វេទិកាពលរដ្ឋអំពាវនាវឲ្យលោក ហ៊ុន សែន បោះបង់មនោគមវិជ្ជាពង្វក់ពលរដ្ឋខ្មែរឲ្យស្អប់ខ្ពើមចងអាឃាតគ្នា ដោយងាកមកបំពេញកាតព្វកិច្ចផ្សះផ្សាបង្រួបបង្រួមជាតិតាមស្មារតីរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១។
សេចក្តីថ្លែងការណ៍របស់វេទិកាពលរដ្ឋ ចេញផ្សាយកាលពីថ្ងៃទី២៣ ខែតុលា ឆ្នាំ២០២២ ឲ្យដឹងថា ក្នុងនាមជាអ្នកដឹកនាំប្រទេស លោក ហ៊ុន សែន មានតួនាទីសំខាន់ក្នុងការនាំមុខបំពេញកាតព្វកិច្ចផ្សះផ្សាបង្រួបបង្រួមជាតិ ដើម្បីបម្រើសេចក្ដីត្រូវការរបស់ប្រជាពលរដ្ឋតាមស្មារតីរដ្ឋធម្មនុញ្ញ និងកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១ ប៉ុន្តែលោក ហ៊ុន សែន មិនបានបំពេញកាតព្វកិច្ចផ្សះផ្សាបង្រួបបង្រួមជាតិ បែរជាបង្កើតមនោគមវិជ្ជានយោបាយ «ហ៊ុន សែន និយម» មានលក្ខណៈបំពុលសម្អប់ ដែលមានកត្តាកំណត់លើចិត្តសាស្ត្រញុះញង់បំបែកបំបាក់ និងពង្វក់ពលរដ្ឋខ្មែរឲ្យស្អប់ខ្ពើមចងអាឃាតគ្នាទៅវិញ។
សេចក្ដីថ្លែងការណ៍ដដែលថា កន្លងមក លោក ហ៊ុន សែន ពិតជាដឹងពេលដែលខ្មែរកំពុងវក់ និងពុលដោយការស្អប់គ្នា បានធ្វើឲ្យពួកអ្នកដែលពេញចិត្តបំផុតនឹងស្ថានភាពនេះ គឺបរទេសឈ្លានពាន។
វេទិកាពលរដ្ឋអំពាវនាវឲ្យលោក ហ៊ុន សែន បោះបង់មនោគមវិជ្ជាពង្វក់បំពុលសម្អប់នេះ ពីព្រោះនេះគឺជានយោបាយដែលងាយធ្វើឲ្យសង្គមខ្មែរបែកបាក់កាន់តែធំ និងផ្ដល់ផលដ៏ធំធេងដល់មហិច្ឆតាឈ្លានពានរបស់បរទេស បើលោក ហ៊ុន សែន មិនបម្រើមហិច្ឆតាឈ្លានពានរបស់បរទេសណាមួយទេនោះ។ បន្ថែមពីនេះ លោក ហ៊ុន សែន ត្រូវងាកទៅដើរតួនាទីផ្សះផ្សាជាតិក្នុងឈ្មោះជានាយករដ្ឋមន្ត្រីរបស់ប្រទេសជាតិ មិនត្រូវឡូកឡំនឹងគំនិតអំណាចបុគ្គលហួងហែងកាងបក្សសង្កត់ជាតិឡើយ។
វេទិកាពលរដ្ឋយល់ថា ទោះបីជាការសម្របសម្រួលរវាងលោក ហ៊ុន សែន និងលោក សម រង្ស៊ី ពេលនេះជារឿងស្មុគស្មាញពិបាកទៅរួចភ្លាមៗ ដោយសារតែជម្លោះនៃមេដឹកនាំនយោបាយទាំងពីរនេះបានធ្លាក់ចូលលក្ខណៈបុគ្គល ដោយធ្វើការវាយប្រហារចោទប្រកាន់គ្នាដល់ជម្រៅបន្ទុកពូជពង្សគ្រួសារជ្រុលពេក។ ប៉ុន្តែបើលោក ហ៊ុន សែន នៅរក្សាស្មារតីជាអ្នកដឹកនាំជាតិនោះ លោកនាយករដ្ឋមន្ត្រីគួរពិចារណាឡើងវិញ ដោយគួរបើកចិត្តរកការជជែកសម្រួលនយោបាយជាមួយលោក កឹម សុខា ដើម្បីបន្ធូរបន្ទុកវិបត្តិប្រទេសជាតិក្រៅពីលោក សម រង្ស៊ី។
ខណៈបច្ចុប្បន្ន លោក កឹម សុខា កំពុងធ្វើទុក្ករកម្មនយោបាយប្រកាន់ធម៌អហិង្សា និងការផ្សះផ្សាជាតិជានិច្ច ហើយច្រើនឆ្នាំចុងក្រោយនេះ លោក កឹម សុខា មិនធ្លាប់ប្រើសារប្រទូសនយោបាយបុគ្គលឡើយ។
ហេតុនេះ បើលោក ហ៊ុន សែន នៅតែមានលេសមិនរកដំណោះស្រាយនយោបាយផ្សះផ្សាជាតិ ដោយចាប់ផ្ដើមជាមួយលោក កឹម សុខា ទៀត នោះគឺច្បាស់ណាស់ថា លោក ហ៊ុន សែន គ្រាន់តែជានាយករដ្ឋមន្ត្រីដែលចេះត្រឹមតែការពារកិត្តិយសបុគ្គលខ្លួន គ្រួសារ ហ៊ុន និងបំពេញបំណងឈ្លានពានរបស់បរទេស។
បើតាមសេចក្ដីថ្លែងការណ៍វេទិកាពលរដ្ឋបញ្ជាក់ថា រយៈពេលចុងក្រោយនេះ គេមើលឃើញថា ជម្លោះរវាងលោក ហ៊ុន សែន និងលោក សម រង្ស៊ី ក្លាយជាសង្គ្រាមមនោគមវិជ្ជានយោបាយប្រទូសរ៉ាយដណ្ដើមឈ្នះបែបបុគ្គល ផ្ទុយពីបំណងប្រាថ្នារបស់ប្រជាពលរដ្ឋខ្មែរទូទៅដែលចង់ឃើញការសម្របសម្រួលផ្សះផ្សាគ្នា ដើម្បីដោះស្រាយវិបត្តិធំៗរបស់ជាតិ ជាពិសេសទុក្ខវេទនារបស់ប្រជាពលរដ្ឋម្ចាស់ប្រទេស។
ការលើកឡើង និងអំពាវនាវរបស់វេទិកាពលរដ្ឋនេះ ធ្វើឡើងបន្ទាប់ពីលោក ហ៊ុន សែន កាលពីថ្ងៃទី២០ ខែតុលា ឆ្នាំ២០២២ បានប្រកាសដាក់ចេញនូវផែនការយុទ្ធសាស្ត្រ ដើម្បីតាមកម្ទេចអ្នកដែលលោកហៅថាជាក្រុមប្រឆាំងនៅតាមមូលដ្ឋាន ហើយគាំទ្រអង្គការចាត់តាំងដឹកនាំដោយលោក សម រង្ស៊ី៕