មន្ត្រីជាន់ខ្ពស់ក្រសួងបរិស្ថាន អំពាវនាវឱ្យមន្ត្រីកងកម្លាំងប្រដាប់អាវុធ មន្ត្រីឧទ្យានុរក្ស មន្ត្រីអនុវត្តច្បាប់ និងអាជ្ញាធរដែនដី ចូលរួមការពារ និងអភិរក្សតំបន់ការពារធម្មជាតិ ដើម្បីថែរក្សាព្រៃឈើខ្មែរទុកជាឧត្តមប្រយោជន៍របស់កម្ពុជាតកូនតចៅជំនាន់ក្រោយ និងមនុស្សជាតិទាំងមូលទៅថ្ងៃអនាគត។
រដ្ឋលេខាធិការក្រសួងបរិស្ថាន លោក សៅ សុភាព បានលើកឡើងក្នុងសិក្ខាសាលាផ្សព្វផ្សាយច្បាប់ពាក់ព័ន្ធនឹងវិស័យបរិស្ថាន និងធនធានធម្មជាតិដែលប្រព្រឹត្តទៅកាលពីថ្ងៃទី១១ ដល់ថ្ងៃទី១២ ខែសីហា ឆ្នាំ២០២២ នេះថា មន្ត្រីពាក់ព័ន្ធគ្រប់ជាន់ថ្នាក់ត្រូវតែចូលរួមគ្រប់គ្រងធនធានធម្មជាតិឱ្យមានប្រសិទ្ធភាព ទើបអាចសម្រេចតាមផែនការ និងគោលដៅជាយុទ្ធសាស្ត្ររបស់រាជរដ្ឋាភិបាលក្នុងកិច្ចគាំពារបរិស្ថានបាន។
ប្រភពដដែលអះអាងថា ក្រសួងបរិស្ថានមានគោលការណ៍ផ្សព្វផ្សាយ និងបញ្ជ្រាបដល់ភាគីពាក់ព័ន្ធ ដើម្បីឱ្យពួកគេបានយល់ដឹងអំពីទិដ្ឋភាពច្បាប់ និងលិខិតបទដ្ឋានគតិយុត្តិពាក់ព័ន្ធនឹងវិស័យបរិស្ថាន និងធនធានធម្មជាតិ ដើម្បីចូលរួមចំណែកទាំងអស់គ្នាក្នុងការអភិរក្ស និងគ្រប់គ្រងធនធានធម្មជាតិប្រកបដោយនិរន្តរភាព។
មន្ត្រីជាន់ខ្ពស់ក្រសួងបរិស្ថានរូបនេះបញ្ជាក់ថា ក្រសួងបរិស្ថានបានយកចិត្តទុកដាក់យ៉ាងខ្លាំងទៅលើការអនុវត្តច្បាប់ពាក់ព័ន្ធនឹងបរិស្ថាន និងការគ្រប់គ្រងធនធានធម្មជាតិ ការរឹតបន្តឹងទៅលើបទល្មើសបរិស្ថាន ពង្រឹងការអនុវត្តច្បាប់នៃបទល្មើសធនធានធម្មជាតិ និងការកសាងសំណុំរឿងពាក់ព័ន្ធនឹងបទល្មើសពីការបំផ្លាញព្រៃឈើផងដែរ។
កាលពីថ្ងៃទី៨ ខែសីហា ឆ្នាំ២០២២ កន្លងទៅ រដ្ឋមន្ត្រីក្រសួងមហាផ្ទៃ លោក ស ខេង បានបើកកិច្ចប្រជុំអន្តរក្រសួងស្តីអំពីការរៀបចំសេចក្ដីព្រាងច្បាប់ស្ដីពីព្រៃឈើ ច្បាប់ស្ដីពីជលផល និងច្បាប់ស្ដីពីតំបន់ការពារធម្មជាតិនៅទីស្ដីការក្រសួងមហាផ្ទៃ ដែលមានការចូលរួមពីក្រសួងពាក់ព័ន្ធនានា ក្នុងនោះក៏មានការចូលរួមពីក្រសួងបរិស្ថានផងដែរ។
