សកម្មជននយោបាយខ្លះនិយាយថា ការផ្តល់តួនាទីទៅដល់ក្រុមអតីតមន្ត្រីគណបក្សក្រៅរដ្ឋាភិបាលដែលបានចុះចូលជាមួយបក្សកាន់អំណាច បង្ហាញឱ្យឃើញថា ពួកគេមិនមែនចូលប្រឡូកក្នុងទីលាននយោបាយដើម្បីរកផលប្រយោជន៍សម្រាប់ជាតិនោះទេ គឺពួកគេកំពុងស្វែងរកផលប្រយោជន៍ឱ្យខ្លួនឯងតែប៉ុណ្ណោះ។
លោក ហ៊ុន កុសល ដែលជាសកម្មជនបក្សប្រឆាំង បានប្រាប់សារព័ត៌មាន The Cambodia Daily នៅថ្ងៃទី២២ សីហា នេះថា ការចុះចូលជាមួយគណបក្សកាន់អំណាច គឺជារឿងរបស់បុគ្គលផ្ទាល់ខ្លួនរបស់ពួកគេ ដែលនឹងមិនប៉ះពាល់អ្វីដល់ស្មារតីតស៊ូ និងភក្តីភាពរបស់ប្រជាជនដែលគាំទ្រលទ្ធិប្រជាធិបតេយ្យដើម្បីផ្លាស់ប្ដូរនោះទេ។ ផ្ទុយទៅវិញ ទង្វើបែបនេះគ្រាន់តែជាការបង្កនូវភាពអាម៉ាស់ដល់ខ្លួនឯងយ៉ាងធ្ងន់ធ្ងរ ក្រោយការថ្កោលទោសជុំទិសពីពលរដ្ឋប៉ុណ្ណោះ។
លោក ហ៊ុន កុសល លើកឡើងថា បញ្ហាធំបំផុតសម្រាប់កម្ពុជា គឺលំហលទ្ធិប្រជាធិបតេយ្យ និងសិទ្ធិរបស់ពលរដ្ឋ ដែលត្រូវបានជនផ្ដាច់ការគាបសង្កត់មិនឱ្យមានការប្រកួតប្រជែងដោយសេរី ត្រឹមត្រូវ និងយុត្តិធម៌។ ដូច្នេះ បក្សក្រៅរដ្ឋាភិបាលមួយចំនួនពុំគួរចូលរួមបង្កើតភាពអយុត្តិធម៌ជាមួយពួកគេ ដើម្បីធ្វើរឿងក្លែងបន្លំបោកប្រាស់ពលរដ្ឋដែលស្មោះត្រង់នឹងលទ្ធិប្រជាធិបតេយ្យនោះឡើយ។
កាលពីថ្ងៃទី១៧ ខែសីហា ឆ្នាំ២០២២ ព្រះមហាក្សត្រខ្មែរបានចេញព្រះរាជក្រឹត្យតែងតាំងអតីតមន្ត្រីជាន់ខ្ពស់គណបក្សខ្មែរស្រឡាញ់ជាតិ ចំនួន ៦រូប រួមមានលោក កង គឹមហាក់ លោក ខឺយ ស៊ីនឿន និងលោក តាន់ ទីន ជាដើម ជាទីប្រឹក្សារបស់ក្រសួងប្រៃសណីយ៍ និងទូរគមនាគមន៍ ដែលមានឋានៈស្មើនឹងអនុរដ្ឋលេខាធិការខ្លះ និងមានឋានៈស្មើអគ្គនាយកខ្លះ តាមការស្នើសុំរបស់លោក ហ៊ុន សែន បន្ទាប់ពីអ្នកទាំងនោះនាំគ្នាទៅចុះចូលជាមួយគណបក្សកាន់អំណាចកាលពីពេលកន្លងទៅ។
កាលពីថ្ងៃទី២៩ ខែកក្កដា ឆ្នាំ២០២២ ប្រធានគណបក្សខ្មែរស្រឡាញ់ជាតិ លោក ជីវ កត្តា លោក ខឺយ ស៊ីនឿន លោក កង គឹមហាក់ និងមន្ត្រីជាន់ខ្ពស់ ៦នាក់ផ្សេងទៀត បានចេញលិខិតប្រកាសរំលាយគណបក្សខ្មែរស្រឡាញ់ជាតិ ដោយមិនបានឆ្លងកាត់សមាជរបស់គណបក្សនោះឡើយ។
ក្នុងលិខិតដដែលនោះ បញ្ជាក់ថា ក្រោមការដឹកនាំប្រទេសដ៏ត្រឹមត្រូវរបស់បក្សកាន់អំណាចដែលមានលោក ហ៊ុន សែន ជាមេដឹកនាំ បានធ្វើឲ្យប្រទេសមានសុខសន្តិភាព និងការអភិវឌ្ឍ ដូច្នេះក្រុមរបស់លោកពុំមានហេតុផលអ្វីដែលត្រូវនៅធ្វើជាអ្នកប្រឆាំងទៀតឡើយ។ ជាងនេះទៀត ពួកគេក៏បានប្រកាសគាំទ្រការធ្វើវិសោធនកម្មលើកទី១០ របស់បក្សកាន់អំណាចផងដែរ។
ទាក់ទិននឹងបញ្ហានេះ កាលពីថ្ងៃទី២៨ ខែវិច្ឆិកា ឆ្នាំ២០២១ អតីតប្រធានគណបក្សខ្មែរស្រឡាញ់ជាតិ លោក ជីវ កត្តា ធ្លាប់បានអះអាងថា លោកនឹងដឹកនាំគណបក្សនេះឆ្ពោះទៅរកការបង្កើតរដ្ឋាភិបាលមួយដែលដឹកនាំតាមរបៀបលទ្ធិប្រជាធិបតេយ្យពិតប្រាកដ ខុសពីការដឹកនាំរបស់បក្សកាន់អំណាចបច្ចុប្បន្ន។
គណបក្សខ្មែរស្រឡាញ់ជាតិ ត្រូវបានបង្កើតឡើងកាលពីឆ្នាំ២០២០ ក្រោមការផ្ដួចផ្ដើមរបស់អតីតមន្ត្រីជាន់ខ្ពស់គណបក្សសង្គ្រោះជាតិ រួមមានលោក ជីវ កត្តា លោក ខឺយ ស៊ីនឿន និងលោក កង គឹមហាក់ ជាដើម បន្ទាប់ពីគណបក្សសង្គ្រោះជាតិត្រូវបានតុលាការប្រកាសរំលាយកាលពីអំឡុងខែវិច្ឆិកា ឆ្នាំ២០១៧ កន្លងទៅនោះ៕