29 C
Phnom Penh

លោក កឹម សុខា ថ្វាយ​សារ​រំលែក​ទុក្ខ​ព្រះមហាក្សត្រិយានី Elizabeth ទី​២ របស់​ចក្រភព​អង់គ្លេស

ដោយ ឌឹ ខេមបូឌា ដេលី

បទវិភាគ

ប្រធាន​គណបក្ស​សង្គ្រោះ​ជាតិ​ដែល​មិនទាន់​មាន​សេរីភាព​ពេញលេញ​ឡើងវិញ លោក កឹម សុខា បាន​ថ្វាយ​សារ​រំលែក​ទុក្ខ​ដល់​ព្រះរាជវង្សានុវង្ស ថ្នាក់​ដឹកនាំ និង​ពលរដ្ឋ​អង់គ្លេស​ទាំងអស់ ក្រោយពី​ការ​យាង​ចូល​ទិវង្គត​របស់​ព្រះមហាក្សត្រិយានី Elizabeth ទី​២ របស់​ចក្រភព​អង់គ្លេស កាលពី​ពេល​ថ្មីៗ​នេះ។

មេដឹកនាំ​បក្ស​ប្រឆាំង​ដែល​កំពុង​រង​នូវ​ការ​រឹតត្បិត​សេរីភាព លោក កឹម សុខា បាន​សរសេរ​លើ​ទំព័រ​ហ្វេសប៊ុក​របស់​ខ្លួន​កាលពី​ថ្ងៃទី​១៤ ខែ​កញ្ញា ឆ្នាំ​២០២២ ថា លោក​បាន​ទៅ​ចូលរួម​គោរព​ព្រះ​វិញ្ញាណក្ខន្ឋ​ព្រះមហាក្សត្រិយានី Elizabeth ទី​២ នៃ​ចក្រភព​អង់គ្លេស នៅ​ស្ថានទូត​អង់គ្លេស ក្នុង​រាជធានី​ភ្នំពេញ និង​បាន​ថ្វាយ​សារ​រំលែក​ទុក្ខ​ដល់​ព្រះរាជវង្សានុវង្ស ថ្នាក់​ដឹកនាំ និង​ពលរដ្ឋ​អង់គ្លេស​ទាំងអស់ តាមរយៈ​ឯកអគ្គរាជទូត​ចក្រភព​អង់គ្លេស​ប្រចាំ​កម្ពុជា​ផង​ដែរ។

លោក កឹម សុខា បាន​បង្ហាញ​ខ្លឹមសារ​នៃ​សារ​រំលែក​ទុក្ខ​នោះ​ថា លោក​ពិត​ជា​មាន​សេចក្តី​រន្ធត់ និង​សោកស្តាយ​ជា​ពន់ពេក​ដែល​ទទួល​ដំណឹង​ថា មហាក្សត្រិយានី Elizabeth ទី​២ យាង​ចូល​ទិវង្គត​ដែល​ជា​ការ​បាត់បង់​ដ៏​ធំធេង​របស់​រាជវង្សានុវង្ស​នៃ​ចក្រភព​អង់គ្លេស​ទាំងមូល និង​ជា​ការ​បាត់បង់​វរជន​ដ៏​ធំ​មួយ​របស់​ពិភពលោក។

ការ​ថ្វាយ​សារ​រំលែក​ទុក្ខ​នេះ ធ្វើឡើង​បន្ទាប់ពី​មេដឹកនាំ​បក្ស​ប្រឆាំង​បាន​ចូលរួម​គោរព​វិញ្ញាណក្ខន្ធ​ព្រះមហាក្សត្រិយានី Elizabeth ទី​២ ដែល​បាន​សោយ​ទិវង្គត​អស់​មួយ​សប្តាហ៍​កន្លងទៅ​នេះ។

ព្រះ​មហាក្សត្រិយ៍​នៃ​ចក្រភព​អង់គ្លេស ប្រសូត​នៅ​ថ្ងៃទី​២១ ខែ​មេសា ឆ្នាំ​១៩២៦ ដែល​មាន​ព្រះនាម​ផ្លូវការ​ថា Elizabeth Alexandra Mary Windsor ហើយ​ព្រះ​មហាក្សត្រិយ៍​នៃ​ចក្រភព​អង់គ្លេស​អង្គ​នេះ​បាន​ឡើង​គ្រងរាជ្យ​សម្បត្តិ​ក្នុង​ព្រះជន្ម ២៥​ព្រះវស្សា អំឡុង​ខែ​មិថុនា ឆ្នាំ​១៩៥៣ ដែល​បាន​ទទួល​ព្រះនាម​ថា​ជា ព្រះ​មហាក្សត្រិយ៍ Elizabeth II។ ក្រោយ​គ្រងរាជ្យ​សម្បត្តិ​អស់​រយៈពេល​ប្រមាណ​ជា ៧០​ឆ្នាំ ទ្រង់​ក៏​បាន​យាង​ចូល​ទិវង្គត​នៅ​ក្នុង​ប្រទេស​ស្កុតឡែន ក្នុង​ព្រះជន្ម ៩៦​ព្រះវស្សា​កាលពី​ថ្ងៃទី​៨ ខែ​កញ្ញា ឆ្នាំ​២០២២ កន្លងទៅ​នេះ។

