32 C
Phnom Penh

សាលា​រាជធានី​ព្រមាន​ប្ដឹង​កូដករ​ណាហ្គា​ទៅ​តុលាការ​ដោយ​ចោទ​ប្រើប្រាស់​ហិង្សា​លើ​សមត្ថកិច្ច

ដោយ ឌឹ ខេមបូឌា ដេលី

បទវិភាគ

សាលា​រាជធានី​ភ្នំពេញ អះអាង​ថា ខ្លួន​នឹង​បញ្ជូន​សំណុំរឿង​កូដករ​ណាហ្គា​វើលដ៍ (Naga World) ទៅ​តុលាការ ដោយ​ចោទ​ថា​ក្រុម​កូដករ​ដែល​ជា​ស្ត្រី​បាន​បំផ្លិចបំផ្លាញ​ទ្រព្យសម្បត្តិ​សាធារណៈ និង​បាន​ប្រើប្រាស់​អំពើ​ហិង្សា​ទៅ​លើ​សមត្ថកិច្ច​ដែល​ជា​បុរស។

ក្នុង​សេចក្តី​ប្រកាស​ព័ត៌មាន​របស់​រដ្ឋបាល​រាជធានី​ភ្នំពេញ ដែល​បាន​ចេញ​ផ្សាយ​កាលពី​ថ្ងៃទី​១១ ខែ​សីហា ដោយ​ចាត់ទុក​ការ​ប្រមូលផ្ដុំ​តវ៉ា​របស់​ក្រុម​កូដករ​ថា​ធ្វើឡើង​ដោយ​ខុស​ច្បាប់។

អាជ្ញាធរ​ក្រុង​ភ្នំពេញ​ក៏​បាន​ចោទប្រកាន់​ចំពោះ​ការ​តវ៉ា​របស់​កូដករ ថា​ជា​ការ​រៀបចំ​ដោយ​ក្រុម​មនុស្ស​មួយ​ក្តាប់​តូច​ដែល​នៅ​ពីក្រោយ​ការ​រៀបចំ​ឈុត​ឆាក​សម្ដែង ក្នុង​ន័យ​បង្កើត​រូបភាព​អវិជ្ជមាន បង្ក​ការ​ប៉ះពាល់​ដល់​មុខមាត់​អាជ្ញាធរ​គ្រប់​ជាន់ថ្នាក់ ដោយ​ក្រុម​នេះ​បាន​បន្ត​ធ្វើ​សកម្មភាព​អនាធិបតេយ្យ​យ៉ាង​គឃ្លើន​ជា​ដដែលៗ។

រដ្ឋបាល​រាជធានី​ភ្នំពេញ​ក៏​បាន​ចោទ​ថា អ្នក​ដែល​នៅ​ពីក្រោយ​ការ​តវ៉ា​របស់​ក្រុម​កូដករ​នោះ បាន​ធ្វើ​សកម្មភាព​ញុះញង់ ដុត​កម្តៅ បញ្ឆេះ​កំហឹង បន្ត​ការ​ជេរ​ប្រមាថ​មក​លើ​មន្ត្រី​សាធារណៈ ហើយ​ថែម​ទាំង​ជាន់​កម្ទេច​បំផ្លាញ​បារ៉ាស់ ធ្វើ​ឲ្យ​ខូចខាត​ជិត ២០​ផ្ទាំង ហើយ​សមត្ថកិច្ច​នៅតែ​បន្ត​ស្រាក់​ដៃ​គ្នា​ធ្វើ​ជា​បារ៉ាស់​ការពារ​ដើម្បី​រក្សា​សណ្ដាប់ធ្នាប់​សាធារណៈ ប៉ុន្តែ​ពួកគេ​បាន​ប្រើ​ហិង្សា​ថែម​ទៀត​មក​លើ​សមត្ថកិច្ច​រហូត​ដល់​មាន​ការ​ប៉ះទង្គិច​គ្នា​បន្តិចបន្តួច។

ករណី​នេះ សាលា​រាជធានី​ភ្នំពេញ​នឹង​ចងក្រង​កសាង​សំណុំរឿង​បញ្ជូន​ទៅ​ស្ថាប័ន​តុលាការ ដើម្បី​នាំ​ជន​ដៃ​ដល់​មក​ផ្ដន្ទាទោស​តាម​ផ្លូវ​ច្បាប់​នូវ​សកម្មភាព​បំផ្លិចបំផ្លាញ​ទ្រព្យសម្បត្តិ​សាធារណៈ ការ​ប្រើ​អំពើ​ហិង្សា​មក​លើ​អាជ្ញាធរ ក៏ដូចជា​ការ​ប្រមាថ​មក​លើ​មន្ត្រី​រាជការ​ដែល​កំពុង​បំពេញ​ភារកិច្ច។

រដ្ឋបាល​រាជធានី​ភ្នំពេញ​សូម​គូស​បញ្ជាក់​បន្ថែម​ទៀត​ថា ក្រុម​បាតុករ​បុក​ទម្លុះ​បារ៉ាស់ និង​បង្ក​អំពើ​ហិង្សា​មក​លើ​សមត្ថកិច្ច​ដែល​ត្រូវ​គេ​មើល​ឃើញ​ថា​សុទ្ធសឹងតែ​ជា​បុរស។

យ៉ាងណា ការ​បន្ត​នាំគ្នា​ចេញ​ធ្វើ​កូដកម្ម​របស់​ក្រុម​កូដករ​ណាហ្គា​វើលដ៍ ប្រហែល ១០០​នាក់​កាលពី​រសៀល​ថ្ងៃទី​១១ ខែ​សីហា ឆ្នាំ​២០២២ ដើម្បី​ទាមទារ​ឱ្យ​ក្រុមហ៊ុន​ដោះស្រាយ​វិវាទ​ការងារ​ដែល​បាន​អូស​បន្លាយ​ជាង ១​ឆ្នាំ​មក​នេះ។ ប៉ុន្តែ​ជា​រឿយៗ ការ​ចេញ​ធ្វើ​កូដកម្ម​របស់​ពួកគេ តែងតែ​ត្រូវ​បាន​ក្រុម​សមត្ថកិច្ច​ស្លៀកពាក់​ស៊ីវិល និង​ឯកសណ្ឋាន ២០០​នាក់ បាន​ដាក់​របាំង​រារាំង និង​រុញច្រាន ព្រមទាំង​ប្រើប្រាស់​អំពើ​ហិង្សា​ដោយ​វាយ​ទាត់​ធាក់​លើ​កូដករ​ដែល​ជា​ស្ត្រី​បណ្ដាល​ឲ្យ​រង​របួស។ ក្នុង​នោះ កូដករ​ស្ត្រី​ចំនួន ៣​នាក់ ត្រូវ​បាន​បញ្ជូន​ទៅ​មន្ទីរពេទ្យ បន្ទាប់ពី​អាជ្ញាធរ​ខណ្ឌ និង​ប្រជា​ការពារ​សណ្ដាប់ធ្នាប់​ប្រើ​ហិង្សា​នៅ​កន្លែង​តវ៉ា​ក្បែរ​កាស៊ីណូ​ណាហ្គា​វើលដ៍។

ប្រធាន​សហជីព​ទ្រទ្រង់​សិទ្ធិ​ការងារ​បុគ្គលិក​កម្មករ​ខ្មែរ​នៃ​ក្រុមហ៊ុន​ណាហ្គា​វើលដ៍ កញ្ញា ឈឹម ស៊ីថរ បង្ហាញ​ការ​សោកស្ដាយ​ចំពោះ​សាលា​រាជធានី​ភ្នំពេញ​ដែល​តែងតែ​រារាំង ចោទប្រកាន់ និង​បាន​ប្រើប្រាស់​ហិង្សា​លើ​កូដករ​ជា​ស្ត្រី​ដែល​គ្រាន់​ធ្វើ​កូដកម្ម​ទាមទារ​ឲ្យ​មាន​ដំណោះស្រាយ​វិវាទ​ការងារ។

កញ្ញា ឈឹម ស៊ីថរ ចាត់ទុក​ការ​បញ្ជូន​ជន​ដៃ​ដល់​ឲ្យ​ទៅ​ប្រើប្រាស់​អំពើ​ហិង្សា​លើ​កូដករ ហើយ​គំរាម​ប្ដឹង​ក្រុម​កូដករ​ដែល​រងគ្រោះ​នោះ ថា​ជា​អំពើ​ព្រៃផ្សៃ និង​អមនុស្សធម៌។ កញ្ញា​ចាត់ទុក​ការ​ប្រើប្រាស់​អំពើ​ហិង្សា​លើ​កូដករ​ដែល​ធ្វើ​កូដកម្ម​ដោយ​អហិង្សា​នៅ​លើ​ផ្លូវ​សាធារណៈ​ថា នឹង​ធ្វើ​ឲ្យ​ប៉ះពាល់​មុខមាត់​រដ្ឋាភិបាល​កម្ពុជា​លើ​ឆាក​អន្តរជាតិ​កាន់តែ​ខ្លាំង។

ចំណែក​អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា អះអាង​ថា ការ​ប្រើប្រាស់​អំពើ​ហិង្សា​ទៅ​លើ​ក្រុម​កូដករ​ពី​សំណាក់​អាជ្ញាធរ​រាជធានី​ភ្នំពេញ មិនមែន​ទើប​តែ​នឹង​កើតឡើង​នោះ​ឡើយ ហើយ​រដ្ឋាភិបាល​ក៏​មិន​ដែល​មាន​វិធានការ​ច្បាប់​ទៅ​លើ​សមត្ថកិច្ច​ដែល​បាន​ប្រើ​អំពើ​ហិង្សា​នោះ​ដែរ បើ​ទោះបីជា​ករណី​នេះ​ចូល​ទៅ​ក្នុង​បទល្មើស​ព្រហ្មទណ្ឌ​ក្ដី។ លោក​បន្ត​ថា អាជ្ញាធរ​ដែល​យល់ដឹង​អំពី​ច្បាប់ ហើយ​ទៅ​ប្រើប្រាស់​អំពើ​ហិង្សា​លើ​ស្ត្រី នេះ​វា​ជា​ការ​រំលោភ​សិទ្ធិមនុស្ស​ធ្ងន់ធ្ងរ។

លោក​បន្ត​ថា ករណី​នេះ​ប្រសិនបើ​រដ្ឋាភិបាល​នៅតែ​មិន​ចាត់​វិធានការ​ទៅ​លើ​ជន​បង្ក​ទេ វា​នឹង​ប៉ះពាល់​ដល់​មុខមាត់​រដ្ឋាភិបាល​លើ​ឆាក​អន្តរជាតិ ហើយ​ធ្វើ​ឲ្យ​សាធារណជន​ថ្កោលទោស និង​បាត់បង់​ជំនឿ​លើ​រដ្ឋាភិបាល​ផង​ដែរ។

លោក ស៊ឹង សែនករុណា បញ្ជាក់​ថា ការ​មិន​ចាត់​វិធានការ​នេះ វា​ជា​ការ​ជំរុញ និង​លើក​ទឹកចិត្ត​ដល់​អាជ្ញាធរ​ឱ្យ​ប្រព្រឹត្ត​អំពើ​ហិង្សា​បន្ត​ទៀត ឈាន​ដល់​ស្លាប់​ក៏​ថា​បាន​ដែរ ប្រសិនបើ​រដ្ឋាភិបាល​មិន​ចាត់​វិធានការ​ច្បាប់​លើ​អាជ្ញាធរ​មាន​សមត្ថកិច្ច​ទាំងនោះ។ លោក​ស្នើ​ទៅ​រដ្ឋាភិបាល​ពិនិត្យ​មើល​ឡើងវិញ​ចំពោះ​ទង្វើ​របស់​ក្រុម​សមត្ថកិច្ច ដែល​ប្រើ​អំពើ​ហិង្សា និង​វាយដំ​លើ​ស្ត្រី​ជា​កូដករ​ដែល​ធ្វើ​កូដកម្ម​ដោយ​សន្តិវិធី ដើម្បី​ទាមទារ​ដំណោះស្រាយ​វិវាទ​ការងារ​នោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស