 ដែលបុរសរូបនេះកាន់អំណាចជាប្រធានាធិបតីរុស្ស៊ីជាង ២០ឆ្នាំមកហើយ។){kind=link}
កំពូលជនផ្ដាច់ការរុស្ស៊ីម្នាក់ដែលកំពុងរុញប្រទេសឲ្យធ្លាក់ក្នុងក្ដីវិនាស និងអាម៉ាស់បំផុត គឺលោក វ៉្លាឌីមៀរ ពូទីន (Vladimir Putin) ដែលបុរសរូបនេះកាន់អំណាចជាប្រធានាធិបតីរុស្ស៊ីជាង ២០ឆ្នាំមកហើយ។
បុរសនេះហើយដែលចាត់ទុកអ្នកនយោបាយប្រឆាំងថាជាសត្រូវរបស់ខ្លួន។ អ្នកនយោបាយប្រឆាំងជាច្រើននាក់ដែលបុរសនេះបញ្ជាឲ្យតុលាការចេញដីកាកាត់ទោស ក្រោមបទចោទថាក្បត់ជាតិសាសន៍ឯង និងមានគំនិតប្រឆាំងការដឹកនាំរបស់លោក។
ក្នុងនាមជាមេដឹកនាំប្រទេសមហាអំណាច បុរសនេះបានបញ្ជាទ័ពឲ្យទៅវាយយកទឹកដីនៃប្រទេសជិតខាងរបស់ខ្លួន។ នៅឆ្នាំ២០០៨ គាត់បានបញ្ជាទ័ពឱ្យលុកលុយប្រទេស Georgia ដោយវាយយកបានទឹកដីមួយផ្នែកពីប្រទេសនេះ។ បុរសរូបនេះក៏បានបញ្ជាទ័ពឲ្យលុកលុយប្រទេសអ៊ុយក្រែន ដែលនាំឲ្យមានសង្គ្រាមមកទល់នឹងសព្វថ្ងៃនេះ។
ប៉ុន្តែលើកនេះ គឺមិនដូចឆ្នាំ២០០៨ នោះទេ ដែលកងទ័ពរុស្ស៊ី ងាយវាយយកទឹកដីប្រទេស Georgia បាន។ សម្រាប់អ៊ុយក្រែន ជាប្រទេសធំមួយដែរនៅអឺរ៉ុប។ ប្រទេសនេះមានមេដឹកនាំម្នាក់ដែលមានស្មារតីជាតិពិតប្រាកដ ដែលមិនងាយចុះចាញ់នឹងការឈ្លានពានពីសំណាក់ប្រទេសរុស្ស៊ី នោះឡើយ។ លោកក្រាញននៀលនៅសមរភូមិ ដោយកាន់អាវុធប្រយុទ្ធតតាំងនឹងទ័ពឈ្លានពាន។ លោក វូឡូឌីមៀ ហ្សេឡេនស្គី គឺជាមេដឹកនាំអ៊ុយក្រែន ដែលមានសម្ពន្ធភាពជាមួយក្រុមបស្ចិមប្រទេសដែលមានសហរដ្ឋអាមេរិកដឹកមុខ ក្នុងការជួយផ្ដល់សព្វាវុធទៅជួយទ័ពអ៊ុយក្រែនក្នុងការធ្វើសង្គ្រាមរបស់លោក ពូទីន។
ដោយគួបផ្សំនឹងភាពក្លាហានរបស់លោក ហ្សេឡេនស្គី និងកងទ័ពអ៊ុយក្រែន ជាមួយនឹងការផ្ដល់ជំនួយអាវុធយ៉ាងសម្បើមពីបស្ចិមប្រទេស បាននាំឱ្យទ័ពអ៊ុយក្រែនមានលទ្ធភាពវាយរុញច្រានទ័ពរុស្ស៊ីឲ្យបាក់ទ័ពជាបន្តបន្ទាប់។
រុស្ស៊ីដែលបានស្គាល់នូវការបាក់ទ័ពទ្រង់ទ្រាយធំដល់ទៅពីរលើកនៅលើសមរភូមិអ៊ុយក្រែន មានរយៈពេលជាង ២០០ថ្ងៃមកនេះ គឺមិនមែនជារឿងធម្មតាពេកនោះទេចំពោះប្រទេសមហាអំណាចយោធាលំដាប់ទី២ នៃពិភពលោក។ ការបាក់ទ័ពចុងក្រោយនេះនៅលើសមរភូមិភាគឥសានប្រទេស នៅតំបន់ខាគៀវ គឺមានសភាពអាក្រក់ និងកម្សោយបំផុតរបស់កងទ័ពនៃប្រទេសមហាអំណាចមួយនេះ។
ការបាក់ទ័ពលើកទី២ កាលពីថ្ងៃទី១១ ខែកញ្ញា នេះ គឺកងទ័ពរុស្ស៊ីបានរត់ប្រាសអាយុដោយរត់ចោលសព្វាវុធនៅពាសពេញសមរភូមិ ខណៈទ័ពរុស្ស៊ីស្លាប់មួយថ្ងៃ ២០០នាក់ឡើងទៅ។
គិតមកដល់ពេលនេះ កងទ័ពរុស្ស៊ីបានបាត់បង់ជីវិតជាង ៥៣៣០០នាក់ រថក្រោះ ២១៧៥គ្រឿង រថពាសដែក ៤៦៦២គ្រឿង រថយន្តដឹកកងទ័ព និងរថយន្តដឹកសាំង ៣៤៦៦គ្រឿង ប្រព័ន្ធកាំភ្លើងធំ ១២៧៩គ្រឿង ប្រព័ន្ធបាញ់រ៉ុក្កែត ៣១១គ្រឿង ប្រព័ន្ធការពារដែនអាកាស ១៦៣គ្រឿង ធ្លាក់យន្តហោះចម្បាំង ២៤៤គ្រឿង ធ្លាក់ឧទ្ធម្ភាគចក្រ ២១៣គ្រឿង ធ្លាក់យន្តហោះ Drone ៩០១គ្រឿង និងឆេះនាវាចម្បាំង ១៥គ្រឿង។ នេះបើយោងតាមការចុះផ្សាយរបស់សារព័ត៌មានអ៊ុយក្រែន The Kyiv Independent នៅថ្ងៃទី១៣ ខែកញ្ញា។
កាលពីថ្ងៃទី២ ខែមិថុនា លោក ហ្សេឡេនស្គី បានលើកឡើងថា ២០% នៃដែនដីអ៊ុយក្រែន ត្រូវបានធ្លាក់ចូលទៅក្នុងដៃរបស់កងទ័ពរុស្ស៊ី គឺប្រមាណ ១២ម៉ឺន ៥ពាន់គីឡូម៉ែត្រការ៉េ។ តែនៅថ្ងៃនេះ លោក ហ្សេឡេនស្គី បានអះអាងថា កងទ័ពអ៊ុយក្រែន បានវាយយកទឹកដីទាំងនោះបានមកវិញជាង ៦ពាន់គីឡូម៉ែត្រការ៉េហើយ។
ភាពកម្សោយ និងការបាត់បង់សព្វាវុធដ៏ច្រើនដូចនេះ រួមទាំងការស្លាប់កងទ័ព និងការបាក់ទ័ព បាននាំឲ្យបុរសខ្លាំង វ៉្លាឌីមៀរ ពូទីន ប្រឈមមុខនឹងសម្ពាធឲ្យដូរយុទ្ធសាស្ត្រសង្គ្រាម ហើយបើពុំនោះទេ ត្រូវលាលែងពីតំណែង។
ជ័យជម្នះរបស់កងទ័ពអ៊ុយក្រែន ក៏កើតចេញយ៉ាងពិតប្រាកដពីការផ្ដល់ជំនួយអាវុធគ្រាប់រំសេវរបស់ក្រុមបស្ចិមប្រទេស ជាពិសេសគឺសហរដ្ឋអាមេរិក។ កត្តាមួយទៀត គឺអាចជាការបាក់ទឹកចិត្តរបស់កងទ័ពរុស្ស៊ី ដែលចូលមកធ្វើសង្គ្រាមជិត ៧ខែហើយ។
ទ័ពរុស្ស៊ីភាគច្រើន គឺមនុស្សស៊ីប្រាក់ឈ្នួល ត្រូវគេកេណ្ឌពីបណ្តាខេត្តដាច់ស្រយាល។ ពួកគេជាទ័ពប្រយុទ្ធមែន តែខ្វះទឹកចិត្តមោះមុតក្នុងការប្រយុទ្ធប្តូរស្លាប់ គឺមិនដូចកងទ័ពអ៊ុយក្រែន ដែលសច្ចាដើម្បីការពារទឹកដីរបស់ខ្លួននោះទេ។
ឥឡូវនេះ បុរសខ្លាំងជាម្ចាស់វិមានក្រឹមឡាំង វ៉្លាឌីមៀរ ពូទីន កំពុងរងសម្ពាធពីពលរដ្ឋ ពីអ្នកនយោបាយ និងមេទ័ពរបស់ខ្លួនឲ្យលាលែងពីតំណែង ឬក៏ត្រូវបញ្ចប់សង្គ្រាម ឬក៏ត្រូវដូរយុទ្ធសាស្ត្រសង្គ្រាម។
កាលពីថ្ងៃសុក្រ ទី៩ ខែកញ្ញា ក្រុមសមាជិកសភារបស់រុស្ស៊ី អំពាវនាវឲ្យលោក ពូទីន ចុះចេញពីតំណែង។ ក្រុមសមាជិកសភាទាំងនេះបានសរសេរលិខិតផ្ញើទៅសភាឌូម៉ារបស់រុស្ស៊ី ដោយលើកឡើងចំៗថា លោកប្រធានាធិបតី ពូទីន បានបរាជ័យហើយនៅពេលនេះ គឺបរាជ័យសង្គ្រាមនៅអ៊ុយក្រែន។
សមាជិកសភាទាំងពីរក្រុមនេះថា សង្គ្រាមលើទឹកដីអ៊ុយក្រែន គឺកើតចេញពីភាពមានះ ភាពក្រអឺតក្រទម និងភាពជ្រុលនិយមរបស់លោក ពូទីន។ ក្រុមអ្នកជាតិនិយមរុស្ស៊ី ដែលដឹកនាំការប្រយុទ្ធដើម្បីរុស្ស៊ី។ ក្រុមនេះដឹកនាំដោយលោក Igor Guirkine អតីតមេទ័ពរុស្ស៊ីដ៏មានឥទ្ធិពល បានហៅការបាក់ទ័ពរបស់កងទ័ពរុស្ស៊ីក្នុងសង្គ្រាមអ៊ុយក្រែន គឺជាការទទួលខុសត្រូវរបស់លោក ពូទីន។ លោកថា លោក ពូទីន ដែលមិនបើកការវាយប្រហារលើអ៊ុយក្រែនទូទាំងប្រទេស គឺជាកំហុសដ៏ធំមួយ។
ចំណែកមេទ័ពម្នាក់នៅសាធារណរដ្ឋ Chechen គឺលោក Ramzan Kadyrov ដែលជាអ្នកជាតិនិយមខ្លាំងស្មោះត្រង់របបលោក ពូទីន បានហៅបរាជ័យរបស់កងទ័ពរុស្ស៊ី គឺជារឿងមិនសមនឹងកើតមាន។ លោកទទូចឱ្យលោក ពូទីន ប្ដូរយុទ្ធសាស្ត្រសង្គ្រាម។
យ៉ាងណាក៏ដោយ សម្រាប់លោក ពូទីន មិនបានប្រតិកម្មចេញមុខនោះទេ ប៉ុន្តែអ្នកនយោបាយណាដែលហ៊ានចេញមុខប្រឆាំងលោក ពូទីន តែងតែត្រូវបានចោទប្រកាន់ ហើយចាប់ខ្លួនកាត់ទោស។
ក្រុមសិក្សាសង្គ្រាមដែលមានមូលដ្ឋាននៅក្រុងវ៉ាស៊ីនតោន យល់ថា សង្គ្រាមរបស់លោក ពូទីន នៅលើទឹកដីអ៊ុយក្រែន ដែលអូសបន្លាយជាង ២០០ថ្ងៃមកនេះ បានកំពុងរុញច្រានអំណាចរបស់រុស្ស៊ី ដែលលោក ពូទីន ដឹកមុខនេះ ចាប់ផ្តើមស្រុតចុះ គឺស្រុតចុះទាំងវិស័យយោធា វិស័យការទូត និងឥទ្ធិពលរុស្ស៊ីជាប្រទេសមហាអំណាច៕