កាលពី​ថ្ងៃទី​១២ ខែ​កញ្ញា ឆ្នាំ​២០២២ ប្រមុខ​រដ្ឋាភិបាល​កម្ពុជា លោក ហ៊ុន សែន ក៏​បាន​ទៅ​ចូលរួម​គោរព​ព្រះ​វិញ្ញាណក្ខន្ធ​ព្រះ​មហាក្សត្រិយ៍ អេលីហ្សាប៊ែត​ទី​២ នៅ​ស្ថានទូត​អង់គ្លេស​ផង​ដែរ។ ក្នុង​នោះ លោក ហ៊ុន សែន បញ្ជាក់​ថា ព្រះ​មហាក្សត្រិយ៍​ចក្រភព​អង់គ្លេស អេលីហ្សាប៊ែត ទី​២ (Elizabeth II) ដែល​ទើប​នឹង​យាង​ចូល​ទិវង្គត គឺជា​ឥស្សរជន​ដ៏​គួរ​ឲ្យ​ស្ញប់ស្ញែង​មួយ​អង្គ ដែល​តែងតែ​ប្រកាន់ខ្ជាប់​ខ្ជួន​នូវ​រាជកិច្ច រាជ​វិន័យ និង​ប្រកប​ដោយ​ព្រះរាជ​បញ្ញាញាណ​រហូត​មក​ក្នុង​នាម​ទ្រង់​ជា​ព្រះមហាក្សត្រ​របស់​ចក្រភព​អង់គ្លេស។

ជុំវិញ​ការ​ថ្វាយ​សារ​រំលែក​ទុក្ខ​ព្រះ​មហាក្សត្រិយ៍ អេលីហ្សាប៊ែត ទី​២ នេះ ក៏​មាន​ការ​ប្រៀបធៀប​អំពី​ព្រះរាជ​តួនាទី​របស់​ទ្រង់ និង​ព្រះរាជ​តួនាទី​របស់​ព្រះមហាក្សត្រ​ខ្មែរ​ផង​ដែរ ក្នុង​នោះ​ក៏​មាន​ការ​រិះគន់​ពី​គ្រប់​មជ្ឈដ្ឋាន​ថា ព្រះមហាក្សត្រ​ខ្មែរ​មិន​អាច​បំពេញ​ព្រះរាជកិច្ច​របស់​ទ្រង់​ឱ្យ​បាន​ពេញលេញ​ទេ ដោយសារតែ​មេដឹកនាំ​កម្ពុជា​ដែល​ពោរពេញ​ដោយ​អំណាច​យោធា​ក្នុង​ដៃ បាន​រំលោភ​ព្រះរាជ​តួនាទី​របស់​ព្រះអង្គ​រហូត​មក។

អ្នកវិភាគ​នយោបាយ និង​សង្គម បណ្ឌិត ឡៅ ម៉ុងហៃ ធ្លាប់​បាន​អះអាង​កាលពី​ពេល​កន្លងទៅ​ថា ការ​ប្រមាថ​ព្រះមហាក្សត្រ​មិន​ត្រឹម​តែ​ប៉ះពាល់​ធ្ងន់ធ្ងរ​ដល់​កិត្តិយស​របស់​ព្រះអង្គ​ដែល​ការពារ​ដោយ​រដ្ឋធម្មនុញ្ញ​ប៉ុណ្ណោះ​ទេ តែ​ផ្ទុយទៅវិញ គឺ​បង្ហាញ​ពី​ទង្វើ​ដែល​កំពុង​រំលោភ​ច្បាប់​រដ្ឋធម្មនុញ្ញ​ថែម​ទៀត។

បណ្ឌិត ឡៅ ម៉ុងហៃ បញ្ជាក់​ថា មេដឹកនាំ​ខ្មែរ​គ្រប់​រូប​មិន​ត្រូវ​រំលោភ​ព្រះរាជ​តួនាទី​របស់​ព្រះមហាក្សត្រ​នោះ​ទេ ប៉ុន្តែ​ត្រូវ​នាំគ្នា​ទាមទារ​ឱ្យ​មាន​ការ​ថ្វាយ​មធ្យោបាយ​ចាំបាច់ ដើម្បី​ឱ្យ​ព្រះអង្គ​អាច​បំពេញ​បេសកកម្ម​ជូន​ជាតិ ដូច​ដែល​មាន​ចែង​ក្នុង​រដ្ឋធម្មនុញ្ញ​វិញ ទើប​ជា​រឿង​ត្រឹមត្រូវ។

ទាក់ទិន​នឹង​បញ្ហា​នេះ កាលពី​ឆ្នាំ​២០០៥ លោក​នាយករដ្ឋមន្ត្រី ហ៊ុន សែន ធ្លាប់​បាន​គំរាម​រំលាយ​របប​រាជា​និយម ហើយ​ដាក់​ជំនួស​មក​វិញ​នូវ​របប​សាធារណរដ្ឋ ប្រសិនបើ​ព្រះមហាក្សត្រ​សម្ដេចព្រះ នរោត្តម សីហនុ មិន​ព្រម​ឡាយព្រះហស្តលេខា​លើ​សន្ធិសញ្ញា​បំពេញ​បន្ថែម​ស្ដីពី​ព្រំដែន​កម្ពុជា-វៀតណាម តាម​ការ​ចង់​បាន​របស់​ខ្លួន​ទេ​នោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស