លោក ហ៊ុន សែន ថ្លែងថា ការផ្អាកពិធីបុណ្យអុំទូកមិនមែនដោយសាររដ្ឋាភិបាលខ្វះថវិកាដូចការវិភាគរបស់បុគ្គលមួយចំនួននោះទេ ប៉ុន្តែដោយសារការបារម្ភពីការជួបជុំមនុស្សច្រើន ដែលធ្វើឲ្យលោកពិបាកគ្រប់គ្រងសភាពការណ៍ ស្របពេលដែលកម្ពុជាជាម្ចាស់ផ្ទះនៃកិច្ចប្រជុំកំពូលអាស៊ាន និងស្ថានភាពជំងឺកូវីដ-១៩ នៅមិនទាន់បាត់ទាំងស្រុងថែមទៀតនោះ។
តាមរយៈសារសំឡេងពិសេសនាថ្ងៃទី១៥ កញ្ញា នេះ លោក ហ៊ុន សែន ថ្លែងថា មូលហេតុផ្អាកពិធីបុណ្យអុំទូក ដោយសារមិនចង់ឲ្យមានការប្រមូលផ្ដុំទ្រង់ទ្រាយធំ ដោយបារម្ភការឆ្លងរីករាលដាលជំងឺកូវីដ-១៩។ លោកថា ប្រសិនបើមានឆ្លងកូវីដទ្រង់ទ្រាយធំ វានឹងបង្កើតឲ្យមានគ្រោះថ្នាក់ដល់ប្រទេសជាតិ ហើយនៅឆ្នាំ២០២១ កម្ពុជាក៏ធ្លាប់បានផ្អាកពិធីបុណ្យអុំទូកនេះដែរ ក្រោយពីការឆ្លងរីករាលដាលជំងឺកូវីដ-១៩។
លោកអះអាងថា ហេតុផលមួយទៀតនោះ ថ្ងៃបុណ្យអុំទូកចំពេលដែលកម្ពុជាត្រូវទទួលធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ាន ខណៈថ្ងៃទី០៧ ដល់ថ្ងៃទី០៩ ក៏មានការបំពេញទស្សនកិច្ចជាផ្លូវការពីសំណាក់នាយករដ្ឋមន្ត្រីវៀតណាម នាយករដ្ឋមន្ត្រីចិន និងប្រធានាធិបតីហ្វីលីពីន ថែមទៀតនោះ។
លោក ហ៊ុន សែន បន្ថែមទៀតថា ដូច្នេះហើយ កម្ពុជាត្រូវមានភារកិច្ចទទួលភ្ញៀវបរទេស រៀបចំកិច្ចប្រជុំកំពូលអាស៊ាន ហើយករណីនេះធ្វើឲ្យលោកមិនអាចលៃលកពេលវេលាក្នុងការគ្រប់គ្រងសភាពការណ៍ដែលមានមនុស្សច្រើននៅក្នុងពេលតែមួយបាន។ លោក ហ៊ុន សែន បានច្រានចោលចំពោះការចោទថា រដ្ឋាភិបាលដែលដឹកនាំដោយលោកផ្ទាល់ ខ្វះថវិកា ទើបផ្អាកពិធីបុណ្យអុំទូក។
កាលពីឆ្នាំ២០២១ កន្លងទៅ រដ្ឋាភិបាលកម្ពុជាក៏បានប្រកាសផ្អាកពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ក្រោមហេតុផលថា ទប់ស្កាត់ការឆ្លងរីករាលដាលជំងឺកូវីដ-១៩។
កម្ពុជាក៏ធ្លាប់ខកខានប្រារព្ធព្រះរាជពិធីបុណ្យមួយនេះរយៈពេល ៣ឆ្នាំជាប់ៗគ្នាកាលពីឆ្នាំ២០១១ ឆ្នាំ២០១២ និងឆ្នាំ២០១៣ ក្រោយពីមានហេតុការណ៍រត់ជាន់គ្នានៅកោះពេជ្រ ដែលបណ្ដាលឱ្យមនុស្សជាង ៣៥០នាក់ស្លាប់ និងដោយសារហេតុផលគ្រោះទឹកជំនន់ និងក្រោយការសោយទិវង្គតរបស់ព្រះបរមរតនកោដ្ឋ ព្រះបាទ នរោត្ដម សីហនុ។
ក្នុងឆ្នាំ២០១៤ ពិធីបុណ្យអុំទូកត្រូវបានរៀបចំធ្វើឡើងវិញ តែក៏បានខកខានម្ដងទៀតនៅឆ្នាំ២០១៥ ដោយសារកម្ពស់ទឹកទន្លេរាក់ពេក មិនអាចអុំទូកបាន។
ពិធីបុណ្យអុំទូកឆ្នាំនេះ នឹងប្រព្រឹត្តទៅចាប់ពីថ្ងៃទី៧ ដល់ទី៩ ខែវិច្ឆិកា ខាងមុខនេះ ហើយចំណែកកិច្ចប្រជុំអាស៊ាន នឹងធ្វើឡើងនៅរាជធានីភ្នំពេញចាប់ពីថ្ងៃទី១០ ដល់ទី១៣ ខែវិច្ឆិកា៕