ចៅក្រមសាលាដំបូងរាជធានីភ្នំពេញ សម្រេចឲ្យភាគីពាក់ព័ន្ធក្នុងសំណុំរឿងលោក កឹម សុខា ធ្វើសេចក្ដីសន្និដ្ឋាននៅសប្ដាហ៍ក្រោយ បន្ទាប់ពីតុលាការប្រកាសបិទបញ្ចប់នីតិវិធីសួរដេញដោលដ៏ចម្រូងចម្រាសដែលបានអូសបន្លាយរយៈពេល ៥ឆ្នាំមកនេះ។
ការប្រកាសរបស់ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក កូយ សៅ នាថ្ងៃព្រហស្បតិ៍ ទី១៣ តុលា នេះ បន្ទាប់ពីតុលាការបានបន្តបើកសវនាការសួរដេញដោលសាក្សីដែលបានកោះហៅ ប៉ុន្តែក្នុងចំណោមសាក្សី ២៧នាក់ តុលាការសួរបានតែចំនួន ៩នាក់ប៉ុណ្ណោះ។
សវនាការរយៈពេលមួយថ្ងៃដោយសួរដេញដោលទៅលើសាក្សីទាំង ៩នាក់ ក្នុងនោះមានទាំងមន្ត្រីគណបក្សប្រជាជនកម្ពុជា លោក ឈឹម ផលវរុន អតីតមន្ត្រីគណបក្សប្រឆាំង លោក គង់ គាំ និងមន្ត្រីអង្គការសង្គមស៊ីវិល អ្នកស្រី ចក់ សុភាព និងលោក ម៉ា ចិត្រា សកម្មជនដីធ្លី ជាដើម ដែលសរុបចំនួន ៩នាក់។
ក្រោយពីបើកសវនាការពេញមួយថ្ងៃនេះ ប្រធានក្រុមប្រឹក្សាជំនុំជម្រះ លោក កូយ សៅ បានប្រកាសបញ្ចប់នីតិវិធីសួរដេញដោល ដោយប្រកាសឲ្យតំណាងអយ្យការ មេធាវីការពារក្ដីរដ្ឋាភិបាល និងមេធាវីការពារឲ្យលោក កឹម សុខា ធ្វើសេចក្ដីសន្និដ្ឋាននៅថ្ងៃទី១៨ ខែតុលា ឆ្នាំ២០២២។
ការសម្រេចយកសប្ដាហ៍នេះ បន្ទាប់ពីមេធាវីការពារក្ដីឲ្យលោក កឹម សុខា ជំទាស់ដោយលើកឡើងថា តុលាការមិនទាន់កោះហៅភាគីពាក់ព័ន្ធមកចូលរួមសវនាការនៅឡើយ ខណៈកូនក្ដីរបស់ខ្លួនត្រូវបានតុលាការចោទប្រកាន់ពីបទ «សន្ទិដ្ឋភាព ត្រូវរ៉ូវដោយសម្ងាត់ជាមួយរដ្ឋបរទេស ឬភ្នាក់ងារបរទេសចង់ផ្តួលរំលំរដ្ឋាភិបាល» នោះ។
ក្នុងសវនាការលើកទី៦១ នេះ មេធាវីការពារក្ដីឲ្យលោក កឹម សុខា បានទាមទារតុលាការកោះហៅសមត្ថកិច្ចដែលបានចូលចាប់ខ្លួនកូនក្ដីទាំងកណ្ដាលយប់អធ្រាត្រនោះ មិនទាន់បានចូលមកឆ្លើយបំភ្លឺនៅឡើយ ប៉ុន្តែលោក ប្លង់ សុផល បានឡើងពន្យល់នីតិវិធីបន្ទាប់ពីមេធាវីការពារក្ដីលោក កឹម សុខា បានលើកដៃតវ៉ាអំឡុងពេលសវនាការ។
លោក កឹម សុខា ក្រោយសមត្ថកិច្ចចាប់ខ្លួនកាលពីដើមខែកញ្ញា ឆ្នាំ២០១៧ តុលាការចោទប្រកាន់រូបលោកពីបទ «សន្ទិដ្ឋភាព ត្រូវរ៉ូវដោយសម្ងាត់ជាមួយរដ្ឋបរទេស ឬភ្នាក់ងារបរទេសចង់ផ្តួលរំលំរដ្ឋាភិបាល» ក៏ប៉ុន្តែបទចោទនេះត្រូវរងការរិះគន់ពីសហគមន៍ជាតិ និងអន្តរជាតិ ថាធ្វើឡើងហាក់មិនសមហេតុផល ហើយចាត់ទុកសំណុំរឿងនេះថាជារឿងនយោបាយ ដោយថាចាប់តាំងពីការចោទប្រកាន់រហូតដល់សវនាការសួរដេញដោលត្រូវបានបិទបញ្ចប់នាថ្ងៃនេះ មិនដែលឃើញរដ្ឋជាបរទេសណាមួយមានជាប់ពាក់ព័ន្ធនឹងការចោទប្រកាន់នេះនៅឡើយ៕