សាលាដំបូងខេត្តរតនគិរី កោះហៅសកម្មជនព្រៃឈើ លោក ឆន ផល្លា ឲ្យចូលរួមសវនាការនៅថ្ងៃទី១៣ ខែតុលា ខាងមុខនេះ ក្រោមបទចោទប្រកាន់ «បរិហារកេរ្តិ៍ជាសាធារណៈ ជេរប្រមាថ និងញុះញង់ឲ្យប្រព្រឹត្តបទឧក្រិដ្ឋជាអាទិ៍»។
ក្នុងលិខិតដែលចេញដោយអយ្យការអមសាលាដំបូងខេត្តរតនគិរី លោក កែវ ភក្ដី ចុះថ្ងៃទី២០ ខែកញ្ញា ឆ្នាំ២០២២ កោះហៅលោក សំ ទិត្យសីហា មេធាវីការពារក្ដីឲ្យសកម្មជនការពារព្រៃឈើ លោក ឆន ផល្លា ចូលរួមសវនាការនៅវេលាម៉ោង ៩ព្រឹកនាថ្ងៃទី១៣ ខែតុលា។
លិខិតដដែលឲ្យដឹងថា ការកោះហៅនេះដើម្បីឲ្យចូលរួមសវនាការករណីបទ «បរិហារកេរ្តិ៍ជាសាធារណៈ ជេរប្រមាថ និងញុះញង់ឲ្យប្រព្រឹត្តបទឧក្រិដ្ឋជាអាទិ៍» ដែលប្រព្រឹត្តនៅចំណុចភូមិសមុត្រក្រោម ឃុំសេដា ស្រុកលំផាត់ ខេត្តរតនគិរី កាលពីថ្ងៃទី៨ ខែកក្កដា ឆ្នាំ២០២០។
បទ «បរិហារកេរ្តិ៍ជាសាធារណៈ ជេរប្រមាថ និងញុះញង់ឲ្យប្រព្រឹត្តបទឧក្រិដ្ឋជាអាទិ៍» ដែលតុលាការកោះមេធាវីឲ្យចូលរួមសវនាការនេះ ជាបណ្ដឹងដែលតុលាការប្ដឹងបកទៅលោក ឆន ផល្លា វិញក្រោយពីសកម្មជនព្រៃឈើរូបនេះបានយកបណ្ដឹងមួយទៅដាក់នៅសាលាឧទ្ធរណ៍ខេត្តត្បូងឃ្មុំ។
បណ្ដឹងដែលលោក ឆន ផល្លា ដាក់ទៅសាលាឧទ្ធរណ៍ខេត្តត្បូងឃ្មុំ ជាបណ្ដឹងតវ៉ានឹងដីកាតម្កល់ឥតចាត់ការលេខ១៧៩ អ.យ.ង/២១ ចុះថ្ងៃទី២៣ ខែវិច្ឆិកា ឆ្នាំ២០២១ របស់អយ្យការអមសាលាដំបូងខេត្តរតនគិរី។
ចំពោះបណ្ដឹងដែលសកម្មជនព្រៃឈើ លោក ឆន ផល្លា ប្ដឹងតវ៉ានេះ សាលាឧទ្ធរណ៍ខេត្តត្បូងឃ្មុំ បានកោះឲ្យសកម្មជនព្រៃឈើរូបនេះចូលបំភ្លឺនៅថ្ងៃទី៤ ខែតុលា ខាងមុខនេះ។
កាលពីថ្ងៃទី១០ ខែវិច្ឆិកា ឆ្នាំ២០២១ សាលាដំបូងខេត្តរតនគិរី បានប្រកាសសាលក្រមផ្ដន្ទាទោសសកម្មជនការពារព្រៃឈើ លោក ឆន ផល្លា ដាក់ពន្ធនាគាររយៈពេល ៥ឆ្នាំពីបទ «កាប់គាស់ រុករានដីព្រៃធ្វើជាកម្មសិទ្ធិ» ហើយលោក ឆន ផល្លា បានប្ដឹងទាស់ទៅសាលាឧទ្ធរណ៍។
ក្រោយពីមិនសុខចិត្តចំពោះការសម្រេចរបស់សាលាដំបូងខេត្តរតនគិរី សកម្មជនព្រៃឈើរូបនេះបានប្ដឹងឧទ្ធរណ៍ទៅតុលាការជាន់ខ្ពស់ ដើម្បីស្វែងរកយុត្តិធម៌។ នៅថ្ងៃទី១៣ ខែកក្កដា ឆ្នាំ២០២២ ប្រធានក្រុមប្រឹក្សាជំនុំជម្រះសាលាឧទ្ធរណ៍ខេត្តត្បូងឃ្មុំ បានប្រកាសសាលដីកាដោយច្រានចោលសេចក្ដីសម្រេចនេះ ហើយសម្រេចឱ្យលោក ឆន ផល្លា រួចទោសក្នុងសំណុំរឿងនេះ ប៉ុន្តែសកម្មជនព្រៃឈើរូបនេះនៅជាប់បណ្ដឹងមួយករណីទៀតពីបទ «ផ្ដើមគំនិតកាប់គាស់ រុករានដីព្រៃ ដើម្បីយកដីជាកម្មសិទ្ធិ»។
កាលពីថ្ងៃទី៥ ខែកក្កដា កន្លងទៅ ការិយាល័យទទួលបន្ទុកសិទ្ធិមនុស្សនៃអង្គការសហប្រជាជាតិប្រចាំកម្ពុជា បង្ហាញការព្រួយបារម្ភថា ការកាត់ទោសលោក ឆន ផល្លា ឱ្យជាប់ពន្ធនាគារ គឺធ្វើឡើងបន្ទាប់ពីលោកមិនព្រមដកពាក្យបណ្ដឹងប្រឆាំងមន្ត្រី ៧រូបដែលខកខានមិនបានបំពេញកាតព្វកិច្ចការពារដីធ្លី។
អង្គការសហប្រជាជាតិចាត់ទុករឿងក្ដីលោក ឆន ផល្លា ជាការបំភិតបំភ័យលើជនជាតិដើមភាគតិច និងអ្នកការពារសិទ្ធិមនុស្ស ហើយបណ្ដឹងនេះជាការសងសឹកដោយផ្ទាល់ចំពោះសកម្មភាពស្របច្បាប់ និងសន្តិភាពរបស់សកម្មជនព្រៃឈើក្នុងការការពារព្រៃសហគមន៍របស់ពួកគេ៕