លោក សៅ សុខា ចេញបញ្ជាទៅមេបញ្ជាការកងរាជអាវុធតាមខេត្តទាំងអស់ឲ្យស្រាវជ្រាវ និងចាត់វិធានការលើមន្ត្រីអាវុធហត្ថណាដែលប្រព្រឹត្តបទល្មើសធនធានធម្មជាតិ ក្រោយរកឃើញអនុប្រធានការិយាល័យបំភាន់អក្ខរៈនៃកងរាជអាវុធហត្ថលើផ្ទៃប្រទេស កំពុងរកស៊ីជួញដូរ និងកាប់បំផ្លាញព្រៃឈើ។
ក្នុងសារសំឡេងដែលមានរយៈពេលប្រមាណ ៤នាទី អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា បានលើកឡើងថា អនុប្រធានការិយាល័យបំភាន់អក្ខរៈនៃកងរាជអាវុធហត្ថលើផ្ទៃប្រទេស លោក ចាប សារ៉ន កំពុងរកស៊ីឈើខុសច្បាប់។ លោកបន្តថា មន្ត្រីខ្លះទោះបីជាដឹងអនុប្រធានការិយាល័យរូបនេះកំពុងរកស៊ីខុសច្បាប់ក្ដី ប៉ុន្តែមិនមានមន្ត្រីណាមួយធ្វើរបាយការណ៍ទៅលោកឡើយ។
លោក សៅ សុខា បញ្ជាក់ថា រូបលោកនឹងចាត់វិធានការលើអនុប្រធានការិយាល័យបំភាន់អក្ខរៈនៃកងរាជអាវុធហត្ថលើផ្ទៃប្រទេស លោក ចាប សារ៉ន និងមន្ត្រីកងរាជអាវុធហត្ថផ្សេងទៀត ដោយថាបើសិនជាទុកមន្ត្រីទាំងនោះឲ្យបន្តធ្វើការទៀត វានឹងបង្កភាពចង្រៃបង្កើតរឿងនៅក្នុងកងរាជអាវុធហត្ថមិនខាន។
លោក សៅ សុខា ក៏បានចេញបញ្ជាឲ្យស្រាវជ្រាវ បើសិនរកឃើញមន្ត្រីកងរាជអាវុធហត្ថណាជាប់ពាក់ព័ន្ធ និងប្រព្រឹត្តបទល្មើសធនធានធម្មជាតិផ្ទុយពីគោលការណ៍ប្រមុខរដ្ឋាភិបាល ត្រូវអនុវត្តច្បាប់លក្ខន្តិកៈកងយោធពលខេមរភូមិន្ទ ព្រមទាំងបណ្ដេញចេញពីជួរកងទ័ព ហើយបើមានភស្តុតាងត្រូវបន្តកសាងសំណុំរឿងបញ្ជូនទៅតុលាការតាមច្បាប់។
ក្រៅពីប្រកាសចាត់វិធានការលើមន្ត្រីកងរាជអាវុធហត្ថប្រព្រឹត្តបទល្មើសព្រៃឈើធនធានធម្មជាតិហើយ លោក សៅ សុខា ក៏បានបញ្ជាទៅមេបញ្ជាការគ្រប់ខេត្តត្រូវចាត់វិធានការភ្លាម ដោយត្រួតពិនិត្យកងកម្លាំងរបស់ខ្លួន ប៉ុន្តែបើសិនមេបញ្ជាការខេត្តនោះជួយលាក់លៀម គឺស្មើនឹងពួកគេសមគំនិតដែរ។ លោកបញ្ជាក់ថា បើសិនមន្ត្រីទាំងនោះធ្វើជាអ្នករកស៊ីឈើ ត្រូវឈប់ធ្វើអាវុធហត្ថ ទោះបីជាស្របច្បាប់ក៏ដោយ។
លោក សៅ សុខា បន្តថា កន្លងមករូបលោកបានរំឭក និងដាស់តឿនច្រើនដងហើយ ប៉ុន្តែម្ដងនេះលោកអនុវត្តតាមអភិក្រមទាំង៥ របស់បុរសខ្លាំង លោក ហ៊ុន សែន ហើយការអនុវត្តអភិក្រមនេះ គឺវះកាត់តែម្ដង ដោយគ្មានងូតទឹកដុសក្អែលអ្វីទៀតឡើយ ដូច្នេះមេបញ្ជាការខេត្តទាំងអស់ជាអ្នកត្រូវទទួលខុសត្រូវ ប៉ុន្តែបើប្រធានស្ថាប័នណាមួយគ្រប់គ្រងបុគ្គលិកខ្លួនឯងមិនបាន ប្រធានស្ថាប័ននឹងទទួលខុសត្រូវ និងគួរសរសេរលិខិតលាឈប់ពីកងរាជអាវុធហត្ថទៅ។
សកម្មជនការពារព្រៃឈើ លោក ហេង ស្រស់ បានយល់ឃើញថា មិនមែនមានតែលោក ចាប សារ៉ន ទេដែលជាអ្នកកាប់បំផ្លាញព្រៃឈើ នៅក្នុងនោះដែរក៏មានក្រុម និងជនដទៃទៀតដែលបានចូលដៃចូលជើងក្នុងការកាប់បំផ្លាញព្រៃឈើ។ លោក សៅ សុខា គួរតែបើកការស៊ើបអង្កេតឲ្យបានហ្មត់ចត់ ដើម្បីចាត់វិធានការផ្លូវច្បាប់ទៅក្រុមឧក្រិដ្ឋជនទាំងអស់នោះ។
លោកបានបន្ថែមទៀតថា កាលដែលលោក ចាប សារ៉ន អាចកាប់ឈើទៅបាន លុះត្រាតែមន្ត្រីរដ្ឋាភិបាលអនុញ្ញាត ដូច្នេះអ្នកតែជាប់ពាក់ព័ន្ធទាំងអស់ត្រូវតែទទួលខុសត្រូវទៅតាមច្បាប់ ជាពិសេសមន្ត្រីរបស់ក្រសួងបរិស្ថាន ហេតុអ្វីបានជាបណ្ដោយឲ្យមានការកាប់ឈើនៅក្នុងតំបន់ព្រៃឡង់។ លោកថា រូបលោកមានទាំងឯកសារ និងភស្តុតាងអំពីការកាប់ឈើនៅតំបន់ព្រៃឡង់។
អង្គការលើកលែងទោសអន្តរជាតិ (Amnesty International) បានចេញរបាយការណ៍មួយនៅថ្ងៃទី២៨ ខែមករា ឆ្នាំ២០២២ បានបង្ហាញថា ព្រៃឈើចំនួន ៦២៧១ហិកតារត្រូវបានកាប់បំផ្លាញនៅក្នុងដែនជម្រកសត្វព្រៃចំនួនពីរ ក្នុងនោះមានដែនជម្រកសត្វព្រៃព្រៃឡង់ និងដែនជម្រកសត្វព្រៃព្រះរការ ដោយការកាប់ឈើខុសច្បាប់យ៉ាងច្រើនសន្ធឹកសន្ធាប់កំពុងប៉ះពាល់ធ្ងន់ធ្ងរដល់សិទ្ធិ និងវប្បធម៌របស់ជនជាតិដើមភាគតិច៕