25 C
Phnom Penh

អ្នក​ឃ្លាំមើល​ថា​ការ​ដក​លោក សាន្ត ប៊ុនធឿន ពី​កងកម្លាំង​ការពារ​ជាតិ​ជា​រឿង​ល្អ​ដើម្បី​កុំ​ឲ្យ​មាន​គំរូ​អាក្រក់​ក្នុង​សង្គម

ដោយ ឌឹ ខេមបូឌា ដេលី

បទវិភាគ

ក្រុម​អ្នក​ឃ្លាំមើល​សង្គម​អះអាង​ថា ការ​ដក​តំណែង​លោក សាន្ត ប៊ុនធឿន ចាងហ្វាង​កាសែត​គ្មាន​ក្រមសីលធម៌ និង​វិជ្ជាជីវៈ ក្រោម​ការ​ទំនុក​បម្រុង​របស់​គ្រួសារ​ត្រកូល «ហ៊ុន» ពី​កងកម្លាំង​ការពារ​ជាតិ ជា​រឿង​ល្អ ដើម្បី​កុំ​ឲ្យ​អ្នក​ដទៃ​យក​គំរូ​តាម ពីព្រោះ​ទង្វើ​របស់​បុគ្គល​រូប​នេះ​បាន​ជះ​ឥទ្ធិពល​អាក្រក់​ទៅ​ដល់​យុវជន​ដែល​ប្រើប្រាស់​បណ្ដាញ​សង្គម​ហ្វេសប៊ុក​សព្វថ្ងៃ។

ស្ថាបនិក​អង្គការ​អភិវឌ្ឍន៍​ផ្នត់គំនិត លោក សេក សុជាតិ បាន​ប្រាប់​សារព័ត៌មាន The Cambodia Daily នៅ​ថ្ងៃទី​២២ សីហា នេះ​ថា យោង​តាម​ករណី​លោក សាន្ត ប៊ុនធឿន នេះ អាច​សន្និដ្ឋាន​បាន​ថា ក្រសួង និង​ស្ថាប័ន​ពាក់ព័ន្ធ​មួយ​ចំនួន​នៅ​ខ្វះ​ការ​យកចិត្ត​ទុកដាក់ និង​បណ្ដែតបណ្ដោយ​ឲ្យ​បុគ្គល​គ្មាន​សីលធម៌​រូប​នេះ​អុកឡុក​សង្គម​តាម​ទំនើងចិត្ត​រហូត​មក។ លោក​បន្ថែម​ថា ការ​ដែល​គ្មាន​ចំណាត់ការ​នេះ ក៏​បង្ហាញ​ពី​សមត្ថភាព​របស់​មន្ត្រី​ពាក់ព័ន្ធ​នៅ​ក្នុង​ក្រសួង និង​ស្ថាប័ន​ថា​នៅ​មាន​កម្រិត​នៅឡើយ ប៉ុន្តែ​ក៏​ប្រហែល​ជា​ពួកគេ​មិន​ហ៊ាន​ចាត់​វិធានការ​តាម​នីតិវិធី​ច្បាប់​នោះ​ដែរ ដោយសារតែ​ខ្លាច​ឥទ្ធិពល​របស់​ជន​ខិលខូច​ទាំងនោះ​ដូចជា​ករណី​លោក សាន្ត ប៊ុនធឿន ជាដើម ដែល​មាន​លោក ហ៊ុន សែន ជា​អ្នក​ជួយ​ឧបត្ថម្ភ​ពី​ក្រោយ​ខ្នង​រហូត​មក​នោះ។

លោក សេក សុជាតិ លើកឡើង​ថា លោក សាន្ត ប៊ុនធឿន ជា​មនុស្ស​ដែល​ចូលចិត្ត​ផឹក​ស៊ី និង​ប្រើ​សម្ដី​គ្មាន​ក្រមសីលធម៌ រួម​ទាំង​បង្ហាញ​សកម្មភាព​ហិង្សា​លើ​បណ្ដាញ​សង្គម​ហ្វេសប៊ុក​ជា​ប្រចាំ ដូច្នេះ​ទង្វើ​បែប​នេះ​គួរតែ​ត្រូវ​បាន​ទប់ស្កាត់​ជា​យូរ​ហើយ ដើម្បី​លើក​កម្ពស់​សីលធម៌​សង្គម​ឱ្យ​បាន​ល្អ​ប្រសើរ និង​ដើម្បី​ទប់ស្កាត់​ទង្វើ​អាក្រក់​បែប​នេះ​រីក​រាលដាល​កាន់តែ​ខ្លាំង​ឡើងៗ។

ស្ថាបនិក​អង្គការ​អភិវឌ្ឍន៍​ផ្នត់គំនិត​រូប​នេះ​បញ្ជាក់​ថា ការ​ដក​លោក សាន្ត ប៊ុនធឿន ចេញពី​ក្របខ័ណ្ឌ​ក្រសួង​ការពារ​ជាតិ​នេះ មិនមែន​ជា​ការ​បញ្ចប់​ភាព​អវិជ្ជមាន​របស់​មន្ត្រី​ខិលខូច​នៅ​ក្នុង​ស្ថាប័ន​រដ្ឋ​នោះ​ទេ គ្រាន់តែ​ជា​ការ​ដាស់តឿន​តូច​មួយ​ប៉ុណ្ណោះ ដូច្នេះ​ក្រសួង ស្ថាប័ន​ពាក់ព័ន្ធ គួរ​អនុវត្ត​ច្បាប់​ឲ្យ​បាន​ល្អ និង​ឈប់​បណ្ដែតបណ្ដោយ​ឲ្យ​មាន​ទង្វើ​បែប​នេះ​បន្ត​ទៀត ហើយ​គួរ​បង្កើត​កម្មវិធី​អប់រំ​សីលធម៌​សង្គម ព្រមទាំង​ធ្វើ​ការ​ផ្សព្វផ្សាយ​ឲ្យ​បាន​ទូលំទូលាយ​ផង​ដែរ។

កាលពី​ថ្ងៃទី​២១ ខែ​សីហា ឆ្នាំ​២០២២ លោក ហ៊ុន សែន បាន​សរសេរ​លើ​ទំព័រ​ហ្វេសប៊ុក​របស់​លោក ដោយ​ភ្ជាប់​ជាមួយ​វីដេអូ​ផឹក​ស៊ី​បោក​បំបែក​ចាន និង​ប្រើ​ពាក្យ​អសុរោះ​មួយ​ចំនួន ដែល​ក្នុង​នាម​ជា​អ្នក​សារព័ត៌មាន​មិន​គួរ​ប្រើ ថា​ចរិត​ពាល​របស់​លោក សាន្ត ប៊ុនធឿន ប្រាកដ​ជា​មិន​អាច​កែប្រែ​បាន​នោះ​ឡើយ។

បុរស​ខ្លាំង​កម្ពុជា​ឧស្សាហ៍​ប្រើ​កណ្ដាប់ដៃ​ដែក លោក ហ៊ុន សែន បញ្ជាក់​ថា ក្រុម​គ្រួសារ​របស់​លោក​បាន​ផ្តល់​លុយ​ឱ្យ​លោក សាន្ត ប៊ុនធឿន ច្រើន​ណាស់​ដើម្បី​ទិញ​ផ្ទះ​រស់នៅ រួម​ទាំង​ផ្តល់​ជា​ប្រាក់ខែ ៥០០​ដុល្លារ​អាមេរិក​ក្នុង​មួយ​ខែ​ថែម​ទៀត​ចាប់ពី​ឆ្នាំ​២០១៨ មក។ លោក ហ៊ុន សែន បន្ថែម​ថា លោក​ធ្លាប់​បាន​អប់រំ​លោក សាន្ត ប៊ុនធឿន កុំ​ឱ្យ​ស៊ីផឹក​ជេរ​បញ្ចោរ​រហូត​មក ប៉ុន្តែ​ចរិត​មនុស្ស​នេះ​កែ​មិន​ឡើង​ឡើយ។

នៅ​ថ្ងៃទី​២២ ខែ​សីហា ឆ្នាំ​២០២២ នេះ អគ្គមេបញ្ជាការ​នៃ​កងយោធពល​ខេមរភូមិន្ទ លោក វង្ស ពិសេន បាន​ចេញ​លិខិត​មួយ​ច្បាប់​ទៅ​កាន់​រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ ស្នើ​លុប​ឈ្មោះ​វរសេនីយ៍ត្រី សាន្ត ប៊ុនធឿន ចេញពី​ក្របខ័ណ្ឌ​កងយោធពល​ខេមរភូមិន្ទ បន្ទាប់ពី​មាន​ប្រតិកម្ម​របស់​លោក​ប្រមុខ​រដ្ឋាភិបាល​កម្ពុជា​រួច​មក ខណៈ​មេ​បញ្ជាការដ្ឋាន​កង​អង្គរក្ស​លោក ហ៊ីង ប៊ុនហៀង ក៏​បាន​ស្នើសុំ​លុប​ឈ្មោះ​លោក សាន្ត ប៊ុនធឿន ពី​អង្គភាព​ផង​ដែរ។

លោក សាន្ត ប៊ុនធឿន ដែល​គេ​ស្គាល់​ថា​ជា​ចាងហ្វាង​កាសែត​មួយ​រូប​ដែល​ចូលចិត្ត​ផឹក​ស្រា ជេរ​ប្រមាថ និង​ប្រើ​ពាក្យ​អសុរោះ ដោយ​ប្រើ​បណ្ដាញ​សង្គម​ហ្វេសប៊ុក​ផ្សព្វផ្សាយ​ពី​សកម្មភាព​របស់​ខ្លួន​កន្លងមក បាន​ធ្វើ​ការ​ផ្សាយ​ចេញពី​ខេត្ត​បន្ទាយមានជ័យ នៅ​ពេល​ដែល​ចាងហ្វាង​កាសែត​រូប​នេះ​ផឹក​ស្រា​កាលពី​ថ្ងៃទី​២០ សីហា និង​បាន​ជេរ​ប្រមាថ ដោយ​ប្រើ​ពាក្យ​អសុរោះ​ផ្សេងៗ​ដែល​ក្នុង​នាម​ជា​អ្នក​សារព័ត៌មាន​មិន​គួរ​ប្រើ​សម្ដី​ហិង្សា និង​បោក​បំបែក​ចាន​ដើម្បី​ទាមទារ​សាច់​ក្លែម​នោះ​ទេ។

ប៉ុន្តែ​ក្រោយ​ការ​ប្រកាស​របស់​លោក ហ៊ុន សែន ចាងហ្វាង​កាសែត​គ្មាន​ក្រមសីលធម៌​រូប​នេះ បាន​ធ្វើ​ការ​ផ្សាយ​តាម​បណ្ដាញ​សង្គម​ហ្វេសប៊ុក​កាលពី​ថ្ងៃទី​២១ សីហា ម្តង​ទៀត ដោយ​ធ្វើការ​សុំទោស​លោក ហ៊ុន សែន ថា​ខ្លួន​គ្រាន់​សម្ដែង ដើម្បី​ឱ្យ​មាន​ការ​ចាប់អារម្មណ៍ និង​មាន​អ្នក​ចូល​មើល​ក្នុង​ការ​ផ្សព្វផ្សាយ​របស់​ខ្លួន​ប៉ុណ្ណោះ។

យ៉ាងណាក៏ដោយ នៅ​ថ្ងៃទី​២២ ខែ​សីហា ឆ្នាំ​២០២២ នេះ រដ្ឋមន្ត្រី​ក្រសួង​ព័ត៌មាន លោក ខៀវ កាញារីទ្ធ បាន​ចេញ​សេចក្តី​ប្រកាស​សម្រេច​លុប​អាជ្ញាប័ណ្ណ​ព័ត៌មាន​របស់​លោក សាន្ត ប៊ុនធឿន មិន​ឱ្យ​ផ្សព្វផ្សាយ​បន្ត​ទៀត​នោះ​ទេ ដោយសារតែ​ក្រសួង​មើល​ឃើញ​ថា ចាងហ្វាង​កាសែត​រូប​នេះ​ប្រព្រឹត្ត​ទង្វើ​អសីលធម៌ ជេរ​ប្រមាថ​ជា​សាធារណៈ ដែល​ធ្វើ​ឱ្យ​ប៉ះពាល់​ដល់​សេចក្តី​ថ្លៃថ្នូរ​របស់​អ្នក​សារព័ត៌មាន​អាជីព​យ៉ាង​ធ្ងន់ធ្ងរ​នា​ពេល​កន្លងមក៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស