មហាសន្និបាតបក្សកុម្មុយនីស្តចិនលើកទី២០ ដែលបានបិទបញ្ចប់កាលពីថ្ងៃទី២២ តុលា បានបន្សល់ទុកនូវរូបភាពអាក្រក់មួយក្នុងទំព័រប្រវត្តិសាស្ត្រនៃប្រទេសមហាអំណាចកុម្មុយនីស្តនៅអាស៊ី គឺការបែកបាក់ក្នុងចំណោមមេដឹកនាំកំពូលៗរបស់គណបក្ស។
អ្នកសង្កេតការណ៍ជាច្រើនបានមើលឃើញរូបភាពនៃការបែកបាក់មេដឹកនាំកំពូលៗក្នុងបក្សកុម្មុយនីស្តចិន នៅថ្ងៃដែលមហាសន្និបាតបក្សឈានទៅដល់ការបោះឆ្នោតតែងតាំងមេដឹកនាំមួយចំនួនឱ្យឡើងដល់កម្រិតកំពូលបំផុតក្នុងបក្ស តែបែរជាមេដឹកនាំកំពូលៗបក្សស្រាប់ទៅហើយ គឺយ៉ាងតិចចំនួន ៣រូបត្រូវបានទម្លាក់ឋានៈ និងមុខនាទី ដែលក្នុងនោះមាននាយករដ្ឋមន្ត្រី លី ឃឺជាំង ដែលបុរសនេះត្រូវមជ្ឈដ្ឋានជាច្រើនគិតថាអាចនឹងស្នងតំណែងជាប្រធានាធិបតី និងជាអគ្គលេខាធិការបក្សកុម្មុយនីស្តពីលោក ស៊ី ជីនពីង។
រឿងដែលគួរឱ្យភ្ញាក់ផ្អើលមួយទៀតនោះ គឺការទម្លាយរូបភាពវីដេអូមួយបានឃើញក្រុមមន្ត្រីមហាសន្និបាតក្រៀកស្មាអតីតប្រធានាធិបតី លោក ហ៊ូ ជិនតាវ ដែលជាប្រធានាធិបតីមុនអាណត្តិលោក ស៊ី ជីនពីង ឱ្យចេញពីសាលមហាសន្និបាត។
រូបភាពដែលមើលឃើញបុរសសក់សម្នាក់អង្គុយជាប់លោក ស៊ី ជីនពីង នៅជួរមុខក្នុងមហាសន្និបាតត្រូវបានមនុស្សពីរនាក់ដើរទៅកៀកខ្លួនគាត់ ហើយលើកគាត់ឱ្យងើបចេញពីកៅអី ទោះបីជាលោក ហ៊ូ ជិនតាវ ព្យាយាមមិនងើបឈរក៏ដោយ តែរូបភាពវីដេអូនេះបង្ហាញថា ផ្ទៃក្នុងបក្សកុម្មុយនីស្តចិន ជាពិសេសគឺមេដឹកនាំកំពូលៗក្នុងបក្សស្ថិតក្នុងការបែកបាក់។
រូបភាពនៃការចាប់ក្រៀកលោក ហ៊ូ ជិនតាវ អតីតប្រធានាធិបតីដើរចេញពីមហាប្រជុំសមាជបក្សនេះ មើលទៅដូចជាមានភាពស្រឡាំងកាំងចំពោះលោកនាយករដ្ឋមន្ត្រី លី ឃឺជាំង ដែលត្រូវបានមហាសន្និបាតបក្សទម្លាក់ឋានៈនៅពេលជាមួយគ្នានេះ។
ចំណែកឯលោក ស៊ី ជីនពីង ដែលអង្គុយជាប់លោក ហ៊ូ ជិនតាវ និងនាយករដ្ឋមន្ត្រី លី ឃឺជាំង មានទឹកមុខមិនភ្ញាក់ផ្អើលនោះទេ គឺមើលទៅបុរសដែលត្រូវការអំណាចប្រធានាធិបតី និងជាអគ្គលេខាធិការបក្សកុម្មុយនីស្តមួយអាណត្តិទៀតនេះ ដឹងយ៉ាងពិតប្រាកដអំពីស្ថានភាពដែលសម្រេចឱ្យមន្ត្រីមហាសន្និបាតមកក្រៀកលោក ហ៊ូ ជិនតាវ ចេញពីសាលប្រជុំ។
លោក ហ៊ូ ជិនតាវ យល់ព្រមឱ្យគេក្រៀកស្មាគាត់ដើរចេញ ប៉ុន្តែអតីតប្រធានាធិបតីរូបនេះបាននិយាយពីរបីម៉ាត់ទៅកាន់លោក ស៊ី ជីនពីង ហើយលោក ស៊ី ជីនពីង គ្រាន់តែងក់ក្បាលបន្តិច។
មុននឹងគាត់សម្រេចឱ្យមន្ត្រីមហាសន្និបាតក្រៀកស្មាដើរចេញពីសាលប្រជុំ គឺលោក ហ៊ូ ជិនតាវ ក៏បានទះស្មាលោក លី ឃឺជាំង នៅពេលនោះ។ លោក លី ឃឺជាំង នាយករដ្ឋមន្ត្រីដែលគេទម្លាក់មុខនាទីក្នុងបក្សនេះ មិនបាននិយាយមួយម៉ាត់ទៅកាន់លោក ហ៊ូ ជិនតាវ នោះទេ តែបុរសនេះនៅពេលដែលមន្ត្រីបក្សក្រៀកស្មាឱ្យលោក ហ៊ូ ជិនតាវ ងើបពីកៅអី គឺលោក លី ឃឺជាំង បានដៀងភ្នែកមើលលោក ហ៊ូ ជិនតាវ ដែលមើលទៅអារម្មណ៍របស់គាត់គិតថាជារឿងចម្លែកផ្ទុះនៅក្នុងសាលមហាសន្និបាត ដែលកំពុងដំណើរប្រជុំ ហើយបុរសនេះក៏ទំនងដឹងខ្លួនឯងថា បក្សលែងមានទំនុកចិត្តលើខ្លួនគាត់ទៀតក៏ថាបាន ព្រោះការដែលមន្ត្រីបក្សក្រៀកលោក ហ៊ូ ជិនតាវ ចេញពីសាលប្រជុំនេះ អ្នកដែលក្ដុកក្ដួលអារម្មណ៍ជាងគេ គឺនាយករដ្ឋមន្ត្រី លី ឃឺជាំង។
នៅក្នុងប្រព័ន្ធអំណាចដឹកនាំបែបផ្ដាច់ការ និងកុម្មុយនីស្ត អ្នកនយោបាយណាដែលស្មោះត្រង់បំផុតនឹងមេដឹកនាំផ្ដាច់ការ គឺអ្នកនោះនឹងអាចកាន់តំណែងកំពូលក្នុងប្រទេសបាន។
ចំពោះអ្នកនយោបាយណាដែលមេដឹកនាំផ្ដាច់ការមិនសូវទុកចិត្ត គឺគ្មានឱកាសកាន់តំណែងជានាយករដ្ឋមន្ត្រីបាននោះទេ។ ក្នុងរូបភាពនេះ លោក ស៊ី ជីនពីង ត្រូវបានមហាសន្និបាតបក្សពង្រីកអាណត្តិ ៥ឆ្នាំទៅមុខទៀតជាមួយនឹងការផ្ទុះរូបភាពអាក្រក់មួយឡើងក្នុងមហាសន្និបាតបក្ស ដែលទីបំផុតគេអាចវាយតម្លៃថា លោក ស៊ី ជីនពីង ទំនងត្រូវបានជំទាស់ដោយលោក ហ៊ូ ជិនតាវ អតីតប្រធានាធិបតីដែលប្រឆាំងមិនឱ្យមានទម្លាប់នៃការពង្រីកអំណាចខុសនឹងវិន័យ និងលក្ខន្តិកៈបក្ស។ ដូចនេះហើយដែលគេសន្និដ្ឋានថា លោក ហ៊ូ ជិនតាវ ប្រាកដណាស់ជំទាស់មិនឱ្យមានមេដឹកនាំណាម្នាក់កែប្រែប្រវត្តិសាស្ត្រដែលគេថា ប្រធានាធិបតីទោះស្ថានការណ៍ណាក៏ដោយ កាលៈទេសៈណាក៏ដោយ គឺមានអាណត្តិត្រឹមតែ ១០ឆ្នាំប៉ុណ្ណោះ។
ដូចនេះ អាចជាការទប់ស្កាត់មិនឱ្យមានការបោះឆ្នោតជំទាស់ ទើបបក្ស ឬក៏លោក ស៊ី ជីនពីង បញ្ជាទៅមន្ត្រីមហាសន្និបាតឲ្យមកក្រៀកលោក ហ៊ូ ជិនតាវ ចេញពីសាលប្រជុំដើម្បីជាការព្រមានដល់មន្ត្រីកំពូលៗនៃបក្សរូបណាដែលមានបំណងបោះឆ្នោតជំទាស់ការបន្តអាណត្តិរបស់លោក ស៊ី ជាប្រធានាធិបតី និងជាអគ្គលេខាបក្សកុម្មុយនីស្តចិនរយៈពេល ៥ឆ្នាំទៅមុខទៀត៕