29 C
Phnom Penh

មន្ត្រី CNRP៖ លោក កឹម សុខា ទទួល​ខុសត្រូវ​តែ​ការ​ធ្វើ​បាតុកម្ម​នៅ​ទីលាន​ប្រជាធិបតេយ្យ​តែប៉ុណ្ណោះ

ដោយ ឌឹ ខេមបូឌា ដេលី

បទវិភាគ

លោក មុត ចន្ថា អះអាង​ថា មេដឹកនាំ​បក្ស​ប្រឆាំង លោក កឹម សុខា ទទួល​ខុសត្រូវ​តែ​ការ​ធ្វើ​បាតុកម្ម​ដែល​ស្ថិត​នៅ​ទីលាន​ប្រជាធិបតេយ្យ​តែប៉ុណ្ណោះ ចំពោះ​ការ​ធ្វើ​បាតុកម្ម​នៅ​កន្លែង​ផ្សេង​ដែល​ដឹកនាំ​ដោយ​អ្នក​ដទៃ លោក​មិន​ទទួល​ខុសត្រូវ​ឡើយ។

អតីត​នាយក​ខុទ្ទកាល័យ​ប្រធាន​គណបក្ស​សង្គ្រោះ​ជាតិ លោក មុត ចន្ថា បាន​សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃទី​៨ កញ្ញា នេះ​ថា ទោះបីជា​ពុំ​មាន​ភស្តុតាង​ណា​មួយ​បញ្ជាក់​ថា​លោក កឹម សុខា ឬ​គណបក្ស​សង្គ្រោះ​ជាតិ​មិន​បាន​បញ្ជា​ឱ្យ​រៀបចំ​ឱ្យ​មាន​បាតុកម្ម​នៅ​កន្លែង​ផ្សេង​ទៀត ដែល​ត្រូវ​បាន​រៀបចំ​ដោយ​បុគ្គល​ដទៃ​ក៏ដោយ ក៏​តំណាង​អយ្យការ​ខំ​គាស់​កកាយ​លើក​យក​បាតុកម្ម​នៅ​កន្លែង​ផ្សេងៗ ដូចជា​បាតុកម្ម​មុខ​វត្ត​ស្ទឹងមានជ័យ បាតុកម្ម​ផ្លូវ​វេងស្រេង បាតុកម្ម​នៅ​រោងចក្រ SL បាតុកម្ម​នៅ​ស្ពាននាគ ជាដើម មក​ផ្សារភ្ជាប់​ជាមួយ​សំណុំរឿង​លោក កឹម សុខា ជា​បន្តបន្ទាប់។

កាលពី​ថ្ងៃទី​៧ ខែ​កញ្ញា ឆ្នាំ​២០២២ ក្នុង​សវនាការ​លើក​ទី​៥៥ លើ​ប្រធាន​គណបក្ស​សង្គ្រោះ​ជាតិ លោក កឹម សុខា ក្នុង​អង្គហេតុ​ប្រទូសរ៉ាយ តំណាង​អយ្យការ​លោក ឆាយ ហុង និង​លោក ប្លង់ សុផល បាន​សួរ​ពី​ការ​យល់​ឃើញ​របស់​លោក កឹម សុខា ទាក់ទិន​ការ​ធ្វើ​បាតុកម្ម​នៅ​ផ្លូវ​វេងស្រេង​កាលពី​ឆ្នាំ​២០១៤ កន្លងទៅ ប៉ុន្តែ​ត្រូវ​លោក កឹម សុខា ច្រានចោល​ការ​ភ្ជាប់​រូបលោក​ទៅ​នឹង​ការ​ធ្វើ​បាតុកម្ម​នោះ។

