លោក ហ៊ុន សែន ថ្លែងថា បុណ្យភ្ជុំឆ្នាំនេះ រូបលោកមិនបាននៅដោយសារជាប់បេសកកម្មនៅក្រៅប្រទេសចន្លោះពីថ្ងៃទី២១ ដល់ថ្ងៃទី២៨ ខែកញ្ញា ដើម្បីថ្លែងសុន្ទរកថាក្នុងកិច្ចពិភាក្សាទូទៅនៃមហាសន្និបាតអង្គការសហប្រជាជាតិលើកទី៧៧ នៅទីស្នាក់ការអង្គការសហប្រជាជាតិទីក្រុងញូវយ៉ក សហរដ្ឋអាមេរិក និងបន្តដំណើរទស្សនកិច្ចនៅប្រទេសគុយបា និងទៅចូលរួមបុណ្យសពអតីតនាយករដ្ឋមន្ត្រីជប៉ុន លោក ស៊ីនហ្ស៊ូ អាបេ ផងដែរ។
តាមរយៈសារសំឡេងពិសេសនាថ្ងៃទី១២ ខែកញ្ញា ឆ្នាំ២០២២ លោក ហ៊ុន សែន ថ្លែងថា រូបលោកនឹងចាកចេញពីកម្ពុជាទៅទីក្រុងញូវយ៉កនៃសហរដ្ឋអាមេរិក ដើម្បីថ្លែងសុន្ទរកថាក្នុងកិច្ចពិភាក្សាទូទៅនៃមហាសន្និបាតអង្គការសហប្រជាជាតិលើកទី៧៧ នៅទីស្នាក់ការអង្គការសហប្រជាជាតិនាថ្ងៃទី២៣ ខែកញ្ញា ខណៈថ្ងៃទី២៤ ដល់ថ្ងៃទី២៥ ខែកញ្ញា លោកនឹងបន្តដំណើរទស្សនកិច្ចនៅប្រទេសគុយបា ទៀត។
លោកបញ្ជាក់ថា ថ្ងៃដែលលោកបន្តទៅទស្សនកិច្ចនៅប្រទេសគុយបា ចំថ្ងៃបុណ្យភ្ជុំធំ ដូច្នេះរូបលោកមិនបាននៅចូលរួមពិធីបុណ្យភ្ជុំជាមួយគ្រួសារឡើយ ខណៈថ្ងៃបន្ទាប់លោកបន្តធ្វើដំណើរទៅទីក្រុងតូក្យូ ដើម្បីចូលរួមបុណ្យសពអតីតនាយករដ្ឋមន្ត្រីជប៉ុន លោក ស៊ីនហ្ស៊ូ អាបេ នៅថ្ងៃទី២៦ ដល់ថ្ងៃទី២៨ ខែកញ្ញា ឆ្នាំ២០២២។
ទោះជាយ៉ាងណាក៏ដោយ លោក ហ៊ុន សែន ណែនាំទៅរដ្ឋបាលរាជធានីភ្នំពេញឲ្យរៀបចំមធ្យោបាយដឹកជញ្ជូនពលរដ្ឋទៅកាន់បណ្តាខេត្តនានាក្នុងឱកាសនៃពិធីបុណ្យភ្ជុំបិណ្ឌនាពេលខាងមុខនេះដោយឥតគិតថ្លៃ ដើម្បីទប់ស្កាត់ការដំឡើងថ្លៃរថយន្តឈ្នួល និងតាក់ស៊ី ស្របពេលអគ្គស្នងការនគរបាលជាតិណែនាំកងកម្លាំងនគរបាលឲ្យកែសម្រួលឥរិយាបថ ពាក្យសម្ដីឲ្យបានសមរម្យ។
អគ្គស្នងការនគរបាលជាតិ នាយឧត្តមសេនីយ៍ នេត សាវឿន បានផ្ញើសារជាសំឡេងទៅកាន់កម្លាំងនគរបាលដើម្បីផ្តល់សេចក្តីណែនាំមួយចំនួនឲ្យយកទៅអនុវត្ត នៅពេលចុះបំពេញការងារ ជាពិសេសការជួយសម្រួលដល់ការធ្វើដំណើររបស់ពលរដ្ឋទៅស្រុកកំណើត។ លោកបានបន្ថែមថា កងកម្លាំងនគរបាលបង្កើនកិច្ចសហប្រតិបត្តិការក្នុងការបម្រើពលរដ្ឋនារដូវភ្ជុំបិណ្ឌ ហើយគោលការណ៍សំខាន់របស់កម្លាំងនគរបាលនារដូវភ្ជុំបិណ្ឌនេះ គឺការសម្រួលចរាចរណ៍ សន្តិសុខ និងសណ្ដាប់ធ្នាប់ជូនពលរដ្ឋតាមដងផ្លូវ។
គួរបញ្ជាក់ផងដែរថា ពិធីកាន់បិណ្ឌ និងបុណ្យភ្ជុំបិណ្ឌមានរយៈពេល ១៥ថ្ងៃ ប្រព្រឹត្តទៅពីថ្ងៃទី១១ ដល់ថ្ងៃទី២៥ ខែកញ្ញា ឆ្នាំ២០២២៕