28 C
Phnom Penh

ក្រុមប្រឹក្សា​សន្តិសុខ UN នឹង​បោះឆ្នោត​មិន​ទទួលស្គាល់​ការ​ធ្វើ​ប្រជាមតិ​របស់​រុស្ស៊ី​យក​ទឹកដី​អ៊ុយក្រែន

ដោយ ឌឹ ខេមបូឌា ដេលី

បទវិភាគ

ទីក្រុង​ញីវយ៉ក នៅ​ថ្ងៃ​សុក្រ ទី​៣០ កញ្ញា ក្រុមប្រឹក្សា​សន្តិសុខ​អង្គការ​សហប្រជាជាតិ នឹង​បោះឆ្នោត​មិន​ទទួលស្គាល់​ការ​ធ្វើ​ប្រជាមតិ​របស់​រុស្ស៊ី យក​ទឹកដី​អ៊ុយក្រែន នោះ​ទេ។

សារព័ត៌មាន​អ៊ីស្រាអែល Jerusaleum Post បាន​ចុះផ្សាយ​នៅ​ថ្ងៃ​សុក្រ ទី​៣០ ខែ​កញ្ញា នេះ​បាន​ឱ្យ​ដឹង​ថា ក្រុមប្រឹក្សា​សន្តិសុខ​អង្គការ​សហប្រជាជាតិ​នឹង​ជួប​ប្រជុំ​គ្នា​ជាបន្ទាន់​តាម​សំណើ​របស់​សហរដ្ឋ​អាមេរិក និង​ប្រទេស​អាល់បានី ដើម្បី​បោះឆ្នោត​លើ​សេចក្ដី​សម្រេច​មួយ​ប្រកាស​មិន​ទទួលស្គាល់​ដែនដី​ទាំងឡាយ​ណា​ដែល​រុស្ស៊ី ដណ្ដើម​យក​ពី​អ៊ុយក្រែន តាមរយៈ​ការ​បោះឆ្នោត​ប្រជាមតិ​ដែល​បាន​ធ្វើឡើង​កាលពី​ថ្ងៃទី​២៧ កញ្ញា។

ប្រភព​ដដែល​ឲ្យ​ដឹង​ថា ក្រុមប្រឹក្សា​សន្តិសុខ​ទាំង​សមាជិក​អចិន្ត្រៃយ៍ ៥​ប្រទេស និង​សមាជិក​មិន​អចិន្ត្រៃយ៍ ១០​ប្រទេស ត្រូវ​ជួប​ប្រជុំ​គ្នា​ដើម្បី​ពិនិត្យមើល​សេចក្ដី​ព្រាង​សេចក្ដី​ថ្លែងការណ៍​របស់​សហរដ្ឋ​អាមេរិក និង​ប្រទេស​អាល់បានី និង​ធ្វើ​សេចក្ដី​សម្រេច​ថា តើ​ត្រូវ​ច្រានចោល​លទ្ធផល​ការ​បោះឆ្នោត​ប្រជាមតិ​របស់​រុស្ស៊ី ឬ​យ៉ាង​ណា។

នៅ​ក្នុង​សេចក្ដី​ព្រាង​សេចក្ដី​ថ្លែងការណ៍​នេះ ក៏​មាន​ខ្លឹមសារ​អំពី​ការ​ថ្កោលទោស​រដ្ឋាភិបាល​ទីក្រុង​មូស្គូ ដែល​ធ្វើការ​បោះឆ្នោត​ប្រជាមតិ​ដើម្បី​ច្បាម​យក​ទឹកដី​នៃ​ប្រទេស​អ៊ុយក្រែន នៅ​ក្នុង​ដែន​អធិបតេយ្យ​របស់​ខ្លួន។

យ៉ាងណា គេ​មិន​អាច​ដឹង​ច្បាស់​ថា តើ​សេចក្ដី​ថ្លែងការណ៍​នេះ​ទទួល​បាន​ការ​យល់ព្រម​ដោយ​មតិ​ឯកច្ឆន្ទ​ទាំងស្រុង ឬ​ដូចម្ដេច​នោះ​ទេ ដែល​កន្លងមក រុស្ស៊ី​ខ្លួន​គេ​ផ្ទាល់​ជា​សមាជិក​អចិន្ត្រៃយ៍​មាន​សិទ្ធិ​ក្នុង​ការ​បោះឆ្នោត​វេតូ ហើយ​រាំង​ខ្ទប់​សេចក្ដី​សម្រេច​របស់​ស្ថាប័ន​ដ៏​កំពូល​នៃ​អង្គការ​សហប្រជាជាតិ​មួយ​នេះ។

ចំណែកឯ​ចិន តែងតែ​បោះឆ្នោត​អនុប្បវាទ ឬ​ក៏​បោះឆ្នោត​វេតូ​ដូច​នឹង​រុស្ស៊ី​ផង​ដែរ។ ដូច្នេះ គេ​អាច​ពុំ​ដឹង​ថា តើ​សេចក្ដី​ថ្លែងការណ៍​ដែល​ព្រាង​ដោយ​សហរដ្ឋ​អាមេរិក និង​អាល់បានី ម្រេច​ដោយ​សំឡេង​ឯកច្ឆន្ទ​បាន​ដែរ​ឬ​យ៉ាង​ណា។ ប៉ុន្តែ​លោក​អគ្គលេខាធិការ​អង្គការ​សហប្រជាជាតិ អង់តូនីញ៉ូ ហ្គូតារ៉េស បាន​ថ្កោលទោស​រួច​ទៅ​ហើយ​ចំពោះ​សេចក្ដី​សម្រេច​របស់​រដ្ឋាភិបាល​ទីក្រុង​មូស្គូ ដែល​រៀបចំ​ការ​បោះឆ្នោត​ប្រជាមតិ​នេះ។

លោក ហ្គូតារ៉េស ទទួល​ដំណឹង​មក​ថា លោក ពូទីន បាន​ចុះ​ក្រឹត្យ​ទទួលស្គាល់​តំបន់​ទាំង​បួន គឺ​ខេត្ត​លូហាន ខេត្ត​ដូណេត​នៅ​ភាគ​ខាងកើត និង​តំបន់​ខឺសុន ហើយ​ហ្សាប៉ូរីស៊ីយ៉ា​នៅ​ភាគ​ខាងត្បូង ជា​រដ្ឋ​ឯករាជ្យ​របស់​រុស្ស៊ី ដែល​ករណី​នេះ​លោក ហ្គូតារ៉េស បាន​ប្រកាស​ថា របប​លោក ពូទីន រំលោភ​ធម្មនុញ្ញ​អង្គការ​សហប្រជាជាតិ​យ៉ាង​ធ្ងន់ធ្ងរ។

ស្រប​ពេល​នេះ​ដែរ ប្រធានាធិបតី​អាមេរិក លោក ចូ បៃដិន ក៏​បាន​ថ្កោលទោស​ការ​បោះឆ្នោត​ប្រជាមតិ​នេះ ហើយ​ប្រកាស​មិន​ទទួលស្គាល់​ដែនដី​នៃ​តំបន់​ទាំង​បួន​នេះ​ជា​ទឹកដី​របស់​រុស្ស៊ី​នោះ​ទេ។ លោក បៃដិន បាន​ទាមទារ​ឱ្យ​សហគមន៍​អន្តរជាតិ​រួម​គ្នា​បញ្ចប់​អំណាច និង​ឥទ្ធិពល​របស់​រុស្ស៊ី​ដែល​បំផ្លាញ​សណ្ដាប់ធ្នាប់​ពិភពលោក។

តាម​ទីភ្នាក់ងារ​សារព័ត៌មាន Reuters ប្រធានាធិបតី​រុស្ស៊ី លោក វ្ល៉ាឌីមៀរ ពូទីន បាន​ចុះហត្ថលេខា​លើ​ក្រឹត្យ​មួយ​ជា​ការ​ត្រួសត្រាយ​ផ្លូវ ដើម្បី​បញ្ចូល​តំបន់​ខឺសុន និង​តំបន់​ហ្សាប៉ូរីសហ្ស៉ីយ៉ា របស់​អ៊ុយក្រែន ទៅ​ក្នុង​ឧបសម្ពន្ធ​របស់​រុស្ស៊ី​ជា​ផ្លូវការ។

បើ​តាម​ក្រឹត្យ​ចេញផ្សាយ​ជា​សាធារណៈ​ដោយ​វិមាន​ក្រឹមឡាំង កាលពី​យប់​ថ្ងៃ​ព្រហស្បតិ៍​សប្ដាហ៍​នេះ លោក ពូទីន បាន​គូស​បញ្ជាក់​ថា៖ «យើង​បញ្ជា​ឱ្យ​ទទួលស្គាល់​តំបន់​ខឺសុន និង​តំបន់​ហ្សាប៉ូរីសហ្ស៉ីយ៉ា ស្ថិត​នៅ​ភាគ​ខាងត្បូង​ប្រទេស​អ៊ុយក្រែន គឺជា​រដ្ឋ​អធិបតេយ្យ និង​ឯករាជ្យ»

តាម​ប្រភព​ដដែល​នេះ លោក ពូទីន នឹង​ប្រកាស​ពី​ការ​បញ្ចូល​តំបន់​លូហាន និង​ដូណេត ក្នុង​ឧបសម្ពន្ធ​របស់​រុស្ស៊ី​ជា​ផ្លូវការ​នៅ​ម៉ោង ៣​រសៀល​ថ្ងៃ​សុក្រ ទី​៣០ កញ្ញា ម៉ោង​នៅ​ទីក្រុង​មូស្គូ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស