29 C
Phnom Penh

អាជ្ញាធរ​អនុញ្ញាត​ឲ្យ​យុវជន​មិន​លើស​៥​នាក់​ប្រមូលផ្ដុំ​មុខ​ក្រសួង​មហាផ្ទៃ​រឿង​ស្នើសុំ​ឲ្យ​បញ្ឈប់​ផ្ដល់​ប័ណ្ណ​ស្នាក់នៅ​អចិន្ត្រៃយ៍​ដល់​ជនបរទេស

ដោយ ឌឹ ខេមបូឌា ដេលី

បទវិភាគ

រដ្ឋបាល​សាលា​រាជធានី​ភ្នំពេញ អនុញ្ញាត​ឲ្យ​ក្រុម​យុវជន​ប្រមូលផ្ដុំ​នៅ​មុខ​ក្រសួង​មហាផ្ទៃ ដើម្បី​ធ្វើការ​ដាក់​ញត្តិ​ស្នើ​ឲ្យ​ក្រសួង​បញ្ឈប់​ការ​ផ្ដល់​ប័ណ្ណ​ស្នាក់នៅ​អចិន្ត្រៃយ៍​ដល់​ជនបរទេស​ដែល​កំពុង​ស្នាក់នៅ​ប្រទេស​កម្ពុជា នៅ​ថ្ងៃទី​១៩ ខែ​កញ្ញា តែ​មិន​ឲ្យ​លើស​ពី ៥​នាក់ ដើម្បី​កុំ​ឱ្យ​ប៉ះពាល់​ដល់​សណ្ដាប់ធ្នាប់​សាធារណៈ។

ក្នុង​កំណត់ហេតុ​របស់​រដ្ឋបាល​រាជធានី​ភ្នំពេញ បន្ទាប់ពី​ជួប​ប្រជុំ​ជាមួយ​ក្រុម​យុវជន​កាលពី​ថ្ងៃទី​៧ ខែ​កញ្ញា ឆ្នាំ​២០២២ បាន​ឲ្យ​ដឹង​ថា ក្រុម​យុវជន​អាច​ជួប​គ្នា​នៅ​មុខ​ក្រសួង​មហាផ្ទៃ ដើម្បី​ដាក់​ញត្តិ​បាន ប៉ុន្តែ​មិន​ឲ្យ​លើស​ពី ៥​នាក់​ឡើយ។ ការ​មិន​អនុញ្ញាត​ឲ្យ​ពួកគេ​ជួបជុំ​គ្នា​លើស​ពី ៥​នាក់​នេះ ដោយ​អភិបាលរង​សាលា​រាជធានី​ភ្នំពេញ​លើក​ហេតុផល​ថា កុំ​ឱ្យ​ប៉ះពាល់​ដល់​សណ្ដាប់ធ្នាប់​សាធារណៈ។

យុវជន​មកពី​ខេត្ត​សៀមរាប លោក ថេល ធីលែន គ្រោង​នឹង​ជួបជុំ​គ្នា​នៅ​មុខ​ក្រសួង​មហាផ្ទៃ នៅ​ថ្ងៃទី​១២ ខែ​កញ្ញា នេះ ដើម្បី​ទាមទារ​ឱ្យ​ក្រសួង​បញ្ឈប់​ការ​ផ្ដល់​ប័ណ្ណ​ស្នាក់នៅ​អចិន្ត្រៃយ៍ ការ​ផ្តល់​សិទ្ធិ​ពេញលេញ​ដល់​ជនបរទេស​ក្នុង​ការ​ប្រកប​អាជីវកម្ម​នៅ​ប្រទេស​កម្ពុជា និង​ទាមទារ​ឱ្យ​ក្រសួង​អប់រំ យុវជន និង​កីឡា លុប​ចោល​ការ​បង្កើត​អគារ​សិក្សា​ភាសា​វៀតណាម​នៅ​សាកលវិទ្យាល័យ​ភូមិន្ទ​ភ្នំពេញ ប៉ុន្តែ​គម្រោង​ដាក់​ញត្តិ​នេះ​ត្រូវ​បាន​ប្ដូរ​ទៅ​ថ្ងៃទី​១៩ ខែ​កញ្ញា វិញ។

យោង​តាម​សារព័ត៌មាន​វៀតណាម​ញ៉ូវស៍ (Vietnam News ) ចុះផ្សាយ​កាលពី​ខែ​មករា ឆ្នាំ​២០១៩ បាន​លើកឡើង​ថា ប្រមាណ ៨០​ភាគរយ​នៃ​ប្រជាពលរដ្ឋ​វៀតណាម​រស់នៅ​កម្ពុជា​បាន​ទទួល​ភាព​ស្រប​ច្បាប់​ក្នុង​ការ​រស់នៅ គឺ​ការ​ផ្ដល់​ការ​អនុគ្រោះ​ឱ្យ​ជ្រកកោន ការ​ផ្ដល់​នូវ​ប័ណ្ណ​ស្នាក់នៅ​អចិន្ត្រៃយ៍ ដែល​ទាំងអស់​នេះ​ធ្វើ​ឱ្យ​ពួកគេ​មាន​លទ្ធភាព​ក្នុង​ការ​ទទួល​បាន​សញ្ជាតិ​ខ្មែរ​ដោយ​អនុលោម​តាម​ច្បាប់​សញ្ជាតិ និង​ច្បាប់​អន្តោប្រវេសន៍។

អនុប្រធាន​គណៈកម្មការ​កិច្ចការ​អន្តោប្រវេសន៍​វៀតណាម លោក ឡួង ថាច់ ងី បាន​ប្រាប់​សារព័ត៌មាន​វៀតណាម​ញ៉ូវស៍ ថា ប្រជាពលរដ្ឋ​វៀតណាម​ប្រមាណ ១១​ម៉ឺន​នាក់​កំពុង​រស់នៅ​ប្រទេស​កម្ពុជា ហើយ​ច្រើន​តែ​រស់នៅ​ម្ដុំ​បឹង​ទន្លេសាប​ដែល​ជា​បឹង​ធម្មជាតិ​ដ៏​ធំ​ជាងគេ​នៅ​អាស៊ី​អាគ្នេយ៍។

លោក​បាន​បញ្ជាក់​ទៀត​ថា ជនជាតិ​វៀតណាម​បាន​សម្រប​ខ្លួន​ជា​សហគមន៍​នៅ​ប្រទេស​កម្ពុជា រស់នៅ អភិវឌ្ឍ​ខ្លួន និង​រួម​ចំណែក​កសាង​នូវ​ការ​អភិវឌ្ឍ​សេដ្ឋកិច្ច​សង្គម​នៃ​ប្រទេស​នេះ តែ​ថា​ក៏​មាន​ពលរដ្ឋ​វៀតណាម​មួយ​ចំនួន​ទៀត​មិនទាន់​ទទួល​បាន​ភាព​ស្រប​ច្បាប់​នៅឡើយ។

គួរ​បញ្ជាក់​ផង​ដែរ​ថា ក្នុង​ជំនួប​ទ្វេភាគី​ជាមួយ​លោក ង្វៀន វ៉ាន់ហ្វុក អនុរដ្ឋមន្ត្រី​ក្រសួង​អប់រំ និង​បណ្តុះបណ្តាល​នៃ​សាធារណរដ្ឋ​សង្គម​និយម​វៀតណាម កាលពី​ថ្ងៃទី​៩ ដល់​ថ្ងៃទី​១២ ខែ​សីហា ឆ្នាំ​២០២២ រដ្ឋមន្ត្រី​ក្រសួង​អប់រំ យុវជន និង​កីឡា លោក ហង់ ជួន ណារ៉ុន បាន​យល់ព្រម​ឲ្យ​បង្កើត​ដេប៉ាតឺម៉ង់​បង្រៀន​ភាសា​វៀតណាម​នៅ​ក្នុង​សាកលវិទ្យាល័យ​ភូមិន្ទ​ភ្នំពេញ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស