មន្ត្រីការទូតជាន់ខ្ពស់របស់អូស្ត្រាលី ជំរុញឱ្យរដ្ឋាភិបាលកម្ពុជាដោះស្រាយបញ្ហាប្រឈមមួយចំនួន ដូចជាករណីជួញដូរមនុស្ស ការលាងលុយកខ្វក់ ការរំលោភសិទ្ធិកម្មករនិយោជិតណាហ្គាវើលដ៍ និងសំណុំរឿងប្រធានគណបក្សសង្គ្រោះជាតិ លោក កឹម សុខា ផងដែរ។
ឯកអគ្គរាជទូតអូស្ត្រាលីប្រចាំកម្ពុជា លោក Pablo Kang បានសរសេរលើបណ្ដាញទំនាក់ទំនងសង្គមធ្វីតទ័រ (Twitter) របស់លោកកាលពីថ្ងៃទី១៣ ខែតុលា ឆ្នាំ២០២២ ថា លោកបានលើកឡើងនូវបញ្ហាមួយចំនួននៅក្នុងជំនួបរបស់លោកជាមួយលោក ស ខេង ឧបនាយករដ្ឋមន្ត្រី អំពីបញ្ហាជួញដូរមនុស្ស គ្រឿងញៀន ការលាងលុយកខ្វក់ វិវាទការងារនៅក្រុមហ៊ុនណាហ្គាវើលដ៍ ការបោះឆ្នោតឆ្នាំ២០២៣ រួមទាំងសំណុំរឿងលោក កឹម សុខា និងលោក សុន ឆ័យ ជាដើម ក្នុងជំនួបជាមួយរដ្ឋមន្ត្រីក្រសួងមហាផ្ទៃ លោក ស ខេង ដែលសុទ្ធសឹងតែជាបញ្ហាដែលកម្ពុជាកំពុងប្រឈមនៅពេលនេះ។
ចំណែករដ្ឋមន្ត្រីក្រសួងមហាផ្ទៃ លោក ស ខេង បានសរសេរលើទំព័រហ្វេសប៊ុករបស់លោកកាលពីថ្ងៃទី១៣ ខែតុលា ឆ្នាំ២០២២ ថា ឯកអគ្គរាជទូតអូស្ត្រាលីប្រចាំកម្ពុជា លោក Pablo Kang បានដាស់តឿនកម្ពុជាថា អំពើជួញដូរមនុស្សជាបញ្ហាសកល និងជាបញ្ហាតំបន់ មិនមែនជាបញ្ហាសម្រាប់តែកម្ពុជានោះទេ ដូច្នេះលោកសង្ឃឹមថានឹងបង្កើនកិច្ចសហប្រតិបត្តិការជាមួយភាគីកម្ពុជា ដើម្បីរួមគ្នាដោះស្រាយបញ្ហាឧក្រិដ្ឋកម្មឆ្លងដែនដ៏ស្មុគស្មាញនេះឱ្យមានប្រសិទ្ធភាព។
រដ្ឋមន្ត្រីក្រសួងមហាផ្ទៃ លោក ស ខេង លើកឡើងថា ការងារប្រយុទ្ធប្រឆាំងអំពើជួញដូរមនុស្ស គឺជាកិច្ចការដែលទាមទារឱ្យមានការសហការជិតស្និទ្ធជាមួយបណ្ដាប្រទេសពាក់ព័ន្ធ ទាំងក្នុងតំបន់ និងសកលលោក ខណៈកម្ពុជាកំពុងបន្តខិតខំស្រាវជ្រាវ បង្ការ ទប់ស្កាត់ និងបង្ក្រាបឧក្រិដ្ឋជនដែលប្រព្រឹត្តអំពើនេះនៅកម្ពុជាឱ្យបានម៉ឺងម៉ាត់ជាទីបំផុត។
លោក ស ខេង បញ្ជាក់ថា ឯកអគ្គរាជទូតអូស្ត្រាលីរូបនេះអះអាងថា អូស្ត្រាលីនឹងរួមចំណែកជួយគាំទ្រដល់កម្ពុជា ក្នុងការបង្កើនសមត្ថភាពដើម្បីជួយឱ្យកម្ពុជាចាកចេញពីបញ្ជីប្រផេះនៃការសម្អាតប្រាក់ដែលកម្ពុជាកំពុងស្ថិតក្នុងបញ្ជីតាមដាននៅពេលនេះ។
