26 C
Phnom Penh

លោក ហ៊ុន សែន ជំរុញ​ឲ្យ​លោក ខឹម វាសនា ចេញ​មុខ​បំភ្លឺ​ករណី​មាន​ការ​ចោទ​ថា​លោក​នៅ​ពីក្រោយ

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កម្ពុជា លោក ហ៊ុន សែន ជំរុញ​ឲ្យ​ប្រធាន​គណបក្ស​សម្ព័ន្ធ​ដើម្បី​ប្រជាធិបតេយ្យ លោក ខឹម វាសនា និង​អ្នកគាំទ្រ​ចេញ​មុខ​បកស្រាយ បន្ទាប់ពី​មាន​ការ​ចោទ​ថា លោក​នៅ​ពីក្រោយ​ព្រឹត្តិការណ៍​ជួបជុំ​នៅ​ជើងភ្នំ​គូលែន ដើម្បី​បង្វែរ​ចេញពី​ព្រឹត្តិការណ៍​ផ្សេង​ទៀត។

ក្នុង​ពិធី​សំណេះសំណាល​ជាមួយ​ពលរដ្ឋ​ស្ម័គ្រចិត្ត​រុះរើ​សំណង់​ខុស​ច្បាប់​ចេញពី​តំបន់​រមណីយដ្ឋាន​អង្គរ នៅ​ព្រឹក​ថ្ងៃទី​១៣ ខែ​កញ្ញា លោក ហ៊ុន សែន ថ្លែង​ថា មាន​ក្រុម​អគតិ​មួយ​ចំនួន​បាន​ជំរុញ​ឲ្យ​លោក​ប្រើ​កម្លាំង​ដើម្បី​បង្ក្រាប​លើ​ការ​ប្រមូលផ្ដុំ​របស់​លោក ខឹម វាសនា និង​អ្នកគាំទ្រ​នៅ​ភ្នំ​គូលែន​ខេត្ត​សៀមរាប។

លោក​ស្នើ​ទៅ​លោក ខឹម វាសនា ដែល​កំពុង​តាំង​ខ្លួន​ជា​ព្រះព្រហ្ម​នោះ ចេញ​មុខ​បកស្រាយ​បន្ទាប់ពី​មាន​ការ​ញុះញង់ និង​ចោទប្រកាន់​ថា លោក​ជា​អ្នក​បញ្ជា​ឲ្យ​លោក ខឹម វាសនា បង្កើត​ព្រឹត្តិការណ៍​ដើម្បី​បង្វែរ​ពី​រឿង​នេះ​រឿង​នោះ ទើប​បាន​ជា​មិន​ហ៊ាន​បង្ក្រាប និង​ចាប់​លោក ខឹម វាសនា ដាក់​ពន្ធនាគារ​នោះ។

លោក ហ៊ុន សែន អះអាង​ថា ប្រសិនជា​លោក ខឹម វាសនា មិន​ចេញ​បកស្រាយ​ទេ ប្រាកដ​ណាស់​ក្រុម​ទាំងនោះ​នឹង​ចោទ​លោក ខឹម វាសនា ថា​ជា «អាយ៉ង» របស់​លោក​ហើយ។

បុរស​ខ្លាំង​រូប​នេះ​អះអាង​ថា បើ​រូបលោក​ជឿ​តាម​ការ​ញុះញង់​របស់​ក្រុម​អគតិ ដោយ​ប្រើ​ចុង​កាំភ្លើង​ទៅ​បង្ក្រាប​លើ​ក្រុម​លោក ខឹម វាសនា នោះ​ប្រាកដ​ណាស់ លោក ខឹម វាសនា នឹង​ចូល​គុក ឬ​មាន​អ្នក​របួស​រហូត​ដល់​ស្លាប់​ថែម​ទៀត​ផង ប៉ុន្តែ​រឿង​នេះ​វា​មិនមែន​ជា​ជម្រើស​លោក​ដែល​ត្រូវ​ប្រើ​នោះ​ទេ។

លោក ហ៊ុន សែន បញ្ជាក់​ថា ជម្រើស​ដែល​លោក​ប្រើប្រាស់​កម្លាំង​ប្រដាប់​អាវុធ​ចំពោះ​អ្នក​ដែល​ចង់​ផ្តួល​រំលំ​លោក​តែប៉ុណ្ណោះ ខណៈ​លោក ហ៊ុន សែន ក៏​បាន​ឆ្លើយតប​ចំពោះ​អ្នក​រិះគន់​លើ​អង្គរក្ស​របស់​លោក ដោយ​ថា​នរណា​ក៏ដោយ​ដែល​ប្រឆាំង​នឹង​អង្គរក្ស​ការពារ​នាយករដ្ឋមន្ត្រី គឺ​អ្នក​ហ្នឹង​ហើយ​ប៉ុនប៉ង​ធ្វើ​រដ្ឋប្រហារ​នោះ។

កាលពី​ចុងខែ​សីហា កន្លងទៅ លោក ហ៊ុន សែន ប្រកាស​ថា មូលហេតុ​ដែល​លោក​មិន​ចាត់​វិធានការ ឬ​ប្រើប្រាស់​កម្លាំង​ក្នុង​ការ​បង្ក្រាប​ណា​មួយ​ទៅ​លើ​ការ​ប្រមូលផ្ដុំ​របស់​លោក ខឹម វាសនា ជាមួយ​ក្រុម​អ្នក​គាំទ្រ​នៅ​តំបន់​ភ្នំ​គូលែន ខេត្ត​សៀមរាប ដោយ​បារម្ភ​ខ្លាច​ចូល​អន្ទាក់​របស់​លោក ខឹម វាសនា បើ​ទោះបីជា​លោក​រង​ការ​ជេរប្រមាថ​ពី​សំណាក់​លោក ខឹម វាសនា ក៏ដោយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស