30 C
Phnom Penh

មន្ត្រី៖ កម្ពុជា​ជំពាក់​បរទេស​ជិត​១​ម៉ឺន​លាន​ដុល្លារ​អាមេរិក ហើយ​នៅ​អាច​ខ្ចី​បន្ថែម​ទៀត

ដោយ ឌឹ ខេមបូឌា ដេលី

បទវិភាគ

អគ្គលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ អះអាង​ថា កម្ពុជា​បាន​ជំពាក់​បំណុល​បរទេស​ជិត ១​ម៉ឺន​លាន​ដុល្លារ​អាមេរិក​ហើយ ប៉ុន្តែ​ត្រូវ​ស្ថាប័ន​អន្តជាតិ​ធំៗ​វាយតម្លៃ​ថា ស្ថានភាព​បំណុល​ស្ថិត​ក្នុង​ទំហំ​បែប​នេះ​មិន​មាន​ហានិភ័យ ឬ​បារម្ភ​ពី​បំណុល​វ័ណ្ឌក​នោះ​ទេ។

អគ្គលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ លោក មាស សុខសេនសាន បាន​អះអាង​នៅ​ក្នុង​សន្និសីទ​សារព័ត៌មាន​ស្ដីពី​សមិទ្ធផល​សម្រេច​បាន​រយៈពេល ៥​ឆ្នាំ​របស់​ក្រសួង​សេដ្ឋកិច្ច និង​ហិរញ្ញវត្ថុ កាលពី​ថ្ងៃទី​២ ខែ​សីហា ឆ្នាំ​២០២២ ថា រដ្ឋាភិបាល​កម្ពុជា​បាន​គ្រប់គ្រង​បំណុល​ទាំងនេះ​យ៉ាង​ម៉ត់ចត់​បំផុត ហើយ​ការ​ខ្ចី​ក៏​ធ្វើឡើង​ដោយ​មាន​គោលដៅ​ច្បាស់លាស់​ផង​ដែរ ពោល​គឺ​កម្ចី​នេះ​ត្រូវ​បាន​យក​មក​ប្រើប្រាស់​ប្រកប​ដោយ​តម្លាភាព និង​ប្រសិទ្ធភាព​រហូត​មក។

លោក មាស សុខសេនសាន លើកឡើង​ថា បើ​ទោះបីជា​កម្ពុជា​ជំពាក់​បរទេស​ជិត ១​ម៉ឺន​លាន​ដុល្លារ​អាមេរិក​ហើយ​ក៏ដោយ ក៏​រដ្ឋាភិបាល​មាន​លក្ខខណ្ឌ​ក្នុង​ការ​ខ្ចី​ត្រឹមត្រូវ​ដែរ ព្រោះ​ថា​កម្ពុជា​ខ្ចី​មិនមែន​យក​មក​បើក​ប្រាក់ខែ​ឱ្យ​បុគ្គលិក​រាជការ​នោះ​ទេ គឺ​ខ្ចី​ដើម្បី​វិនិយោគ​ប៉ុណ្ណោះ។

ប្រធាន​វេទិកា​ពលរដ្ឋ លោក គឹម សុខ ប្រាប់ The Cambodia Daily នៅ​ថ្ងៃទី​៣ សីហា នេះ​ថា ករណី​បំណុល​ដែល​កម្ពុជា​ជំពាក់​បរទេស​ប្រមាណ ៤០% នៃ​ទំហំ​សេដ្ឋកិច្ច​ទាំងមូល​របស់​ខ្លួន បើ​គិត​ត្រឹមតែ​តួលេខ​នេះ គឺ​មិន​មាន​ហានិភ័យ​នោះ​ទេ ប៉ុន្តែ​ស្ថានភាព​បំណុល​នេះ​បាន​ធ្វើ​ឲ្យ​កម្ពុជា​ប្រឈម​នឹង​ហានិភ័យ​នៅ​ថ្ងៃ​អនាគត ជាពិសេស​បំណុល​ដែល​ពុំ​មាន​តម្លាភាព​ជាមួយ​ចិន​សព្វថ្ងៃ​នេះ។

លោក គឹម សុខ អះអាង​ថា ស្ថានភាព​បំណុល​ដែល​កម្ពុជា​កំពុង​ជំពាក់​បរទេស​ក្នុង​ពេល​បច្ចុប្បន្ន​នេះ គឺ​មិនមែន​តិចតួច​នោះ​ទេ។ លោក​បន្ត​ថា បំណុល​នេះ​មាន​ចំនួន​ប្រមាណ ១០​ពាន់​លាន​ដុល្លារ​អាមេរិក​បើ​ប្រៀបធៀប​នឹង​ទំហំ​សេដ្ឋកិច្ច​កម្ពុជា ដែល​មាន​ប្រមាណ​ជាង ២០​ពាន់​លាន​ដុល្លារ​អាមេរិក​នោះ។ លោក​បន្ត​ថា ចំ​ពេល​ដែល​កម្ពុជា​កំពុង​មាន​វិបត្តិ​លើ​គ្រប់​វិស័យ​ថែម​ទៀត ដូចជា​វិបត្តិ​នយោបាយ វិបត្តិ​សិទ្ធិមនុស្ស និង​វិបត្តិ​ប្រជាធិបតេយ្យ ដែល​ធ្វើ​ឱ្យ​កម្ពុជា​រង​នូវ​គំនាប​សេដ្ឋកិច្ច​ពី​មហាអំណាច ដូចជា​សហគមន៍​អឺរ៉ុប និង​សហរដ្ឋ​អាមេរិក ជាដើម តាមរយៈ​នៃ​ការ​ផ្តាច់​ប្រព័ន្ធ​អនុគ្រោះ​នានា​ក្នុង​ពេល​បច្ចុប្បន្ន​នេះ។

ប្រធាន​វេទិកា​ពលរដ្ឋ​រូប​នេះ​បញ្ជាក់​ថា ការ​បង្កើត​ប្រព័ន្ធ​គ្រួសារ​និយម​ក្នុង​ប្រព័ន្ធ​រដ្ឋបាល​ជាតិ និង​ការ​បង្កើត​ឱ្យ​មាន​អំពើពុករលួយ​កាន់តែ​រីក​ធំ​ឡើងៗ គឺ​សុទ្ធសឹងតែ​ជា​គំនរ​វិបត្តិ​នាំ​ឱ្យ​មាន​ឱនភាព​សេដ្ឋកិច្ច​ធ្ងន់ធ្ងរ​របស់​កម្ពុជា​ទាំងអស់ ក្នុង​នោះ​ការ​ប្រមូល​ពន្ធ​បាន​តិចតួច​ដែល​មាន​ប្រមាណ​មិន​ដល់ ៥០% នៃ​ចំណាយ​របស់​រដ្ឋ​ផង​នោះ ក៏​ជា​លទ្ធផល​មួយ​បញ្ជាក់​ថា ការ​សង​បំណុល​បរទេស​ប្រាកដ​ជា​មិន​អាច​ទៅ​រួច​នោះ​ទេ​នៅ​ថ្ងៃ​អនាគត។

ក្រសួង​សេដ្ឋកិច្ច​កម្ពុជា បាន​ចេញ​ផ្សាយ​ព្រឹត្តិបត្រ​ស្ថិតិ​បំណុល​សាធារណៈ​របស់​ខ្លួន​កាលពី​ថ្ងៃទី​៩ ខែ​មិថុនា ឆ្នាំ​២០២២ នេះ​ថា កម្ពុជា​បាន​ចុះ​កិច្ចព្រមព្រៀង​កម្ចី​បរទេស​ចាប់ពី​ឆ្នាំ​២០១៩ ដល់​ឆ្នាំ​២០២២ ក្នុង​ទំហំ​ទឹកប្រាក់ ១​ម៉ឺន ៥​ពាន់​លាន​ដុល្លារ​អាមេរិក។ ប៉ុន្តែ​កម្ពុជា​បាន​ចំណាយ​អស់ ១​ម៉ឺន ៥៥១​លាន​ដុល្លារ​អាមេរិក​ហើយ ខណៈ​បំណុល​ជាក់ស្តែង​ដែល​កម្ពុជា​មិនទាន់​បាន​ទូទាត់​សង​ម្ចាស់​បំណុល​សព្វថ្ងៃ​នេះ គឺ​នៅ​មាន​ទំហំ ៩,៨១​ប៊ី​លាន​ដុល្លារ​អាមេរិក​នៅឡើយ។

ទាក់ទិន​នឹង​បំណុល​នេះ វិទ្យាស្ថាន Kiel Institute ដែល​មាន​មូលដ្ឋាន​នៅ​ប្រទេស​អាល្លឺម៉ង់ កាលពី​ចុង​ឆ្នាំ​២០១៩ បាន​រក​ឃើញ​ថា កម្ពុជា​ស្ថិត​ក្នុង​ចំណោម​ប្រទេស​ដែល​មាន​អត្រា​ជំពាក់​បំណុល​ប្រទេស​ចិន​ច្រើន​បំផុត​លំដាប់​ទី​៦ ក្នុង​ចំណោម​ប្រទេស​៥០ លើ​ពិភពលោក​ដែល​ជា​បំណុល​មាន​ហានិភ័យ​ការប្រាក់​ខ្ពស់ និង​កង្វះ​តម្លាភាព៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស