បុរសខ្លាំង លោក ហ៊ុន សែន យល់ព្រមជាមួយប្រធានរដ្ឋវៀតណាម លោក ង្វៀន ស៊ួនហ្វុក ក្នុងការបន្តដោះស្រាយបញ្ហាបោះបង្គោលព្រំដែននៃប្រទេសទាំងពីរឲ្យបានកាន់តែឆាប់ ដើម្បីប្រែក្លាយតំបន់ព្រំដែនទាំងមូលនៃប្រទេសទាំងពីរទៅជាតំបន់ព្រំដែនសន្តិភាពពេញលេញ។
មេដឹកនាំខ្មែរដែលវៀតណាមលើកបន្តុបរូបនេះ បានសរសេរលើគណនីហ្វេសប៊ុករបស់ខ្លួននៅថ្ងៃទី២៧ ខែកញ្ញា ឆ្នាំ២០២២ នេះថា លោកបានប្រាប់ប្រធានរដ្ឋវៀតណាម លោក ង្វៀន ស៊ួនហ្វុក នូវលទ្ធផលផ្លែផ្កាអំពីកិច្ចការជាច្រើនដែលបានធ្វើជាមួយនាយករដ្ឋមន្ត្រីថ្មីរបស់វៀតណាម គឺលោក ផាម មិញជីញ លើការពង្រឹង និងពង្រីកទំនាក់ទំនងទ្វេភាគី ពហុភាគី ក្នុងតំបន់ និងអន្តរជាតិ ដែលមានការយកចិត្តទុកដាក់ដូចគ្នាទៅវិញទៅមក។
លោក ហ៊ុន សែន អះអាងថា ប្រធានរដ្ឋវៀតណាម លោក ង្វៀន ស៊ួនហ្វុក បានកោតសរសើរ និងវាយតម្លៃខ្ពស់ចំពោះបញ្ញាញាណនៃការដឹកនាំរបស់លោក ដែលបានស្ដារ និងអភិវឌ្ឍប្រទេសកម្ពុជាឱ្យមានការរីកចម្រើនលើគ្រប់វិស័យដូចសព្វថ្ងៃនេះ។
លោក ហ៊ុន សែន បានរាយការណ៍ទៅកាន់លោក ង្វៀន ស៊ួនហ្វុក ក្នុងពិធីទទួលទានអាហារពេលព្រឹកអំឡុងពេលដែលមេដឹកនាំទាំងពីរទៅចូលរួមក្នុងពិធីបុណ្យសពថ្នាក់ជាតិរបស់អតីតនាយករដ្ឋមន្ត្រីជប៉ុន លោក ស៊ិនហ្សូ អាបេ នៅថ្ងៃទី២៧ ខែកញ្ញា ឆ្នាំ២០២២ នេះ ។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី២៧ កញ្ញា នេះថា រដ្ឋាភិបាលដែលដឹកនាំដោយគណបក្សកាន់អំណាចសព្វថ្ងៃនេះនៅពេលជួបជាមួយមេដឹកនាំជាន់ខ្ពស់វៀតណាមម្តងៗ មិនដែលមានប្រវត្តិនាំអានុភាពឱ្យជូនពលរដ្ឋខ្មែរនោះឡើយ គឺមានតែទម្លាក់កិត្យានុភាពជាតិប៉ុណ្ណោះ។
លោក ហ៊ុន កុសល លើកឡើងថា ក្រៅពីការគោរពកោតខ្លាចវៀតណាម រដ្ឋាភិបាលមួយនេះក៏បានផ្តល់សម្បត្តិធម្មជាតិនានារបស់កម្ពុជាឱ្យទៅវៀតណាមទាំងបំពានច្បាប់ថែមទៀត។ លើសពីនេះ ក៏បានគាបសង្កត់ប្រជាជនខ្មែរឲ្យទទួលយកនូវការសម្រេចរបស់ខ្លួន ដែលមិនយុត្តិធម៌ថែមទៀត ដូចជាប្រើអំណាចចាប់បង្ខំឱ្យទទួលយកការបោះបង្គោលព្រំដែនដោយឯកបក្សនៅពេលនេះជាដើម។
សកម្មជនបក្សប្រឆាំងរូបនេះបញ្ជាក់ថា នៅចំពោះមុខរដ្ឋាភិបាលវៀតណាម កម្ពុជាតែងធ្វើរឿងអយុត្តិធម៌ចំពោះជាតិខ្លួនជានិច្ច ដូចជាការរំលោភច្បាប់ជាតិ និងច្បាប់អន្តរជាតិដែលបានចែងអំពីអធិបតេយ្យភាពជាតិ និងបូរណភាពទឹកដីកម្ពុជា ដូចជាកិច្ចព្រមព្រៀងសន្តិភាពទីក្រុងប៉ារីស ឆ្នាំ១៩៩១ ជាដើម ដែលបើកផ្លូវឱ្យសន្ធិសញ្ញានានាដែលត្រូវបានធ្វើមោឃភាពកាលពីឆ្នាំ១៩៩៣ ឱ្យរស់ឡើងវិញក្រោយសន្ធិសញ្ញាបំពេញបន្ថែមឆ្នាំ២០០៥ ជាដើម។
លោកបន្ថែមថា អ្នកទទួលខុសត្រូវធំបំផុតចំពោះប្រវត្តិសាស្ត្រដ៏អយុត្តិធម៌ចំពោះជាតិខ្មែរនេះ គ្មានអ្នកណាផ្សេងក្រៅពីមេដឹកនាំកំពុងដឹកនាំរដ្ឋាភិបាលបច្ចុប្បន្ននេះឡើយ។
កម្ពុជា-វៀតណាម មានព្រំដែនគោករួមគ្នាប្រវែង ១២៧០គីឡូម៉ែត្រ ក្នុងនោះភាគីទាំងពីរបានព្រមព្រៀងគ្នាបោះបង្គោលកំណត់ព្រំដែនសរុបបានចំនួន ៣១៤បង្គោល ដែលស្មើនឹង ៨៤% រួចរាល់ហើយ ខណៈ ១៦% ទៀតនៅមិនទាន់ឯកភាពគ្នានៅឡើយ៕