ផ្ទៃដីបឹងតាមោក ប្រមាណ ១៦ហិកតារទៀតត្រូវបានរដ្ឋាភិបាលផ្ទេរទៅឲ្យបុគ្គល ២នាក់ទៀតគ្រប់គ្រង ខណៈផ្ទៃដីបឹងតាមោកជាង ៦០% ត្រូវបានលោក ហ៊ុន សែន កាត់ និងផ្ទេរទៅឲ្យក្រុមហ៊ុន និងសាច់ញាតិរបស់លោក រួមទាំងឧកញ៉ាមួយចំនួន និងតារាចម្រៀង ដើម្បីធ្វើជាកម្មសិទ្ធិ។
ឯកសារកិច្ចព្រមព្រៀងរវាងរដ្ឋជាមួយក្រុមហ៊ុនអភិវឌ្ឍន៍ដែលបានចេញផ្សាយកាលពីសប្ដាហ៍មុននេះ ឲ្យដឹងថា ដីបឹងតាមោកទំហំ ១៥,៦ហិកតារ ក៏ត្រូវបានផ្ទេរទៅឲ្យឈ្មោះ ថៃ អ៊ុយ និងឈ្មោះ តាំង គីម។
កាលពីថ្ងៃទី១៣ ខែមេសា ឆ្នាំ២០២២ លោកនាយករដ្ឋមន្ត្រី ហ៊ុន សែន ក៏បានកាត់ផ្ទៃដីបឹងតាមោកចំនួន ៣ហិកតារក្នុងខណ្ឌព្រែកព្នៅ ប្រគល់ទៅឲ្យតារាចម្រៀង លោក ព្រាប សុវត្ថិ ខណៈដីជាច្រើនហិកតារទៀតត្រូវបានលោក ហ៊ុន សែន កាត់ និងផ្ទេរទៅឱ្យបុគ្គលដែលជាប់សែស្រឡាយមន្ត្រីនៅក្នុងជួររដ្ឋាភិបាលមួយចំនួន ក្នុងនោះក៏មានទាំងកូនស្រីរបស់រដ្ឋមន្ត្រីក្រសួងដែនដី នគរូបនីយកម្ម និងសំណង់ ភរិយាសមាជិកព្រឹទ្ធសភា និងភរិយារបស់មេបញ្ជាការកងពលតូចលេខ៧០ ផងដែរ។
សារព័ត៌មាន ឌឹ ខេមបូឌា ដេលី ភ្លាមៗមិនអាចកំណត់អត្តសញ្ញាណបុគ្គលទាំងពីរ គឺឈ្មោះ ថៃ អ៊ុយ និងឈ្មោះ តាំង គីម បាននៅឡើយទេ។
បឹងតាមោក ឬបឹងកប់ស្រូវមានផ្ទៃដីសរុប ៣២៣៩ហិកតារ ជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងមួយនេះត្រូវបានរដ្ឋាភិបាលចេញអនុក្រឹត្យកាលពីដើមខែកុម្ភៈ ឆ្នាំ២០១៦ ដោយកំណត់យកបឹងធម្មជាតិមួយនេះជាសម្បត្តិសាធារណៈរបស់រដ្ឋ។
របាយការណ៍មួយរបស់អង្គការសមាគមធាងត្នោត ដែលបានចេញផ្សាយនៅថ្ងៃទី១០ ខែកុម្ភៈ ឆ្នាំ២០២២ បានលើកឡើងថា គិតត្រឹមខែធ្នូ ឆ្នាំ២០២១ ផ្ទៃបឹងតាមោក ឬបឹងកប់ស្រូវជាង ២០០០ហិកតារ (២០៩៤,៧១៦៥ហិកតារ) ឬស្មើជិត ៦៥% ត្រូវបានរដ្ឋាភិបាលកាត់ឱ្យឧកញ៉ា ក្រុមហ៊ុនឯកជន និងស្ថាប័នសាធារណៈ ដែលសរុបនៃការកាត់ទាំងអស់មានចំនួន ៤៣ដង។ បើតាមផែនទីនោះ ផ្ទៃបឹងតាមោក ឬបឹងទំនប់កប់ស្រូវស្ទើរតែទាំងស្រុងត្រូវបានកាត់គ្រប់ទីកន្លែងនៃផ្ទៃបឹងទៅហើយ៕