សកម្មជនសិទ្ធិមនុស្ស កញ្ញា សេង ធារី ទាមទារផ្លាស់ប្ដូរការឃុំខ្លួនពីខេត្តព្រះវិហារ មកឃុំខ្លួននៅក្នុងពន្ធនាគារព្រៃសក្នុងទីក្រុងភ្នំពេញវិញ ពីព្រោះការឃុំខ្លួនបច្ចុប្បន្ននៅឆ្ងាយ បង្កផលពិបាកសម្រាប់អ្នកដែលចង់ទៅសួរសុខទុក្ខ។
ប្រធានគណៈកម្មាធិការកម្ពុជាឯករាជ្យប្រឆាំងអំពើពុករលួយ អ្នកស្រី ម៉ម ស៊ីថា បានសរសេរលើគណនីហ្វេសប៊ុករបស់ខ្លួនកាលពីថ្ងៃទី២២ ខែសីហា ឆ្នាំ២០២២ ថា អ្នកស្រីបានចូលទៅពន្ធនាគារខេត្តព្រះវិហារ ជួបសំណេះសំណាលដោយផ្ទាល់ជាមួយកញ្ញា សេង ធារី។ អ្នកស្រីបន្តថា ស្មារតីរបស់កញ្ញា សេង ធារី មិនស្រុតចុះនោះឡើយ គឺនៅដូចមុនដដែល ប៉ុន្តែកញ្ញាត្អូញត្អែរថា ការឃុំក្នុងពន្ធនាគារខេត្តព្រះវិហារ គឺកញ្ញាមានអារម្មណ៍ឯកោណាស់ ព្រោះថាខេត្តនេះគឺជាខេត្តដែលឆ្ងាយដាច់សង្វែងពីទីក្រុងភ្នំពេញខ្លាំងណាស់ ដែលមានការពិបាកសម្រាប់អ្នកដែលចង់ទៅសួរសុខទុក្ខកញ្ញា។
អ្នកស្រីបន្ថែមថា កញ្ញា សេង ធារី សប្បាយចិត្តយ៉ាងខ្លាំងនៅពេលដែលបានឃើញអ្នកស្រីដែលជាមិត្តភ័ក្ដិទៅសួរសុខទុក្ខកញ្ញាដល់ពន្ធនាគារខេត្តព្រះវិហារ នេះ។ អ្នកស្រីបន្តថា កញ្ញា សេង ធារី មានសុខភាពល្អ ស្រស់ស្រាយ និងមានប្រឡោះទទួលទានដំណេកសមល្មមមិនចង្អៀតណែននោះទេ ហើយក៏មានខ្យល់អាកាសល្អសមរម្យថែមទៀត ខណៈម្ហូបអាហារក៏មិនអាក្រក់ណាស់ណាដែរ។ បន្ថែមពីនេះ កញ្ញាក៏ត្រូវបានអនុញ្ញាតឲ្យចេញក្រៅបន្ទប់ឃុំឃាំង ៤ម៉ោងជារៀងរាល់ថ្ងៃផងដែរ។
កាលពីថ្ងៃទី១៤ ខែមិថុនា ឆ្នាំ២០២២ សាលាដំបូងរាជធានីភ្នំពេញបានសម្រេចផ្ដន្ទាទោសកញ្ញា សេង ធារី ដាក់ពន្ធនាគារចំនួន ៦ឆ្នាំ និងចេញដីកាបង្គាប់ឱ្យចាប់ខ្លួនភ្លាមៗនៅមុខសាលាដំបូងរាជធានីភ្នំពេញ ដែលមានសមត្ថកិច្ចប្រមាណ ៥០នាក់ ដោយបញ្ជូនពលរដ្ឋខ្មែរ-អាមេរិកាំងរូបនេះទៅឃុំខ្លួនក្នុងពន្ធនាគារព្រៃសភ្លាមៗក្រោមបទចោទ «រួមគំនិតក្បត់»។
ប៉ុន្តែនៅថ្ងៃទី១៥ ខែមិថុនា កញ្ញា សេង ធារី ត្រូវបានសមត្ថកិច្ចក្រុងភ្នំពេញបញ្ជូនទៅឃុំខ្លួននៅពន្ធនាគារខេត្តព្រះវិហារ ក្រោមហេតុផលថា កន្លងមក កញ្ញា សេង ធារី បានធ្វើសកម្មភាពមួយចំនួននាំឱ្យមានភាពចលាចល ដូច្នេះខាងពន្ធនាគារត្រូវមានការប្រុងប្រយ័ត្នខ្ពស់បញ្ចៀសកុំឲ្យក្រុមអ្នកគាំទ្រកញ្ញា សេង ធារី ធ្វើបាតុកម្មនៅខាងមុខមណ្ឌលអប់រំកែប្រែរបស់ខ្លួន។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី២៣ សីហា នេះថា ក្រុមអង្គការសង្គមស៊ីវិលតែងទទូចឲ្យតុលាការពិចារណាមិនត្រឹមតែស្នើឲ្យយកកញ្ញា សេង ធារី មកឃុំខ្លួននៅគុកព្រៃសក្នុងទីក្រុងភ្នំពេញវិញនោះទេ គឺស្នើឲ្យមានការពិចារណាទម្លាក់ចោលបទចោទ និងដោះលែងកញ្ញាឱ្យមានសេរីភាពឡើងវិញតែម្តង។
លោក ស៊ឹង សែនករុណា លើកឡើងថា ការស្នើសុំឲ្យដោះលែងនេះ គឺដើម្បីឲ្យកម្ពុជាមានឱកាសបញ្ជាក់ទៅសហគមន៍អន្តរជាតិ ជាពិសេសប្រទេសលោកសេរីឲ្យមើលមកកម្ពុជាថា បានចាប់ផ្តើមបើកនូវលំហសិទ្ធិមនុស្ស និងលទ្ធិប្រជាធិបតេយ្យប្រសើរឡើងវិញ ហើយផលចំណេញទាំងនេះនឹងបានដល់សង្គមជាតិទាំងអស់គ្នាជាមិនខាន។
របាយការណ៍ស្ដីពីនីតិរដ្ឋឆ្នាំ២០២១ នៃគម្រោងយុត្តិធម៌ពិភពលោក (The World Justice Project) បានរកឃើញថា កម្ពុជាបានជាប់ចំណាត់ថ្នាក់លេខទី១៣៨ ក្នុងចំណោមប្រទេស១៣៩ ដោយសារតែការដឹកនាំគ្មានតម្លាភាព ការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួនតាមផ្លូវតុលាការពីសំណាក់រដ្ឋាភិបាលកម្ពុជាសព្វថ្ងៃនេះ៕