវ៉ាន់ Su Tseng-chang បាននិយាយថា បើទោះជាដំណឹងថាអ្នកស្រី ប៉េឡូស៊ី ពិតជាមកកាន់កោះតៃវ៉ាន់ ឬយ៉ាងណា គឺសម្រាប់រដ្ឋាភិបាលតៃវ៉ាន់ សូមស្វាគមន៍ជានិច្ចនូវគ្រប់ទស្សនកិច្ចទាំងអស់នៃមិត្តជិត ឬឆ្ងាយ ឲ្យតែមកកាន់ដែនកោះមួយនេះ។
ដំណើរទស្សនកិច្ចរបស់អ្នកស្រី ប៉េឡូស៊ី ប្រធានរដ្ឋសភាអាមេរិក ត្រូវបានកត់ត្រាថាជាផ្នែកមួយដែលសហរដ្ឋអាមេរិកខិតខំពង្រឹងឥទ្ធិពល និងអនុភាពរបស់ខ្លួនយ៉ាងខ្លាំងនៅក្នុងតំបន់អាស៊ី។ ជាមួយគ្នានេះ ប្រមុខការទូតអាមេរិក លោក Antony Blinken នឹងធ្វើដំណើរទៅកាន់ប្រទេសនៅអាស៊ីដោយចាប់ផ្តើមពីកម្ពុជា។
នៅកម្ពុជា លោក Blinken ត្រូវចូលរួមក្នុងកិច្ចប្រជុំមួយចំនួនក្នុងក្របខ័ណ្ឌអាស៊ាន ដែលកម្ពុជាធ្វើជាម្ចាស់ផ្ទះ។
ដំណើរទស្សនកិច្ចនេះក៏ធ្វើឡើងខណៈភាពតានតឹងកំពុងកើតមានរវាងអាមេរិកជាមួយចិន លើបញ្ហាដែនកោះតៃវ៉ាន់ និងអាមេរិកជាមួយនឹងរុស្ស៊ី អំពីសង្គ្រាមរុស្ស៊ីនៅអ៊ុយក្រែន។ ប៉ុន្តែបញ្ហាវិបត្តិនយោបាយភូមា គឺជាករណីចាំបាច់នៅក្នុងកិច្ចប្រជុំជាមួយថ្នាក់រដ្ឋមន្ត្រីការបរទេសអាស៊ាន ៩ប្រទេសដែលពុំមានរដ្ឋមន្ត្រីការបរទេសនៃរបបសឹកភូមាចូលរួមនោះទេ។
ក្រសួងការបរទេសអាមេរិក ឲ្យដឹងថា លោក Blinken នឹងផ្តើមដំណើររបស់លោកចាប់ពីថ្ងៃទី២ ខែសីហា ដល់ថ្ងៃទី១២ ខែសីហា ដោយក្នុងការធ្វើដំណើរនោះមានទៅកាន់ប្រទេសកម្ពុជា ហ្វីលីពីន អាហ្វ្រិកខាងត្បូង សាធារណរដ្ឋប្រជាធិបតេយ្យកុងហ្គោ និងប្រទេសរូវ៉ាន់ដា។
បើតាមប្រភពដដែលនេះ លោករដ្ឋមន្ត្រី Blinken នឹងធ្វើដំណើរទៅកាន់រាជធានីភ្នំពេញប្រទេសកម្ពុជាដំបូងគេចាប់ពីថ្ងៃទី៣ ដល់ថ្ងៃទី៥ ខែសីហា ដើម្បីចូលរួមកិច្ចប្រជុំថ្នាក់រដ្ឋមន្ត្រីអាមេរិក-អាស៊ាន កិច្ចប្រជុំកំពូលអាស៊ីបូព៌ានៃថ្នាក់រដ្ឋមន្ត្រីការបរទេស និងកិច្ចប្រជុំវេទិកាតំបន់អាស៊ាន។
សេចក្តីថ្លែងការណ៍របស់ក្រសួងការបរទេសអាមេរិក បញ្ជាក់ថា លោក Blinken នឹងបញ្ជាក់ឡើងវិញពីការប្ដេជ្ញាចិត្តរបស់សហរដ្ឋអាមេរិកចំពោះអាស៊ាន និងការអនុវត្តដោយជោគជ័យចំពោះចក្ខុវិស័យអាស៊ានអំពីសហប្រតិបត្តិការសេដ្ឋកិច្ចឥណ្ឌូ-ប៉ាស៊ីហ្វិក។
ដោយឡែកអនុរដ្ឋមន្ត្រីការបរទេសអាមេរិក អ្នកស្រី Wendy Sherman គ្រោងបំពេញទស្សនកិច្ចនៅក្នុងប្រទេស Solomon ជាដែនកោះមួយក្នុងតំបន់លំហសមុទ្រអាស៊ី-ប៉ាស៊ីហ្វិកមួយដែរ។ អ្នកស្រី Sherman នឹងជួបមេដឹកនាំដែនកោះមួយនេះ ដើម្បីបញ្ជាក់អំពីចំណងមិត្តភាពស្ថិតស្ថេរយូរអង្វែងរវាងសហរដ្ឋអាមេរិក និងប្រទេស Solomon ក៏ដូចជាការបើកសម្ពោធស្ថានទូតអាមេរិកក្នុងរដ្ឋធានី Honiara របស់ដែនកោះនេះ។
អ្នកស្រី Sherman ជាមន្ត្រីជាន់ខ្ពស់អាមេរិកចុងក្រោយបន្ទាប់ពីអ្នកស្រី Nancy Pelosi ប្រធានរដ្ឋសភា និងប្រមុខការទូតអាមេរិក Antony Blinken ដែលត្រូវបំពេញទស្សនកិច្ចនៅតំបន់ប៉ាស៊ីហ្វិកបន្តបន្ទាប់គ្នា ខណៈរដ្ឋាភិបាលក្រុងវ៉ាស៊ីនតោន កំពុងបង្កើនកិច្ចខិតខំប្រឹងប្រែងដើម្បីទប់ទល់នឹងឥទ្ធិពលការទូត និងយោធារបស់ប្រទេសចិន នៅក្នុងតំបន់អាស៊ីប៉ាស៊ីហ្វិក៕