លោក ស ខេង បញ្ជាក់ថា ការរៀបចំសេចក្ដីព្រាងច្បាប់នេះ គឺមានគោលដៅជំរុញ និងលើកកម្ពស់ការទទួលខុសត្រូវរបស់រដ្ឋបាលថ្នាក់ក្រោមជាតិ និងពលរដ្ឋក្នុងការការពារ ការអភិរក្ស និងការអភិវឌ្ឍធនធានធម្មជាតិប្រកបដោយប្រសិទ្ធភាព និងនិរន្តរភាពនៅកម្ពុជាទៅថ្ងៃមុខ។
ទាក់ទិននឹងបញ្ហានេះ សកម្មជនការពារព្រៃឈើកម្ពុជា លោក ហេង ស្រស់ ធ្លាប់បានរិះគន់កាលពីពេលថ្មីនេះថា ឧក្រិដ្ឋជនព្រៃឈើនៅកម្ពុជាកើតឡើងយ៉ាងអនាធិបតេយ្យសព្វថ្ងៃនេះ គឺដោយសារតែមានការជួយជ្រោមជ្រែងពីក្រសួងពាក់ព័ន្ធរបស់រដ្ឋាភិបាលកម្ពុជា ដូចជាក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ជាដើម។
លោក ហេង ស្រស់ អះអាងថា ឈើដែលក្រុមហ៊ុនកាប់ចេញពីតំបន់អភិរក្សដោយខុសច្បាប់ ត្រូវបានអាជ្ញាធរប្រថាប់ត្រាឱ្យក្លាយទៅជាឈើស្របច្បាប់វិញ ខណៈផលប្រយោជន៍ពីការកាប់បំផ្លាញព្រៃឈើនេះ គឺធ្លាក់តែទៅលើក្រុមឈ្មួញ និងមន្ត្រីដែលបានចូលរួមឃុបឃិត និងអ្នកបញ្ជាពីក្រោយខ្នងនៃសកម្មភាពខុសច្បាប់នេះតែប៉ុណ្ណោះ ខណៈពលរដ្ឋខ្មែរម្ចាស់ប្រទេសដែលឈឺឆ្អាលបញ្ហានេះ អាចនឹងត្រូវរងការចោទប្រកាន់ថែមទៀត។
ជុំវិញបញ្ហានេះ កាលពីដើមខែវិច្ឆិកា ឆ្នាំ២០២១ មានប្រទេសជាង ១៣០ បានចុះហត្ថលេខាលើសេចក្តីប្រកាសទីក្រុង Glasgow COP26 ស្ដីពីការរួមគ្នាបញ្ឈប់ការបាត់បង់ព្រៃឈើ ដើម្បីទប់ទល់ការផ្លាស់ប្ដូរអាកាសធាតុ ក្នុងនោះរួមមានចក្រភពអង់គ្លេស សហរដ្ឋអាមេរិក ចិន និងវៀតណាម ជាដើម ប៉ុន្តែកម្ពុជាមិនបានចុះហត្ថលេខាលើសេចក្តីប្រកាសនេះជាមួយប្រទេសទាំងនោះទេ។
សាកលវិទ្យាល័យនៃប្រទេសដាណឺម៉ាក និងបណ្ដាញសហគមន៍ព្រៃឡង់ បានបញ្ចេញរបាយការណ៍របស់ខ្លួនស្ដីពីការវិនាសព្រៃឈើនៅកម្ពុជា កាលពីដើមឆ្នាំ២០២២ នេះថា កម្ពុជាបានបាត់បង់គម្របព្រៃឈើជិត ២លាន ៥សែនហិកតារហើយក្នុងចន្លោះឆ្នាំ២០០១ និងឆ្នាំ២០២០ ដែលស្មើនឹងប្រមាណជា ២៨% នៃគម្របព្រៃឈើសរុបរបស់ខ្លួនគិតចាប់តាំងពីឆ្នាំ២០០០ មក៕