អ្នកឃ្លាំមើលទាមទារឱ្យលោក ហ៊ុន សែន ប្រតិបត្តិតាមគំរូនៃស្នាព្រះហស្តរបស់អតីតព្រះមហាក្សត្រ សម្ដេចព្រះ នរោត្តម សីហនុ ដោយការផ្សះផ្សានយោបាយផ្ទៃក្នុងជាតិ ទម្លាក់បទចោទលើអ្នកទោសមនសិការគ្រប់រូប និងផ្ដល់សិទ្ធិសេរីឱ្យពលរដ្ឋខ្មែរគ្រប់រូបអាចចូលរួមសកម្មភាពនយោបាយបានដោយសេរី។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១៧ តុលា នេះថា ការបង្រួបបង្រួមខ្មែរគ្រប់និន្នាការ ការបើកទូលាយឱ្យខ្មែរគ្រប់រូបបានចូលរួមការពារអធិបតេយ្យភាពជាតិ ឯករាជ្យជាតិ សន្តិភាពជាតិ និងបូរណភាពដែនដីកម្ពុជាបានពេញលេញ ស្របតាមរដ្ឋធម្មនុញ្ញកម្ពុជាដែលបានចែង សុទ្ធសឹងតែជាគំរូដ៏ថ្លៃថ្លារបស់សម្តេចព្រះ នរោត្តម សីហនុ ដែលលោក ហ៊ុន សែន គួរអនុវត្តតាមដើម្បីភាពរុងរឿងរបស់កម្ពុជា។
លោក សេក សុជាតិ លើកឡើងថា រដ្ឋាភិបាលកម្ពុជាក៏គួរតែរៀបចំការបោះឆ្នោតមួយដោយសេរី និងត្រឹមត្រូវ ដែលមានសមាសភាពថ្នាក់ដឹកនាំ គ.ជ.ប មួយដែលឯករាជ្យ គ្មាននិន្នាការនយោបាយ និងធ្វើវិសោធនកម្មច្បាប់ស្ដីពីការបោះឆ្នោត ច្បាប់ស្ដីពីគណបក្សនយោបាយ និងច្បាប់អង្គការសង្គមស៊ីវិល ដែលបានរឹតបន្តឹងដល់សិទ្ធិសេរីភាពក្នុងការបញ្ចេញមតិ សិទ្ធិទាមទាររបស់កម្មករ សេរីភាពសារព័ត៌មាន និងច្បាប់ផ្សេងៗទៀត ជាដើម ដើម្បីលើកកម្ពស់ក្នុងការចូលរួមគាំទ្រដល់ដំណើរការនីតិរដ្ឋមួយពិតប្រាកដនៅកម្ពុជា។
លោក សេក សុជាតិ បញ្ជាក់ថា ស្នាព្រះហស្តរបស់សម្ដេចព្រះ នរោត្តម សីហនុ មានច្រើនរាប់មិនអស់ដែលប្រមុខរដ្ឋាភិបាលគួរអនុវត្តតាម ដូចជា៖
- ការទាមទារឯករាជ្យជាតិពីប្រទេសបារាំងក្នុងឆ្នាំ១៩៥៣
- ការដឹកនាំកម្ពុជាឱ្យទទួលបាននូវការបង្រួបបង្រួម និងផ្សះផ្សាជាតិតាមរយៈកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១
- ការរៀបចំរបបដឹកនាំប្រទេសសាជាថ្មី ដោយប្រកាន់យកលទ្ធិប្រជាធិបតេយ្យសេរី ពហុបក្ស ដែលមានក្នុងរដ្ឋធម្មនុញ្ញ ឆ្នាំ១៩៩៣
- និងបណ្តាំរបស់ព្រះអង្គនៅមុនពេលសោយទិវង្គតថា ប្រជាជាតិខ្មែរត្រូវតែសាមគ្គី និងបញ្ចប់នូវវប្បធម៌យកជាតិឯងធ្វើជាសត្រូវ ជាដើម។
កាលពីថ្ងៃទី១៥ ខែតុលា លោក ហ៊ុន សែន បានអះអាងថា ការគោរពវិញ្ញាណក្ខន្ធក្នុងខួប ១០ឆ្នាំនៃការយាងសោយទិវង្គតរបស់ព្រះករុណាព្រះបាទសម្ដេចព្រះ នរោត្តម សីហនុ នេះ គឺដើម្បីសម្ដែងនូវការដឹងគុណដ៏ខ្ពង់ខ្ពស់ដែលព្រះអង្គបានលះបង់ និងបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជារហូតមក។
លោក ហ៊ុន សែន លើកឡើងថា ពលរដ្ឋខ្មែរគ្រប់រូបនៅតែចងចាំជាប់មិនអាចបំភ្លេចនូវស្នាព្រះហស្តដែលព្រះអង្គយាងបំពេញព្រះរាជបូជនីយកិច្ចយ៉ាងអង់អាចក្លាហាន ក្នុងការទាមទារ និងដណ្តើមសិទ្ធិសេរីភាពជូនពលរដ្ឋខ្មែរពីនឹមអាណានិគមបារាំង រហូតទទួលបានជោគជ័យនៅថ្ងៃទី៩ ខែវិច្ឆិកា ឆ្នាំ១៩៥៣ កន្លងទៅ។
មេដឹកនាំបក្សកាន់អំណាច លោក ហ៊ុន សែន បញ្ជាក់ថា ការយាងសោយទិវង្គតរបស់ព្រះករុណា ព្រះបាទសម្ដេចព្រះ នរោត្ដម សីហនុ គឺជាពេលវេលាដ៏សែនសោកសៅ និងសោកសង្រេងបំផុតសម្រាប់ជាតិខ្មែរទាំងមូល ព្រោះជាពេលវេលាបាត់បង់នូវព្រះមហាវីរក្សត្រដ៏ឆ្នើមមួយអង្គរបស់ទឹកដីកម្ពុជា។
ជុំវិញបញ្ហានេះ មេដឹកនាំកម្ពុជាដែលប្តូរផ្តាច់កាន់អំណាចគ្មានពេលកំណត់ លោក ហ៊ុន សែន ធ្លាប់បានប្រកាសនៅខេត្តត្បូងឃ្មុំ កាលពីថ្ងៃទី២១ ខែមិថុនា ឆ្នាំ២០១៧ ថា មានតែត្រកូល «ហ៊ុន» ប៉ុណ្ណោះដែលជាអ្នកធានាការពារប្រទេសកម្ពុជា រដ្ឋធម្មនុញ្ញ ជាពិសេសរបបរាជានិយមតទៅថ្ងៃមុខ។
យ៉ាងណាក៏ដោយ ក្រុមអ្នកសង្កេតការណ៍រិះគន់ថា ការដឹកនាំរបស់មេដឹកនាំខ្មែរដែលវៀតណាមលើកបន្តុប លោក ហ៊ុន សែន ជាង ៤ទសវត្សមកនេះ មិនត្រឹមតែមិនគោរពព្រះរាជកិច្ចរបស់អតីតព្រះមហាក្សត្រខ្មែរ និងព្រះមហាក្សត្រខ្មែរដែលកំពុងគ្រងរាជ្យបច្ចុប្បន្ននេះទេ តែលោក ហ៊ុន សែន តែងតែប្រឆាំងនឹងការដឹកនាំរបស់ព្រះអង្គរហូតដល់រំលោភព្រះរាជតួនាទីរបស់ទ្រង់ថែមទៀត។
ជាក់ស្តែង កាលពីឆ្នាំ២០០៥ លោក ហ៊ុន សែន បានគំរាមរំលាយរបបរាជានិយម ហើយដាក់ជំនួសមកវិញនូវរបបសាធារណរដ្ឋ ប្រសិនបើសម្ដេចព្រះ នរោត្តម សីហនុ មិនព្រមឡាយព្រះហស្តលេខាលើសន្ធិសញ្ញាបំពេញបន្ថែមឆ្នាំ២០០៥ ស្ដីពីព្រំដែនកម្ពុជា-វៀតណាម ដើម្បីឱ្យបក្សកាន់អំណាចអាចចុះកិច្ចព្រមព្រៀងខុសច្បាប់នានាជាមួយរដ្ឋាភិបាលវៀតណាម បានបន្តទៀតទេនោះ៕