គណបក្សសង្គ្រោះជាតិពីខាងភាគីលោក សម រង្ស៊ី ព្រមានថា ការទម្លាក់ចោលបទចោទរបស់តុលាការប្រទេសបារាំង លើលោក សម រង្ស៊ី គឺជាការបង្ហាញឲ្យឃើញថា បទឧក្រិដ្ឋនានាដែលកើតមានឡើងនៅកម្ពុជា គឺជាការទទួលខុសត្រូវរបស់បុរសខ្លាំងលោក ហ៊ុន សែន។
សេចក្តីថ្លែងការណ៍របស់គណបក្សសង្គ្រោះជាតិភាគីលោក សម រង្ស៊ី កាលពីថ្ងៃទី១១ ខែតុលា បានចេញផ្សាយជាសាធារណៈថា សេចក្តីសម្រេចរបស់តុលាការទីក្រុងប៉ារីស ដែលបានសម្រេចឲ្យលោក សម រង្ស៊ី រួចផុតពីបទចោទប្រកាន់ មិនមែនគ្រាន់តែជាជ័យជម្នះផ្ទាល់ខ្លួនរបស់លោក សម រង្ស៊ី នោះទេ ប៉ុន្តែជាពន្លឺយុត្តិធម៌ដ៏ធំមួយសម្រាប់ជនស្លូតត្រង់ដែលបានរងគ្រោះយ៉ាងអយុត្តិធម៌ក្រោមការដឹកនាំរបស់លោក ហ៊ុន សែន កន្លងមក។
ការអះអាងនេះ ធ្វើឡើងបន្ទាប់ពីតុលាការប្រទេសបារាំង បានប្រកាសសាលក្រមទម្លាក់បទចោទលើលោក សម រង្ស៊ី ចំពោះបណ្តឹងរបស់លោក ហ៊ុន សែន និងលោក ឌី វិជ្ជា កាលពីឆ្នាំ២០១៩ កន្លងទៅ។
ទោះជាបែបនេះក្តី លោក ហ៊ុន សែន បានផ្សព្វផ្សាយសេចក្តីប្រកាសព័ត៌មាននៃមេធាវីបារាំងរបស់លោកកាលពីថ្ងៃអង្គារ ទី១១ តុលា ថា សាលាដំបូងប្រទេសបារាំង បានវិនិច្ឆ័យយ៉ាងច្បាស់ថា ការចោទប្រកាន់របស់លោក សម រង្ស៊ី លើលោក ហ៊ុន សែន ដែលថាជាអ្នកនៅពីក្រោយនៃការស្លាប់របស់លោក ហុក ឡង់ឌី គឺពុំមានមូលដ្ឋាន និងអំណះអំណាងច្បាស់លាស់។
ប្រភពដដែលបញ្ជាក់ថា តុលាការបារាំងបានចាត់ទុកថា លោក សម រង្ស៊ី មានមូលដ្ឋានអង្គហេតុតិចតួចបំផុតក្នុងការគាំទ្រលើការចោទប្រកាន់របស់ខ្លួន ជាពិសេសករណីផ្តល់រូបថតដែលមានគុណភាពមិនច្បាស់អំពីបំណែកនៃឧទ្ធម្ភាគចក្រដែលមិនអាចបញ្ជាក់បានថា បំណែកនៃឧទ្ធម្ភាគចក្រនោះកើតចេញពីការផ្ទុះគ្រាប់បែក ឬជាការធ្លាក់ធម្មតានោះទេ ដោយសារមិនមានរបាយការណ៍អ្នកជំនាញមកសំអាង។
ជុំវិញបញ្ហានេះ លោក ហ៊ុន សែន បានអះអាងក្នុងពិធីចែកសញ្ញាបត្រដល់និស្សិតនៅក្នុងទីក្រុងភ្នំពេញ កាលពីថ្ងៃទី១១ ខែតុលា ឆ្នាំ២០២២ នេះដែរថា លោកអរគុណចំពោះតុលាការបារាំងដែលបានផ្តល់យុត្តិធម៌សម្រាប់រូបលោក។
លោក ហ៊ុន សែន បញ្ជាក់ថា ពីកម្ពុជាទៅដល់ប្រទេសបារាំង លោកចង់បានត្រឹមតែភាពស្អាតស្អំ ថាលោកមិនមែនជាអ្នកនៅពីក្រោយនៃការស្លាប់របស់លោក ហុក ឡង់ឌី ដូចការចោទប្រកាន់របស់លោក សម រង្ស៊ី តែប៉ុណ្ណោះ។
ចំណែកអតីតមេដឹកនាំប្រឆាំង លោក សម រង្ស៊ី បានសរសេរលើទំព័រហ្វេសប៊ុករបស់លោកកាលពីថ្ងៃទី១១ តុលា នេះដែរថា លោក ហ៊ុន សែន អត់ចេះអានអក្សរបារាំងទេ ហើយក៏មិនអាចភូតភរពលរដ្ឋបានដែរ ព្រោះថាតុលាការបារាំងបានបញ្ជាក់យ៉ាងច្បាស់ហើយថា លោក ហ៊ុន សែន និងលោក ឌី វិជ្ជា បានចាញ់ក្តីហើយចំពោះមុខសាលាដំបូងទីក្រុងប៉ារីស។ ចំណែកលោក សម រង្ស៊ី បានឈ្នះក្តីចំពោះមុខតុលាការលើសំណុំរឿងនេះ។
ជុំវិញសាលក្រមតុលាការឯករាជ្យនៃប្រទេសបារាំងនេះ ទាំងលោក ហ៊ុន សែន និងលោក សម រង្ស៊ី សុទ្ធតែអះអាងថាខ្លួនជាអ្នកឈ្នះក្តីលើសំណុំរឿងនេះដូចគ្នា ប៉ុន្តែអ្នកសង្កេតការណ៍លើកឡើងថា អ្នកដែលចាញ់ គឺមានតែប្រជាជាតិខ្មែរតែប៉ុណ្ណោះ ព្រោះអ្នកនយោបាយជាន់ខ្ពស់ទាំងនោះបានយករឿងកំប៉ិកកំប៉ុកទៅតតាំងគ្នានៅតុលាការបរទេស ដែលជាការបន្តុះបង្អាប់ពូជអម្បូរខ្មែរដែលធ្លាប់តែមានប្រវត្តិថ្លៃថ្នូរ ដោយសារតែការចង់ឈ្នះចាញ់របស់អ្នកនយោបាយទាំងនោះ។
អ្នកគ្រប់គ្រងសិទ្ធិការងារនៃមជ្ឈមណ្ឌលសម្ព័ន្ធភាពសិទ្ធិការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ បានសរសេរលើគណនីហ្វេសប៊ុករបស់លោកនៅថ្ងៃទី១២ តុលា នេះថា មេដឹកនាំនយោបាយចាស់ៗគួរតែរៀនអត់ឱនទុកមុខទុកមាត់ឱ្យគ្នាទៅវិញទៅមក។ លោកបន្ថែមថា គួរតែខ្មាសតុលាការប្រទេសបារាំងទៅវិញទេដែលគេបានកាត់ក្តីដោយយកគោលការណ៍សមធម៌ អនុគ្រោះ និងយោគយល់រវាងភាគីដែលប្រើសិទ្ធិ និងភាគីដែលមានអំណាចរបស់កម្ពុជាលើបណ្តឹងនេះ។
កាលពីខែសីហា ឆ្នាំ២០១៩ លោក ហ៊ុន សែន និងកូនប្រសារបស់លោក គឺលោក ឌី វិជ្ជា ដែលត្រូវជាកូនប្រុសបង្កើតរបស់លោក ហុក ឡង់ឌី បានដាក់បណ្ដឹងទៅតុលាការថ្នាក់ទាបនៃប្រទេសបារាំង ប្ដឹងលោក សម រង្ស៊ី ពីបទ «បរិហារកេរ្តិ៍» បន្ទាប់ពីលោក សម រង្ស៊ី បានអះអាងកាលពីដើមខែមិថុនា ឆ្នាំ២០១៩ ដោយចោទថា លោក ហ៊ុន សែន បានដាក់គ្រាប់បែកសម្លាប់លោក ហុក ឡង់ឌី កាលពីឆ្នាំ២០០៨ បើទោះបីជារដ្ឋាភិបាលកម្ពុជាធ្លាប់អះអាងថា ការស្លាប់របស់អតីតអគ្គស្នងការនគរបាលជាតិរូបនោះជាការស្លាប់ដោយរន្ទះបាញ់បង្កឡើងដោយគ្រោះធម្មជាតិក៏ដោយ៕