27 C
Phnom Penh

អាមេរិក​និង​កូរ៉េ​ខាងត្បូង​នឹង​ធ្វើ​សមយុទ្ធ​ទ្រង់ទ្រាយ​ធំ​នៅ​ចំពោះ​មុខ​ការ​គំរាមកំហែង​ពី​កូរ៉េ​ខាងជើង

ដោយ ឌឹ ខេមបូឌា ដេលី

បទវិភាគ

កងទ័ព​នៃ​ប្រទេស​កូរ៉េ​ខាងត្បូង និង​សហរដ្ឋ​អាមេរិក នឹង​ចាប់ផ្ដើម​ធ្វើ​សមយុទ្ធ​យោធា​រួម​គ្នា​ដ៏​ធំ​បំផុត​មួយ​នៅ​សប្ដាហ៍​ក្រោយ​នេះ ដែល​ការ​ប្រកាស​នេះ​ចំ​ពេល​កូរ៉េ​ខាងជើង បន្ត​បាញ់​មីស៊ីល​ឲ្យ​ធ្លាក់​ក្នុង​សមុទ្រ​លឿង​នៃ​ឧបទ្វីប​កូរ៉េ នៅ​ថ្ងៃ​ពុធ ទី​១៧ ខែ​សីហា នេះ។

ទីភ្នាក់ងារ​ព័ត៌មាន Associated Press បាន​រាយការណ៍​ថា សមយុទ្ធ​នេះ​ធ្វើឡើង​ស្រប​ពេល​ដែល​មាន​ការ​ប្រឈម​នឹង​ភាព​គឃ្លើន​កើនឡើង​របស់​ប្រទេស​កូរ៉េ​ខាងជើង ដែល​ប្រទេស​នេះ​បាន​បង្កើន​ការ​សាកល្បង​បាញ់​មីស៊ីល និង​ការ​គំរាមកំហែង​បង្ក​ជម្លោះ​នុយក្លេអ៊ែរ​ប្រឆាំង​នឹង​កូរ៉េ​ខាងត្បូង និង​សហរដ្ឋ​អាមេរិក។

ប្រភព​ដដែល​ឲ្យ​ដឹង​ថា សមយុទ្ធ​រដូវក្ដៅ​ធ្វើឡើង​រួម​គ្នា​រវាង​សហរដ្ឋ​អាមេរិក និង​កូរ៉េ​ខាងត្បូង​នេះ នឹង​ប្រព្រឹត្ត​ទៅ​ពី​ថ្ងៃ​ទី​២២ ខែ​សីហា ដល់​ថ្ងៃទី​១ ខែ​កញ្ញា នៅ​ក្នុង​ប្រទេស​កូរ៉េ​ខាងត្បូង។

សមយុទ្ធ​នេះ​ត្រូវ​បាន​គេ​ហៅ​ថា «របាំង​ការពារ​សេរីភាព» ដោយ​មាន​ការ​ធ្វើ​សកម្មភាព​យោធា​នៅ​ទីវាល​ផ្ទាល់​ដែល​ចូលរួម​ដោយ​កង​យន្តហោះ​ចម្បាំង នាវាចម្បាំង កងរថក្រោះ និង​កងទ័ព​អាច​មាន​ជាង ១​ម៉ឺន​នាក់។ ការ​ធ្វើ​សមយុទ្ធ​នេះ ស្រប​ពេល​សហរដ្ឋ​អាមេរិក និង​កូរ៉េ​ខាងត្បូង ប្ដេជ្ញា​ចិត្ត​រួម​គ្នា​នៅ​ក្នុង​ការ​បន្ត​ឡើងវិញ​នូវ​ការ​ធ្វើ​សមយុទ្ធ​ទ្រង់ទ្រាយ​ធំ បន្ទាប់ពី​ប្រទេស​ទាំង​ពីរ​បាន​ផ្អាក​សមយុទ្ធ​ជា​ប្រចាំ​របស់​ខ្លួន​មួយ​ចំនួន​នៅ​ក្នុង​រយៈពេល​ប៉ុន្មាន​ឆ្នាំ​មក​នេះ ដោយសារតែ​ក្ដី​បារម្ភ​នៃ​ការ​រាតត្បាត​នៃ​ជំងឺ​កូវីដ-១៩។

សមយុទ្ធ​នេះ​ត្រូវ​បាន​មើល​ឃើញ​ថា ធ្វើឡើង​ដើម្បី​ការពារ​ខ្លួន​ទប់ទល់​នឹង​ការ​គំរាមកំហែង​ពី​សំណាក់​កូរ៉េ​ខាងជើង។ តែ​ចំពោះ​កូរ៉េ​ខាងជើង បាន​ហៅ​ការ​ធ្វើ​សមយុទ្ធ​របស់​អាមេរិក និង​កូរ៉េ​ខាងត្បូង ឬ​អាមេរិក​ជាមួយ​ជប៉ុន គឺជា​ទង្វើ​ដើម្បី​ត្រៀម​ឈ្លានពាន​កូរ៉េ​ខាងជើង។

ក្រសួង​ការពារ​ជាតិ​សហរដ្ឋ​អាមេរិក ក៏​បាន​ចេញ​សេចក្ដី​ប្រកាស​ព័ត៌មាន​ថា កងទ័ព​ជើងទឹក​របស់​អាមេរិក កូរ៉េ​ខាងត្បូង និង​ជប៉ុន បាន​ចូលរួម​នៅ​ក្នុង​ការ​ធ្វើ​សមយុទ្ធ​ត្រៀម​ទប់ទល់​នឹង​មីស៊ីល​ផ្លោង​អន្តរទ្វីប​នៅ​ឯ​សមុទ្រ​រដ្ឋ Hawaii ដែល​ធ្វើឡើង​ពី​ថ្ងៃ​ទី​៨ ដល់ទី​១៤ ខែ​សីហា កន្លង​ទៅ​នេះ។ សមយុទ្ធ​នេះ ក្នុង​គោលបំណង​ដើម្បី​ពង្រឹង​កិច្ច​សហប្រតិបត្តិការ​ត្រីភាគី ដើម្បី​ទប់ទល់​នឹង​ការ​ប្រឈម​ពី​សំណាក់​កូរ៉េ​ខាងជើង។

ស្រប​ពេល​ដែល​ដឹង​ថា​សហរដ្ឋ​អាមេរិក និង​កូរ៉េ​ខាងត្បូង នឹង​ធ្វើ​សមយុទ្ធ​រួម​គ្នា​ដ៏​ធំ​មួយ​នៅ​សប្ដាហ៍​ក្រោយ ត្រូវ​បាន​រាយការណ៍​មក​ថា កូរ៉េ​ខាងជើង​បាញ់​មីស៊ីល​ចំនួន ២​គ្រាប់​ឆ្ពោះ​ទៅ​កាន់​សមុទ្រ​លឿង។

មន្ត្រី​យោធា​កូរ៉េ​ខាងត្បូង​ម្នាក់​អះអាង​ថា កូរ៉េ​ខាងជើង​ទំនង​ជា​បាន​បាញ់​មីស៊ីល​គ្រួស​ចំនួន ២​គ្រាប់​ឆ្ពោះ​ទៅ​កាន់​សមុទ្រ​លឿង​នៅ​ថ្ងៃ​ពុធ ទី​១៧ ខែ​សីហា នេះ។

ទីភ្នាក់ងារ​សារព័ត៌មាន​កូរ៉េ Yonhap ឲ្យ​ដឹង​ថា កូរ៉េ​ខាងជើង​បន្ត​បាញ់​មីស៊ីល​នៅ​ថ្ងៃ​នេះ គឺ​បន្ទាប់ពី​ប្រធានាធិបតី​កូរ៉េ​ខាងត្បូង លោក Yoon Suk-yeol បាន​ធ្វើ​សន្និសីទ​សារព័ត៌មាន​នា​ឱកាស​ខួប ១០០​ថ្ងៃ​នៃ​ការ​ស្បថ​ចូល​កាន់​អំណាច​របស់​លោក ដែល​លោក​ថ្លែង​អំពី​ការ​ប្រកាន់​ជំហរ​ក្នុង​ការ​ប្រឈម​នឹង​កូរ៉េ​ខាងជើង។

កាលពី​ថ្ងៃទី​១៦ សីហា គឺជា​ទិវា​ឧបទ្វីប​កូរ៉េ ត្រូវ​បាន​រំដោះ​ចេញពី​ការ​គ្រប់គ្រង​របស់​ជប៉ុន លោក Yoon Suk-yeol បាន​ថ្លែង​អំពី​គម្រោង​កិច្ច​ផ្ដួចផ្ដើម​របស់​លោក​ដែល​សំដៅ​ចង់​ជួយ​លើក​កម្ពស់​សេដ្ឋកិច្ច​របស់​កូរ៉េ​ខាងជើង ក្នុង​ករណី​ដែល​ទីក្រុង​ព្យុងយ៉ាង សម្រេច​ទទួលយក​ការ​រំសាយ​កម្មវិធី​អាវុធ​នុយក្លេអ៊ែរ។ ការ​ថ្លែង​របស់​ប្រធានាធិបតី​កូរ៉េ​ខាងត្បូង​នេះ មើល​ទៅ​ដូចជា​បញ្ឆេះ​ឲ្យ​ក្រុង​ព្យុងយ៉ាង ប្រតិកម្ម ដែល​នាំ​ឲ្យ​កូរ៉េ​ខាងជើង​ឆ្លើយតប​ដោយ​បាញ់​មីស៊ីល​ចំនួន ២​គ្រាប់​ជា​ថ្មី​ទៀត​នេះ។

តែ​យ៉ាងណា លោក​ប្រធានាធិបតី​កូរ៉េ​ខាងត្បូង Yoon Suk-yeol បាន​និយាយ​នៅ​ថ្ងៃ​ពុធ​នេះ​ថា កិច្ច​ចរចា​ជាមួយ​កូរ៉េ​ខាងជើង មិន​គួរ​ធ្វើឡើង​ក្នុង​ន័យ​នយោបាយ ឬ​ឱ្យ​តែ​ល្អ​មើល​នោះ​ទេ គឺ​គួរតែ​ជា​ការ​ចូលរួម​ចំណែក​ដល់​ការ​ស្វែងរក​សន្តិភាព​តំបន់។

បើ​តាម​លោក Yoon Suk-yeol គឺ​ពិត​ណាស់ កូរ៉េ​ខាងត្បូង​មិនមែន​ជា​អ្នក​ធានា​សន្តិសុខ​ឱ្យ​កូរ៉េ​ខាងជើង​នោះ​ទេ ប្រសិនបើ​ក្រុង​ព្យុងយ៉ាង មិន​បោះបង់​ចោល​អាវុធ​នុយក្លេអ៊ែរ។ លោក​បញ្ជាក់​ថា ទីក្រុង​សេអ៊ូល អាច​ធានា​បាន លុះត្រាតែ​ទីក្រុង​ព្យុងយ៉ាង ទទួល​យក​កិច្ចព្រមព្រៀង​ជា​សកល​ដើម្បី​រំសាយ​កម្មវិធី​អាវុធ​នុយក្លេអ៊ែរ។

ការ​រំសាយ​កម្មវិធី​អាវុធ​នុយក្លេអ៊ែរ​កូរ៉េ​ខាងជើង គឺជា​គោលនយោបាយ​ការបរទេស​ដ៏​សំខាន់​មួយ​របស់​ប្រធានាធិបតី​កូរ៉េ​ខាងត្បូង និង​សហរដ្ឋ​អាមេរិក រួម​នឹង​ជប៉ុន។ តែ​យ៉ាងណា កូរ៉េ​ខាងជើង​ប្រកាស​ជំហរ​ថា​នឹង​មិន​បោះបង់​ចោល​អាវុធ​នុយក្លេអ៊ែរ​ជាដាច់ខាត ព្រោះ​អាវុធ​នេះ​គឺជា​តម្លៃ​មួយ​ដើម្បី​សន្តិភាព​របស់​កូរ៉េ​ខាងជើង។

បើ​តាម​គេហទំព័រ Global Fire ឲ្យ​ដឹង​ថា កូរ៉េ​ខាងជើង​អាច​មាន​អាវុធ​នុយក្លេអ៊ែរ​ពី ២៥​គ្រាប់​ទៅ ៣០​គ្រាប់។

កូរ៉េ​ខាងជើង និង​ខាងត្បូង គឺជា​សាច់ឈាម​នឹង​គ្នា។ ដែនដី​ពីរ​នេះ​ប្រកាន់​របប​នយោបាយ​ដឹកនាំ​ប្រទេស​ខុស​គ្នា។ កូរ៉េ​ខាងត្បូង​ប្រកាន់​របប​ប្រជាធិបតេយ្យ។ ចំណែក​កូរ៉េ​ខាងជើង​ប្រកាន់​របប​កុម្មុយនីស្ត​ផ្ដាច់ការ។

ដែនដី​ពីរ​នេះ​ធ្លាក់​ក្នុង​សង្គ្រាម​ស៊ីវិល​រយៈពេល ៤​ឆ្នាំ​នៅ​រវាង​ឆ្នាំ​១៩៥០ ដល់​ឆ្នាំ​១៩៥៣។ ទីក្រុង​សេអ៊ូល ជា​រដ្ឋធានី​របស់​កូរ៉េ​ខាងត្បូង។ ចំណែក​ទីក្រុង​ព្យុងយ៉ាង ជា​រដ្ឋធានី​របស់​កូរ៉េ​ខាងជើង។ ក្រោយ​បិទ​បញ្ចប់​សង្គ្រាម​នៅ​ឆ្នាំ​១៩៥៣ កងទ័ព​អាមេរិក​នៅ​បន្ត​វត្តមាន​នៅ​លើ​ទឹកដី​កូរ៉េ​ខាងត្បូង​ចំនួន ៤​ម៉ឺន​នាក់​មក​ដល់​នឹង​សព្វថ្ងៃ​នេះ។ ចំណែក​នៅ​លើ​ទឹកដី​ប្រទេស​ជប៉ុន ក៏​មាន​កងទ័ព​អាមេរិក​ប្រមាណ​ជា ៥​ម៉ឺន​នាក់​ផង​ដែរ។ វត្តមាន​ទ័ព​អាមេរិក គឺ​ដើម្បី​ជួយ​ពង្រឹង​ទ័ព​កូរ៉េ​ខាងត្បូង និង​ជប៉ុន​ទប់ទល់​នឹង​ការ​គំរាមកំហែង​ពី​សំណាក់​កូរ៉េ​ខាងជើង៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស