29 C
Phnom Penh

GDP៖ ក្រសួង​មហាផ្ទៃ​ទទួលយក​សំណើ​រួម​របស់​បក្ស​ក្រៅ​រដ្ឋាភិបាល​ទាំង​៤​ទៅ​ពិចារណា

ដោយ ឌឹ ខេមបូឌា ដេលី

បទវិភាគ

ប្រធាន​គណបក្ស​ប្រជាធិបតេយ្យ​មូលដ្ឋាន (GDP) អះអាង​ថា ក្រសួង​មហាផ្ទៃ​ព្រម​ទទួលយក​សំណើ​ដែល​ជា​គោលជំហរ​រួម​របស់​គណបក្ស​ក្រៅ​រដ្ឋាភិបាល​ទាំង​៤ ទៅ​ពិចារណា ខណៈ​ឯកអគ្គរាជទូត​ជប៉ុន បង្ហាញ​ជំហរ​មុតមាំ​ក្នុង​ការ​កែលំអ​ប្រព័ន្ធ​បោះឆ្នោត​នៅ​កម្ពុជា។

ប្រធាន​គណបក្ស​ប្រជាធិបតេយ្យ​មូលដ្ឋាន លោក យ៉េង វីរៈ បាន​ប្រាប់​សារព័ត៌មាន The Cambodia Daily នៅ​ថ្ងៃទី​១៦ កញ្ញា នេះ​ថា គណបក្ស​ទាំង​៤ បាន​លើកឡើង​នូវ​គោលជំហរ​រួម​ដែល​មាន ៧​ចំណុច​ដាក់​ជូន​ក្រសួង​មហាផ្ទៃ ដូចជា​ការ​ស្នើ​ឱ្យ​បង្កើត​យន្តការ​ទំនាក់ទំនង​ក្រសួង​មហាផ្ទៃ​ឱ្យ​មាន​ភាព​ងាយស្រួល ដើម្បី​ឱ្យ​ក្រសួង​អាច​ជួយ​សម្របសម្រួល​ដោះស្រាយ​បញ្ហា​ពាក់ព័ន្ធ​នានា ដូចជា​មាន​ការ​គំរាមកំហែង និង​បំភិតបំភ័យ​លើ​សកម្មជន​នយោបាយ​របស់​បក្ស​ក្រៅ​រដ្ឋាភិបាល​ពី​សំណាក់​អាជ្ញាធរ​មូលដ្ឋាន​ឱ្យ​បាន​ទាន់​ពេលវេលា។

តំណាង​គណបក្ស​ទាំងនោះ​បាន​ស្នើ​ឱ្យ​ក្រសួង​មហាផ្ទៃ លុប​បំបាត់​បណ្តឹង​ជា​លក្ខណៈ​នយោបាយ និង​ស្នើ​ឱ្យ​មាន​ការ​បែងចែក​តួនាទី​សមាជិក​ក្រុមប្រឹក្សា​ឃុំ-សង្កាត់​ដោយ​ស្រប​តាម​ច្បាប់​ផង​ដែរ។

គណបក្ស​ទាំង​៤ ក៏​បាន​ស្នើ​ឱ្យ​ក្រសួង​ជួយ​សម្រួល​ឱ្យ​អាជ្ញាធរ​បង្កើត​ទំនាក់ទំនង​ល្អ​ជាមួយ​តំណាង​គណបក្ស​នយោបាយ​ដែល​មាន​មូលដ្ឋាន និង​ស្នើ​ឱ្យ​ជួយ​ធានា​នូវ​សុវត្ថិភាព​សកម្មជន​គណបក្ស​នយោបាយ​ក្រៅ​រដ្ឋាភិបាល​ផង​ដែរ។

ប្រធាន​គណបក្ស​ប្រជាធិបតេយ្យ​មូលដ្ឋាន​រូប​នេះ​បញ្ជាក់​ថា ចុងក្រោយ តំណាង​គណបក្ស​ទាំង​៤ បាន​ស្នើ​ឱ្យ​ក្រសួង​មហាផ្ទៃ​ចេញ​សេចក្តី​ណែនាំ​មួយ​ក្នុង​ការ​បើក​ទូលាយ​សិទ្ធិ​សេរីភាព​នយោបាយ ដើម្បី​កុំ​ឱ្យ​អាជ្ញាធរ​នៅ​មូលដ្ឋាន​ប្រើ​អំណាច​ហាមឃាត់ ឬ​គំរាម​ម្ចាស់ផ្ទះ ឬ​ម្ចាស់​ទីតាំង​ណា​មួយ​ដែល​ទទួល​ឱ្យ​មាន​ការ​ជួប​ប្រជុំ​របស់​គណបក្ស​ក្រៅ​រដ្ឋាភិបាល ដូច​ដែល​ធ្លាប់​កើតមាន​នា​ពេល​កន្លងមក។

កាលពី​ថ្ងៃទី​១៥ ខែ​កញ្ញា ឆ្នាំ​២០២២ តំណាង​គណបក្ស​ចំនួន​៤ រួម​មាន​តំណាង​គណបក្ស​ប្រជាធិបតេយ្យ​មូលដ្ឋាន តំណាង​គណបក្ស​ភ្លើង​ទៀន តំណាង​គណបក្ស​ឆន្ទៈ​ខ្មែរ និង​តំណាង​គណបក្ស​កែទម្រង់​កម្ពុជា បាន​ជួប​ប្រជុំ​ពិភាក្សា​ជាមួយ​នឹង​តំណាង​ក្រសួង​មហាផ្ទៃ ដើម្បី​ពិភាក្សា​អំពី​សំណើ​លើក​ស្ទួយ​សេរីភាព​នយោបាយ​នៅ​កម្ពុជា។ ជាង​នេះ​ទៀត តំណាង​គណបក្ស​ទាំងនោះ​ក៏​បាន​ពិភាក្សា​ការងារ​ជាមួយ​ឯកអគ្គរាជទូត​ជប៉ុន ដើម្បី​ពិភាក្សា​ទៅ​លើ​បញ្ហា​លំហ​សេរីភាព​នយោបាយ និង​ការ​កែលំអ​ប្រព័ន្ធ​បោះឆ្នោត​នៅ​កម្ពុជា​ក្នុង​ពេល​បច្ចុប្បន្ន​នេះ​ផង​ដែរ។

កាលពី​ថ្ងៃទី​២២ ខែ​សីហា ឆ្នាំ​២០២២ គណបក្ស​ក្រៅ​រដ្ឋាភិបាល​ចំនួន​៤ បាន​រួម​គ្នា​ដាក់​លិខិត​ទៅ​រដ្ឋសភា ក្រសួង​មហាផ្ទៃ និង​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) ស្នើ​កែ​ច្បាប់​មួយ​ចំនួន​ដើម្បី​ធ្វើ​ឱ្យ​ប្រព័ន្ធ​បោះឆ្នោត និង​លំហ​សេរីភាព​នយោបាយ​នៅ​កម្ពុជា​មាន​ភាព​ល្អ​ប្រសើរ​ឡើងវិញ។

ក្រោយ​ដាក់​ញត្តិ​របស់​គណបក្ស​ទាំងនេះ គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប) និង​ក្រសួង​មហាផ្ទៃ បាន​ទទួល​ជួប​ជាមួយ​តំណាង​គណបក្ស​ទាំងនេះ​ជា​បន្តបន្ទាប់ ក្នុង​នោះ ស្ថាប័ន គ.ជ.ប និង​ក្រសួង​មហាផ្ទៃ បាន​ប្រកាស​ទទួល​សំណើ​របស់​គណបក្ស​ទាំងនេះ​ដើម្បី​ពិចារណា​បន្ត​ទៀត ប៉ុន្តែ​ស្ថាប័ន​រដ្ឋសភា​ជាតិ​កម្ពុជា មិនទាន់​ទទួល​ជួប​តំណាង​គណបក្ស​ទាំងនេះ​នៅឡើយ​ទេ​រហូត​មក​ទល់​នឹង​ពេលនេះ។

ទាក់ទិន​នឹង​ការ​ជំរុញ​ឱ្យ​មាន​ការ​កែប្រែ​ប្រព័ន្ធ​បោះឆ្នោត និង​លំហ​សេរីភាព​នយោបាយ​នៅ​កម្ពុជា​នេះ កាលពី​ថ្ងៃទី​២០ ខែ​ឧសភា ឆ្នាំ​២០២២ កន្លងទៅ សហភាព​អឺរ៉ុប បាន​បដិសេធ​មិន​បញ្ជូន​អ្នក​សង្កេតការណ៍​របស់​ខ្លួន​ឱ្យ​ទៅ​ចូលរួម​តាមដាន​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​នា​ពេល​កន្លងទៅ​នោះ​ទេ ក្រោម​ហេតុផល​ថា ដំណើរការ​នៃ​ការ​បោះឆ្នោត​នេះ​គ្មាន​តម្លាភាព និង​មិន​មាន​ដំណើរការ​ដោយ​សេរី ត្រឹមត្រូវ និង​យុត្តិធម៌។

ជុំវិញ​ការ​បោះឆ្នោត​នៅ​កម្ពុជា ត្រូវ​គេ​មើល​ឃើញ​ថា​មាន​តែ​ការ​បោះឆ្នោត​ឆ្នាំ​១៩៩៣ ដែល​រៀបចំ​ឡើង​ដោយ​អ៊ុនតាក់ (UNTAC) ប៉ុណ្ណោះ ដែល​មាន​តម្លាភាព សេរី ត្រឹមត្រូវ និង​យុត្តិធម៌។ ក្រៅ​ពី​នោះ គឺ​នៅ​អាណត្តិ​បន្តបន្ទាប់​មក​ទៀត គឺជា​ការ​បោះឆ្នោត​ដែល​មិន​ត្រឹមត្រូវ ដោយសារតែ​ដំណើរការ និង​នីតិវិធី​នៃ​ការ​បោះឆ្នោត​ទាំងនោះ ត្រូវ​បាន​គ្រប់គ្រង និង​លួច​បន្លំ​ដោយ​គណបក្ស​គ្រប់គ្រង​រដ្ឋាភិបាល​រហូត​មក៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស