ពលរដ្ឋមានជម្លោះដីធ្លីនៅជាប់បឹងតាមោក រាជធានីភ្នំពេញ ប្រកាសជំហរមិនដោះដូរដីទៅទីតាំងថ្មីនោះទេ ប៉ុន្តែពួកគេស្នើឲ្យលោក ហ៊ុន សែន ចាត់វិធានការលើអាជ្ញាធរដែលបានប្រើប្រាស់អំពើហិង្សាលើពួកគេ គ្រាន់តែការពារដីធ្លីរបស់ខ្លួនធ្លាប់រស់នៅរាប់ឆ្នាំនោះ។
តំណាងពលរដ្ឋម្នាក់ លោកស្រី ប្រាក់ សុភា ប្រាប់ក្រុមអ្នកសារព័ត៌មាននៅមុខសាលារាជធានីភ្នំពេញក្រោយពីជំនួបជាថ្មីរវាងមន្ត្រីសាលារាជធានីភ្នំពេញ នៅព្រឹកថ្ងៃចន្ទ ទី៣ ខែតុលា នេះថា ពួកគាត់សុំឲ្យរដ្ឋាភិបាលធ្វើការអភិវឌ្ឍនៅនឹងកន្លែង ដោយមិនដោះដូរទៅទីតាំងផ្សេងទេ។ លោកស្រីបន្តថា មូលហេតុដែលពួកគាត់មិនប្ដូរទៅទីតាំងថ្មី ដោយសារទីតាំងនោះពិបាកក្នុងការប្រកបរបរចិញ្ចឹមជីវិត ដូច្នេះបើប្ដូរទៅ គឺដូចសម្លាប់ពួកគាត់ទាំងរស់។
លោកស្រី ប្រាក់ សុភា បន្តថា ពួកគាត់រងសម្ពាធផ្លូវចិត្តខ្លាំងចាប់ពីមានវិវាទដីធ្លីមក។ ករណីនេះ លោកស្រីស្នើទៅរដ្ឋាភិបាល និងអាជ្ញាធរ ឲ្យធ្វើការអភិវឌ្ឍនៅនឹងកន្លែង ហើយបញ្ឈប់ការធ្វើទុក្ខបុកម្នេញពួកគាត់បន្តទៀត។
លោកស្រីស្នើទៅលោក ហ៊ុន សែន ឲ្យចាត់វិធានការច្បាប់ទៅក្រុមអាជ្ញាធរដែលប្រើប្រាស់អំពើហិង្សាទាំងកម្រោលលើពលរដ្ឋ។ លោកស្រីបន្តថា ក្រុមសមត្ថកិច្ចបានទាត់លោកស្រី ៣ជើងចំកន្លែងដែលវះកាត់ ហើយពលរដ្ឋខ្លះក៏បានរងរបួសថែមទៀត។ លោកស្រីបន្តថា ពួកគាត់មិនអាចឈរមើលក្រុមអាជ្ញាធរចុះទៅរុះរើ និងបំផ្លាញផ្ទះដែលពួកគាត់រស់នៅរាប់ឆ្នាំបានឡើយ។
លោកស្រី ប្រាក់ សុភា បានដាក់ជាសំណួរថា ពលរដ្ឋក្រីក្រមិនអាចរស់នៅលើដីបឹងតាមោក ខណៈបច្ចុប្បន្ន ផ្ទៃដីបឹងតាមោកត្រូវលោក ហ៊ុន សែន កំពុងកាត់ និងដោះដូរប្រគល់ទៅឲ្យសែស្រឡាយរបស់លោក និងមន្ត្រីជាន់ខ្ពស់នៅក្នុងជួរបក្សប្រជាជនកម្ពុជា ព្រមទាំងមន្ត្រីជាន់ខ្ពស់កងរាជអាវុធហត្ថ ជាដើម។
ក្រុមពលរដ្ឋបានជួបប្រជុំជាមួយតំណាងរដ្ឋបាលរាជធានីភ្នំពេញ និងតំណាងរដ្ឋបាលខណ្ឌព្រែកព្នៅ ដើម្បីស្វែងរកដំណោះស្រាយដីធ្លី កាលពីថ្ងៃទី១២ ខែកញ្ញា ឆ្នាំ២០២២ ម្ដងរួចមកហើយ។ ក្នុងជំនួបនោះ ពលរដ្ឋអះអាងថា អាជ្ញាធរបានបង្ខំឲ្យពួកគេដោះដូរដីទៅរស់នៅទីតាំងថ្មី ស្ថិតនៅសង្កាត់សំរោង ដូចគ្នា ប៉ុន្តែក្រុមពលរដ្ឋមិនព្រមទទួលយកឡើយ ហើយបន្តទាមទារឲ្យរដ្ឋាភិបាលធ្វើការអភិវឌ្ឍនៅនឹងកន្លែងវិញ។
បឹងតាមោក ឬបឹងកប់ស្រូវ មានផ្ទៃដីចំនួន ៣២៣៩ហិកតារ ជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងមួយនេះត្រូវបានរដ្ឋាភិបាលចេញអនុក្រឹត្យកាលពីដើមខែកុម្ភៈ ឆ្នាំ២០១៦ ដោយកំណត់យកបឹងធម្មជាតិមួយនេះជាសម្បត្តិសាធារណៈរបស់រដ្ឋ។
បើយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ឆ្នាំ២០២២ ផ្ទៃបឹងតាមោកជាង ២ពាន់ហិកតារហើយត្រូវបានលោក ហ៊ុន សែន កាត់ ឬដោះដូរប្រគល់ទៅឲ្យ៖
- ប្អូនស្រីរបស់លោក
- សមាជិកព្រឹទ្ធសភា
- កូនរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា
- មេបញ្ជាការកងរាជអាវុធហត្ថ
- ឧកញ៉ា
- និងតារាចម្រៀង ជាដើម៕