28 C
Phnom Penh

សមត្ថកិច្ច​ចាប់​ខ្លួន​យុវជន​ពីរ​នាក់​ដែល​គ្រោង​ធ្វើ​បាតុកម្ម​ប្រឆាំង​ការ​ផ្ដល់​ប័ណ្ណ​ស្នាក់នៅ​អចិន្ត្រៃយ៍​ដល់​ជន​បរទេស

ដោយ ឌឹ ខេមបូឌា ដេលី

បទវិភាគ

សកម្មជន​សង្គម​ពីរ​នាក់​ដែល​ប្រឆាំង​ទៅ​នឹង​ការ​ផ្តល់​ប័ណ្ណ​ស្នាក់នៅ​ដល់​ជនអន្តោប្រវេសន៍ និង​ការ​បង្កើត​អគារ​សិក្សា​ភាសា​វៀតណាម​នៅ​កម្ពុជា ត្រូវ​បាន​សមត្ថកិច្ច​ខេត្ត​កណ្តាល ចាប់​ខ្លួន​ហើយ ដោយ​ចោទ​ថា​ពួកគេ​បាន​លួច​លក់​អចលនទ្រព្យ​អ្នក​ដទៃ។

ការ​ចាប់​ខ្លួន​សកម្មជន​សង្គម​ពីរ​រូប​នេះ ធ្វើឡើង​បន្ទាប់ពី​ពួកគេ​បាន​ជួប​ជាមួយ​មន្ត្រី​សាលា​រាជធានី​ភ្នំពេញ ដើម្បី​ស្នើសុំ​ធ្វើ​បាតុកម្ម​ដោយ​អហិង្សា​នៅ​ទីលាន​ប្រជាធិបតេយ្យ ដើម្បី​ទាមទារ​ឱ្យ​រដ្ឋាភិបាល​បញ្ឈប់​ការ​ចេញ​ប័ណ្ណ​ស្នាក់នៅ​អចិន្ត្រៃយ៍​ដល់​ជនបរទេស និង​លុប​គម្រោង​បង្កើត​អគារ​សិក្សា​ភាសា​វៀតណាម នៅ​ក្នុង​សាកលវិទ្យាល័យ​ភូមិន្ទ​ភ្នំពេញ នៅ​ថ្ងៃទី​៤ ខែ​តុលា នេះ។

សកម្មជន​សង្គម លោក អ៊ំ ឈុម ត្រូវ​បាន​សារព័ត៌មាន​ក្នុង​ស្រុក VOD ដកស្រង់​សម្ដី​ចុះផ្សាយ​នៅ​ថ្ងៃទី​៤ តុលា នេះ​ថា ក្រោយ​ពេល​ពួកគេ​ជួប​ជាមួយ​មន្ត្រី​រដ្ឋបាល​រាជធានី​ភ្នំពេញ អ្នក​ទាំងនោះ​ក៏​ត្រៀម​ទៅ​ធ្វើ​សន្និសីទ​សារព័ត៌មាន​នៅ​ទីលាន​ប្រជាធិបតេយ្យ​បន្ត​ទៀត ប៉ុន្តែ​ពេល​ចេញ​មក​ដល់​មុខ​ខ្លោងទ្វារ​សាលា​រាជធានី​ភ្នំពេញ ក៏​ត្រូវ​បាន​ជនស៊ីវិល​មួយ​ក្រុម​ចេញ​មក​ចាប់​វាយ​ខ្នោះ​ពួកគេ​ទាំង​ពីរ​នាក់​តែម្តង ក្នុង​នោះ​ក៏​មាន​លោក ថែល ធីលែន ម្នាក់​ដែរ ហើយ​ពួកគេ​ក៏​ត្រូវ​បាន​បញ្ជូន​ទៅ​ស្នងការដ្ឋាន​នគរបាល​ខេត្ត​កណ្តាល ភ្លាមៗ​ផង​ដែរ។

