នៅថ្ងៃទី២០ កញ្ញា ខាងមុខនេះ មហាសន្និបាតប្រចាំឆ្នាំរបស់អង្គការសហប្រជាជាតិ នឹងចាប់ផ្ដើមដែលមានរយៈពេល ៨ថ្ងៃ ដោយបិទបញ្ចប់នៅថ្ងៃទី២៧ កញ្ញា។
មហាសន្និបាតសម្រាប់ឆ្នាំ២០២២ នេះ ពុំប្រព្រឹត្តតាមវីដេអូ Online ដូចឆ្នាំទៅមិញនោះទ ព្រោះតែឆ្នាំនេះ ពិភពលោកពុំជួបវិបត្តិជំងឺឆ្លងកូវីដ-១៩ ធ្ងន់ធ្ងរនោះទេ។
ប្រទេសខ្លះត្រូវបញ្ជូនប្រមុខរដ្ឋាភិបាល និងប្រមុខរដ្ឋទៅថ្លែងសុន្ទរកថា។ តែប្រទេសខ្លះទៀតចាត់តាំងរដ្ឋមន្ត្រីការបរទេសទៅតំណាងឲ្យប្រមុខរដ្ឋ និងប្រមុខរដ្ឋាភិបាលរបស់ខ្លួន។ សម្រាប់កោះតៃវ៉ាន់ ពុំមានតំណាងរបស់ខ្លួនឡើងធ្វើសុន្ទរកថានោះទេ ទោះជាដែនកោះមួយនេះមានប្រជាជនជាង ២៣លាននាក់ក៏ដោយ។
ដែនកោះនេះពុំមានអាសនៈរបស់ខ្លួននៅឯមហាសន្និបាតនេះទេ។ អាសនៈរបស់ដែនកោះនេះ ត្រូវបានរបបបក្សកុម្មុយនិស្តចិន ដណ្ដើមយកតាមរយៈការបោះឆ្នោតរបស់មហាសន្និបាតនេះកាលពីថ្ងៃទី២៥ ខែតុលា ឆ្នាំ១៩៧១។
ចាប់ពីឆ្នាំនោះមក តៃវ៉ាន់ពុំមានសិទ្ធិចូលរួមប្រជុំរបស់ស្ថាប័នពិភពលោកនេះទេ ទោះជាតៃវ៉ាន់ជារដ្ឋអធិបតេយ្យប្រជាធិបតេយ្យមួយដែលប្រកាន់របបសាធារណរដ្ឋចិនក៏ដោយ។
បើតាមប្រព័ន្ធព័ត៌មានរបស់ដែនកោះនេះ គឺសារព័ត៌មាន Taiwan News បានចុះផ្សាយថា ក្រសួងការបរទេសតៃវ៉ាន់ កាលពីសប្ដាហ៍មុនបានបញ្ជូនសំណើទៅកាន់បណ្ដាប្រទេសជាសម្ពន្ធមិត្តរបស់ខ្លួនឱ្យជំរុញទៅគណៈកម្មការសន្និបាតរបស់អង្គការសហប្រជាជាតិ ដើម្បីអនុញ្ញាត និងផ្ដល់ឱកាសដល់តៃវ៉ាន់បានថ្លែងទៅកាន់ពិភពលោក អំពីអ្វីដែលតៃវ៉ាន់ប្រឈមមុខនឹងការគំរាមកំហែងវាយលុកលុយពីសំណាក់ប្រទេសចិន។
យោងតាមលិខិតរបស់ក្រសួងការបរទេសតៃវ៉ាន់ បានទទូចថា ៥១ឆ្នាំហើយ រដ្ឋាភិបាលតៃវ៉ាន់ដែលតំណាងឱ្យប្រជាជនជាង ២៣លាននាក់ ពុំដែលបានថ្លែងប្រាប់ពិភពលោកអំពីការឈឺចាប់របស់ប្រជាជន និងសេចក្ដីត្រូវការរបស់ប្រជាជនតៃវ៉ាន់ម្ដងណាទេនៅចំពោះមុខអង្គមហាសន្និបាត។ រដ្ឋាភិបាលតៃវ៉ាន់ ថាអ្នកនិយាយតំណាងឱ្យប្រជាជនតៃវ៉ាន់ គឺមិនជារដ្ឋអធិបតេយ្យជំនួសតៃវ៉ាន់នោះទេ។
នៅក្នុងឆ្នាំ២០២២ នេះ ជាពិសេសគឺនៅដើមខែសីហា នេះ ចិនបានបញ្ជូនទ័ពឡោមព័ទ្ធកោះតៃវ៉ាន់ដោយការធ្វើសមយុទ្ធទ្រង់ទ្រាយធំ។ ចិនបញ្ជូននាវាចម្បាំងធំ ១៣គ្រឿងធ្វើសមយុទ្ធបាញ់គ្រាប់មីស៊ីលឱ្យធ្លាក់ក្បែរកោះតៃវ៉ាន់ ហើយយន្តហោះចម្បាំងដល់ទៅជាង ១០០គ្រឿងឱ្យហោះចូលដែនអាកាសតៃវ៉ាន់ទៀតផង។ បន្ថែមលើសពីនេះ ចិនបានបាញ់មីស៊ីលផ្លោងប៉ាឡេស្ទីនចំនួន ១១គ្រាប់ ហោះរំលងដែនកោះនេះ បើទោះជាតៃវ៉ាន់ថ្កោលទោសក៏ដោយ។
ក្នុងអំឡុងនៃការធ្វើសមយុទ្ធរយៈពេលមួយសប្ដាហ៍នៅដើមខែសីហា ដែលជាសមយុទ្ធប្រឆាំងនឹងវត្តមានរបស់អ្នកស្រីប្រធានរដ្ឋសភាសហរដ្ឋអាមេរិក ណាន់ស៊ី ផេឡូស៊ី ទៅធ្វើទស្សនកិច្ចនៅដែនកោះតៃវ៉ាន់ គឺពេលនោះ ចិនបានគំរាមតៃវ៉ាន់ឱ្យមកចុះចូលនឹងក្រុងប៉េកាំង ក្រោមគោលនយោបាយប្រទេសមួយប្រព័ន្ធពីរ។
ទីក្រុងប៉េកាំងពេលនោះ បានប្រាប់ពិភពលោក ជាពិសេសសហរដ្ឋអាមេរិក ថាតៃវ៉ាន់ជាដែនដីក្នុងរដ្ឋអធិបតេយ្យរបស់ចិន គឺទាំងច្រកសមុទ្រតៃវ៉ាន់ និងលំហអាកាសតៃវ៉ាន់។ ក្រុងប៉េកាំង បានគំរាមទៀតថា បើតៃវ៉ាន់មិនទទួលយកការមករស់នៅជាបងប្អូននឹងគ្នាឡើងវិញនៅក្រោមដំបូលនៃបក្សកុម្មុយនីស្តចិន គឺជាការដែលតៃវ៉ាន់ចង់ប្រកាសផ្ដាច់ខ្លួន គឺមិនអាចទៅរួចនោះទេ។
បើសិនតៃវ៉ាន់ប្រកាសថាខ្លួនគេកំពុងជារដ្ឋឯករាជ្យ គឺប្រទេសចិននឹងប្រើប្រាស់មធ្យោបាយកម្លាំងទ័ពវាយកាន់កាប់កោះនេះភ្លាមតែម្ដង។ ការគំរាមកំហែងឥតឈប់ឈរនេះ នាំឲ្យតៃវ៉ាន់ប្រកាសថា ខ្លួនគេរងការធ្វើទុក្ខបុកម្នេញខ្លាំងណាស់ពីសំណាក់ប្រទេសចិន ហើយដែលចាំបាច់តៃវ៉ាន់ចង់ប្រាប់រឿងរ៉ាវទាំងអស់នេះទៅពិភពលោក ព្រោះថាការធ្វើទុក្ខបុកម្នេញរបស់ចិនមកលើដែនកោះតៃវ៉ាន់ គឺសឹងតែរាល់ថ្ងៃ ដែលចិនមិនដែលទុកឱកាសឱ្យប្រជាជនតៃវ៉ាន់បានសេចក្ដីសុខនោះទេ។
តៃវ៉ាន់ និងចិន ការពិតជាប់សាច់ឈាមនឹងគ្នា។ ដែនដីពីរនេះបែកបាក់គ្នាដោយសារតែសង្គ្រាមស៊ីវិលពីឆ្នាំ១៩៤៦ ដល់ឆ្នាំ១៩៤៩។ ប្រធានាធិបតីដែលគ្រប់គ្រងទីក្រុងប៉េកាំង នៅឆ្នាំនោះ គឺលោក ចាង កៃ ចៀក (Chiang Kai-shek)។
លោក ចាង កៃ ចៀក (Chiang Kai-shek) ជាប្រធានាធិបតីនៃសាធារណរដ្ឋចិន ប៉ុន្តែលោកដឹកនាំការធ្វើសង្គ្រាមចាញ់កងទ័ពព្រៃដឹកនាំដោយកម្មាភិបាល ម៉ៅ សេទុង ហើយក៏រត់ភៀសខ្លួនទៅនៅដែនកោះតៃវ៉ាន់ ដែលប្រកាន់យករបបសាធារណរដ្ឋចិនមកដល់សព្វថ្ងៃនេះ។
បច្ចុប្បន្ន តៃវ៉ាន់មានសម្ពន្ធមិត្តជាច្រើន ប៉ុន្តែភាគច្រើនពុំមានស្ថានទូតរបស់ពួកគេនៅលើកោះតៃវ៉ាន់នោះទេ។ សម្រាប់សហរដ្ឋអាមេរិក គឺជាសម្ពន្ធមិត្តរបស់តៃវ៉ាន់តាំងពីសម័យកាលប្រធានាធិបតី ចាង កៃ ចៀក (Chiang Kai-shek)។
កាលពីថ្មីៗនេះ រដ្ឋមន្ត្រីការបរទេសអាមេរិក លោក Antony Bliken បានសម្ដែងការសោកស្ដាយដែលតៃវ៉ាន់ជារដ្ឋអធិបតេយ្យប្រជាធិបតេយ្យមានប្រជាជនជាង ២៣លាននាក់ បែរពុំមានតំណាងរបស់ខ្លួនដើម្បីការពារផលប្រយោជន៍របស់ខ្លួននៅឯអង្គការសហប្រជាជាតិ៕