យ៉ាងណាក៏ដោយ នៅលើទំព័រហ្វេសប៊ុករបស់លោក ស ខេង មិនបានលើកឡើងពីសំណុំរឿងរបស់លោក កឹម សុខា លោក សុន ឆ័យ និងវិវាទរបស់ក្រុមហ៊ុនណាហ្គាវើលដ៍ដូចដែលឯកអគ្គរាជទូតអូស្ត្រាលី លោក Pablo Kang បានអះអាងនោះទេ។
បន្ទាប់ពីកម្ពុជាត្រូវបានគេចាត់ចូលទៅក្នុងបញ្ជីខ្មៅកម្រិត៣ (Tier 3 Watch List) នៃក្រុមប្រទេសជួញដូរមនុស្សដែលចេញផ្សាយដោយក្រសួងការបរទេសអាមេរិក កាលពីថ្ងៃទី១៩ ខែកក្កដា សម្រាប់ឆ្នាំ២០២២ និងត្រូវបានចាត់ចូលក្នុងចំណោមប្រទេសលាងលុយកខ្វក់ក្នុងបញ្ជីប្រផេះ ដែលសហគមន៍អន្តរជាតិត្រូវតាមដានឱ្យកាន់តែខ្លាំងនៅឆ្នាំ២០២២ នេះ កម្ពុជាបានដាក់ចេញនូវកិច្ចប្រតិបត្តិការបង្ក្រាបបទល្មើសជួញដូរមនុស្សយ៉ាងសកម្មដែលរកឃើញបទល្មើសរាប់រយករណីនៅពេលនេះ។
បច្ចុប្បន្ននេះ ខេត្តព្រះសីហនុ និងទីក្រុងភ្នំពេញ ត្រូវគេរកឃើញថាជាមុខសញ្ញាដែលពោរពេញទៅដោយសម្បុកឧក្រិដ្ឋជនដែលសម្ងំលាក់ខ្លួនប្រព្រឹត្តអំពើជួញដូរមនុស្ស និងសម្អាតប្រាក់យ៉ាងសុខសាន្ត និងយ៉ាងអនាធិបតេយ្យ ខណៈអាជ្ញាធរខេត្តព្រះសីហនុ អះអាងកាលពីថ្ងៃទី១២ ខែតុលា នេះថា ក្រុមឧក្រិដ្ឋជនបានប្រើប្រាស់ពលកម្មឆ្លាតវៃ និងប្រព័ន្ធព័ត៌មានវិទ្យាឆ្លាតវៃក្នុងពេលបច្ចុប្បន្ននេះ ដែលបង្កការលំបាកដល់សមត្ថកិច្ចក្នុងការស្រាវជ្រាវរកភស្តុតាងដើម្បីចោទប្រកាន់ពួកគេយ៉ាងខ្លាំង។
សារព័ត៌មាន The Australian បានចេញផ្សាយកាលពីពេលថ្មីៗនេះថា កម្ពុជាកំពុងរងនូវការសង្ស័យថាកំពុងប្រព្រឹត្តអំពើជួញដូរមនុស្សយ៉ាងធំ ដែលគ្រប់គ្រងដោយក្រុមឧក្រិដ្ឋជនលាងលុយជនជាតិចិន ហើយមានការជាប់ពាក់ព័ន្ធយ៉ាងខ្លាំងជាមួយនឹងក្មួយប្រុសរបស់មេដឹកនាំផ្ដាច់ការកម្ពុជា លោក ហ៊ុន សែន គឺលោក ហ៊ុន តូ។
ដោយឡែកសារព័ត៌មានអន្តរជាតិ អាល់ចាហ្ស៊ីរ៉ា (Aljazeera) អះអាងថា ក្នុងអំពើទាំងនោះ គឺមានជាប់ពាក់ព័ន្ធយ៉ាងខ្លាំងទៅនឹងអ្នកជំនួញជនជាតិចិនដ៏មានឥទ្ធិពលមួយរូបឈ្មោះ តុង លីឆឹង (Dong Lecheng) ដែលបានភ្ជាប់ខ្លួនជាមួយថ្នាក់ដឹកនាំកំពូលៗនៅកម្ពុជា ដូចជាលោកនាយករដ្ឋមន្ត្រី ហ៊ុន សែន អ្នកស្រីឧបនាយករដ្ឋមន្ត្រី ម៉ែន សំអន អគ្គមេបញ្ជាការរងនៃកងយោធពលខេមរភូមិន្ទ លោក ហ៊ីង ប៊ុនហៀង និងបុគ្គលមានតួនាទីខ្ពស់ៗក្នុងជួររដ្ឋាភិបាលមួយចំនួនទៀតផងដែរ៕