ការ​ចាប់​ខ្លួន​សកម្មជន​សង្គម​នេះ ធ្វើឡើង​បន្ទាប់ពី​ពួកគេ​បាន​ធ្វើ​សកម្មភាព​ប្រឆាំង​ទៅ​នឹង​រដ្ឋាភិបាល ជុំវិញ​ការ​ផ្តល់​ប័ណ្ណ​ស្នាក់នៅ​ដល់​ជនអន្តោប្រវេសន៍​ខុស​ច្បាប់​នៅ​កម្ពុជា​នា​ពេល​កន្លងមក។

ក្នុង​រយៈពេល​ចុងក្រោយ​នេះ សកម្មជន​សង្គម លោក ថែល ធីលែន បាន​ចេញ​មុខ​ប្រឆាំង​យ៉ាង​ខ្លាំង​ឲ្យ​រដ្ឋាភិបាល​កម្ពុជា​បញ្ឈប់​នូវ​ការ​ផ្តល់​ប័ណ្ណ​ស្នាក់នៅ​អចិន្ត្រៃយ៍​ដល់​ជនអន្តោប្រវេសន៍​ខុស​ច្បាប់​នៅ​កម្ពុជា បន្ទាប់ពី​ក្រសួង​មហាផ្ទៃ​បាន​សម្រេច​ផ្ដល់​ប័ណ្ណ​ស្នាក់នៅ​អចិន្ត្រៃយ៍​ឱ្យ​ជនអន្តោប្រវេសន៍​ទាំងនោះ​កាលពី​ថ្ងៃ​ចុងខែ​សីហា ឆ្នាំ​២០២២ កន្លងទៅ​នេះ។

យ៉ាងណា សារព័ត៌មាន The Cambodia Daily ពុំ​ទាន់​អាច​សុំ​ការ​បំភ្លឺ​ពី​ករណី​ចាប់​ខ្លួន​លោក ថែល ធីលែន និង​អ្នក​ផ្សេង​ទៀត​ពី​អាជ្ញាធរ​រាជធានី​ភ្នំពេញ​បាន​ទេ​នា​ថ្ងៃ​នេះ។

ពាក់ព័ន្ធ​នឹង​ការ​ចាប់​ខ្លួន​លោក ថែល ធីលែន នេះ អនុប្រធាន​វេទិកា​ពលរដ្ឋ លោក ម៉ែន ណាត បាន​ប្រាប់​សារព័ត៌មាន The Cambodia Daily នៅ​មុន​ការ​ផ្សាយ​នេះ​បន្តិច​ថា ការ​ចាប់​ខ្លួន​លោក ថែល ធីលែន ដោយ​ចោទប្រកាន់​ករណី​ដីធ្លី គឺជា​ការ​ចោទប្រកាន់​ដើម្បី​បន្លប់​សាច់រឿង​ពី​សកម្មភាព​របស់​គាត់​កំពុងតែ​ធ្វើ​ជាក់ស្តែង​ពាក់ព័ន្ធ​នឹង​រដ្ឋាភិបាល​របស់​បុរស​ខ្លាំង លោក ហ៊ុន សែន ដែល​បន្ត​ធ្វើ​សម្បទាន​ឲ្យ​វៀតណាម​នូវ​រឿង​ព្រំដែន ជាពិសេស​រឿង​ផ្តល់​ប័ណ្ណ​ស្នាក់នៅ​អចិន្ត្រៃយ៍​ដល់​ជនអន្តោប្រវេសន៍​ខុស​ច្បាប់​នៅ​កម្ពុជា និង​ការ​បង្កើត​ដេប៉ាតឺម៉ង់​ភាសា​វៀតណាម នៅ​សាកលវិទ្យាល័យ​ភូមិន្ទ​ភ្នំពេញ ជាដើម។

លោក ម៉ែន ណាត អំពាវនាវ​ឲ្យ​រដ្ឋាភិបាល​លោក ហ៊ុន សែន ដោះលែង​លោក ថែល ធីលែន ក៏ដូចជា​សកម្មជន​ដទៃ​ទៀត​ដោយ​គ្មាន​លក្ខខណ្ឌ។ ជាមួយ​គ្នា​នេះ លោក​សូម​រដ្ឋាភិបាល​កម្ពុជា​ទម្លាក់​ចោល​នូវ​ការ​ផ្តល់​ប័ណ្ណ​ស្នាក់នៅ​អចិន្ត្រៃយ៍​ដល់​ជនអន្តោប្រវេសន៍​ខុស​ច្បាប់​នៅ​កម្ពុជា និង​រំលាយ​ផែនការ​បង្កើត​ដេប៉ាតឺម៉ង់​ភាសា​វៀតណាម​នៅ​សាកលវិទ្យាល័យ​ភូមិន្ទ​ភ្នំពេញ ដើម្បី​ជា​ការ​ស្រាយ​ចម្ងល់ និង​ផ្តល់​ភាព​កក់ក្តៅ​ដល់​ពលរដ្ឋ​ខ្មែរ​គ្រប់​រូប។

ចំណែក​ស្ថាបនិក​នៃ​អង្គការ​អភិវឌ្ឍន៍​ផ្នត់គំនិត លោក សេក សុជាតិ បាន​ប្រតិកម្ម​ជា​ខ្លាំង​ទៅ​នឹង​ការ​ចាប់​ខ្លួន​សកម្មជន​សង្គម​ដ៏​សកម្ម​ទាំង​ពីរ​រូប​នេះ។ លោក​អះអាង​ថា ការ​ចាប់​យុវជន ថែល ធីលែន អាច​ធ្វើ​ឲ្យ​សាធារណជន​ជាតិ និង​អន្តរជាតិ​កាន់តែ​ប្រាកដ​ថា កម្ពុជា​អនុវត្ត​រដ្ឋធម្មនុញ្ញ​មិន​បាន​ល្អ និង​មាន​ការ​គាប​សង្កត់​សិទ្ធិ​សេរីភាព​ក្នុង​ការ​បញ្ចេញមតិ​របស់​ពលរដ្ឋ។

កាលពី​ពេល​ថ្មីៗ​នេះ យុវជន​មួយ​ក្រុម​មកពី​តាម​បណ្តា​ខេត្ត​ផ្សេងៗ​គ្នា បាន​នាំគ្នា​ដាក់​ញត្តិ​នៅ​សាលា​រាជធានី​ភ្នំពេញ ស្នើសុំ​ធ្វើ​បាតុកម្ម​ដោយ​អហិង្សា​នៅ​ទីលាន​ប្រជាធិបតេយ្យ​ថ្មី ដើម្បី​ទាមទារ​បញ្ឈប់​ការ​ផ្ដល់​ប័ណ្ណ​ស្នាក់នៅ​អចិន្ត្រៃយ៍​ដល់​ជនបរទេស និង​លុបចោល​គម្រោង​បង្កើត​អគារ​សិក្សា​ភាសា​វៀតណាម​នៅ​សាកលវិទ្យាល័យ​ភូមិន្ទ​ភ្នំពេញ។

ការ​ប្រកាស​ធ្វើ​បាតុកម្ម​នេះ ក្រោយ​ពេល​ពួកគេ​ដាក់​សំណើ​ទៅ​ក្រសួង​អប់រំ និង​ក្រសួង​មហាផ្ទៃ ឲ្យ​បញ្ឈប់​ការ​ផ្ដល់​ប័ណ្ណ​ស្នាក់នៅ​អចិន្ត្រៃយ៍​ដល់​ជនបរទេស និង​លុបចោល​គម្រោង​បង្កើត​អគារ​សិក្សា​ភាសា​វៀតណាម​នៅ​សាកលវិទ្យាល័យ​ភូមិន្ទ​ភ្នំពេញ មិន​ត្រូវ​បាន​ឆ្លើយតប​ណា​មួយ​នោះ។

ក្រសួង​អប់រំ យុវជន និង​កីឡា គ្រោង​បង្កើត​អគារ​សិក្សា​ភាសា​វៀតណាម​នៅ​សាកលវិទ្យាល័យ​ភូមិន្ទ​ភ្នំពេញ ហើយ​ចំណែក​ក្រសួង​មហាផ្ទៃ ប្រកាស​ឲ្យ​មន្ត្រី​ក្រោម​ឱវាទ និង​វិស័យ​ឯកជន​ទទួលស្គាល់​ប័ណ្ណ​ស្នាក់នៅ​អចិន្ត្រៃយ៍​ជនអន្តោប្រវេសន៍​សម្រាប់​បម្រើ​ជីវភាព​ប្រចាំ​ថ្ងៃ បន្ទាប់ពី​រក​ឃើញ​ថា​មន្ត្រី​ថ្នាក់​ក្រោម​ជាតិ និង​វិស័យ​ឯកជន​មួយ​ចំនួន មិនទាន់​ទទួលស្គាល់​តម្លៃ​ក្នុង​ការ​ប្រើប្រាស់​ប័ណ្ណ​ស្នាក់នៅ​អចិន្ត្រៃយ៍​សម្រាប់​ជនបរទេស​ទាំងនោះ។

ប៉ុន្តែ​ការ​ប្រកាស​នេះ ត្រូវ​សាធារណជន​រិះគន់ និង​ស្នើ​ឲ្យ​បញ្ឈប់​វិញ ដោយ​បារម្ភ​ប៉ះពាល់​ដល់​ផលប្រយោជន៍​របស់​ជាតិ ដោយ​ថា​ចាប់តាំងពី​សម័យ​ប្រវត្តិសាស្ត្រ​រហូត​ដល់​បច្ចុប្បន្ន វៀតណាម​នៅ​មាន​មហិច្ឆតា និង​ចិញ្ចឹម​ចិត្ត​ឈ្លានពាន​ទឹកដី​កម្ពុជា។

មាត្រា​៣៥ នៃ​រដ្ឋធម្មនុញ្ញ ចែង​ថា ប្រជាពលរដ្ឋ​ខ្មែរ​ទាំង​ពីរ​ភេទ​មាន​សិទ្ធិ​ចូលរួម​យ៉ាង​សកម្ម​ក្នុង​ជីវភាព​នយោបាយ សេដ្ឋកិច្ច សង្គមកិច្ច និង​វប្បធម៌​របស់​ប្រទេស​ជាតិ។ សេចក្តី​ស្នើ​ទាំងឡាយ​របស់​ពលរដ្ឋ ត្រូវ​បាន​ទទួល​ការ​ពិនិត្យ និង​ដោះស្រាយ​យ៉ាង​ហ្មត់ចត់​ពី​អង្គការ​រដ្ឋ។

ចំណែក​មាត្រា​៣៧ នៃ​រដ្ឋធម្មនុញ្ញ ចែង​ថា សិទ្ធិ​ធ្វើ​កូដកម្ម និង​ធ្វើ​បាតុកម្ម​ដោយ​សន្តិវិធី ត្រូវ​យក​មក​អនុវត្ត​នៅ​ក្នុង​ក្របខ័ណ្ឌ​នៃ​ច្បាប់។ ដោយឡែក​មាត្រា​៤១ ចែង​ថា ពលរដ្ឋ​ខ្មែរ​មាន​សេរីភាព​ខាង​ការ​បញ្ចេញមតិ​របស់​ខ្លួន សេរីភាព​ខាង​សារព័ត៌មាន សេរីភាព​ខាង​បោះពុម្ព​ផ្សាយ និង​សេរីភាព​ខាង​ជួបជុំ ជាដើម៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស