ក្នុងរយៈពេលប៉ុន្មានសប្ដាហ៍មកនេះ ចិនមើលទៅកាន់តែដើរដល់ក្រឡាទាល់ច្រកហើយ ចំពោះសំណុំរឿងតៃវ៉ាន់ ដែលខ្លួនព្យាយាមរាំងខ្ទប់មិនឲ្យប្រទេសផ្សេងៗទៀតមានទំនាក់ទំនងនឹងដែនកោះមួយនេះ ដែលក្រុងប៉េកាំង ចាត់ទុកថាជាដែនដីស្ថិតក្នុងអធិបតេយ្យភាពរបស់ចិន ស្របនឹងដំណោះស្រាយនៃមហាសន្និបាតអង្គការសហប្រជាជាតិលេខ២៧៥៨ កាលពីឆ្នាំ១៩៧១។
ដំណោះស្រាយនេះហើយដែលជាសេចក្ដីសម្រេចបើកសិទ្ធិឲ្យរបបបក្សកុម្មុយនីស្តចិន មកអង្គុយជំនួសសាធារណរដ្ឋចិនរបស់តៃវ៉ាន់នៅអង្គការសហប្រជាជាតិ។ ប៉ុន្តែសម្រាប់សហរដ្ឋអាមេរិក និងសម្ពន្ធមិត្ត មិនបានចាត់ទុកតៃវ៉ាន់ជាដែនដីចំណុះឲ្យរបបកុម្មុយនីស្តចិនម្ដងណានោះទេ ព្រោះតៃវ៉ាន់ គឺជារដ្ឋអធិបតេយ្យប្រជាធិបតេយ្យ។
ប្រទេសលោកខាងលិចភាគច្រើន រួមមានជប៉ុន ឥណ្ឌា អូស្ត្រាលី សហរដ្ឋអាមេរិក និងសហភាពអឺរ៉ុប បើទោះជាទទួលស្គាល់គោលនយោបាយចិនតែមួយក៏ពិតមែន ប៉ុន្តែប្រទេសទាំងនេះក៏ទទួលស្គាល់កោះតៃវ៉ាន់ជារដ្ឋអធិបតេយ្យដែលមានកម្លាំងប្រជាធិបតេយ្យរឹងមាំនៅអាស៊ីប៉ាស៊ីហ្វិកដែរ។ ដូច្នេះហើយបានជាសហរដ្ឋអាមេរិក ឈានមុខគេក្នុងការជួយការពារប្រជាធិបតេយ្យនៅតៃវ៉ាន់ ដោយសម្រេចជ្រើសរើសយកភាពតានតឹងជាមួយចិន ទាំងផ្នែកសេដ្ឋកិច្ច ពាណិជ្ជកម្ម និងយោធា។
ជាថ្មីម្ដងទៀត ក្រុមបស្ចិមប្រទេស និងកម្លាំងអ្នកប្រជាធិបតេយ្យបានសម្រេចបញ្ជូនគណៈប្រតិភូរបស់ខ្លួន ទាំងមន្ត្រីជាន់ខ្ពស់របស់រដ្ឋាភិបាលរហូតដល់សមាជិកព្រឹទ្ធសភា រដ្ឋសភា ឲ្យទៅធ្វើទស្សនកិច្ចជាបន្តបន្ទាប់លើដែនកោះនេះ បន្ទាប់ពីថ្ងៃទី២ កញ្ញា ដែលផ្ដើមដោយប្រធានរដ្ឋសភាអាមេរិក អ្នកស្រី ណាន់ស៊ី ប៉េឡូស៊ី បើទោះបីជាចិនគំរាមកំហែងដោយបង្ហាញកងទ័ពប្រឆាំងនឹងទស្សនកិច្ចរបស់ប្រតិភូប្រទេសទាំងនោះក៏ដោយ។
បន្ថែមលើសនេះទៅទៀត គណៈកម្មាធិការព្រឹទ្ធសភាអាមេរិក កាលពីសប្ដាហ៍កន្លងមកនេះ បានសម្រេចអនុម័តកញ្ចប់ថវិកាជំនួយយោធាទៅឱ្យតៃវ៉ាន់ចំនួន ៦៥០០លានដុល្លារ ដើម្បីឆ្លើយតបទៅនឹងស្ថានការណ៍នៅច្រកសមុទ្រតៃវ៉ាន់ និងអធិបតេយ្យភាពកោះតៃវ៉ាន់ដែលចិនមានផែនការវាយលេបដែនកោះមួយនេះ។
បើតាមសារព័ត៌មាន Defense News គណៈកម្មាធិការព្រឹទ្ធសភាអាមេរិក បានសម្រេចដូចនេះដោយផ្អែកលើច្បាប់ស្ដីពីគោលនយោបាយសម្រាប់តៃវ៉ាន់ឆ្នាំ២០២២។
ប្រធានគណៈកម្មាធិការព្រឹទ្ធសភា Bob Menendez បាននិយាយថា ការសម្រេចនេះចាត់ទុកជាហេតុការណ៍បន្ទាន់ ដើម្បីឆ្លើយតបតាមក្ដីកង្វល់របស់រដ្ឋាភិបាលកោះតៃវ៉ាន់ ប៉ុន្តែលោកបញ្ជាក់ថា កញ្ចប់ជំនួយយោធាទៅឲ្យតៃវ៉ាន់នេះ គឺចាប់មានពីចុងឆ្នាំនេះតទៅរហូតដល់ឆ្នាំ២០២៧ ទើបពិនិត្យឡើងវិញម្ដងទៀត។
បើតាមព្រឹទ្ធសភា Bob Menendez សភាអាមេរិកកំពុងតែធ្វើពង្រាងច្បាប់ដើម្បីអនុញ្ញាតឲ្យតៃវ៉ាន់ ក្លាយជាដៃគូយុទ្ធសាស្ត្ររបស់អង្គការយោធាណាតូ (NATO) ទៀតផង។
ចាប់ពីចុងឆ្នាំ២០២២ នេះតទៅ រដ្ឋការរបស់លោកប្រធានាធិបតី ចូ បៃដិន នឹងបន្តបញ្ជូនសព្វាវុធធ្ងន់ធ្ងរមានទាំងប្រព័ន្ធមីស៊ីល អេថាកខឹម (Atacm) និងប្រព័ន្ធរ៉ុក្កែត Himars រួមទាំងយន្តហោះចម្បាំង F-16 ជាច្រើនគ្រឿងទៅឱ្យតៃវ៉ាន់ ទៅតាមសំណើសុំទិញអាវុធទាំងនេះបន្ថែមទៀតរបស់ដែនកោះនេះ។
ក្នុងសំណុំរឿងនេះ ចិនកាន់តែខកចិត្ត និងទាល់ច្រក។ កាលពីថ្ងៃព្រហស្បតិ៍សប្ដាហ៍មកនេះ ចិនបានជំទាស់តាមផ្លូវទូតប្រឆាំងនឹងសហរដ្ឋអាមេរិក ដោយសារតែព្រឹទ្ធសភាប្រទេសមហាអំណាចមួយនេះបានអនុម័តសំណើច្បាប់មួយដែលជំរុញឱ្យមានការគាំទ្រផ្នែកយោធារបស់សហរដ្ឋអាមេរិកចំពោះកោះតៃវ៉ាន់។
អ្នកស្រី Mao Ning អ្នកនាំពាក្យក្រសួងការបរទេសចិន បាននិយាយនៅក្នុងសន្និសីទកាសែតប្រចាំថ្ងៃថា ប្រសិនបើសំណើច្បាប់នេះនឹងបន្តក្លាយជាច្បាប់ វានឹងប៉ះពាល់ដល់ទំនាក់ទំនងរវាងអាមេរិក និងចិនយ៉ាងខ្លាំង។ អ្នកស្រីក៏បានបញ្ជាក់ផងដែរថា ការអនុម័តរបស់គណៈកម្មាធិការព្រឹទ្ធសភាអាមេរិកលើសំណើច្បាប់ថ្មីនេះ គឺជាការបញ្ជូនសញ្ញាខុសឆ្គងធ្ងន់ធ្ងរទៅកាន់កងកម្លាំងផ្ដាច់ខ្លួនដែលចង់ទាមទារឯករាជ្យឱ្យកោះតៃវ៉ាន់។
អ្នកស្រីបានថ្លែងថា៖ «ប្រទេសចិនប្រឆាំងយ៉ាងម៉ឺងម៉ាត់ចំពោះរឿងនេះ និងជំទាស់តាមផ្លូវទូតប្រឆាំងនឹងភាគីសហរដ្ឋអាមេរិក»។ អ្នកស្រីថា «នៅលើពិភពលោកនេះ មានប្រទេសចិនតែមួយប៉ុណ្ណោះ ហើយចំណែកតៃវ៉ាន់ គឺជាផ្នែកមួយដែលមិនអាចកាត់ផ្ដាច់បាននៃដែនដីរបស់ប្រទេសចិនបានឡើយ»។
ប្រតិកម្មរបស់ចិន គឺពិតណាស់ឆ្លើយតបនឹងគណៈកម្មាធិការទំនាក់ទំនងការបរទេសនៃព្រឹទ្ធសភាសហរដ្ឋអាមេរិក បានអនុម័តច្បាប់គោលនយោបាយតៃវ៉ាន់ឆ្នាំ២០២២ ក្នុងសំឡេង ១៧ ទល់នឹង ៥ ដែលបើកផ្លូវឱ្យរដ្ឋការលោក បៃដិន ទាញយកថវិការបស់សហរដ្ឋអាមេរិកពាន់លានដុល្លារជួយបញ្ជូនអាវុធទៅឱ្យតៃវ៉ាន់។
សំណើច្បាប់នេះបានធ្វើឡើងក្នុងរយៈពេលជាងមួយខែក្រោយមក បន្ទាប់ពីប្រទេសចិនបានធ្វើសមយុទ្ធយោធាទ្រង់ទ្រាយធំបំផុតមិនធ្លាប់មានពីមុនមកនៅជុំវិញកោះតៃវ៉ាន់ ដើម្បីឆ្លើយតបទៅនឹងទស្សនកិច្ចរបស់ប្រធានរដ្ឋសភាអាមេរិក អ្នកស្រី Nancy Pelosi ទៅកាន់ទីនោះ។
ជាថ្មីម្ដងទៀត គឺភាពប្រាកដប្រជាកាន់តែច្បាស់ហើយចំពោះអាមេរិក ដែលត្រូវអន្តរាគមន៍ផ្នែកយោធាជួយកោះតៃវ៉ាន់ បើដែនកោះនេះធ្លាក់ក្នុងសង្គ្រាមពីសំណាក់ប្រទេសចិន។
លោកប្រធានាធិបតី ចូ បៃដិន បានបន្តព្រមានជាថ្មីទៀតថា នឹងជួយការពារដែនកោះតៃវ៉ាន់ បើដែនកោះនេះត្រូវចិនឈ្លានពាន។ នៅក្នុងបទសម្ភាសន៍មួយជាមួយបណ្ដាញផ្សព្វផ្សាយ CBS ៦០នាទី កាលពីថ្ងៃអាទិត្យ លោក បៃដិន បន្តព្រមានចិនថា សហរដ្ឋអាមេរិកពិតណាស់នឹងជួយតៃវ៉ាន់តាមរយៈកិច្ចអន្តរាគមន៍ផ្នែកកងទ័ព។
លោក បៃដិន បញ្ជូនសារទៅក្រុងប៉េកាំងថា កុំឈ្លានពានដែនដីប្រជាធិបតេយ្យមួយនេះឱ្យសោះ។ លោកបញ្ជាក់ថា អាមេរិកទោះជាទទួលស្គាល់គោលនយោបាយចិនតែមួយក៏ដោយ ក៏ក្រុងវ៉ាស៊ីនតោន ត្រូវការពារប្រជាធិបតេយ្យរបស់ដែនកោះមួយនេះដែរ បើដែនកោះនេះត្រូវចិនឈ្លានពានមែននោះ។
បើតាមអ្នកសង្កេតការណ៍អំពីសំណុំរឿងតៃវ៉ាន់ មើលឃើញថា ចិនកាន់តែទាល់ច្រកដែលគេថា ចិនអស់ក្រឡាដើរហើយ ព្រោះវិធានការរបស់ចិន រួមទាំងការលើកទ័ពឡោមព័ទ្ធកោះតៃវ៉ាន់ ទាំងវិធានការការទូត ត្រូវបានអាមេរិក និងសម្ពន្ធមិត្តអាមេរិក និងតៃវ៉ាន់ វាយសំពងចិនចុងក្រោយនេះប្រៀបដូចរុញចិនខ្ទប់ជញ្ជាំងទៅហើយ។ ចិននៅសល់ក្រឡាអុកតែមួយគត់ គឺត្រូវធ្វើសេចក្ដីសម្រេចក្នុងការលើកទ័ពវាយកាន់កាប់កោះតៃវ៉ាន់នៅចំពោះមុខការព្រមានរបស់អាមេរិកតែប៉ុណ្ណោះ៕