តុលាការក្រុងភ្នំពេញគ្រោងប្រកាសសាលក្រមសំណុំរឿងលោក សម រង្ស៊ី ពាក់ព័ន្ធនឹងករណីចុះកិច្ចព្រមព្រៀងកាត់ខេត្តភាគឦសាននៃប្រទេសកម្ពុជាចំនួន៤ ប្រគល់ឲ្យជនជាតិម៉ុងតាញ៉ា ដើម្បីរស់នៅ។
ការលើកពេលប្រកាសសាលក្រមទៅថ្ងៃទី១៣ ខែកញ្ញា ឆ្នាំ២០២២ ខាងមុខនេះ ធ្វើឡើងបន្ទាប់ពីប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ បានបើកសវនាការសំណុំរឿងលោក សម រង្ស៊ី ពីបទ «ប្រគល់ឲ្យរដ្ឋបរទេស» កាលពីថ្ងៃទី១១ សីហា ពាក់ព័ន្ធនឹងរឿងដែលលោក សម រង្ស៊ី ចុះកិច្ចព្រមព្រៀងជាមួយមេដឹកនាំជនជាតិដើមភាគតិចម៉ុងតាញ៉ា កាលពីឆ្នាំ២០១៣។
ក្នុងបន្ទប់សវនាការ តំណាងអយ្យការ លោក ប្លង់ សុផល ស្នើទៅចៅក្រមឲ្យផ្ដន្ទាទោសលោក សម រង្ស៊ី កម្រិតអតិបរមា ដោយលើកឡើងថា កិច្ចព្រមព្រៀងដែលលោក សម រង្ស៊ី ចុះដោយកាត់ខេត្តចំនួន៤ ឲ្យទៅជនជាតិដើមភាគតិចម៉ុងតាញ៉ា ដែលមិនមែនជាជនជាតិខ្មែរនោះ ថាជាអំពើក្បត់ជាតិ។
លោកបញ្ជាក់ថា ជនជាតិដើមភាគតិចម៉ុងតាញ៉ា មិនមែនជាជនជាតិខ្មែរទេ ពួកគេជាជនជាតិភាគតិចរស់នៅតំបន់ភ្នំក្នុងប្រទេសវៀតណាម តែប៉ុណ្ណោះ។
លោក ប្លង់ សុផល អះអាងថា កិច្ចព្រមព្រៀងដែលលោក សម រង្ស៊ី បានធ្វើជាមួយលោក កុក ស ដែលជាមេដឹកនាំជនជាតិម៉ុងតាញ៉ា ចុះកាលពីថ្ងៃទី១៤ ខែមេសា ឆ្នាំ២០១៣ នោះ ក៏បានផ្ទុយពីរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់អន្តរជាតិផងដែរ។
កាលពីថ្ងៃទី១៤ ខែមេសា ឆ្នាំ២០១៣ លោក សម រង្ស៊ី បានចុះកិច្ចព្រមព្រៀងមួយជាមួយមេដឹកនាំជនជាតិដើមភាគតិចម៉ុងតាញ៉ា លោក កុក ស ដោយបានសន្យាថានឹងកាត់ខេត្តចំនួន៤ ប្រគល់ឲ្យជនជាតិដើមភាគតិចម៉ុងតាញ៉ា ដើម្បីរស់នៅដូចប្រជាពលរដ្ឋខ្មែរ។ លោកបញ្ជាក់ថា ការកាត់ខេត្តមណ្ឌលគិរី រតនគិរី ស្ទឹងត្រែង និងខេត្តក្រចេះ ទៅឲ្យជនជាតិដើមភាគតិចម៉ុងតាញ៉ានោះ ប្រសិនបើគណបក្សសង្គ្រោះជាតិឈ្នះឆ្នោតបង្កើតបានរដ្ឋាភិបាលថ្មីមួយ។
The Cambodia Daily បានព្យាយាមទាក់ទងលោក សម រង្ស៊ី ដើម្បីសុំប្រតិកម្មអំពីការចោទប្រកាន់នេះ ប៉ុន្តែលោកមិនដែលលើកទូរស័ព្ទទេ។
ទោះជាយ៉ាងណាក៏ដោយ លោក សម រង្ស៊ី តែងចាត់ទុកការចោទប្រកាន់របស់តុលាការកម្ពុជាកន្លងមក ថាជាតុលាការកំប្លុកកំប្លែងដែលតែងធ្វើការក្រោមការបង្គាប់បញ្ជារបស់បុរសខ្លាំង លោក ហ៊ុន សែន តែប៉ុណ្ណោះ៕