26 C
Phnom Penh

លោក កឹម សុខា ប្ដេជ្ញា​ប្រកាន់​ព្រហ្ម​វិហារធម៌​និង​ចិត្ត​កតញ្ញូ​ចំពោះ​មាតុភូមិ​ទោះ​ត្រូវ​ស្ថិត​ក្នុង​អំពើ​អយុត្តិធម៌​បែប​ណា​ក៏ដោយ

ដោយ ឌឹ ខេមបូឌា ដេលី

បទវិភាគ

មេដឹកនាំ​បក្ស​ប្រឆាំង​ដែល​មិនទាន់​មាន​សេរីភាព​ពេញលេញ​ឡើងវិញ លោក កឹម សុខា ប្ដេជ្ញា​ថា​ទោះបីជា​រូបលោក​ស្ថិត​ក្នុង​កាលៈទេសៈ​ទទួល​រង​នូវ​ការ​ឈឺចាប់​ដោយ​អំពើ​អយុត្តិធម៌​បែប​ណា​ក៏ដោយ លោក​នៅតែ​ប្រកាន់ខ្ជាប់​នូវ​ព្រហ្ម​វិហារធម៌​កតញ្ញូ​ចំពោះ​មាតុភូមិ​កម្ពុជា និង​បុព្វការីជន​របស់​ខ្លួន​លោក​ជានិច្ច។

ប្រធាន​គណបក្ស​សង្គ្រោះ​ជាតិ​ដែល​មិនទាន់​មាន​សេរីភាព​ពេញលេញ​ឡើងវិញ លោក កឹម សុខា បាន​សរសេរ​លើ​ទំព័រ​ហ្វេសប៊ុក​របស់​លោក​កាលពី​ថ្ងៃទី​១១ ខែ​កញ្ញា ឆ្នាំ​២០២២ ដែល​ត្រូវ​នឹង​ថ្ងៃ​កាន់​បិណ្ឌ​១ តាម​ប្រពៃណី​ទំនៀមទម្លាប់​ជាតិ​ខ្មែរ​នៅ​វត្ត​ចំប៉ា សង្កាត់​ក្បាលកោះ ខណ្ឌ​ច្បារអំពៅ ថា ក្នុង​នាម​រូបលោក​ជា​ពលរដ្ឋ​ខ្មែរ​មួយ​រូប​ដែល​គោរព​ប្រតិបត្តិ​តាម​ព្រះពុទ្ធសាសនា និង​ប្រពៃណី​ទំនៀមទម្លាប់​ខ្មែរ លោក​នៅតែ​ជឿជាក់​លើ​អំពើ​ល្អ គុណធម៌​ដែល​ជា​កុសល​ដោយ​ប្រកាន់ខ្ជាប់​នូវ​ព្រហ្ម​វិហារធម៌ អហិង្សា​ធម៌ ការ​ផ្សះផ្សា​ជាតិ ដើម្បី​សាមគ្គី​ជាតិ​ខ្មែរ​ទាំងមូល​ក្នុង​ពេល​បច្ចុប្បន្ន​នេះ និង​ទៅ​ថ្ងៃ​អនាគត។

មេដឹកនាំ​បក្ស​ប្រឆាំង​ដែល​កំពុង​តស៊ូ​ដើម្បី​សេរីភាព និង​យុត្តិធម៌​សង្គម លោក កឹម សុខា លើកឡើង​ថា ការ​លះបង់​នូវ​គំនុំ​សងសឹក​ប្រកាន់​យក​នូវ​ធម៌​អហិង្សា គឺជា​អំពើ​កុសល​យ៉ាង​ធំធេង​ដែល​បង្ហាញ​ឲ្យ​ឃើញ​នូវ​ព្រហ្ម​វិហារធម៌​ចំពោះ​ញាតិ​សន្តាន និង​ពលរដ្ឋ​ខ្មែរ​ទូទាំង​ប្រទេស​ដែល​នាំ​មក​នូវ​សេចក្តី​សុខ សុភមង្គល និង​ភាព​សុខ​ក្សេមក្សាន្ត​នៃ​ប្រទេស​ជាតិ​ទាំងមូល។

កាលពី​ថ្ងៃទី​១១ ខែ​កញ្ញា ឆ្នាំ​២០២២ ប្រធាន​គណបក្ស​សង្គ្រោះ​ជាតិ លោក កឹម សុខា និង​ភរិយា​របស់​លោក គឺ​អ្នកស្រី តែ ចន្ទមនោ ព្រមទាំង​សហការី បាន​នាំគ្នា​ទៅ​ចូលរួម​ជាមួយ​ពុទ្ធបរិស័ទ​ក្នុង​ពិធី​បុណ្យ​កាន់​បិណ្ឌ​១ តាម​ប្រពៃណី​ទំនៀមទម្លាប់​ជាតិ​ខ្មែរ​នៅ​វត្ត​ចំប៉ា ដោយ​បាន​នាំ​យក​នូវ​ទេយ្យវត្ថុ និង​បច្ច័យ​មួយ​ចំនួន​ដែល​ជា​សទ្ធា​ជ្រះថ្លា​បាន​មក​ដោយ​ធម៌ ដើម្បី​ប្រគេន​ព្រះសង្ឃ​ដែល​គង់​ចាំ​ព្រះវស្សា ដើម្បី​ឧទ្ទិស​កុសល​ផល​បុណ្យ​ជូន​ដល់​បុព្វការីជន​ដែល​បាន​ចាក​លោក​ទៅ​ហើយ​នោះ។

លោក កឹម សុខា ត្រូវ​បាន​អាជ្ញាធរ​ក្រុង​ភ្នំពេញ​ចាប់​ខ្លួន​កាលពី​ថ្ងៃទី​៣ ខែ​កញ្ញា ឆ្នាំ​២០១៧ ពី​បទ​ឃុបឃិត​ជាមួយ​រដ្ឋ​បរទេស ដើម្បី​ផ្តួល​រំលំ​រដ្ឋាភិបាល​កម្ពុជា ប៉ុន្តែ​រហូត​មក​ទល់​នឹង​ពេលនេះ លោក​នៅតែ​មាន​ភាព​ស្អាតស្អំ ព្រោះ​តុលាការ​មិនទាន់​កាត់ទោស​លោក​ពី​បទល្មើស​ណា​មួយ​នៅឡើយ​ទេ។

លោក កឹម សុខា អះអាង​ថា បើ​ទោះបី​លោក​ស្ថិត​ក្នុង​ការ​ចោទប្រកាន់ និង​ការ​រឹតត្បិត​សេរីភាព​ពី​រដ្ឋាភិបាល​កម្ពុជា​ក្នុង​ពេល​បច្ចុប្បន្ន​នេះ​ក៏ដោយ ក៏​លោក​នៅតែ​ដឹកនាំ​សហការី​ធ្វើ​ពិធី​បុណ្យ​សាង​កុសល និង​ចូលរួម​រាល់​កម្មវិធី​មនុស្សធម៌​នានា ដូចជា​ការ​ជួយ​ពលរដ្ឋ​ដែល​រងគ្រោះ​ដោយសារ​ទឹកជំនន់ និង​ដោយសារ​ជំងឺ​កូវីដ-១៩ ជាដើម។

ជាក់ស្តែង កាលពី​ចុង​ខែ​មីនា ឆ្នាំ​២០២០ អំឡុង​ពេល​ដែល​រដ្ឋាភិបាល​កម្ពុជា​កំពុង​ស្វះ​ស្វែងរក​ថវិកា​ប្រឆាំង​ជំងឺ​កូវីដ-១៩ ប្រធាន​គណបក្ស​សង្គ្រោះ​ជាតិ លោក កឹម សុខា បាន​ចូលរួម​បរិច្ចាគ​ថវិកា​ផ្ទាល់ខ្លួន​ចំនួន ៥​ពាន់​ដុល្លារ​អាមេរិក ដើម្បី​ឧបត្ថម្ភ​ដល់​រដ្ឋាភិបាល​ក្នុង​ការ​ប្រយុទ្ធ​ប្រឆាំង​នឹង​ការ​រីក​រាលដាល​ជំងឺ​កូវីដ-១៩។

ជាង​នេះ​ទៀត កាលពី​ពាក់កណ្តាល​ខែ​តុលា ឆ្នាំ​២០២០ កន្លងទៅ មេដឹកនាំ​បក្ស​ប្រឆាំង​រូប​នេះ​ក៏​បាន​ឧបត្ថម្ភ​ថវិកា​ចំនួន ៥​ពាន់​ដុល្លារ​អាមេរិក​ដល់​រដ្ឋាភិបាល​កម្ពុជា ដើម្បី​ជួយ​សង្គ្រោះ​ពលរដ្ឋ​ខ្មែរ​ក្នុង​ពេល​ដែល​ពួកគាត់​កំពុង​រងគ្រោះ​ដោយសារ​គ្រោះ​ទឹកជំនន់​ផង​ដែរ។ លើស​ពី​នេះ លោក កឹម សុខា ក៏​ធ្លាប់​បាន​ផ្តល់​ជំនួយ​ជា​ថវិកា​បន្ថែម​ទៀត​តាមរយៈ​រដ្ឋាភិបាល ដើម្បី​ជួយ​ដល់​ជនរងគ្រោះ​ក្នុង​សោកនាដកម្ម​នៃ​ការ​បាក់​រលំ​អគារ​ក្នុង​ខេត្ត​កែប ផង​ដែរ។

យ៉ាងណាក៏ដោយ សកម្មភាព​មនុស្សធម៌ និង​សកម្មភាព​ធ្វើ​បុណ្យ​តាម​បែប​ព្រះពុទ្ធសាសនា​នេះ មិន​ត្រូវ​បាន​តុលាការ​កម្ពុជា​ស្វាគមន៍​នោះ​ទេ ក្នុង​នោះ តុលាការ​បម្រុង​នឹង​ឃុំ​ខ្លួន​លោក​ក្នុង​ពន្ធនាគារ​សាជាថ្មី​ម្តង​ទៀត​កាលពី​ចុង​ខែ​មិថុនា ឆ្នាំ​២០២២ កន្លងទៅ​នេះ ដោយ​បាន​ចោទ​ថា លោក​បាន​ធ្វើ​សកម្មភាព​ពាក់ព័ន្ធ​នឹង​នយោបាយ។

កាលពី​ថ្ងៃទី​៧ ខែ​កញ្ញា ឆ្នាំ​២០២២ លោក កឹម សុខា បាន​លើកឡើង​បន្ទាប់​ពី​សវនាការ​លើក​ទី​៥៥ របស់​លោក​ថា លោក​ទទួល​រង​នូវ​ភាព​អយុត្តិធម៌​អស់​រយៈពេល ៥​ឆ្នាំ​មក​ហើយ ក្រោយ​តុលាការ​បាន​ចោទប្រកាន់ និង​ចាប់​ខ្លួន​លោក​យក​ទៅ​ឃុំ​ទុក​ក្នុង​ពន្ធនាគារ​ត្រពាំងផ្លុង ក្នុង​ខេត្ត​ត្បូងឃ្មុំ កាលពី​ឆ្នាំ​២០១៧ កន្លងទៅ ក្នុង​នោះ​លោក​បាន​បញ្ជាក់​ថា ការ​សម្រេច​ដោយ​អគតិ គឺជា​អំពើ​បាប៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស