32 C
Phnom Penh

ចំណុច​ខ្លាំង​នៃ​សេចក្ដី​ថ្លែងការណ៍​របស់​មេដឹកនាំ​មាន​ឥទ្ធិពល​នៅ​ឯ​មហាសន្និបាត​អង្គការ​សហប្រជាជាតិ​គឺ​សង្គ្រាម​នៅ​អ៊ុយក្រែន

ដោយ ឌឹ ខេមបូឌា ដេលី

បទវិភាគ

មហាសន្និបាត​អង្គការ​សហប្រជាជាតិ ចាប់​បើក​សម័យប្រជុំ​ប្រចាំ​ឆ្នាំ​របស់​ខ្លួន​កាលពី​ថ្ងៃ​ចន្ទ ទី​១៩ កញ្ញា មាន​រយៈពេល​មួយ​សប្តាហ៍។

នេះ​ជា​មហាសន្និបាត​អង្គការ​សហប្រជាជាតិ​លើក​ទី​៧៧ សម្រាប់​ឆ្នាំ​២០២២។ ចាប់ពី​ថ្ងៃ​អង្គារ​នេះ​ទៅ ប្រមុខ​រដ្ឋ និង​ប្រមុខ​រដ្ឋាភិបាល​នៃ​ប្រទេស​ជា​សមាជិក​នីមួយៗ​នៃ​អង្គការ​សហប្រជាជាតិ ត្រូវ​ឡើង​ថ្លែង​សុន្ទរកថា​នៅ​លើ​វេទិកា​ពិភពលោក​មួយ​នេះ។

មេដឹកនាំ​ប្រទេស​ខ្លះ​អាច​ចាត់តាំង​រដ្ឋមន្ត្រី​ការបរទេស​មក​ថ្លែង​ជំនួស បើ​មេដឹកនាំ​នោះ​អវត្តមាន។ រយៈពេល ២​ឆ្នាំ​កន្លងមក មេដឹកនាំ​ពិភពលោក​មិន​បាន​មក​កាន់​មហាសន្និបាត​ដោយ​ផ្ទាល់​នោះ​ទេ ដោយ​ពួកគាត់​ត្រូវ​ធ្វើ​សេចក្ដី​ថ្លែងការណ៍​តាមរយៈ​ការ​ថ្លែង​សារ​វីដេអូ​ថត​ទុក។ សម្រាប់​នៅ​ឆ្នាំ​នេះ មហាសន្និបាត​ប្រព្រឹត្ត​ទៅ​ដោយ​ផ្ទាល់។ គេ​ពុំ​ដឹង​ថា មេដឹកនាំ​ណា​ខ្លះ​អវត្តមាន​នោះ​ទេ។

តែ​ចំពោះ​លោក ពូទីន មេដឹកនាំ​សង្គ្រាម​ឈ្លានពាន​អ៊ុយក្រែន អាច​មិន​មាន​វត្តមាន​នោះ​ទេ។ លោក​បាន​ចាត់តាំង​រដ្ឋមន្ត្រី​ការបរទេស​របស់​លោក គឺ​លោក ហ្សេហ្គេឡារ៉ុស ឲ្យ​មាន​វត្តមាន​ជំនួស​លោក។

ចំណែក​លោក ស៊ី ជីនពីង (Xi Jinping) ប្រធានាធិបតី​ចិន ក៏​អាច​អវត្តមាន​ផង​ដែរ។ ពុំ​មាន​មេដឹកនាំ​ប្រទេស​ណា​មួយ​ត្រូវ​បាន​អនុញ្ញាត​ឲ្យ​ថ្លែង​សុន្ទរកថា​តាមរយៈ​វីដេអូ Conference ដូច​កាលពី ២​ឆ្នាំ​កន្លងមក​នោះ​ទេ ព្រោះតែ​ពេល​នោះ​ដោយសារតែ​ពិភពលោក​ជួប​វិបត្តិ​កូវីដ-១៩ ដ៏​ធ្ងន់ធ្ងរ។

យ៉ាងណា​សម្រាប់​ឆ្នាំ​នេះ គឺ​មាន​តែ​លោក​ប្រធានាធិបតី​អ៊ុយក្រែន​ម្នាក់​គត់​ដែល​ត្រូវ​បាន​ព្រមព្រៀង​ពិសេស​តាមរយៈ​ការ​បោះឆ្នោត​របស់​គណៈកម្មាធិការ​មហាសន្និបាត ដោយ​អនុញ្ញាត​ឲ្យ​លោក ហ្សេឡេនស្គី ថ្លែង​ទៅ​កាន់​អង្គ​មហាសន្និបាត​តាមរយៈ​វីដេអូ​ចេញពី​វិមាន​ប្រធានាធិបតី​នៅ​ទីក្រុង​គៀវ។

គេ​រំពឹង​ថា ចំណុច​ខ្លាំង​នៃ​សេចក្ដី​ថ្លែង​របស់​មេដឹកនាំ​សំខាន់ៗ ជាពិសេស​មេដឹកនាំ​បស្ចិម​ប្រទេស​ថ្លែង​ទៅ​កាន់​មហាសន្និបាត គឺ​អាច​ករណី​សង្គ្រាម​រុស្ស៊ី​ឈ្លានពាន​អ៊ុយក្រែន ហើយ​អាច​ករណី​វិបត្តិ​ច្រក​សមុទ្រ​តៃវ៉ាន់។

គ្រាន់តែ​ចាប់ផ្ដើម​ដំបូង លោក​អគ្គលេខាធិការ​អង្គការ​សហប្រជាជាតិ អង់តូនីញ៉ូ ហ្គូតារេស បាន​បរិហារ​ភាព​ប្រេះឆា​របស់​ពិភពលោក ដែល​ពេលនេះ​មាន​សណ្ឋាន​ដូចជា​ការ​ពុះ​ចែក​ភូមិសាស្ត្រ​យុទ្ធសាស្ត្រ​ដូច​កាលពី​សម័យ​សង្គ្រាម​ត្រជាក់។ លោក​អគ្គលេខាធិការ​បាន​អំពាវនាវ​តាំងពី ៣​ថ្ងៃ​មុន ឱ្យ​ពិភពលោក​មក​ជួបជុំ​គ្នា​ស្វែងរក​ដំណោះស្រាយ​វិបត្តិ​ប្រឈម​ទាំងឡាយ ដែល​ក្នុង​នោះ​គឺ​ត្រូវ​លើក​មក​ដោះស្រាយ​សង្គ្រាម​នៅ​អ៊ុយក្រែន។

របៀបវារៈ​នៃ​សង្គ្រាម​នៅ​អ៊ុយក្រែន គឺជា​ចំណុច​ខ្លាំង​ដែល​ក្រុមប្រឹក្សា​សន្តិសុខ​អង្គការ​សហប្រជាជាតិ​សម្រេច​បើក​ប្រជុំ​នៅ​ថ្ងៃ​ព្រហស្បតិ៍ ក្នុង​សប្ដាហ៍​នេះ គឺ​ទន្ទឹម​នឹង​មហាសន្និបាត​កំពុង​ដំណើរការ​ប្រជុំ​របស់​ខ្លួន។ នេះ​បើ​តាម​ការ​ចុះផ្សាយ​របស់​ទីភ្នាក់ងារ​សារព័ត៌មាន Reuters។

គេ​រំពឹង​ថា មេដឹកនាំ​ជាច្រើន​បាន​ត្រៀម​សេចក្ដី​ថ្លែងការណ៍​របស់​ពួកគេ​រួច​ស្រេច​ហើយ ដែល​និយាយ​យោង​ដល់​វិបត្តិ​សង្គ្រាម​បង្ក​ឡើង​ដោយ​ប្រធានាធិបតី​រុស្ស៊ី វ៉្លាឌីមៀរ ពូទីន (Vladimir Putin)។

នៅ​មុន​មួយ​ថ្ងៃ​នៃ​ការ​បើក​ទ្វារ​សាល​ប្រជុំ​មហាសន្និបាត នាយករដ្ឋមន្ត្រី​ថ្មី​នៃ​ចក្រភព​អង់គ្លេស អ្នកស្រី Liz Truss បាន​វាយប្រហារ​ប្រទេស​រុស្ស៊ី​យ៉ាង​ខ្លាំង ដោយ​អ្នកស្រី​ប្រកាន់​ជំហរ​ដូច​អតីត​នាយករដ្ឋមន្ត្រី បូរីស ចនសុន (Boris Johnson)។

នាយករដ្ឋមន្ត្រី​អង់គ្លេស អ្នកស្រី Liz Truss ត្រូវ​គេ​រំពឹង​ថា អ្នកស្រី​នឹង​ថ្លែង​នៅ​ចំពោះ​អង្គ​មហាសន្និបាត ដែល​ថា​ចក្រភព​អង់គ្លេស​នឹង​ផ្ដល់​ជំនួយ​យោធា​ទៅ​ឲ្យ​អ៊ុយក្រែន សម្រាប់​ឆ្នាំ​២០២៣ ដោយ​មាន​ទំហំ​សាច់ប្រាក់ ២៦០០​លាន​ដុល្លារ​អាមេរិក​ដែល​លើស​ពី​ឆ្នាំ​២០២២ មាន​ទំហំ ២៣០០​លាន​ដុល្លារ។ នេះ​បើ​យោង​តាម​ការ​ចុះផ្សាយ​ដោយ​ទីភ្នាក់ងារ​សារព័ត៌មាន Reuters នៅ​ថ្ងៃ​អង្គារ ទី​២០ ខែ​កញ្ញា។

ជា​ដំណើរ​ទស្សនកិច្ច​លើកដំបូង​របស់​អ្នកស្រី Liz Truss មក​កាន់​ក្រុង​ញីវយ៉ក ក្នុង​នាម​ជា​នាយករដ្ឋមន្ត្រី​អង់គ្លេស អ្នកស្រី​នឹង​អំពាវនាវ​ដល់​មេដឹកនាំ​ផ្សេង​ទៀត​នៅ​ឯ​មហាសន្និបាត​ឲ្យ​ជួយ​បញ្ចប់​សង្គ្រាម​ឈ្លានពាន​របស់​រុស្ស៊ី​ជាមួយ​នឹង​ការ​នាំគ្នា​ជួយ​អ៊ុយក្រែន និង​ដាក់​ទណ្ឌកម្ម​លើ​របប​លោក ពូទីន។

គេ​រំពឹង​ថា អ្នកស្រី Liz Truss នឹង​ជួប​ជាមួយ​ប្រធានាធិបតី​សហរដ្ឋ​អាមេរិក លោក ចូ បៃដិន ដើម្បី​បញ្ជាក់​អំពី​ការ​ប្ដេជ្ញាចិត្ត​របស់​អ្នកស្រី​ក្នុង​ការ​គាំទ្រ​អ៊ុយក្រែន ហើយ​ប្រឆាំង​រុស្ស៊ី​ឈ្លានពាន​អ៊ុយក្រែន។ ចក្រភព​អង់គ្លេស គឺជា​ប្រទេស​ផ្តល់​ជំនួយ​យោធា​ធំ​ជាងគេ​ទី​២ ដល់​អ៊ុយក្រែន បន្ទាប់ពី​សហរដ្ឋ​អាមេរិក។

ក្រៅពី​អ្នកស្រី Liz Truss នាយករដ្ឋមន្ត្រី​អង់គ្លេស​ដែល​បាន​បញ្ចេញ​សារ​ឱ្យ​ដឹង​មុន​គេ​ចំពោះ​សង្គ្រាម​របស់​លោក ពូទីន ឈ្លានពាន​អ៊ុយក្រែន គេ​រំពឹង​ថា​សារ​ដ៏​ខ្លាំង​របស់​លោក ចូ បៃដិន ក្នុង​នាម​ជា​ប្រធានាធិបតី​សហរដ្ឋ​អាមេរិក ពិត​ជា​ធ្ងន់​ជាង​សារ​របស់​អ្នកស្រី Liz Truss ទៅ​ទៀត។

ជាមួយ​គ្នា​នេះ សារ​របស់​អធិការបតី​អាល្លឺម៉ង់ សារ​របស់​នាយករដ្ឋមន្ត្រី​អង់គ្លេស សារ​របស់​ប្រធានាធិបតី​ប៉ូឡូញ សារ​របស់​នាយករដ្ឋមន្ត្រី​ឥណ្ឌា សារ​របស់​នាយករដ្ឋមន្ត្រី​ជប៉ុន សារ​របស់​នាយករដ្ឋមន្ត្រី​អូស្ត្រាលី និង​សារ​របស់​ប្រធានាធិបតី​បារាំង ក៏​នឹង​សង្កត់​ធ្ងន់​ផង​ដែរ​អំពី​សង្គ្រាម​នៅ​លើ​ទឹកដី​អ៊ុយក្រែន។

នៅ​ខណៈ​មហាសន្និបាត​អង្គការ​សហប្រជាជាតិ​កំពុង​ដំណើរការ​នេះ ប្រធានាធិបតី​កោះ​តៃវ៉ាន់​បាន​បញ្ជូន​សារ​មក​ផ្សព្វផ្សាយ​នៅ​ក្រុង​ញីវយ៉ក ជា​ទី​ដែល​មេដឹកនាំ​ពិភពលោក​មក​កាន់​ទីនោះ។ សារ​របស់​អ្នកស្រី សាយ អ៊ឹងវិន បាន​វាយប្រហារ​ធ្ងន់ៗ​ទៅ​លើ​របប​ក្រុង​មូស្គូ ដែល​ឈ្លានពាន​អ៊ុយក្រែន។ អ្នកស្រី​ថា ទោះជា​តៃវ៉ាន់​ពុំ​មាន​អាសនៈ​របស់​ខ្លួន​នៅ​មហាសន្និបាត​អង្គការ​សហប្រជាជាតិ តែ​តៃវ៉ាន់​ជា​រដ្ឋ​អធិបតេយ្យ និង​ប្រជាធិបតេយ្យ​ដែល​ត្រូវ​ចូលរួម​ជាមួយ​ពិភពលោក​ប្រឆាំង​ប្រទេស​ធំ​ដែល​ឈ្លានពាន​ប្រទេស​តូច។

អ្នកស្រី សាយ អ៊ឹងវិន ក៏​បាន​សម្ដែង​អរគុណ​ជា​ខ្លាំង​ចំពោះ​លោក បៃដិន ដែល​បន្ត​សន្យា​ជួយ​ការពារ និង​អន្តរាគមន៍​ឱ្យ​ទ័ព​អាមេរិក​ជួយ​តៃវ៉ាន់ បើ​ចិន​ឈ្លានពាន​តៃវ៉ាន់។

គេ​រំពឹង​ប្រទេស​មួយ​ចំនួន​ដែល​នៅ​ក្រោម​ឥទ្ធិពល​រុស្ស៊ី និង​ចិន នឹង​មិន​បញ្ចេញ​សារ​វាយប្រហារ​រុស្ស៊ី​នោះ​ទេ។

យ៉ាងណាក៏ដោយ ការ​ភ្ញាក់ផ្អើល​មួយ​អាច​នឹង​កើតឡើង​នៅ​ពេល​ប្រធានាធិបតី​អ៊ុយក្រែន លោក ហ្សេឡេនស្គី ថ្លែង​អំពី​ទុក្ខសោក និង​ការ​ឈឺចាប់​របស់​ប្រជាជន​អ៊ុយក្រែន ដែល​និរាស​ព្រាត់ប្រាស​គ្រួសារ​សាច់ញាតិ និង​វិនាសកម្ម​យ៉ាង​អាក្រក់​ដោយសារតែ​រុស្ស៊ី​បង្ក​សង្គ្រាម។

ពិត​ណាស់ លោក ហ្សេឡេនស្គី នឹង​អំពាវនាវ​ឲ្យ​ពិភពលោក​អនុម័ត​ដាក់​ប្រទេស​រុស្ស៊ី និង​លោក ពូទីន ជា​ឧក្រិដ្ឋជន​សង្គ្រាម និង​ជា​រដ្ឋ​ភេរវកម្ម៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស