ក្រសួងធនធានទឹក និងឧតុនិយម ព្រមានបណ្តាខេត្តភាគពាយព្យនៃប្រទេសកម្ពុជាចំនួន៨ ឱ្យប្រុងប្រយ័ត្នដែលអាចនឹងមានភ្លៀងធ្លាក់ក្នុងកម្រិតពីបង្គួរទៅច្រើន ដោយសារតែឥទ្ធិពលព្យុះ និងសម្ពាធទាប ខណៈស្រុកចំនួន៩ នៃខេត្តសៀមរាប កំពុងរងផលប៉ះពាល់ដល់ពលរដ្ឋជាង ៨ពាន់គ្រួសារ។
ក្រសួងធនធានទឹក និងឧតុនិយម បានចេញសេចក្តីប្រកាសព័ត៌មាននៅថ្ងៃទី២៧ ខែកញ្ញា ឆ្នាំ២០២២ នេះថា កម្លាំងស្រូបនៃឥទ្ធិពលព្យុះទី១៦ ឈ្មោះ ណូរុ (NORU) ដែលកើតនៅភាគខាងកើតប្រទេសហ្វីលីពីន នឹងធ្វើឱ្យមានប្រព័ន្ធសម្ពាធទាបអូសបន្លាយលើភាគខាងជើងនៃប្រទេសកម្ពុជា ដែលនឹងធ្វើឱ្យបណ្តាខេត្តមួយចំនួន ដូចជាខេត្តឧត្ដរមានជ័យ ព្រះវិហារ រតនគិរី សៀមរាប បន្ទាយមានជ័យ ប៉ៃលិន បាត់ដំបង និងខេត្តពោធិ៍សាត់ ប្រឈមនឹងជំនន់ទឹកភ្លៀងហួសកម្រិតក្នុងរយៈពេលប៉ុន្មានថ្ងៃខាងមុខនេះ។
ប្រភពដដែលអះអាងថា ព្យុះណូរុនឹងវិវឌ្ឍទៅជាព្យុះទីហ្វុង ហើយព្យុះនេះនឹងឆ្លងកាត់តាមប្រទេសវៀតណាម និងអាងទន្លេមេគង្គ ប្រទេសឡាវ និងថៃ ដែលនឹងធ្វើឱ្យកម្ពុជា ចាប់ពីថ្ងៃទី២៧ ដល់ថ្ងៃទី៣០ ខែកញ្ញា ឆ្នាំ២០២២ ទទួលរងនូវភ្លៀងធ្លាក់ក្នុងកម្រិតពីបង្គួរទៅច្រើននៅតាមបណ្តាខេត្តនៅភាគពាយព្យនៃប្រទេស បូកផ្សំនឹងបរិមាណទឹកភ្លៀងដែលហូរមកពីប្រទេសថៃបន្ថែមទៀត អាចបង្កឱ្យទីទំនាបជាប់ផ្លូវទឹក និងផ្លូវទឹកនៅក្នុងភូមិសាស្ត្រនៃបណ្តាខេត្តទាំងនោះប្រឈមនឹងទឹកឡើងគួរឱ្យព្រួយបារម្ភ។
ក្រសួងធនធានទឹក និងឧតុនិយម បញ្ជាក់ថា ចំណែកបណ្ដាខេត្តដទៃទៀត និងរាជធានីភ្នំពេញមានភ្លៀងធ្លាក់ក្នុងកម្រិតពីតិចទៅបង្គួរ លើកលែងតែបណ្ដាខេត្តជាប់មាត់សមុទ្រ ដូចជាខេត្តកោះកុង និងខេត្តព្រះសីហនុ ដែលអាចមានភ្លៀងធ្លាក់ច្រើន ខណៈផ្ទៃសមុទ្រក៏នឹងមានភ្លៀងច្រើន ហើយខ្យល់នឹងបោកបក់ខ្លាំងមានរលកសមុទ្រខ្ពស់ៗ។ ជាងនេះទៀត ភ្លៀងនឹងបន្តធ្លាក់ច្រើនផងដែរនៅតំបន់ផ្ទៃរងទឹកភ្លៀងនៃអាងទន្លេមេគង្គ ដែលអាចធ្វើឱ្យទឹកទន្លេមេគង្គមានការងើបកើនឡើងវិញជាបន្តបន្ទាប់។
ការព្រមាននេះ ធ្វើឡើងដើម្បីជំរុញឱ្យអាជ្ញាធរតាមបណ្តាខេត្តដែលនឹងរងឥទ្ធិពលនៃព្យុះណូរុ ប្រុងប្រយ័ត្នដើម្បីត្រៀមខ្លួនគេចចេញពីទឹកជំនន់ក្នុងរយៈពេលប៉ុន្មានថ្ងៃខាងមុខនេះ។
ក្នុងរយៈពេលប៉ុន្មានថ្ងៃចុងក្រោយនេះ បន្ទាប់ពីមានភ្លៀងធ្លាក់ជាបន្តបន្ទាប់ បានបណ្តាលឱ្យបណ្តាខេត្តភាគពាយព្យនៃប្រទេសមានដូចជា ខេត្តឧត្តរមានជ័យ បន្ទាយមានជ័យ ពោធិ៍សាត់ បាត់ដំបង សៀមរាប និងខេត្តកំពង់ធំ ជាដើម កំពុងជួបការជន់លិចដោយសារជំនន់ទឹកភ្លៀង និងទឹកហូរធ្លាក់មកពីប្រទេសថៃ យ៉ាងធ្ងន់ធ្ងរ។
របាយការណ៍សង្ខេបស្ដីពីវឌ្ឍនភាពការគ្រប់គ្រងគ្រោះមហន្តរាយពីរដ្ឋបាលខេត្តសៀមរាប បានបង្ហាញថា ចាប់ពីថ្ងៃទី១៧ ដល់ថ្ងៃទី២៤ កញ្ញា ជំនន់ទឹកភ្លៀងនៅខេត្តសៀមរាប បានកើតឡើងនៅក្នុងស្រុកចំនួន៩ ដែលហូរចុះពីខេត្តឧត្តរមានជ័យ និងខេត្តព្រះវិហារ ក្នុងនោះមានពលរដ្ឋជាង ៨ពាន់គ្រួសារ (៨៤៤៤គ្រួសារ) ដែលរស់នៅក្នុងចំនួន ២៤៥ភូមិនៃឃុំចំនួន៥៦ នៃស្រុកទាំង៩ នោះ កំពុងរងគ្រោះដោយសារគ្រោះមហន្តរាយនេះ។ ស្រុកដែលកំពុងរងគ្រោះពីជំនន់ទឹកភ្លៀងនោះមានស្រុកស្រីស្នំ ក្រឡាញ់ ជីក្រែង អង្គរជុំ វ៉ារិន ពួក សូទ្រនិគម ប្រាសាទបាគង និងអង្គរធំ។
កាលពីថ្ងៃទី២០ ខែកញ្ញា ឆ្នាំ២០២២ អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនី អះអាងថា ពលរដ្ឋចំនួន ១៥៧គ្រួសារ និងដំណាំស្រូវជាង ២៥៦៣ហិកតារ ស្ថិតក្នុងឃុំចំនួន៤ ស្រុកមង្គលបុរី ខេត្តបន្ទាយមានជ័យ កំពុងរងនូវទឹកជន់លិចហើយនៅពេលនេះ។
ដោយឡែកមន្ទីរសាធារណការ និងដឹកជញ្ជូនខេត្តព្រះវិហារ កាលពីថ្ងៃទី២៦ ខែកញ្ញា ក៏បានចេញសេចក្តីជូនដំណឹងស្ដីពីការផ្អាកចរាចរណ៍ទាំងស្រុងជាបណ្ដោះអាសន្នចំពោះរថយន្តដឹកទំនិញធុនធ្ងន់នៅកំណាត់ផ្លូវជាតិលេខ៩ ចាប់ពីគីឡូម៉ែត្រលេខ៥៦០ ដល់គីឡូម៉ែត្រលេខ៥៦១ ផងដែរ។
រីឯខេត្តកំពង់ធំ ក៏បានប្រកាសបិទកំណាត់ផ្លូវចំនួន ៣ខ្សែជាបណ្ដោះអាសន្នដែរ សម្រាប់រថយន្តធុនធ្ងន់ រួមមានផ្លូវខេត្តលេខ២៦៤D ផ្លូវខេត្តលេខ២៦៤G និងកំណាត់ផ្លូវជាតិលេខ៦ ចាប់ពីគីឡូម៉ែត្រលេខ២២០ ដល់គីឡូម៉ែត្រលេខ២២៤ ក្នុងស្ថិតក្នុងស្រុកស្ទោង ដូចគ្នាកាលពីថ្ងៃចន្ទដើមសប្តាហ៍នេះ។
ជុំវិញបញ្ហានេះ ក្រសួងធនធានទឹក និងឧតុនិយម បានអំពាវនាវឱ្យអាជ្ញាធរដែនដី ព្រមទាំងអាជ្ញាធរពាក់ព័ន្ធ និងសាធារណជន បង្កើនការប្រុងប្រយ័ត្នខ្ពស់ចំពោះស្ថានភាពទឹកជំនន់ដែលកំពុងហក់ឡើងដោយសារទឹកភ្លៀង និងទឹកហូរធ្លាក់មកពីប្រទេសថៃ ដែលអាចនឹងបង្កទៅជាគ្រោះថ្នាក់ធ្ងន់ធ្ងរនៅពេលនេះ៕