រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ត្អូញត្អែរថា វិស័យកសិកម្មនៅកម្ពុជានៅមានបញ្ហាកង្វះបច្ចេកទេស និងការកែច្នៃដើម្បីនាំចេញផលិតផលកសិកម្មរបស់ខ្លួន ដែលធ្វើឲ្យងាយទទួលរងនូវហានិភ័យនៃការប្រែប្រួលតម្លៃ។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានលើកឡើងនៅក្នុងពិធីតែងតាំងរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១៧ ខែតុលា ឆ្នាំ២០២២ ថា វិស័យកសិកម្មនៅកម្ពុជាកំពុងប្រឈមនឹងបញ្ហាកង្វះបច្ចេកទេស កង្វះប្រព័ន្ធស្រោចស្រព និងការធ្លាក់គុណភាពដីកសិកម្ម ស្របពេលដែលកម្ពុជាកំពុងស្ថិតក្នុងស្ថានភាពដែលពុំមានលទ្ធភាពច្រើនក្នុងការពង្រីកដីកសិកម្មបន្ថែមទៀត។
លោកបន្តថា វិស័យកសិកម្មនៅកម្ពុជានៅមានការខ្វះខាតការកែច្នៃ ដូច្នេះការនាំចេញផលិតផលកសិកម្មរបស់ខ្លួនស្ថិតនៅក្នុងលក្ខខណ្ឌក្រៅផ្លូវការនៅឡើយ ដែលធ្វើឲ្យងាយទទួលរងនូវហានិភ័យនៃការប្រែប្រួលតម្លៃ ខណៈស្ថាប័នពាក់ព័ន្ធដែលមានតួនាទីសម្របសម្រួលលើវិស័យនេះ ក៏មិនទាន់មានភាពប្រាកដប្រជាដែរ។
លោកបញ្ជាក់ថា រដ្ឋាភិបាលកម្ពុជានៅតែចាត់ទុកវិស័យកសិកម្មជាវិស័យអាទិភាពក្នុងការរក្សាសន្តិសុខស្បៀង ការរក្សាលំនឹងជីវភាពរស់នៅរបស់ពលរដ្ឋក្នុងពេលមានវិបត្តិ ការបង្កើតការងារ និងការចូលរួមក្នុងការជួយជំរុញកំណើនសេដ្ឋកិច្ចជាតិផងដែរ។
កាលពីថ្ងៃទី១៧ ខែតុលា ឆ្នាំ២០២២ ក្នុងពិធីប្រកាសចូលកាន់តំណែងជាផ្លូវការជារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានប្ដេជ្ញាប្រែក្លាយកសិកម្មនៅកម្ពុជាឱ្យទៅជាកសិកម្មកាន់តែទំនើប ឆ្លាតវៃ ប្រកបដោយនិរន្តរភាព ធន់នឹងបម្រែបម្រួលអាកាសធាតុ ហើយបម្រើឱ្យផលប្រយោជន៍ពិតប្រាកដរបស់ប្រជាជន និងលើកកម្ពស់ជីវភាពរបស់កសិករថែមទៀត។
មន្ត្រីជាន់ខ្ពស់បក្សប្រឆាំង លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី១៨ តុលា នេះថា វិស័យកសិកម្មរបស់កម្ពុជាមិនអាចរីកចម្រើនទៅមុខបានទេ បើកម្ពុជានៅតែបន្តពឹងលើការផ្គត់ផ្គង់ពីប្រទេសវៀតណាម ទាំងការផលិត និងការនាំចេញដូចសព្វថ្ងៃនេះ។ លោកថា ជាក់ស្តែង ឧបករណ៍គ្រប់ប្រភេទត្រូវនាំចូលពីប្រទេសវៀតណាមទាំងអស់ ដូចជាជីដាក់ដំណាំ ថ្នាំសម្លាប់សត្វល្អិតគ្រប់ប្រភេទ ម៉ាស៊ីនបូមទឹក និងឧបករណ៍ផ្សេងៗជាច្រើនទៀត។
លោក មាជ សុវណ្ណារ៉ា លើកឡើងថា រដ្ឋាភិបាលកម្ពុជាគ្មានផែនការអភិវឌ្ឍន៍លើវិស័យនេះច្បាស់លាស់ទេ បើទោះបីជារដ្ឋមន្ត្រីថ្មីនៃក្រសួងកសិកម្ម ប្ដេជ្ញាធ្វើឲ្យវិស័យនេះរីកចម្រើនក៏ដោយ ព្រោះថារដ្ឋាភិបាលកម្ពុជាគ្មានគម្រោងបង្កើតហេដ្ឋារចនាសម្ព័ន្ធគាំទ្រដល់វិស័យនេះទេ ដូចជារោងចក្រផលិតជី រោងចក្រផលិតថ្នាំគ្រប់ប្រភេទ និងរោងចក្រដំឡើង និងផលិតឧបករណ៍កសិកម្មជាច្រើនទៀត។
លោកត្អូញត្អែរថា ទីផ្សារកសិកម្មរបស់កម្ពុជាបច្ចុប្បន្ននេះត្រូវប្រទេសវៀតណាមគ្រប់គ្រងទាំងស្រុង ក្នុងនោះ ផលិតផលកសិកម្មដែលកសិករផលិតបាន ដូចជាដំណាំស្រូវ ដំឡូងមី ស្វាយចន្ទី និងជ័រកៅស៊ូ ជាដើម ត្រូវពឹងផ្អែកលើទីផ្សារវៀតណាមគ្រប់ពេលទាំងអស់ ជាពិសេសតម្លៃនៃកសិផលខ្មែរទាំងនោះ ត្រូវឈ្មួញវៀតណាមកំណត់ស្រេចតែនឹងចិត្តរហូតមក។
ក្រុមអ្នកឃ្លាំមើលសង្គមលើកឡើងថា វិស័យកសិកម្មរបស់កម្ពុជានៅពេលនេះ គឺត្រូវការការផ្ទេរបច្ចេកវិទ្យា និងចំណេះខ្លាំងណាស់ពីប្រទេសជិតខាងដែលមានបច្ចេកវិទ្យាខ្ពស់លើវិស័យនេះ ដើម្បីពង្រីកវិស័យកសិកម្មរបស់ខ្លួនឱ្យកាន់តែទូលំទូលាយតាមរយៈនៃការកែច្នៃដោយខ្លួនឯង ដូចជាការកែច្នៃពូជស្រូវ ពូជដំឡូងមី ពូជស្វាយចន្ទី និងជីសម្រាប់ប្រើលើដំណាំ ជាដើម ដើម្បីចៀសវាងការចំណាយលុយរបស់កសិករខ្មែរទិញពីប្រទេសវៀតណាម ដែលកសិករខ្មែរកំពុងអនុវត្តសព្វថ្ងៃនេះ។
កាលពីថ្ងៃទី២៤ ខែវិច្ឆិកា ឆ្នាំ២០២១ មេដឹកនាំបក្សកាន់អំណាច លោក ហ៊ុន សែន បានជំរុញឱ្យប្រទេសវៀតណាម រៀបចំកិច្ចព្រមព្រៀងជាមួយកម្ពុជាលើវិស័យកសិកម្មឱ្យកាន់តែច្រើនឡើងបន្ថែមទៀតរវាងប្រទេសទាំងពីរ ដើម្បីឱ្យវិស័យនេះកាន់តែរីកធំធាត់ជាងពេលបច្ចុប្បន្ននេះ៕