គណបក្សខ្មែររួបរួមជាតិ និងគណបក្សកម្ពុជានិយម បានប្រកាសពីការរួបរួមគ្នាបង្កើតប៉ូលនយោបាយប្រជាធិបតេយ្យសេរីថ្មី ដោយថាបង្រួបបង្រួម ផ្សះផ្សាអ្នកប្រជាធិបតេយ្យដើម្បីបុព្វហេតុជាតិ។
ក្នុងសេចក្ដីប្រកាសព័ត៌មានរបស់គណបក្សខ្មែររួបរួមជាតិ និងគណបក្សកម្ពុជានិយម ចុះថ្ងៃទី៧ ខែតុលា ឆ្នាំ២០២២ ឱ្យដឹងថា គណបក្សទាំងពីរនេះ នឹងជួបពិភាក្សាគ្នាស្ដីពីការរួបរួមគ្នាដើម្បីបង្កើតប៉ូលនយោបាយប្រជាធិបតេយ្យសេរីថ្មី ក្នុងការត្រៀមលក្ខណៈចូលរួមប្រកួតប្រជែងការបោះឆ្នោតជាតិឆ្នាំ២០២៣ ខាងមុខ។
ប្រភពដដែលបន្តថា ការបង្កើតប៉ូលនយោបាយថ្មីនេះមានសមាសភាពចូលរួមចម្រុះពីនិស្សិត បញ្ញវន្ត យុវជន ស្ត្រី អ្នកតស៊ូមតិដើម្បីបុព្វហេតុជាតិ អ្នកជាតិនិយម អ្នកប្រជាធិបតេយ្យសេរីនិយម។
បើតាមសេចក្ដីប្រកាសឱ្យដឹងថា ការបង្កើតប៉ូលនយោបាយប្រជាធិបតេយ្យសេរីថ្មី ធ្វើឡើងក្នុងគោលដៅបង្រួបបង្រួម ផ្សះផ្សាអ្នកតស៊ូដើម្បីបុព្វហេតុជាតិ អ្នកជាតិនិយម ប្រជាធិបតេយ្យសេរីនិយម និងលើកកម្ពស់ប្រជាធិបតេយ្យសេរី សិទ្ធិសេរីភាព ការគោរពសិទ្ធិមនុស្ស យុត្តិធម៌សង្គម ដើម្បីផលប្រយោជន៍របស់ប្រទេសជាតិ និងប្រជាជាតិខ្មែរ តាមស្មារតីនៃកិច្ចព្រមព្រៀងសន្តិភាពទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១។
ចំពោះជំនួបរវាងថ្នាក់ដឹកនាំនៃគណបក្សខ្មែររួបរួមជាតិ និងគណបក្សកម្ពុជានិយម នឹងរៀបចំនៅថ្ងៃចន្ទ ទី១០ ខែតុលា ឆ្នាំ២០២២ ដែលការរៀបចំនេះ ដើម្បីពិភាក្សាលម្អិតស្វែងរកការសម្រេចរួមឈានទៅបង្កើតប៉ូលនយោបាយប្រជាធិបតេយ្យសេរីថ្មីមួយ។
យ៉ាងណា សារព័ត៌មាន The Cambodia Daily មិនទាន់អាចសុំការបញ្ជាក់បន្ថែមពីប្រធានគណបក្សកម្ពុជានិយមរបស់លោក យ៉ែម បុញ្ញឫទ្ធិ បាននៅឡើយទេនាថ្ងៃសុក្រនេះ៕