25 C
Phnom Penh

រដ្ឋាភិបាល​កាត់​ផ្ទៃដី​បឹង​តាមោក​៣​ហិកតារ​ឲ្យ​តារា​ចម្រៀង​លោក ព្រាប សុវត្ថិ

ដោយ ឌឹ ខេមបូឌា ដេលី

បទវិភាគ

រដ្ឋាភិបាល​កាត់​ផ្ទៃដី​បឹង​តាមោក​ចំនួន ៣​ហិកតារ​ឲ្យ​តារា​ចម្រៀង លោក ព្រាប សុវត្ថិ ដើម្បី​ធ្វើ​កម្មសិទ្ធិ ខណៈ​ផ្ទៃដី​ជាង ២​ពាន់​ហិកតារ​ទៀត​ត្រូវ​បាន​បុរស​ខ្លាំង​លោក ហ៊ុន សែន ប្រគល់​ទៅ​ឲ្យ​សែស្រឡាយ​របស់​លោក និង​មន្ត្រី​ជាន់ខ្ពស់​របស់​លោក​នៅ​ក្នុង​ជួរ​បក្ស​ប្រជាជន​កម្ពុជា ព្រមទាំង​មន្ត្រី​ជាន់ខ្ពស់​នៃ​កងរាជ​អាវុធហត្ថ ជាដើម។

ក្នុង​អនុក្រឹត្យ​ចុះហត្ថលេខា​ដោយ​លោក ហ៊ុន សែន កាលពី​ថ្ងៃទី​១៣ ខែ​មេសា ឆ្នាំ​២០២២ ដែល ឌឹ ខេមបូឌា ដេលី ទើប​ទទួល​បាន ឲ្យ​ដឹង​ថា ការ​កាត់​ផ្ទៃដី​បឹង​តាមោក​ចំនួន​ពីរ​ទីតាំង​ស្មើ​នឹង ៣​ហិកតារ​ក្នុង​ខណ្ឌ​ព្រែកព្នៅ រាជធានី​ភ្នំពេញ ប្រគល់​ឲ្យ​លោក ព្រាប សុវត្ថិ ដើម្បី​ធ្វើជា​កម្មសិទ្ធិ​ចាប់​ពី​ថ្ងៃ​ចុះហត្ថលេខា​តទៅ។

កន្លងមក ក្រុម​អង្គការ​សង្គម​ស៊ីវិល និង​យុវជន​បាន​បង្ហាញ​ក្ដី​បារម្ភ និង​ស្នើ​ទៅ​លោក ហ៊ុន សែន ឲ្យ​ពិចារណា​ដោយ​បញ្ឈប់​ការ​បន្ត​កាត់ និង​ការ​ចាក់​ខ្សាច់​លុប​បឹង​តាមោក ដោយ​ថា​ការ​កាត់ និង​លុប​បឹង​ធម្មជាតិ​ចុងក្រោយ​នឹង​បង្ក​ជា​ជំនន់​ទឹកភ្លៀង​លិច​ទីក្រុង​ភ្នំពេញ ប៉ុន្តែ​រដ្ឋាភិបាល​កម្ពុជា​មិន​អើពើ​ឡើយ។

កាលពី​ថ្ងៃទី​៨ ខែ​វិច្ឆិកា ឆ្នាំ​២០២១ បុរស​ខ្លាំង​កម្ពុជា លោក ហ៊ុន សែន បាន​ថ្លែង​ថា បញ្ហា​ទឹកជំនន់​ដែល​បង្ក​ឱ្យ​លិច​រាជធានី​ភ្នំពេញ មិនមែន​បណ្ដាល​មកពី​ការ​លុប​បឹង​ធម្មជាតិ​នោះ​ទេ។ លោក​ថា កន្លងមក ទោះបីជា​មិន​លុប​បឹង រាជធានី​ភ្នំពេញ​ក៏​មាន​ទឹកជំនន់​ដែរ ដែល​ករណី​នេះ​លោក​ថា​គួរតែ​ឈប់​រិះគន់​ទៅ។

អ្នកស្រី ចក់ សុភាព នាយិកា​មជ្ឈមណ្ឌល​សិទ្ធិមនុស្ស​កម្ពុជា (CCHR) បាន​សរសេរ​នៅ​លើ​ហ្វេសប៊ុក​នៅ​ថ្ងៃទី​២ កញ្ញា នេះ​ថា ប៉ុន្មាន​ខែ​មុន ជនជាតិ​ជប៉ុន​មួយ​រូប​បាន​បរិច្ចាគ​ដី​ដែល​ខ្លួន​ទិញ​ជូន​សាលាក្រុង​ទុក​ធ្វើ​សួន​បម្រើ​ផលប្រយោជន៍​សាធារណៈ ហើយ​ប៉ុន្មាន​ឆ្នាំ​កន្លងមក​ក៏​មាន​តារា​ស្រី​មួយ​រូប​ដែល​មាន​ភាព​ក្លាហាន​លើក​ជា​សំណើ​ទៅ​កាន់​នាយករដ្ឋមន្ត្រី សូម​រក្សា​បឹង​តាមោក សូម​កុំ​លុប​បឹង​នេះ ហើយ​នាយករដ្ឋមន្ត្រី​ក៏​ព្រម​ដែរ។

អ្នកស្រី​បាន​សរសេរ​ទៀត​ថា តែ​ពេល​នេះ អ្វីៗ​ស្ទើរតែ​រលាយ​ទាំងស្រុង បឹង​ក៏​ត្រូវ​បាន​គេ​លេប​ត្របាក់​ពុះ​ច្រៀក​ចែក​ក្រុម បក្សពួក តារា​ក៏​មាន​ចំណែក ក្រសួង ឬ​ភ្នាក់ងារ​រដ្ឋ​ខ្លះ​ក៏​មាន​ចំណែក អ្នក​មាន​ទ្រព្យ​ធន​មាន​អំណាច​ខ្លះ​ក៏​មាន​ចំណែក ដោយ​មិន​មាន​ការ​ពន្យល់​អំពី​ហេតុផល ឬ​ការ​ថ្លឹងថ្លែង​អំពី​ផល​ប៉ះពាល់​ដល់​បរិស្ថាន និង​សង្គម ខ្វះ​តម្លាភាព ហើយ​អ្វី​ដែល​សំខាន់​ទៅ​ទៀត​នោះ គឺ​ការ​មិន​កាន់​ពាក្យ​សច្ចៈ​ក្នុង​ការ​រក្សា​ការពារ​បឹង​នេះ។

អ្នកស្រី​អះអាង​ថា ភ្នំ​តាម៉ៅ​អស់​ព្រៃ​ហើយ បែរ​ជា​ប្រឹង​ដាំ​ដើមឈើ​ឡើងវិញ ចុះ​បឹង​តាមោក​លុប​បាត់​ទៅ​ហើយ​នឹង​មាន​អ្វី​កែច្នៃ?

បឹង​តាមោក​មាន​ផ្ទៃដី​សរុប ៣២៣៩​ហិកតារ ជា​អាង​ស្តុក​ទឹក​កខ្វក់ និង​រំដោះ​ទឹក​ចេញពី​រាជធានី​ភ្នំពេញ ហើយ​បឹង​នេះ​ត្រូវ​បាន​រដ្ឋាភិបាល​ចេញ​អនុក្រឹត្យ​មួយ​កាលពី​ដើម​ខែ​កុម្ភៈ ឆ្នាំ​២០១៦ ដោយ​កំណត់​ជា​សម្បត្តិ​សាធារណៈ​របស់​រដ្ឋ។

សេចក្តី​រាយការណ៍​របស់​អង្គការ​សមាគម​ធាងត្នោត ដែល​បាន​ចេញ​ផ្សាយ​នៅ​ថ្ងៃទី​១០ ខែ​កុម្ភៈ ឆ្នាំ​២០២២ បាន​លើកឡើង​ថា គិត​ត្រឹម​ខែ​ធ្នូ ឆ្នាំ​២០២១ ផ្ទៃ​បឹង​តាមោក ឬ​បឹង​កប់ស្រូវ​ជាង ២​ពាន់​ហិកតារ (២០៩៤,៧១៦៥​ហិកតារ) ឬ​ស្មើ​នឹង​ជិត ៦៥% ត្រូវ​បាន​រដ្ឋាភិបាល​កាត់​ឱ្យ​ឧកញ៉ា ក្រុមហ៊ុន​ឯកជន និង​ស្ថាប័ន​សាធារណៈ​ដែល​សរុប​នៃ​ការ​កាត់​ទាំងអស់​មាន​ចំនួន ៤៣​ដង។ បើ​តាម​ផែនទី ផ្ទៃ​បឹង​តាមោក ឬ​បឹង​ទំនប់​កប់ស្រូវ​ស្ទើរតែ​ទាំងស្រុង​ត្រូវ​បាន​កាត់​គ្រប់​ទីកន្លែង​តែម្តង៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស