ពលរដ្ឋរស់នៅតាមបន្ទាត់ព្រំដែនកម្ពុជា-វៀតណាម អះអាងថា លោកវរសេនីយ៍ត្រី ហាក់ ប៊ុន្នី ដែលជាមេបញ្ជាការកងរាជអាវុធហត្ថស្រុកអណ្ដូងមាស ខេត្តរតនគិរី កំពុងតែមមាញឹកដឹកជញ្ជូនឈើចេញពីតំបន់ឧទ្យានជាតិវីរៈជ័យ យកទៅលក់នៅប្រទេសវៀតណាម ដោយឃុបឃិតជាមួយមន្ត្រីជំនាញនៅក្នុងតំបន់នោះក្នុងការរត់ពន្ធ។
ពលរដ្ឋម្នាក់ដែលរស់នៅស្រុកអណ្ដូងមាស បានប្រាប់សារព័ត៌មាន ឌឹ ខេមបូឌា ដេលី ក្នុងលក្ខខណ្ឌមិនបញ្ចេញឈ្មោះ កាលពីថ្ងៃទី៦ ខែតុលា ថា លោកបានឃើញពលរដ្ឋដឹកជញ្ជូនឈើមកដាក់នៅខាងក្រោយសាលាស្រុកអណ្ដូងមាស ដោយពួកគេអះអាងថាជាឈើរបស់លោកវរសេនីយ៍ត្រី ហាក់ ប៊ុន្នី មេបញ្ជាការកងរាជអាវុធហត្ថស្រុកអណ្ដូងមាស។
លោកបានបន្តទៀតថា ឈើទាំងនេះគឺក្រុមប្រជាពលរដ្ឋបានដឹកចេញពីតំបន់ឧទ្យានជាតិវីរៈជ័យ ស្ថិតនៅស្រុកតាវែង រួចបន្តដឹកយកមកទុកនៅស្រុកអណ្ដូងមាស រង់ចាំមេឈ្មួញរបស់វៀតណាម មកទូទាត់លុយរួច ទើបពួកគេដឹកបន្តយកទៅវៀតណាម នៅពេលយប់។
បុរសដដែលបន្ថែមទៀតថា សមត្ថកិច្ចនៅតំបន់នោះត្រូវផ្លែត្រូវដងគ្នាក្នុងការរត់ពន្ធឈើចេញពីប្រទេសកម្ពុជា យកទៅលក់នៅប្រទេសវៀតណាម។ លោកថា មធ្យោបាយដែលពួកគេដឹកជញ្ជូន មានម៉ូតូ និងរថយន្តសាំយ៉ុង ដោយម៉ូតូត្រូវដឹកជញ្ជូនឈើចេញពីតំបន់ព្រៃ រួចហើយដឹកតាមរថយន្តសាំយ៉ុងដែលចាំដឹកបន្តទៅប្រទេសវៀតណាម តាមចក្រទ្វារអន្តរជាតិអូរយ៉ាដាវនៃខេត្តរតនគិរី។
ជុំវិញករណីនេះ សកម្មជនការពារព្រៃឈើ លោក ហេង ស្រស់ បានប្រាប់សារព័ត៌មាន ឌឹ ខេមបូឌា ដេលី ថា លោកមានការសោកស្ដាយនៅពេលដែលមន្ត្រីរបស់រដ្ឋាភិបាលជាអ្នករត់ពន្ធឈើឆ្លងដែនយកទៅលក់នៅក្រៅប្រទេសដោយខុសច្បាប់។
លោកអំពាវនាវឲ្យសមត្ថកិច្ចជំនាញធ្វើការសិក្សាស្រាវជ្រាវស្វែងរកជនល្មើស និងអ្នកដែលពាក់ព័ន្ធយកមកផ្ដន្ទាទោសតាមផ្លូវច្បាប់ ចំពោះបុគ្គលណាដែលហ៊ានរត់ពន្ធឈើ និងឃុបឃិតគ្នាក្នុងការនាំឈើទៅលក់នៅក្រៅប្រទេសបែបនេះ។
សារព័ត៌មាន ឌឹ ខេមបូឌា ដេលី មិនអាចទាក់ទងលោកវរសេនីយ៍ត្រី ហាក់ ប៊ុន្នី មេបញ្ជាការកងរាជអាវុធហត្ថស្រុកអណ្ដូងមាស ដើម្បីធ្វើការអត្ថាធិប្បាយបានទេ។
កាលពីថ្ងៃទី២២ ខែកញ្ញា ឆ្នាំ២០២២ អង្គការគំនិតផ្ដួចផ្ដើមសកលប្រឆាំងនឹងឧក្រិដ្ឋកម្មឆ្លងដែន បានចេញរបាយការណ៍ស្រាវជ្រាវដែលមានកម្រាស់ ៥៣ទំព័រ រៀបរាប់អំពីមែកធាងនៃការកាប់ឈើដោយខុសច្បាប់នៅកម្ពុជា។
នៅក្នុងរបាយការណ៍ស្រាវជ្រាវរបស់អង្គការគំនិតផ្ដួចផ្ដើម ក៏បានរំលេចអំពីដំណើរការនៃគ្រួសារលោក ហ៊ុន សែន ក្នុងការគ្រប់គ្រងលើក្រុមឧកញ៉ាដែលជាឈ្មួញរកស៊ីព្រៃឈើ ក្នុងនោះអ្នកស្រី ប៊ុន រ៉ានី ភរិយារបស់លោក ហ៊ុន សែន ធ្លាប់ជំរុញឲ្យបើកការស៊ើបអង្កេតទៅលើឧកញ៉ា លីម ប៊ុណ្ណា ហៅខ្នា ដើម្បីសម្រួលផ្លូវរកស៊ីឈើរបស់ឧកញ៉ា សឹង សំអុល ប៉ុន្តែឧកញ៉ា លីម ប៊ុណ្ណា ហៅខ្នា ជាមនុស្សរបស់លោក ហ៊ុន ម៉ាណែត ដែលជាកូនប្រុសច្បងរបស់លោក ហ៊ុន សែន៕