នៅក្នុងថ្ងៃខួប ៩ឆ្នាំនៃការបាញ់សម្លាប់កម្មករសំណង់ លោក ម៉ៅ សុខចាន់ ដោយការផ្ទុះអំពើហិង្សារវាងក្រុមប្រជាពលរដ្ឋ និងកងកម្លាំងប្រដាប់អាវុធនៅស្ពានព្រះមុនីវង្ស កាលពីឆ្នាំ២០១៣ មជ្ឈមណ្ឌលសិទ្ធិមនុស្សកម្ពុជា (CCHR) លើកឡើងថា ការមិនស៊ើបអង្កេតករណីបាញ់សម្លាប់ ៩ឆ្នាំកន្លងមកនេះ ជំរុញឲ្យអំពើនិទ្ទណ្ឌភាពនៅបន្តកើតឡើងនៅកម្ពុជា។
យោងតាមហ្វេសប៊ុកមជ្ឈមណ្ឌលសិទ្ធិមនុស្សកម្ពុជា (CCHR) បាន សរសេរថា ក្នុងនាមជាអង្គការសង្គមស៊ីវិលនៅតែចាំមិនភ្លេចចំពោះការស្លាប់របស់លោក ម៉ៅ សុខចាន់ កាលពី ៩ឆ្នាំមុន។ CCHR បញ្ជាក់ថា លោក ម៉ៅ សុខចាន់ ត្រូវបានសមត្ថកិច្ចបាញ់សម្លាប់ទាំងគ្មានកំហុស ដោយសារលោកគ្រាន់តែជាអ្នកឈរមើលក្នុងអំឡុងពេលប៉ះទង្គិចនៅលើស្ពានព្រះមុនីវង្សក្នុងឆ្នាំ២០១៣។
CCHR អះអាងថា អស់រយៈពេល ៩ឆ្នាំក្រោយពីការស្លាប់របស់លោក ម៉ៅ សុខចាន់ រដ្ឋាភិបាលមិនបានបើកការស៊ើបអង្កេតអ្វីនោះឡើយ។
លោក ម៉ៅ សុខចាន់ ត្រូវបានកងកម្លាំងសន្តិសុខបាញ់សម្លាប់នៅលើស្ពានអាកាសក្បាលថ្នល់ក្នុងរាជធានីភ្នំពេញ កាលពីរាត្រីថ្ងៃទី១៥ ខែកញ្ញា ឆ្នាំ២០១៣ អំឡុងពេលដែលនគរបាលបានបិទផ្លូវ ខណៈពលរដ្ឋដែលគាំទ្រគណបក្សសង្គ្រោះជាតិ ធ្វើបាតុកម្មនៅទីលានប្រជាធិបតេយ្យទាមទារឱ្យបោះឆ្នោតឡើងវិញ។ ក្រៅពីការបាញ់សម្លាប់លោក ម៉ៅ សុខចាន់ ក៏មានមនុស្សចំនួន ១០នាក់ផ្សេងទៀតបានរងរបួសដែរ។
កាលពីថ្ងៃទី៣១ ខែសីហា ឆ្នាំ២០២២ លោក ហ៊ុន សែន បានថ្លែងការពារក្រុមសមត្ថកិច្ចដែលប្រើកាំភ្លើងបាញ់បង្ក្រាបទៅលើបាតុករនៅលើផ្លូវវេងស្រេង កាលពីឆ្នាំ២០១៤ ដែលបណ្ដាលឲ្យពលរដ្ឋស្លាប់ និងរងរបួសធ្ងន់ថា ធ្វើឡើងដើម្បីការពារខ្លួន ការពារទ្រព្យសម្បត្តិសាធារណៈ និងឯកជន។
ការចេញមុខការពារក្រុមសមត្ថកិច្ចពីសំណាក់លោក ហ៊ុន សែន នេះ ត្រូវអង្គការសង្គមស៊ីវិលជាតិ និងអន្តរជាតិចាត់ទុកថាជាការលើកទឹកចិត្តជនប្រព្រឹត្តិបទល្មើស និងជំរុញឲ្យមានអំពើហិង្សាកើតឡើងបន្តទៀត ខណៈសមត្ថកិច្ចដែលបាញ់ពលរដ្ឋឲ្យស្លាប់ និងរងរបួស មិនត្រូវរដ្ឋាភិបាលចាប់ខ្លួនយកមកផ្ដន្ទាទោសឡើយ៕