សហមេធាវីការពារក្តីឱ្យមេដឹកនាំបក្សប្រឆាំងដែលមិនទាន់មានសេរីភាពពេញលេញឡើងវិញ លោក កឹម សុខា អះអាងថា សវនាការលើសំណុំរឿងរបស់ប្រធានគណបក្សសង្គ្រោះជាតិ នឹងត្រូវបើកការជំនុំជម្រះនៅថ្ងៃព្រហស្បតិ៍ ទី១៣ តុលា នេះបន្តទៀត បន្ទាប់ពីតុលាការបានបើកការជំនុំជម្រះពេញមួយថ្ងៃនៅថ្ងៃពុធ។
មេធាវីការពារក្តីមេដឹកនាំបក្សប្រឆាំង លោក ចាន់ ចេន បានសរសេរលើគណនីហ្វេសប៊ុករបស់លោកនៅថ្ងៃទី១២ តុលា នេះថា ប្រធានគណបក្សសង្គ្រោះជាតិ លោក កឹម សុខា គ្មានកំហុសដូចការចោទប្រកាន់របស់បក្សកាន់អំណាចនោះឡើយ ដូច្នេះបើទោះបីជាសវនាការនឹងត្រូវបន្តបើកដំណើរការជំនុំជម្រះនៅថ្ងៃទី១៣ តុលា បន្តទៀតក៏ដោយ ក៏លោកនៅតែតស៊ូរកយុត្តិធម៌ជូនមេដឹកនាំបក្សប្រឆាំងរូបនេះមិនរាថយជាដាច់ខាត។
ការអះអាងនេះ ធ្វើឡើងបន្ទាប់ពីសាលាដំបូងក្រុងភ្នំពេញសម្រេចបន្តដំណើរការសវនាការប្រធានគណបក្សសង្គ្រោះជាតិ លោក កឹម សុខា នៅថ្ងៃព្រហស្បតិ៍បន្តទៀត បន្ទាប់ពីដំណើរការសវនាការរបស់លោកមួយថ្ងៃពេញនៅថ្ងៃពុធ។
សាលាដំបូងរាជធានីភ្នំពេញ បានបើកសវនាការលើសំណុំរឿងប្រធានគណបក្សសង្គ្រោះជាតិ លោក កឹម សុខា លើកទី៦០ នៅថ្ងៃទី១២ ខែតុលា ឆ្នាំ២០២២ ក្នុងអង្គហេតុបដិវត្តន៍ពណ៌ដដែល ប៉ុន្តែសវនាការម្តងនេះ គឺមានសភាពខុសប្រក្រតី ដោយសារតែតុលាការបានជំនុំជម្រះលើសំណុំរឿងរបស់លោកដោយប្រើពេលរហូតដល់ពេញមួយថ្ងៃ ហើយចុងក្រោយ តុលាការបានសម្រេចថានឹងបន្តដំណើរការនៃសវនាការនេះនៅថ្ងៃព្រហស្បតិ៍នេះបន្តទៀត។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ បានប្រាប់សារព័ត៌មាន The Cambodia Daily នៅថ្ងៃទី១២ តុលា នេះថា ការបង្កើនពេលវេលាដើម្បីដោះស្រាយសំណុំរឿងមេដឹកនាំបក្សប្រឆាំង លោក កឹម សុខា ឲ្យឆាប់ចប់ គឺជារឿងល្អ ជាពិសេសប្រសិនបើតុលាការបញ្ចប់សំណុំរឿងនេះឲ្យបានមុនកិច្ចប្រជុំអាស៊ាន ដែលកម្ពុជានឹងធ្វើជាម្ចាស់ផ្ទះនាពេលខាងមុខនេះ គឺមានផលចំណេញធំធេងសម្រាប់កម្ពុជាទៅថ្ងៃមុខ។
លោក សេក សុជាតិ លើកឡើងថា ប្រសិនបើតុលាការមានចេតនាដោះស្រាយបញ្ចប់សំណុំរឿងនេះឲ្យបានឆាប់ គួរតែអនុវត្តការជំនុំជម្រះឲ្យបានញឹកញាប់ ប៉ុន្តែរាល់ដំណើរការគ្រប់ជំហានត្រូវតែធ្វើឡើងប្រកបដោយតម្លាភាព គ្មានការគាបសង្កត់ ដើម្បីផ្តល់យុត្តិធម៌ជូនលោក កឹម សុខា ដោយពិតប្រាកដ។
ចំណែកអនុប្រធានវេទិកាពលរដ្ឋ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី១២ តុលា នេះដែរថា វិធីល្អបំផុតសម្រាប់កម្ពុជា គឺគ្មានជម្រើសណាផ្សេងក្រៅពីទម្លាក់ចោលបទចោទលើលោក កឹម សុខា នោះទេ ដើម្បីឲ្យស្ថានការណ៍នយោបាយរបស់ខ្លួនមានភាពល្អប្រសើរឡើងវិញ ដែលជាផលប្រយោជន៍សម្រាប់ពលរដ្ឋខ្មែរទូទាំងប្រទេស។
លោក ម៉ែន ណាត លើកឡើងថា ប្រសិនបើរដ្ឋាភិបាលលោក ហ៊ុន សែន អាចបើកលំហសេរីភាពនយោបាយឲ្យលោក កឹម សុខា វិលចូលឆាកនយោបាយវិញនៅមុនការបោះឆ្នោតជាតិឆ្នាំ២០២៣ ខាងមុខនេះ កម្ពុជានឹងទទួលបានអត្ថប្រយោជន៍ជាច្រើនពីសហគមន៍អន្តរជាតិ ដូចជាផលអនុគ្រោះពន្ធ EBA របស់សហគមន៍អឺរ៉ុប និង GSP របស់សហរដ្ឋអាមេរិក ជាដើម ដែលនឹងជួយសេដ្ឋកិច្ច និងមុខមាត់របស់កម្ពុជាឲ្យល្អប្រសើរជាងពេលបច្ចុប្បន្ននេះ។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាលកម្ពុជា ប៉ុន្តែរហូតមកទល់នឹងពេលនេះ តុលាការកម្ពុជាមិនទាន់អាចកាត់ទោសលោកពីបទល្មើសណាមួយនៅឡើយទេ ប៉ុន្តែសវនាការរបស់លោកនៅតែបន្តដោយគ្មានពេលកំណត់ ដូច្នេះករណីនេះត្រូវគេរិះគន់ថាជារឿងនយោបាយ ជាជាងការរកយុត្តិធម៌តាមផ្លូវច្បាប់របស់កម្ពុជា៕