ជុំវិញ​សកម្មភាព​នៃ​ការ​ធ្វើ​បាតុកម្ម​នៅ​ស្ពាន​អាកាស​ក្បាលថ្នល់ ក្នុង​រាជធានី​ភ្នំពេញ​កាលពី​ថ្ងៃ​ទី​១៥ ខែ​កញ្ញា ឆ្នាំ​២០១៣ ដែល​បង្ក​ឱ្យ​ខូច​ទ្រព្យសម្បត្តិ និង​មាន​អំពើ​ហិង្សា សាលាដំបូង​រាជធានី​ភ្នំពេញ​បាន​កាត់ទោស​មនុស្ស ៦​នាក់​រួច​ហើយ​អំពី​បទ​បង្ក​ឱ្យ​ខូច​ទ្រព្យសម្បត្តិ និង​បង្ក​ឱ្យ​មាន​អំពើ​ហិង្សា​កាលពី​ថ្ងៃទី​២៨ ខែ​កុម្ភៈ ឆ្នាំ​២០១៤ កន្លងទៅ។

ចំណែក​ការ​ធ្វើ​បាតុកម្ម​នៅ​រោងចក្រ​កាត់ដេរ SL រោងចក្រ យ៉ាកជីង និង​ការ​ធ្វើ​បាតុកម្ម​ពី​កម្មករ​នៅ​ផ្លូវ​វេងស្រេង នា​ថ្ងៃទី​២ និង​ថ្ងៃទី​៣ ខែ​មករា ឆ្នាំ​២០១៤ ក៏​ត្រូវ​សាលាដំបូង​រាជធានី​ភ្នំពេញ​បើក​សវនាការ​នៅ​ថ្ងៃទី​៦ ខែ​ឧសភា ឆ្នាំ​២០១៤ ដោយ​ប្រកាស​សាលក្រម​កាត់ទោស​ប្រធាន​សមាគម​ប្រជាធិបតេយ្យ​ឯករាជ្យ​សេដ្ឋកិច្ច​ក្រៅ​ប្រព័ន្ធ លោក វន់ ពៅ និង​មនុស្ស ២២​នាក់​ផ្សេង​ទៀត​នៅ​ថ្ងៃទី​៣០ ខែ​ឧសភា ឆ្នាំ​២០១៤ រួច​ហើយ​ដែរ។

ដោយឡែក​ការ​ធ្វើ​បាតុកម្ម​នៅ​ស្ពាននាគ​កាលពី​ថ្ងៃទី​១៥ ខែ​កក្កដា ឆ្នាំ​២០១៤ សាលាដំបូង​រាជធានី​ភ្នំពេញ​ក៏​សម្រេច​កាត់ទោស​សកម្មជន​គណបក្ស​សង្គ្រោះ​ជាតិ​ចំនួន ១១​នាក់ ពី​បទ​ជាប់​ពាក់ព័ន្ធ​នឹង​ការ​ធ្វើ​កុប្បកម្ម​ដែល​នាំ​ឲ្យ​កើត​អំពើ​ហិង្សា​នៅ​ស្ពាននាគ​កាលពី​ថ្ងៃទី​២១ ខែ​កក្កដា ឆ្នាំ​២០១៥ រួច​អស់​ហើយ​ដែរ ដូច្នេះ​ការ​ភ្ជាប់​សកម្មភាព​ទាំងនោះ​ទៅ​នឹង​លោក កឹម សុខា ជា​រឿង​ដែល​មិន​សម​ហេតុផល​នោះ​ឡើយ។

លោក មុត ចន្ថា បាន​អះអាង​ទៀត​ថា ទាំង​បាតុកម្ម​នៅ​ទីលាន​ប្រជាធិបតេយ្យ និង​ការ​ដើរ​ដង្ហែ​ក្បួន​តាម​ដងផ្លូវ​នៃ​គណបក្ស​សង្គ្រោះ​ជាតិ មិន​ដែល​មាន​ការ​ប៉ះទង្គិច​ដោយ​ហិង្សា​ដែល​នាំ​ឱ្យ​មាន​គ្រោះថ្នាក់​ដល់​ប្រជាពលរដ្ឋ ឬ​ទ្រព្យសម្បត្តិ​ឯកជន និង​សាធារណៈ​ម្តង​ណា​ឡើយ បើ​ទោះបីជា​មាន​ការ​បង្ក្រាប​ពី​សំណាក់​អាជ្ញាធរ​លើ​បាតុករ​អហិង្សា​ខាង​គណបក្ស​សង្គ្រោះ​ជាតិ នា​ដើម​ខែ​មករា ឆ្នាំ​២០១៤ ក៏ដោយ។

លោក មុត ចន្ថា បន្ត​ទៀត​ថា ការ​ធ្វើ​បាតុកម្ម​ពី​គណបក្ស​សង្គ្រោះ​ជាតិ​នៅ​ទីលាន​ប្រជាធិបតេយ្យ បាន​កំណត់​ពី​គោលបំណង​របស់​គណបក្ស​យ៉ាង​ច្បាស់ គឺ​ដើម្បី​ទាមទារ​ឱ្យ​បង្កើត​គណៈកម្មការ​ឯករាជ្យ​ស្វែងរក​យុត្តិធម៌​នៃ​ការ​បោះឆ្នោត​ក្នុង​ខែ​កក្កដា ឆ្នាំ​២០១៣ ក្រោម​គោលការណ៍​អហិង្សា ដែល​ដឹកនាំ​ធ្វើ​ដោយ​គោរព​យ៉ាង​ម៉ឺងម៉ាត់​តាម​ក្រមសីលធម៌ និង​តាម​បទបញ្ញត្តិ​នៃ​ច្បាប់​ជា​ធរមាន។

ជុំវិញ​បញ្ហា​នេះ នាយក​ទទួល​បន្ទុក​កិច្ចការ​ទូទៅ​នៃ​អង្គការ​ការពារ​សិទ្ធិមនុស្ស​លីកាដូ លោក អំ សំអាត បាន​ប្រាប់​សារព័ត៌មាន​ក្នុង​ស្រុក​ថា ការ​ភ្ជាប់​លោក កឹម សុខា ទៅ​នឹង​ការ​ធ្វើ​បាតុកម្ម​នៅ​ផ្លូវ​វេងស្រេង ស្ពាននាគ ព្រមទាំង​ស្ពាន​អាកាស​ក្បាលថ្នល់ ជាដើម គ្រាន់តែ​ជា​ការ​ពន្យារ​ពេល​របស់​តុលាការ​ប៉ុណ្ណោះ។ លោក​ថា សំណុំរឿង​លោក កឹម សុខា អាច​នឹង​បន្ត​អូស​បន្លាយ​ពេល​ទៅ​មុខ​យូរ​ទៀត បើ​អ្នក​នយោបាយ​មិន​ព្រម​ចរចា​គ្នា។

ពី​ថ្ងៃ​ទី​២ ឈាន​ចូល​ថ្ងៃទី​៣ ខែ​កញ្ញា ឆ្នាំ​២០១៧ អាជ្ញាធរ​រដ្ឋាភិបាល​លោក ហ៊ុន សែន បាន​សម្រុក​ចូល​ចាប់​ខ្លួន​លោក កឹម សុខា ទាំង​កណ្ដាល​អាធ្រាត្រ​ដល់​គេហដ្ឋាន​របស់​លោក​ក្នុង​ពេល​ដែល​លោក​កំពុង​មាន​អភ័យ​ឯកសិទ្ធិ​សភា​នៅឡើយ ក្រោម​បទ​ចោទប្រកាន់​ថា​លោក​ត្រូវរ៉ូវ​គ្នា​ជាមួយ​សហរដ្ឋ​អាមេរិក ដើម្បី​ផ្ដួល​រំលំ​រដ្ឋាភិបាល​កម្ពុជា។ រយៈពេល ៥​ឆ្នាំ​ហើយ តែ​តុលាការ​នៅ​តែ​រក​មិន​ទាន់​ឃើញ​ថា លោក កឹម សុខា មាន​ទោស​នៅឡើយ​ទេ ខណៈ​សហគមន៍​ជាតិ និង​អន្តរជាតិ បាន​ចាត់ទុក​ការ​ចាប់​ខ្លួន​នេះ​ជា​រឿង​នយោបាយ​ច្រើន​ជាង​ការ​អនុវត្ត​ច្បាប់៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស