បេក្ខជនស្នងតំណែងអនាគតនាយករដ្ឋមន្ត្រីដែលជាកូនប្រុសច្បងរបស់បុរសខ្លាំងកម្ពុជា គឺលោក ហ៊ុន ម៉ាណែត បានលើកឡើងថា កងទ័ពជើងគោកកម្ពុជា និងវៀតណាមបានរួមចំណែកយ៉ាងសំខាន់ក្នុងការពង្រឹងចំណងមិត្តភាព ដើម្បីការពារ និងកសាងប្រទេសទាំងពីរនៅក្រោមម្លប់នៃសន្តិភាពក្នុងពេលបច្ចុប្បន្ន និងទៅអនាគត។
លោក ហ៊ុន ម៉ាណែត បានលើកឡើងក្នុងកិច្ចប្រជុំពិភាក្សាការងារជាមួយអនុប្រធានអគ្គសេនាធិការនៃកងទ័ពប្រជាជនវៀតណាម លោក ង្វៀន វ៉ាន់ងៀ អំឡុងដំណើរទស្សនកិច្ចរយៈពេល ៣ថ្ងៃនៅប្រទេសវៀតណាម ចាប់ពីថ្ងៃទី០៧ ដល់ថ្ងៃទី០៩ ខែសីហា ឆ្នាំ២០២២ នេះថា ការសាមគ្គីភាពរវាងកម្ពុជា និងវៀតណាម គឺជាមូលដ្ឋានមិនអាចខ្វះបាន ដើម្បីការពារ និងកសាងប្រទេសទាំងពីរឱ្យបានរីកចម្រើន និងរុងរឿងទាំងអស់គ្នា។
លោក ហ៊ុន ម៉ាណែត បានថ្លែងអំណរគុណចំពោះបក្សកុម្មុយនីស្ត រដ្ឋាភិបាល កងទ័ព និងប្រជាជនវៀតណាម ថាពួកគេតែងតែជួយឧបត្ថម្ភគាំទ្រដល់កម្ពុជាក្នុងនាមជាប្រទេសជិតខាងល្អ ទាំងក្នុងអតីតកាល និងបច្ចុប្បន្ន ជាពិសេសក្នុងកាលៈទេសៈដែលកម្ពុជាជួបការលំបាក។
បេក្ខជនអនាគតនាយករដ្ឋមន្ត្រីកម្ពុជារូបនេះបញ្ជាក់ថា ការមកបំពេញទស្សនកិច្ចផ្លូវការក្នុងប្រទេសវៀតណាមនៅពេលនេះ គឺដើម្បីពង្រឹង និងពង្រីកទំនាក់ទំនងកិច្ចសហប្រតិបត្តិការទ្វេភាគីរវាងកងទ័ពនៃប្រទេសទាំងពីរឱ្យកាន់តែជិតស្និទ្ធ និងរឹងមាំបន្ថែមទៀត ជាពិសេសពង្រឹងវិស័យយោធាស្របតាមពាក្យស្លោកថា ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងស្ថិរភាពយូរអង្វែង។
ការអះអាងនេះ ត្រូវគេមើលឃើញថា ជាការបញ្ជាក់ជំហររបស់កម្ពុជាចំពោះវៀតណាម ឱ្យកាន់តែច្បាស់បន្ថែមទៀតចំពោះទំនាក់ទំនងប្រទេសទាំងពីរ បន្ទាប់ពីលោក ហ៊ុន ម៉ាណែត បានក្លាយជាបេក្ខជននាយករដ្ឋមន្ត្រីកម្ពុជានាពេលអនាគតនៅពេលនេះ។
អនុប្រធានវេទិកាពលរដ្ឋ លោក ម៉ែន ណាត ប្រាប់ The Cambodia Daily នៅថ្ងៃទី៩ សីហា នេះថា ទស្សនកិច្ចរបស់លោក ហ៊ុន ម៉ាណែត គឺជាការទាមទាររបស់វៀតណាម ដើម្បីឱ្យបេក្ខជនស្នងមរតកអំណាចនៅកម្ពុជារូបនេះ បញ្ជាក់ជំហររបស់ខ្លួនឱ្យកាន់តែច្បាស់ជាមួយវៀតណាមបន្ថែមទៀត បន្ទាប់ពីរដ្ឋមន្ត្រីការបរទេសចិន លោក វ៉ាង យី ប្រកាសគាំទ្រខ្លួនធ្វើជាអ្នកបន្តវេនកាលពីពេលថ្មីៗនេះ ថាតើក្រោយឡើងកាន់អំណាច លោក ហ៊ុន ម៉ាណែត នឹងនៅតែរក្សាទំនាក់ទំនងជាមួយវៀតណាមដូចមុនដែរឬទេទៅថ្ងៃមុខ។
លោក ម៉ែន ណាត អះអាងថា ការស្នងអំណាចរបស់លោក ហ៊ុន ម៉ាណែត នឹងមិនអាចធ្វើទៅរួចទេ បើគ្មានការជួយជ្រោមជ្រែងពីវៀតណាម ព្រោះថាជំនាញការ និងក្រុមចារកិច្ចរបស់វៀតណាម បានរៀបបណ្ដាញចូលយ៉ាងជ្រៅទៅក្នុងប្រព័ន្ធដឹកនាំរបស់រដ្ឋាភិបាលកម្ពុជា និងបណ្ដាញខ្សែបក្ខពួកទាំងអស់របស់គ្រួសារត្រកូល ហ៊ុន។ ដូច្នេះ ត្រកូល ហ៊ុន គ្មានជម្រើសណាល្អក្រៅតែពីបន្តទំនាក់ទំនងល្អជាមួយវៀតណាម តាមរយៈនៃការសម្បទានទឹកដីកម្ពុជាបន្ថែមទៀត ដើម្បីស្ថិរភាពនៃការគ្រប់គ្រងអំណាចនេះទេ។
អនុប្រធានវេទិកាពលរដ្ឋរូបនេះបញ្ជាក់ថា ប្រទេសកម្ពុជាកំពុងស្ថិតនៅមាត់ជ្រោះគួរឱ្យព្រួយបារម្ភ ពីព្រោះប្រទេសនេះបានស្ថិតក្នុងការក្តោបក្តាប់របស់ត្រកូល ហ៊ុន ទាំងស្រុង ខណៈត្រកូល ហ៊ុន ត្រូវបានរៀបចំចាត់ចែងដោយរដ្ឋាភិបាលវៀតណាម ដើម្បីទាញយកផលប្រយោជន៍គ្រប់បែបយ៉ាងពីកម្ពុជា ខណៈចិនក៏កំពុងតែដើរតួជាម្ចាស់បំណុលចិត្តធម៌ក្នុងចេតនាទាញកម្ពុជាធ្វើជាកូនអុកបម្រើភូមិសាស្ត្រនយោបាយរបស់ខ្លួនក្នុងពេលបច្ចុប្បន្ននេះផងដែរ។
កម្ពុជាដែលក្រោមការដឹកនាំរបស់ត្រកូល ហ៊ុន ជាង ៤០ឆ្នាំមកនេះ ត្រូវគេមើលឃើញថា មានតែការកាត់ទឹកដីឱ្យវៀតណាម ដើម្បីអំណាច និងប្រឹងខ្ចីបំណុលចិនដើម្បីបន្តអំណាចរបស់ខ្លួនប៉ុណ្ណោះ ហើយបញ្ហានេះ ពលរដ្ឋខ្មែរព្រួយបារម្ភថា កម្ពុជាដ៏តូចចង្អៀតមួយនេះនឹងត្រូវបរទេសឈ្លានពានរើខ្លួនមិនរួចទៅថ្ងៃមុខ ប្រសិនបើកម្ពុជានៅតែស្ថិតក្នុងទម្រង់នៃការដឹកនាំតាមរបៀបគ្មានតម្លាភាពរបស់ត្រកូល ហ៊ុន ដូចសព្វថ្ងៃនេះ៕