ក្រុមអ្នកឃ្លាំមើលរិះគន់ថា អ្នកនយោបាយរបស់បក្សប្រឆាំងគិតតែពីផលប្រយោជន៍ខ្លួនឯង ជាជាងផលប្រយោជន៍ជាតិ ដោយនាំគ្នាលាក់ខ្លួនមិនចេញមុខរកយុត្តិធម៌ឱ្យយុវជន ថែល ធីលែន ដែលហ៊ានចេញមុខទាមទារឲ្យរដ្ឋាភិបាលទម្លាក់ចោលគម្រោងផ្តល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍នៅកម្ពុជា។
អគ្គលេខាធិការនៃវេទិកាពលរដ្ឋ លោក អ៊ាប គឹមសេង បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី៦ ខែតុលា ថា គណបក្សនយោបាយដែលមាននិន្នាការប្រឆាំងបច្ចុប្បន្ននេះគិតតែពីផលប្រយោជន៍ផ្ទាល់ខ្លួន ជាជាងគិតគូរ ពីផលប្រយោជន៍ជាតិ ដូច្នេះទាំងសកម្មជន និងយុវជនដែលមាននិន្នាការខាងបក្សរបស់ពួកគេ គឺត្រូវតែធ្វើសកម្មភាពណាដែលចំណេញដល់គណបក្សនោះតែប៉ុណ្ណោះ។ ផ្ទុយទៅវិញ កិច្ចការណាដែលមិនចំណេញដល់គណបក្ស ទោះកិច្ចការនោះមានប្រយោជន៍ដល់ជាតិកម្រិតណាក៏ដោយ ក៏ពួកគេធ្វើមិនដឹងមិនឮនោះដែរ។
លោក អ៊ាប គឹមសេង អះអាងថា ជាឧទាហរណ៍ជាក់ស្តែង ការតវ៉ាទាមទារឲ្យរដ្ឋាភិបាលទម្លាក់ចោលគម្រោងផ្តល់ប័ណ្ណស្នាក់នៅអចិន្ត្រៃយ៍ដល់ជនអន្តោប្រវេសន៍នៅកម្ពុជា ដែលស្ទើរតែទាំងអស់ជាជនអន្តោប្រវេសន៍វៀតណាមខុសច្បាប់ និងស្នើរំលាយផែនការបង្កើតអគារសិក្សាភាសាវៀតណាមនៅកម្ពុជាពីសំណាក់យុវជន ថែល ធីលែន គឺជាប្រយោជន៍ជាតិសុទ្ធសាធ ប៉ុន្តែគណបក្សនយោបាយប្រឆាំងគ្មានសកម្មភាពណាមួយដែលហ៊ានចេញមុខរកយុត្តិធម៌ទាល់តែសោះនៅពេលដែលរដ្ឋាភិបាលបានចាប់ឃុំខ្លួនយុវជនរូបនេះ។
អគ្គលេខាធិការនៃវេទិកាពលរដ្ឋរូបនេះបញ្ជាក់ថា អ្នកនយោបាយដែលអួតខ្លួនថាជាអ្នកប្រឆាំងដើម្បីជាតិ តាមការពិត ពួកគេគ្រាន់តែកុហកសកម្មជន និងយុវជនដែលគាំទ្រពួកគេប៉ុណ្ណោះ ប៉ុន្តែទង្វើរបស់ពួកគេជាក់ស្តែងមានបំណងប្រើប្រាស់សកម្មជន និងយុវជនទាំងនោះទៅប្រឈមនឹងគ្រោះថ្នាក់ ជាថ្នូរនឹងផលប្រយោជន៍សម្រាប់ពួកគេតែប៉ុណ្ណោះ។ ជាក់ស្តែងដូចជាស្ថាបនិកគណបក្សបេះដូងជាតិ លោក សៀម ភ្លុក សមាជិកជាន់ខ្ពស់ខេត្តតាកែវ របស់បក្សភ្លើងទៀន លោក អៀរ ចាន់ណា និងសកម្មជនបក្សប្រឆាំង កញ្ញា សេង ធារី ដែលកំពុងជាប់ឃុំក្នុងពន្ធនាគារនៅពេលនេះ ជាដើម។
ចំណែកលោក សេក កុសល ប្រធានអង្គការ IKARE ក្នុងរដ្ឋមីនីសសូតា បានលើកឡើងក្នុងកិច្ចពិភាក្សានេះដែរថា កម្ពុជាគឺជាប្រទេសដែលគ្មានវិន័យ ហើយភាពគ្មានវិន័យបែបនេះ គឺជាឥទ្ធិពលដែលជះមកពីមេដឹកនាំ ព្រមទាំងរីកសាយភាយដល់មន្ត្រីថ្នាក់ក្រោមដែលនាំឱ្យពលរដ្ឋរស់នៅរងទុក្ខក្រោមការគ្រប់គ្រងរបស់ពួកគេយ៉ាងអាណោចអាធ័ម។
លោក សេក កុសល លើកឡើងថា ដើម្បីកែប្រែសង្គមកម្ពុជាទៅជាសង្គមដែលមានការគោរពច្បាប់ទម្លាប់ត្រឹមត្រូវឡើងវិញ គឺមានតែកម្លាំងសាមគ្គីរបស់យុវជនតែប៉ុណ្ណោះ ដែលធ្វើសកម្មភាពឱ្យកាន់តែខ្លាំង កាន់តែលឿន និងកាន់តែឮ ដើម្បីកែប្រែរបៀបដឹកនាំបច្ចុប្បន្ននេះ ប៉ុន្តែពួកគេក៏មិនត្រូវបណ្តោយខ្លួនឱ្យធ្លាក់ទៅក្នុងអន្ទាក់របស់អ្នកនយោបាយដែលប្រាសចាកផលប្រយោជន៍ជាតិផងដែរ។
សកម្មជនសង្គម លោក ថែល ធីលែន និងតំណាងយុវជនមួយចំនួនទៀតបានដាក់ញត្តិទៅក្រសួងមហាផ្ទៃ ស្នើសុំឱ្យបញ្ឈប់ការផ្តល់ប័ណ្ណស្នាក់នៅអចិន្ត្រៃយ៍ដល់ជនបរទេសអន្តោប្រវេសន៍ខុសច្បាប់នៅកម្ពុជា និងស្នើរំសាយផែនការបង្កើតអគារសិក្សាភាសាវៀតណាមនៅកម្ពុជា កាលពីថ្ងៃទី១៩ ខែកញ្ញា ឆ្នាំ២០២២ កន្លងទៅនេះ ប៉ុន្តែនៅថ្ងៃទី៤ ខែតុលា ឆ្នាំ២០២២ យុវជនរូបនេះត្រូវបានសមត្ថកិច្ចចាប់ឃុំខ្លួន ដោយលើកយកបទចោទដែលតុលាការបានចោទកាលពី ៦ឆ្នាំមុនមកអនុវត្តទៅវិញ៕