26 C
Phnom Penh

អ្នកវិភាគ​ថា​លោក ហ៊ុន សែន ទៅ​ហាត់​រៀន​របៀប​រស់​ក្រោម​ទណ្ឌកម្ម​អាមេរិក​នៅ​គុយបា

ដោយ ឌឹ ខេមបូឌា ដេលី

បទវិភាគ

មេដឹកនាំ​កម្ពុជា​ដែល​សល់​ពី​របប​ប្រល័យ​ពូជសាសន៍ លោក ហ៊ុន សែន ប្ដេជ្ញា​រក្សា​បន្ត​កិច្ចសហការ​ជាមួយ​រដ្ឋាភិបាល​គុយបា ទោះបី​រដ្ឋាភិបាល​នៃ​ប្រទេស​មួយ​នេះ​ត្រូវ​បាន​មហាអំណាច​សហរដ្ឋ​អាមេរិក​ដាក់​ទណ្ឌកម្ម​សេដ្ឋកិច្ច​ធ្ងន់ធ្ងរ​នា​ពេល​កន្លងមក​យ៉ាង​ណា​ក៏ដោយ។

មេដឹកនាំ​បក្ស​កាន់​អំណាច​ដែល​ល្បី​រន្ទឺ​ខាង​រំលោភ​សិទ្ធិមនុស្ស និង​ក្រាញ​អំណាច​យូរ​ជាងគេ​ក្នុង​លោក​រូប​នេះ បាន​លើកឡើង​ក្នុង​ជំនួប​ពិភាក្សា​ការងារ​ជាមួយ​ប្រធាន​សភា​នៃ​ប្រទេស​គុយបា លោក Esteban Lazo Hernandez កាលពី​ថ្ងៃទី​២៤ ខែ​កញ្ញា ឆ្នាំ​២០២២ នេះ ដោយ​បាន​សរសើរ​រដ្ឋាភិបាល​គុយបា ដែល​បន្ត​ប្រឆាំង​នូវ​ការ​ដាក់​ទណ្ឌកម្ម​សេដ្ឋកិច្ច​ពី​សហរដ្ឋ​អាមេរិក ដែល​គុយបា​ចាត់ទុក​ថា​ជា​ទង្វើ​អយុត្តិធម៌​សម្រាប់​ខ្លួន​នោះ។

បុរស​ខ្លាំង លោក ហ៊ុន សែន អះអាង​ថា រយៈពេល ៦២​ឆ្នាំ​នៃ​ទំនាក់ទំនង​រវាង​កម្ពុជា និង​គុយបា មាន​លក្ខណៈ​ស្ថិរភាព ជាពិសេស​ទំនាក់ទំនង​នយោបាយ​ការទូត បើ​ទោះបីជា​មាន​ការ​ផ្លាស់ប្ដូរ​នូវ​របៀប​របប​មួយ​ចំនួន តែ​ទំនាក់ទំនង​ទ្វេភាគី​រវាង​ប្រទេស​ទាំង​ពីរ​នៅតែ​មាន​ស្ថិរភាព​ដូច​មុន​ដដែល។

លោក ហ៊ុន សែន សង្ឃឹម​ថា តាមរយៈ​ទំនាក់ទំនង​រដ្ឋសភា​នៃ​ប្រទេស​ទាំង​ពីរ នឹង​បន្ត​កិច្ច​សហប្រតិបត្តិការ​ជាមួយ​គ្នា​ដើម្បី​គាំទ្រ​ដល់​រដ្ឋាភិបាល​នៃ​ប្រទេស​ទាំង​ពីរ​ទៅ​ថ្ងៃ​មុខ ក្នុង​នោះ លោក ហ៊ុន សែន ក៏​បាន​ផ្តល់​អង្ករ​ជា​អំណោយ​ដល់​រដ្ឋាភិបាល​គុយបា ចំនួន ៦​ពាន់​តោន​ផង​ដែរ។

ការ​អះអាង​នេះ ធ្វើឡើង​ស្រប​ពេល​ដែល​រដ្ឋាភិបាល​កម្ពុជា និង​រដ្ឋាភិបាល​នៃ​សាធារណរដ្ឋ​គុយបា បាន​ចាប់ផ្តើម​កិច្ច​សហប្រតិបត្តិការ​ជាមួយ​គ្នា​ឡើងវិញ​ក្រោយ​ខកខាន​ទំនាក់ទំនង​គ្នា​អស់​ជាច្រើន​ឆ្នាំ​កន្លងមក។

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ បាន​ប្រាប់​សារព័ត៌មាន The Cambodia Daily នៅ​ថ្ងៃទី​២៦ កញ្ញា នេះ​ថា ការ​ធ្វើ​ដំណើរ​ទស្សនកិច្ច​ទៅ​ប្រទេស​គុយបា ស្រប​ពេល​អំណាច​ត្រកូល «ហ៊ុន» ជិត​នឹង​ត្រូវ​បាន​ផ្ទេរ​នៅ​ពេល​ដ៏​ខ្លី​ខាងមុខ​នេះ ទំនង​ជា​លោក ហ៊ុន សែន ប្រឹង​រឹត​ចំណង​ទំនាក់ទំនង​មិត្តភាព​ជាមួយ​គុយបា ឱ្យ​កាន់តែ​រឹងមាំ​សម្រាប់​ទុក​ឱ្យ​កូនប្រុស​របស់​គាត់ ហើយ​ក៏​អាច​ជា​ការ​ទៅ​ជម្រាបលា​មិត្ត​កុម្មុយនីស្ត​របស់​ខ្លួន​មុន​នឹង​លោក ហ៊ុន សែន ចុះចេញ​ពី​អំណាច​ផង​ដែរ។

លោក គឹម សុខ លើកឡើង​ថា ក្នុង​ដំណើរ​ទស្សនកិច្ច​នេះ លោក ហ៊ុន សែន មាន​គោលបំណង​មួយ​ផ្សេង​ទៀត​ដែរ គឺ​ដើម្បី​សិក្សា​ពី​បទពិសោធន៍​របស់​គុយបា ដែល​មាន​ប្រវត្តិ​ផ្ទេរ​អំណាច​ត​ជំនាន់​ដោយ​ជោគជ័យ​រហូត​មក បើ​ទោះបី​រដ្ឋាភិបាល​កុម្មុយនីស្ត​មួយ​នេះ​ត្រូវ​បាន​ទទួល​រង​នូវ​ទណ្ឌកម្ម​របស់​អាមេរិក​ក៏ដោយ។ ដូច្នេះ បទពិសោធន៍​បែប​នេះ គឺ​លោក ហ៊ុន សែន ពិតជា​ត្រូវការ​ចាំបាច់​ខ្លាំង​ណាស់​ក្នុង​ស្ថានភាព​របស់​គាត់​ដែល​កំពុង​រង​នូវ​ទណ្ឌកម្ម​អាមេរិក​ដូច​គ្នា​សព្វថ្ងៃ​នេះ។

ប្រធាន​វេទិកា​ពលរដ្ឋ​រូប​នេះ​បញ្ជាក់​ថា ក្រៅពី​ហេតុផល​ខាងលើ ក៏​នៅ​មាន​ចំណុច​សំខាន់​បំផុត​មួយ​ដែរ គឺ​ការ​នាំ​ចៅស្រី​របស់​គាត់​ទៅ​ទស្សនកិច្ច​នៅ​គុយបា នៅ​ពេលនេះ ទំនង​ជា​លោក ហ៊ុន សែន អាច​នឹង​រឹតចំណង​គ្រួសារ ហ៊ុន និង​គ្រួសារ​មេដឹកនាំ​គុយបា តែម្តង ក្រៅពី​ចំណង​មិត្តភាព​រវាង​ប្រទេស និង​ប្រទេស។

លោក​បន្ត​ថា ការ​ផ្តល់​អង្ករ ៦​ពាន់​តោន​ក្នុង​ជំនួប​នេះ ក៏​ជា​ហេតុផល​មួយ​ដើម្បី​បង្ហាញ​ពី​សមានចិត្ត​របស់​ខ្លួន​ទៅ​កាន់​គ្រួសារ​មេដឹកនាំ​គុយបា ឱ្យ​កាន់តែ​មាន​ភាព​ជិតស្និទ្ធ​បន្ថែម​ទៀត។

កម្ពុជា​បាន​បង្កើត​ទំនាក់ទំនង​ការទូត​ជាមួយ​ប្រទេស​គុយបា ចាប់តាំងពី​ថ្ងៃទី​១៥ ខែ​មេសា ឆ្នាំ​១៩៦០ មក ហើយ​ចាប់តាំងពី​ពេល​នោះ​មក ប្រទេស​ទាំង​ពីរ​បាន​រក្សា​ទំនាក់ទំនង​ក្នុង​លក្ខណៈ​ធម្មតា​រហូត​ដល់​ខែ​កញ្ញា ឆ្នាំ​១៩៩៩ លោក ហ៊ុន សែន បាន​ទៅ​បំពេញ​ទស្សនកិច្ច​នៅ​ប្រទេស​គុយបា ម្តង ប៉ុន្តែ​ក្រោយ​អាក់ខាន​អស់​រយៈពេល​ជាង ២០​ឆ្នាំ​មក​នេះ គឺជា​លើក​ទី​មួយ​ហើយ​ដែល​លោក ហ៊ុន សែន បាន​ទៅ​ទស្សនកិច្ច​នៅ​ប្រទេស​គុយបា ម្តង​ទៀត​នៅ​ពេលនេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស