ប្រធានវេទិកាពលរដ្ឋ រិះគន់ថា ការបញ្ជូនពលរដ្ឋជិត ៣ពាន់គ្រួសារពីតំបន់អង្គរឲ្យទៅរស់នៅលើទីតាំងថ្មីនៅក្នុងភូមិរុនតាឯក ស្រុកបន្ទាយស្រី គឺស្មើនឹងការបោះបង់ពលរដ្ឋចោល ព្រោះពួកគេទទួលបានតែប័ណ្ណក្រីក្រ ១សន្លឹកប៉ុណ្ណោះ។
អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ បានប្រាប់សារព័ត៌មាន The Cambodia Daily នៅថ្ងៃទី៣ តុលា នេះថា បើតាមប្រភពច្បាស់ការណ៍ដែលលោកទទួលបាន ឲ្យដឹងថា អំណោយដែលលោក ហ៊ុន សែន ចែកជូនពលរដ្ឋ ដូចជាមីកញ្ចប់ និងត្រីខកំប៉ុង ជាដើម សុទ្ធតែជារបស់គ្មានគុណភាពដែលជាជំនួយរៀបចំដោយក្រុមហ៊ុនវៀតណាមប៉ុណ្ណោះ មិនមែនជាគ្រឿងបរិភោគដែលមានគុណភាពនោះទេ។
លោក គឹម សុខ អះអាងថា ប័ណ្ណក្រីក្រដែលអាជ្ញាធរក្រោមបង្គាប់លោក ហ៊ុន សែន ចែកឲ្យពលរដ្ឋដែលផ្លាស់ទីលំនៅទៅរស់នៅភូមិរុនតាឯកនេះ គឺជាការកេងប្រវ័ញ្ចលើពលរដ្ឋដែលមិនទទួលបានសំណងត្រឹមត្រូវ។ ជាងនេះទៀត ប័ណ្ណក្រីក្រនេះ គឺផ្ដល់ឲ្យតែអ្នកដែលគាំទ្រគណបក្សប្រជាជនកម្ពុជារបស់ពួកគេតែប៉ុណ្ណោះ ខណៈពលរដ្ឋក្រីក្រពិតប្រាកដមិនទទួលបានប័ណ្ណនេះទេ។
អ្នកវិភាគរូបនេះរិះគន់ថា លោក ហ៊ុន សែន គឺជាមេដឹកនាំដែលគ្មានចិត្តអាណិតអាសូរពលរដ្ឋដ៏ក្រីក្រនោះឡើយ ព្រោះថាក្នុងពិធីប្រកាសចែកអំណោយ និងប័ណ្ណក្រីក្រឲ្យពលរដ្ឋ លោក ហ៊ុន សែន ក៏ប្រកាសនូវការផ្ទេរមរតកឲ្យចៅបង្កើតខ្លួនឯងនូវវិមានដ៏ស្កឹមស្កៃ ដែលមានទំហំទឹកប្រាក់រាប់រយពាន់លានដុល្លារអាមេរិកផងដែរ។
ទង្វើនេះ គឺបង្ហាញនូវការប្រមាថជីវិតពលរដ្ឋខ្មែរយ៉ាងធ្ងន់ធ្ងរថា ការដឹកនាំជាង ៤០ឆ្នាំរបស់គាត់ អាចត្រឹមតែចែកប័ណ្ណក្រីក្រឲ្យពលរដ្ឋប៉ុណ្ណោះ ប៉ុន្តែចៅបង្កើតរបស់គាត់ដែលទើបតែនឹងកើតអាចទទួលបាននូវមរតករាប់រយពាន់លានដុល្លារអាមេរិកពីការដឹកនាំលួចទ្រព្យសម្បត្តិជាតិរបស់គាត់ជាង ៤ទសវត្សមកនេះ។
កាលពីថ្ងៃទី១ ខែតុលា ឆ្នាំ២០២២ ប្រមុខរដ្ឋាភិបាលកម្ពុជា លោក ហ៊ុន សែន បានប្រកាសចែកប័ណ្ណក្រីក្រប្រភេទ១ ដល់ពលរដ្ឋជិត ៣ពាន់គ្រួសារ ដែលបានស្ម័គ្រចិត្តរើលំនៅឋានចេញពីតំបន់រមណីយដ្ឋានអង្គរ និងតំបន់ស្ថិតក្រោមការគ្រប់គ្រងរបស់អាជ្ញាធរជាតិអប្សរា ទៅរស់នៅភូមិរុនតាឯក ស្ថិតក្នុងស្រុកបន្ទាយស្រី ខេត្តសៀមរាប បន្ទាប់ពីមានការអំពាវនាវរបស់រដ្ឋាភិបាលកន្លងមក។
មេដឹកនាំបក្សកាន់អំណាច លោក ហ៊ុន សែន បានលើកឡើងក្នុងពិធីនោះថា បន្ថែមពីលើការផ្តល់ប័ណ្ណក្រីក្រនេះ លោកក៏បានឧបត្ថម្ភដំណាក់កាលដំបូងដល់ពលរដ្ឋនូវមីមួយកេសធំ ត្រីខមួយកេសធំ អង្ករ ៥០គីឡូក្រាម ស័ង្កសី ៣០សន្លឹក តង់១ មុង ខ្នើយ ភួយ សារុង កន្ទេល និងថវិកា ១លាន ៤សែនរៀលក្នុងមួយគ្រួសារផងដែរ។
ក្រៅពីការប្រកាសចែកប័ណ្ណក្រីក្រ និងអំណោយដល់ពលរដ្ឋ លោក ហ៊ុន សែន ក៏ឆ្លៀតប្រកាសពីការផ្ទេរមរតកដែលជាគេហដ្ឋានផ្ទាល់ខ្លួនរបស់លោកនៅឯក្រុងតាខ្មៅ ក្នុងរាជធានីភ្នំពេញដែលមានតម្លៃរាប់ពាន់លានដុល្លារអាមេរិក ឲ្យទៅចៅច្បងរបស់គាត់ផងដែរ ដែលនាំឲ្យមានការរិះគន់ថា ការដឹកនាំរបស់លោក ហ៊ុន សែន រីកចម្រើនតែគ្រួសាររបស់គាត់ប៉ុណ្ណោះ ខណៈពលរដ្ឋនៅតែរស់នៅរំពឹងលើប័ណ្ណក្រីក្រទៅថ្ងៃមុខដដែល។
ក្រុមអ្នកសង្កេតការណ៍រិះគន់ថា ការដឹកនាំតាមបែបសន្តតិវង្ស ឬការបន្តអំណាចពីឪពុកទៅកូន ឬពីជីតាទៅចៅដូចការរៀបចំរបស់លោក ហ៊ុន សែន សព្វថ្ងៃនេះ ទ្រព្យសម្បត្តិរបស់ប្រទេសកម្ពុជានឹងត្រូវក្លាយជាទ្រព្យសម្បត្តិផ្ដាច់មុខរបស់គ្រួសារត្រកូលហ៊ុនទាំងអស់តាមរយៈនៃក្តោបក្តាប់ក្រសួងស្ថាប័នរដ្ឋ និងក្រុមហ៊ុនឯកជនធំៗនានា ខណៈពលរដ្ឋខ្មែរដែលជាម្ចាស់ប្រទេស ត្រូវរស់ក្នុងភាពជាពលរដ្ឋក្រីក្ររង់ចាំទទួលតែអំណោយដែលគេផ្តល់ឲ្យប៉ុណ្ណោះ។
ទាក់ទិននឹងបញ្ហានេះ អង្គការឃ្លាំមើលពិភពលោក (Global Witness) ធ្លាប់បានលាតត្រដាងកាលពីពេលកន្លងទៅថា សមាជិកគ្រួសារត្រកូលហ៊ុនម្នាក់ៗមានលុយសរុបប្រមាណពី ៥០០លានទៅ ១ពាន់លានដុល្លារសហរដ្ឋអាមេរិក និងគ្រប់គ្រងក្រុមហ៊ុនធំៗដែលសុទ្ធសឹងតែក្រុមហ៊ុនជាប់ពាក់ព័ន្ធនឹងការរកស៊ីខុសច្បាប់ថែមទៀត៕