25 C
Phnom Penh

អគ្គស្នងការ​រង​នគរបាល​ជាតិ​ប្រាប់​មន្ត្រី​ត្រូវ​ប្រកាន់ខ្ជាប់​សច្ចធម៌​ដើម្បី​ផ្តល់​យុត្តិធម៌​ដល់​ពលរដ្ឋ

ដោយ ឌឹ ខេមបូឌា ដេលី

បទវិភាគ

អគ្គស្នងការ​រង​នគរបាល​ជាតិ លើកឡើង​ថា គ្រប់​ជនសង្ស័យ​ទាំងអស់​ដែល​ត្រូវ​ជាប់​ពាក់ព័ន្ធ​ក្នុង​ការ​ស៊ើបអង្កេត មិនមែន​សុទ្ធតែ​មាន​ទោស​នោះ​ទេ ក្នុង​នាម​ជា​មន្ត្រី​នគរបាល​យុត្តិធម៌​ម្នាក់​ត្រូវ​ប្រកាន់ខ្ជាប់​នូវ​សច្ចធម៌ និង​ធ្វើការ​ស៊ើបអង្កេត​ឲ្យ​បាន​ច្បាស់លាស់ ដើម្បី​ជៀសវាង​កើតមាន​នូវ​អំពើ​អយុត្តិធម៌​ទៅ​លើ​ប្រជាពលរដ្ឋ​ដែល​គ្មាន​កំហុស។

អគ្គស្នងការ​រង​នគរបាល​ជាតិ លោក អ៊ី សុខឃី បាន​លើកឡើង​ក្នុង​ពិធី​បិទ​វគ្គ​បំប៉ន​ជំនាញ​ស្ដីពី​ក្រម​ព្រហ្មទណ្ឌ ក្រម​នីតិវិធី​ព្រហ្មទណ្ឌ និង​វិធានការ​ស៊ើបអង្កេត​នៅ​អគ្គស្នងការដ្ឋាន​នគរបាល​ជាតិ​កាលពី​ថ្ងៃទី​១៧ ខែ​សីហា ឆ្នាំ​២០២២ ថា ក្នុង​ដំណាក់កាល​ស៊ើបអង្កេត គឺ​ត្រូវ​រក​ខុស រក​ត្រូវ ក្នុង​នោះ​បើ​ស៊ើបអង្កេត​ទៅ​រក​ឃើញ​ថា​មាន​កំហុស ត្រូវតែ​ធ្វើការ​ចោទប្រកាន់ ប៉ុន្តែ​បើ​ស៊ើបអង្កេត​ទៅ​រក​ឃើញ​ថា​គ្មាន​កំហុស ត្រូវតែ​ធ្វើ​សេចក្តី​រាយការណ៍​បញ្ជាក់​ថា​គ្មាន​កំហុស នោះ​ទើប​សង្គម​ជាតិ​កម្ពុជា​មាន​យុត្តិធម៌​ពិតប្រាកដ។

អគ្គស្នងការ​រង​នគរបាល​ជាតិ​រូប​នេះ​ណែនាំ​ទៅ​កាន់​សិក្ខាកាម​ជា​នគរបាល​ចំនួន ១៥៤​រូប​ថា ត្រូវតែ​ប្រកាន់ខ្ជាប់​នូវ​វិន័យ ក្រម​សីលធម៌ សច្ចធម៌ យុត្តិធម៌ ប្រកប​ដោយ​វិជ្ជាជីវៈ​ជំនាញ ជាពិសេស​អនុវត្ត​ឲ្យ​បាន​នូវ​វិន័យ​ក្នុង​កងកម្លាំង​នគរបាល​ជាតិ ធ្វើ​យ៉ាង​ណា​កុំ​ឲ្យ​សំណុំរឿង​បង្ក​នូវ​ភាព​អយុត្តិធម៌​ដល់​ពលរដ្ឋ​ដែល​គ្មាន​កំហុស ដើម្បី​ទប់ស្កាត់ បង្ក្រាប​បទល្មើស ព្រមទាំង​បំពេញ​ភារកិច្ច​ឲ្យ​ស្រប​តាម​នីតិវិធី​ប្រកប​ដោយ​ប្រសិទ្ធភាព​ខ្ពស់។

លោក អ៊ី សុខឃី បញ្ជាក់​ថា ក្នុង​នាម​ជា​នគរបាល​ជាតិ​ដែល​ជា​អ្នក​ថែរក្សា​សន្តិសុខ​ជូន​ប្រជាពលរដ្ឋ ម្នាក់ៗ​ត្រូវតែ​អនុវត្ត​ការងារ​ជំនាញ​របស់​ខ្លួន​ប្រកប​ដោយ​ប្រសិទ្ធភាព​ខ្ពស់ មិន​ធ្វើ​សកម្មភាព​ផ្ទុយ​ពី​ច្បាប់​កំណត់​នោះ​ឡើយ ក្នុង​នោះ​គឺ​ត្រូវ​បង្កើន​កិច្ចសហការ​ជាមួយ​អង្គភាព​ស្ថាប័ន​ពាក់ព័ន្ធ ជាពិសេស​គឺ​ជាមួយ​អយ្យការ​អម​សាលាដំបូង​រាជធានី​ភ្នំពេញ ក្នុង​ការ​ស្រាវជ្រាវ​ស៊ើបអង្កេត ដើម្បី​ជៀសវាង​ជន​ស្លូតត្រង់​ត្រូវ​រងគ្រោះ​ដោយសារ​កំណត់ហេតុ​របស់​ខ្លួន។

ប្រធាន​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ (CCIM) លោក ប៉ា ងួនទៀង បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃ​ពុធ ទី​១៧ សីហា នេះ​ថា ភាព​អយុត្តិធម៌​ក្នុង​សង្គម​កម្ពុជា​កំពុង​រីក​ដុះដាល​យ៉ាង​ធ្ងន់ធ្ងរ ដូចជា​អំពើ​អយុត្តិធម៌​ដែល​កើតមាន​តាម​ប្រព័ន្ធ​តុលាការ កើតមាន​រវាង​មន្ត្រី អ្នក​មាន​អំណាច​ទៅ​លើ​ប្រជាពលរដ្ឋ និង​អំពើ​អយុត្តិធម៌​ដែល​កើតមាន​ពី​ការ​បែងចែក​ទ្រព្យសម្បត្តិ​ជាតិ​មិន​មាន​តម្លាភាព​ពី​សំណាក់​រាជរដ្ឋាភិបាល ជាដើម។

លោក ប៉ា ងួនទៀង បញ្ជាក់​ថា ប្រជាពលរដ្ឋ​ខ្មែរ​ស្ទើរតែ​ទូទាំង​ប្រទេស​សុទ្ធសឹងតែ​បាន​រង​នូវ​ភាព​អយុត្តិធម៌​ក្រោម​ការ​ដឹកនាំ​របស់​រាជរដ្ឋាភិបាល​សព្វថ្ងៃ​នេះ ដូចជា​អំពើ​អយុត្តិធម៌​ក្នុង​ការ​រំលោភ​ដីធ្លី​របស់​ប្រជាពលរដ្ឋ ការ​បង្ក្រាប​ដើម្បី​បិទ​សិទ្ធិ​សេរីភាព​បញ្ចេញ​មតិ ការ​ចាប់​ឃុំ​ខ្លួន​សកម្មជន​នានា​ដែល​កាត់ទោស​ដោយ​ប្រើ​ច្បាប់​ព្រហ្មទណ្ឌ ដែល​ប្រាសចាក​ពី​ខ្លឹមសារ​រដ្ឋធម្មនុញ្ញ ការ​ជាន់​ឈ្លី​លទ្ធិប្រជាធិបតេយ្យ​តាមរយៈ​នៃ​ការ​បិទ​លំហ​សេរីភាព​នយោបាយ និង​បង្កើត​ឱ្យ​មាន​អំពើ​និទ្ទណ្ឌភាព​លើ​ឃាតកម្ម​ក្រៅ​ប្រព័ន្ធ​សព្វថ្ងៃ​នេះ ជាដើម។

ទាក់ទិន​នឹង​បញ្ហា​នេះ កាលពី​ចុង​ខែ​វិច្ឆិកា ឆ្នាំ​២០២១ ប្រធាន​សហភាព​សហជីព​កម្ពុជា លោក រ៉ុង ឈុន លាតត្រដាង​ថា អំឡុង​ពេល​ដែល​លោក​ត្រូវ​បាន​តុលាការ​ឃុំ​ខ្លួន​អស់​រយៈពេល​ជាង ១​ឆ្នាំ​កន្លងមក លោក​បាន​សង្កេត​ឃើញ​ថា តុលាការ​នៅ​កម្ពុជា​គ្រាន់តែ​ជា​ទីផ្សារ​ទិញ​លក់​រឿង​ក្តី​តែប៉ុណ្ណោះ មិនមែន​ជា​កន្លែង​រក​យុត្តិធម៌​ជូន​ជនរងគ្រោះ​នោះ​ឡើយ។

ក្រុម​អ្នក​ឃ្លាំមើល​សង្គម​អះអាង​ថា បច្ចុប្បន្ន​នេះ ស្ថាប័ន​ដែល​ជា​សសរស្ដម្ភ​ធំៗ​ទាំង​បី​របស់​ជាតិ គឺ​ស្ថាប័ន​នីតិប្បញ្ញត្តិ ស្ថាប័ន​នីតិប្រតិបត្តិ និង​ស្ថាប័ន​តុលាការ បាន​ក្លាយ​ជា​ឧបករណ៍​របស់​បក្ស​កាន់​អំណាច​ទាំងស្រុង​ទៅ​ហើយ ដូច្នេះ​យុត្តិធម៌​នឹង​កើតមាន​សម្រាប់​តែ​បក្ខពួក​អ្នក​មាន​អំណាច​ប៉ុណ្ណោះ ខណៈ​ពលរដ្ឋ​ស្លូតត្រង់​គឺជា​អ្នក​ទទួល​រងគ្រោះ​រហូត។

សេចក្តី​រាយការណ៍​ស្ដីពី​នីតិរដ្ឋ​ឆ្នាំ​២០២១ នៃ​គម្រោង​យុត្តិធម៌​ពិភពលោក (The World Justice Project) បាន​រក​ឃើញ​ថា កម្ពុជា​បាន​ជាប់​ចំណាត់ថ្នាក់​លេខ​ទី​១៣៨ ក្នុង​ចំណោម​ប្រទេស​១៣៩ ដោយសារតែ​ការ​ដឹកនាំ​គ្មាន​តម្លាភាព មាន​ការ​គំរាមកំហែង​សិទ្ធិ​ជា​មូលដ្ឋាន​របស់​ពលរដ្ឋ និង​ការ​មិន​ធានា​បាន​នូវ​ប្រព័ន្ធ​យុត្តិធម៌​របស់​ខ្លួន​តាម​ផ្លូវ​តុលាការ ជាដើម៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស