ចលនានៃការបង្កសង្គ្រាមនុយក្លេអ៊ែរពីសំណាក់មហាអំណាចរុស្ស៊ី កំពុងធ្វើឲ្យពិភពលោកមានការបារម្ភជាខ្លាំង។ ប្រទេសមហាអំណាចអាវុធនុយក្លេអ៊ែរមួយនេះ ត្រូវគេមើលឃើញថា កំពុងដើរលើវិថីនៃការទាញសហរដ្ឋអាមេរិកឲ្យត្រៀមខ្លួនក្នុងការធ្វើសង្គ្រាមនុយក្លេអ៊ែរ។
សង្គ្រាមរុស្ស៊ីឈ្លានពានអ៊ុយក្រែន ដែលអូសបន្លាយជិត ១៣០ថ្ងៃមកនេះ គឺទ័ពរុស្ស៊ីបានធ្លាក់ដល់ចំណុចបរាជ័យធ្ងន់ធ្ងរ ដោយទ័ពអ៊ុយក្រែនវាយឲ្យបាក់ទ័ពក្នុងទ្រង់ទ្រាយធំ ៣លើកមកហើយ។ ជាក់ស្ដែងនៅថ្ងៃទី៧ តុលា នេះ សារព័ត៌មានអ៊ីស្រាអែល Jerusalem Post បានចុះផ្សាយថា កងទ័ពរុស្ស៊ីជាង ២ពាន់នាក់ បានសុំទម្លាក់អាវុធហើយចុះចាញ់នឹងកងទ័ពអ៊ុយក្រែន នៅលើសមរភូមិមួយនៃតំបន់ Kherson ភាគខាងត្បូងប្រទេសអ៊ុយក្រែន។
បើតាមប្រភពព័ត៌មានដដែលនេះឲ្យដឹងថា កងទ័ពអ៊ុយក្រែន បានសម្រុកវាយលើទ័ពរុស្ស៊ីយ៉ាងសន្ធប់ ដោយគ្រាប់កាំភ្លើងធំ M-777 គ្រាប់រ៉ុក្កែត HIMARS និងរ៉ុក្កែត M-270 ដោយវាយដេញកងទ័ពរុស្ស៊ីធ្លាក់ដល់ទន្លេ Dnipro។
ក្នុងស្ថានភាពទាល់ច្រកនេះ រុស្ស៊ីប្រកាសគំរាមប្រើអាវុធនុយក្លេអ៊ែរទៅលើកងទ័ពអ៊ុយក្រែន ដោយក្រុងមូស្គូ ប្រកាសថា ទឹកដី Kherson បានក្លាយជាដែនដីរបស់រុស្ស៊ីជាផ្លូវការហើយ។ នៅពេលដែលរុស្ស៊ីគំរាមប្រើបាញ់ក្បាលគ្រាប់នុយក្លេអ៊ែរ ដែលជាអាវុធប្រល័យលោកដ៏សាហាវនេះ បានទាញសញ្ញាអាសន្នទៅកាន់មេដឹកនាំពិភពលោកឲ្យប្រុងប្រយ័ត្ន ដោយត្រូវជួយទប់ស្កាត់រុស្ស៊ី កុំឲ្យជ្រុលទៅរកសង្គ្រាមដ៏មហាប្រល័យនេះ។
ប្រតិកម្មនឹងមហាអំណាចនុយក្លេអ៊ែរមួយនេះ លោកប្រធានាធិបតី ចូ បៃដិន បានព្រមានពីគ្រោះមហន្តរាយនៃការប្រឈមមុខដោយអាវុធនុយក្លេអ៊ែរជាមួយនឹងរុស្ស៊ី។ លោក ចូ បៃដិន បានរំឭកថា ស្ថានភាពដែលពិភពលោកកំពុងបារម្ភនេះ គឺដូចនឹងស្ថានការណ៍ដ៏ធ្ងន់ធ្ងរកើតឡើងនៅឆ្នាំ១៩៦២ ដែលត្រូវប្រឈមមុខនឹងវិបត្តិមីស៊ីលគុយបា ដែលអាមេរិកប្រឆាំងសហភាពសូវៀតដាក់ពង្រាយមីស៊ីលលើទឹកដីប្រទេសគុយបា ជាដែនដីក្នុងភូមិសាស្ត្រជាប់នឹងអាមេរិក។
គេនៅចាំបានថា វិបត្តិមីស៊ីលគុយបា ដែលបណ្តាលមកពីវត្តមានរបស់មីស៊ីលសូវៀតនៅក្នុងប្រទេសគុយបា កាលពីឆ្នាំ១៩៦២ ជិតនឹងឈានទៅដល់ការវាយប្រហារគ្នារវាងអាមេរិក និងរុស្ស៊ីដោយអាវុធនុយក្លេអ៊ែរ។ កាលនោះ សហរដ្ឋអាមេរិកក្រោមការដឹកនាំរបស់ប្រធានាធិបតី លោក John Kennedy និងសហភាពសូវៀត ក្រោមការដឹកនាំរបស់លោក Nikita Khrushchev។
ថ្លែងទៅកាន់សមាជិកគណបក្សប្រជាធិបតេយ្យនៅក្នុងទីក្រុងញីវយ៉ក កាលពីថ្ងៃទី៦ ខែតុលា លោក បៃដិន ឲ្យដឹងថា លោកកំពុងតាមដានយ៉ាងដិតដល់ចំពោះលោក ពូទីន និងរបៀបដែលលោក ពូទីន ប្រតិកម្មនៅពេលដែលកងទ័ពអ៊ុយក្រែន សម្រេចបានគោលដៅវាយយកបានមកវិញនូវទឹកដីរបស់ខ្លួនពីទ័ពរុស្ស៊ី។
លោក បៃដិន បានបញ្ជាក់ថា៖ «ជាលើកដំបូង គិតចាប់តាំងពីវិបត្តិមីស៊ីលគុយបា ពេលនេះពិភពលោកកំពុងរងការគំរាមកំហែងដោយផ្ទាល់ចំពោះការបំផ្ទុះសង្គ្រាមនុយក្លេអ៊ែររបស់រុស្ស៊ី»។
លោក ពូទីន ប្រហែលជាមិននិយាយលេងទេចំពោះការបាញ់អាវុធនុយក្លេអ៊ែរ យុទ្ធសាស្ត្រ អាវុធជីវសាស្ត្រ ឬអាវុធគីមី ពីព្រោះកងទ័ពនៃប្រទេសរុស្ស៊ី ប្រហែលជាសម្រេចបាននូវគោលដៅតិចតួចណាស់ក្នុងការធ្វើសង្គ្រាមលើទឹកដីអ៊ុយក្រែន។
ប្រធានាធិបតីសហរដ្ឋអាមេរិករូបនេះបានហៅការគំរាមកំហែងរបស់ប្រធានាធិបតីរុស្ស៊ី លោក វ្ល៉ាឌីមៀរ ពូទីន ក្នុងការបង្កសង្គ្រាមនុយក្លេអ៊ែរ គឺជាការគំរាមកំហែងដែលមានហានិភ័យដ៏ធំបំផុតដែលអាមេរិកត្រូវព្យាយាមរកឲ្យឃើញអ្វីទៅជាគោលដៅពិតរបស់លោក ពូទីន។ ក្រៅពីនេះ លោក បៃដិន បានចោទសួរក្នុងការរកច្រកចេញពីវិបត្តិរបស់លោក ពូទីន។ លោកឱ្យដឹងថា លោកសុខចិត្តពិភាក្សាជាមួយលោក ពូទីន ដើម្បីស្រាយវិបត្តិរបស់មេដឹកនាំរុស្ស៊ីម្នាក់នេះ។
កាលពីថ្ងៃទី២១ កញ្ញា ប្រធានាធិបតីរុស្ស៊ី វ៉្លាឌីមៀរ ពូទីន បានព្រមានជាសាធារណៈតាមកញ្ចក់ទូរទស្សន៍ពីទីក្រុងមូស្គូ ថា លោកនឹងប្រើប្រាស់គ្រប់មធ្យោបាយទាំងអស់ ប្រសិនបើចាំបាច់ ដើម្បីទប់ទល់នឹងកម្លាំងខាងក្រៅ គឺក្រុមបស្ចិមប្រទេស។ លោក ពូទីន ចោទពួកបស្ចិមប្រទេសថាមានផែនការចង់កម្ទេចរុស្ស៊ី។
មួយថ្ងៃក្រោយមក នាយករងនៃក្រុមប្រឹក្សាសន្តិសុខជាតិរុស្ស៊ី លោក ឌីមីទ្រី មេវេដៀវ បានព្រមានថា បើទ័ពអ៊ុយក្រែន វាយកាន់កាប់ទឹកដីរបស់ក្រុមផ្ដាច់ខ្លួននៅភាគខាងត្បូង និងខាងកើត គឺស្មើនឹងចូលឈ្លានពានទឹកដីរុស្ស៊ី ដែលរុស្ស៊ីចាំបាច់ត្រូវវាយបកដោយអាវុធនុយក្លេអ៊ែរ។
មិនបានប៉ុន្មានថ្ងៃផង ចារកម្មអង់គ្លេសដែលគេសង្ស័យថាក្រុងមូស្គូ បានចល័តសព្វាវុធបំពាក់ដោយក្បាលគ្រាប់នុយក្លេអ៊ែរតាក់ទិចទៅដាក់ពង្រាយនៅតាមព្រំដែនរុស្ស៊ី ជាប់នឹងអ៊ុយក្រែន ដែលជាសញ្ញាប្រកាសអាសន្នភ្លាមៗដល់ក្រុមបស្ចិមប្រទេស និងសហរដ្ឋអាមេរិក។
ក្រុមមេដឹកនាំណាតូ (NATO) ព្រមានឲ្យរុស្ស៊ីដកថយទៅវិញនូវចលនាបង្កសង្គ្រាមនុយក្លេអ៊ែរ។ មេដឹកនាំក្រុមណាតូចាត់ទុកថា បើរុស្ស៊ីផ្ដើមសង្គ្រាមអាវុធប្រល័យលោកនេះ គឺណាតូនឹងហក់ចូលក្នុងសង្គ្រាមនេះភ្លាម។
ណាតូចាត់ទុកការសាយភាយវិទ្យុសកម្មនុយក្លេអ៊ែរចូលទៅដល់ប្រទេសសមាជិកណាតូ គឺស្មើនឹងរុស្ស៊ីវាយចូលប្រទេសទាំងនោះ។ សម្រាប់លោក បៃដិន ព្រមានថា លោក ពូទីន ទំនងមិននិយាយលេងសើចនោះទេ។ លោកបានហៅលោក ពូទីន ថាជាអ្នកលេងកោងកាច។
បើតាមគេហទំព័រសារព័ត៌មាន Global Power Fire ឲ្យដឹងថា រុស្ស៊ីមានក្បាលគ្រាប់នុយក្លេអ៊ែរចំនួន ៦២០០គ្រាប់។ ចំណែកចិន មាន ៣៥០គ្រាប់។ កូរ៉េខាងជើងមាន ៣០គ្រាប់។ ប៉ាគីស្ថាន មាន ១៦៥គ្រាប់។ ឥណ្ឌា មាន ១៥៦គ្រាប់។ អ៊ីស្រាអែល មានចំនួនពី ៨០ ទៅ ៤០០គ្រាប់ ប៉ុន្តែប្រទេសមិនទាន់បានចុះបញ្ជីអំពីចំនួនក្បាលគ្រាប់នុយក្លេអ៊ែររបស់ខ្លួននៅឡើយទេ។
ចំណែកសហរដ្ឋអាមេរិក មាន ៥៥៥០គ្រាប់។ អង់គ្លេស និងបារាំង ក៏មានក្បាលគ្រាប់នុយក្លេអ៊ែរដែរ គឺអង់គ្លេសមាន ២៨០គ្រាប់ ហើយបារាំង មាន ២៥០គ្រាប់។ ទាំងសហរដ្ឋអាមេរិក អង់គ្លេស និងបារាំង គឺជាមេដឹកនាំដ៏មានសក្ដានុពលផ្នែកយោធានៃអង្គការយោធាណាតូដែលមាន ៣០ប្រទេស៕